1. Saide a Yehofa wawan u mu dini?

A FITI fu dini Yehofa wawan, bika neen meke u (Openb. 4:11). Ma u mu de na ain, bika winsi u lobi Yehofa, winsi wi e lesipeki en, tokuso taa sani sa pelensipali gi u te da u nai dini en wawan moo. Wi o luku fa a sani ya sa pasa. Meke u luku fosi san a wani taki fu dini Yehofa wawan.

2. Enke fa Ekisodesi 34:14 e soi, da san a wani taki fu dini Yehofa wawan?

² Enke fa Beibel e soi, da te wan sama e dini Yehofa da a sani ya wani taki a lobi Yehofa anga en hii ati. Efu wi e dini en wawan, da nawan sani efuso sama o pelensipali gi u moo Yehofa.​—Leisi Ekisodesi 34:14.

3. Saide u lobi Yehofa?

³ A ná fu soso u lobi Yehofa. Saide u lobi en? U lobi Yehofa fu di u leli sabi en. U lobi den manii fi en. U lobi den sani di a lobi, wi e buuse den sani di ai buuse. U lobi den sani di a wani du gi libisama, neen meke wi e holibaka gi en. Ai bigi gi u taki a gi wi a gaandi fu toon en mati (Ps. 25:14). Moo wi e leli sabi a Gadu di meke u, moo wi e lobi en.​—Yak. 4:8.

4. (a) San Didibii e du fu koli u fu wi á dini Yehofa wawan? (b) San wi o luku aini a artikel ya?

⁴ A Didibii e tii a goontapu ya. A goontapu fi en e gi u taanga-sikin fu lobi den sani fu a goontapu. Ai gi u  deki-ati fu du san a sondu sikin wani (Efe. 2:1-3; 1 Yoh. 5:19). Saatan á wani u dini Yehofa wawan, neen meke ai meke moiti fu koli u fu lobi taa sani tu. Wi o luku tu fasi fa ai du a sani ya. A fosiwan, a wani koli u fu feti a gudu baka. Du fu tu, a wani u piisii a wan fasi di á fiti.

5. Saide u mu luku bun fu wi á lobi moni?

⁵ Ala u wani abi nyanyan sai, u wani abi koosi fu wei anga wan bun peesi fu tan. Ma u mu luku bun fu wi á kon lobi moni. Gaanse fu den sama fu a goontapu fu Saatan „lobi moni”. Den lobi den sani di den sa bai anga moni (2 Tim. 3:2). Yesesi be sabi taki a sani ya be sa miti den bakaman fi en tu. A be taki: „Nawan sama poi dini tu masaa. Bika a o buuse wan fu den, da a lobi a taawan, efuso a o holibaka gi wan fu den, da a wisiwasi a taawan. Yu á poi dini Gadu anga Gudu na aseefi yuu” (Mat. 6:24). Efu wan sama di e dini Yehofa e koboloiki omen ten anga kaakiti fu meke moni, da a leti enke ai feti fu dini tu masaa. A á be o dini Yehofa anga en hii ati moo.

6. San wi e leli fu den sani di Yesesi be taigi a kemeente a Laodiseya?

⁶ Den Kelesten aini a kemeente a Laodiseya be e gafa taki: „Mi gudu. Mi abi omen gudu kaba. Mi ná abi sani fanowdu.” Ma Yehofa anga Yesesi be e si den enke ’mofinasama, pootiman, sama di beendi anga sama di de soso sikin’. Yesesi á be kaasi den fu di den be gudu. Ma a be kaasi den fu di a lobi di den be lobi moni be e meke den anga Yehofa poli (Openb. 3:14-17). Efu u si enke wi e bigin lobi moni aini wi ati, wi á mu  daaidaai fu kengi a fasi fa wi e denki (1 Tim. 6:7, 8). Efu wi á du a sani ya, u ná o lobi Yehofa anga u hii ati moo. A dini di wi o dini Yehofa o de fu soso, bika Yehofa „wani sama dini en wawan” (Deit. 4:24). Fa moni sa toon a moo pelensipali sani aini u libi?

7-9. San i leli fu a ondoofenitoli fu a owluman di den e kai David?

⁷ Luku a toli fu David, wan owluman di e tan na Ameekankondee. A taki en a wan sama di be e wooko taanga gi en bodeleifi. Bakaten a be fende wan moo hei posisi aini a bodeleifi, den be e pai en moo moni tu. Sama be e si en enke wan fu den sama di be sabi du a wooko ya bun aini a kondee. David taki: „Mi be e si den sani ya enke wan fasi fa Yehofa be e belesi mi.” Ma a Yehofa be e belesi en?

⁸ Bakaten David bigin si wantu sani di e soi taki a wooko be e meke en anga Yehofa poli. A taki: „Te mi be de a komakandaa efuso aini a peleikiwooko, mi be e pakisei den polobelema di mi be abi a wooko. Mi be e meke tyaipi moni, ma mi be e booko mi ede anga omen sani. Mi toowlibi be e go a baka tu.”

⁹ David kon fusutan taki a be mu daai wan ana. A taki: „Mi á daaidaai fu du sani taa fasi.” David be wani kengi den yuu di a be e wooko. A soi a basi fi en san a be wani du. San pasa baka dati? A basi puu en a wooko. San David du di a lasi en wooko? A taki: „A tamaa fi en neen mi poti mi nen fu du a yeepi pioniliwooko.” David anga en uman be e kiin osu gi sama fu solugu denseefi. Bakaten a bigin anga a kowownu pioniliwooko.  A á langa baka dati neen en uman bigin pionili tu. Winsi fa omen sama nai wani du den sowtu wooko ya, tokuso a toowpaa ya á be e si a wooko di den be e du enke a moo pelensipali sani. Winsi fa den á be e fende moni so moo enke fosi, tokuso den be e fende san den be abi fanowdu fu puu den fuka fu den. Den be wani poti Yehofa a fesi aini den libi. Den si taki Yehofa e solugu den sama di e poti a Kownukondee fi en a fesi.​—Mat. 6:31-33.

10. Fa u sa kibii wi ati?

¹⁰ Winsi u gudu efuso pooti, u mu kibii wi ati. Fa i sa du a sani ya? Yu á mu lobi moni. Yu á mu meke wooko pelensipali gi i moo a dini di yu e dini Yehofa. Fa i sa sabi efu a sani ya e miti i? I sa akisi iseefi den sani ya: ’Mi e pakisei a wooko di mi e du ala yuu winsi mi de a komakandaa efuso peleikiwooko? Mi e booko mi ede ala yuu efu mi o abi moni a ten di e kon? Mi anga mi toowpaa e takitaki fu moni anga taa sani di u sa bai anga moni? Mi de kabakaba fu du wan wooko di taawan e si enke wan lagi wooko efu a wooko ya o yeepi mi fu du moo gi Yehofa?’ (1 Tim. 6:9-12). Te wi e akisi useefi den sani ya, u mu holi a pakisei taki Yehofa paamisi den sama di e dini en anga den hii ati taki: „Mi ná o gwe fika i. Noiti mi o fika i wawan.” Neen meke apostel Pawlesi be sikiifi taki: „A fasi fa wi e libi mu soi taki wi á lobi moni.”​—Heb. 13:5, 6.

11. San sa pasa anga wan sama te ai piisii a wan fasi di á fiti?

¹¹ Yehofa wani u piisii. Wan fasi fa u sa du a sani ya, a te wi e luku felon, leisi buku efuso aliki poku. A Wowtu fu Gadu taki „a moo bun sani di wan libisama sa du, na nyan, diingi, da a piisii anga a taanga wooko di a du” (Peleik. 2:24). Ma gaanse fu den felon, buku anga den poku di sama e meke aini a ten ya sa poli den bun manii fu u. Den sa meke i bigin si sani di Yehofa e buuse enke kowownu sani. Den sa meke i kon lobi sani tu di a Wowtu fu Gadu e kuutu.

12. Enke fa 1 Korentesama 10:21, 22 e soi, da saide u mu luku bun san wi e du fu piisii?

¹² U wani dini Yehofa wawan, neen meke wi á poi e nyan na „a tafaa fu  Yehofa” anga „a tafaa fu den ogii yeye”. (Leisi 1 Korentesama 10:21, 22.) Gaanse leisi anga wan sama di yu e si enke i mati yu e sidon nyan. Neen meke wi á mu luku felon, leisi buku efuso aliki poku di abi fu du anga ogii yeye efuso di e soi fa sama e libi wan hululibi. Wi á mu luku sani tu di e soi fa sama e du ogii anga taawan efuso e du taa sani di a sondu sikin lobi. Efu u be o luku felon, leisi buku efuso aliki poku di abi fu du anga den sani ya, da a leti enke wi e nyan na a tafaa fu den feyanti fu Gadu. A sani ya be o tyai ogii gi u. Boiti dati, a be o meke Yehofa á si wi enke en mati moo.

13-14. Enke fa Yakowbesi 1:14, 15 e soi, da saide u mu luku bun anga den sani di wi e du fu piisii? Gi wan ageisitoli.

¹³ Saide u sa taki felon, buku anga poku de enke tuutuu nyanyan? We, te wi e nyan, a useefi e luku san wi e poti a u mofu. Ma te u gwili a nyanyan kaba, wi á poi tapu u sikin fu a á teke a kaakiti fu a sani di u nyan. Efu wi e nyan gusontu nyanyan, wi o gusontu. Ma efu wi e nyan sani di á bun, wi o siki. Kande u ná o siki wantenwanten, ma bakaten wi o fii den bakapisi fu den sani di u be e nyan.

¹⁴ A letiso a de anga den sani di wi e du fu piisii. A useefi mu luku sowtu felon wi o luku, sowtu buku wi o leisi efuso sowtu poku wi o aliki. Ma baka te u luku den sani ya, wi á poi tapu a kaakiti di den o abi a u tapu. Efu wi e piisii a wan fasi di fiti, wi o fii bun. Ma efu wi e luku, leisi efuso aliki sani di á bun, a sani ya o tyai ogii gi u. (Leisi Yakowbesi 1:14, 15.) Kande u ná o si a bakapisi fu den sani ya wantenwanten, ma wi o si den namo. Neen meke Beibel e wasikoi u taki: „Ná koli iseefi: Gadu nai meke sama holi en a sipowtu. Bika a san wan sama paandi, a o koti. A sama di e paandi anga sondu a pakisei, o koti dede bika ai du san a sondu sikin wani” (Gal. 6:7, 8). Neen meke wi á mu luku, leisi efuso aliki sani di Yehofa e buuse.​—Ps. 97:10.

15. Sowtu moin kado Yehofa gi u?

¹⁵ A omen baala anga sisa lobi luku JW Broadcasting^®, a tv sitasiyon fu u di de a internet. A soso bun sani de na a sitasiyon ya. Wan sisa den e kai Marilyn taki: „JW Broadcasting e yeepi mi fu piisii. A soso bun sani de ape. Te mi e fuka efuso te mi e fii booko-saka, da mi e aliki wan fu den lezing di e kon ala mun efuso wan lezing di e taki fu a dei wowtu. A sani ya e yeepi mi fu kon moo koosube a Yehofa anga en olikanisâsi. JW Broadcasting kengi mi libi tuutuu.” Yu e koboloiki a kado ya di Yehofa gi i? Boiti a lezing di e kon ala mun, a omen moin poku di e gi u taanga-sikin i sa fende a JW Broadcasting.

16-17. Saide u mu luku omen ten wi e koboloiki fu piisii? Fa u sa du a sani ya?

¹⁶ Wi á mu luku sowtu sani wi e luku, aliki efuso leisi namo, ma u mu luku tu omen ten wi e teke fu du den sani ya. Efu u nai luku bun anga a sani ya, wi o koboloiki gaanse fu u ten fu meke piisii, pe fu u wooko gi Yehofa. Ai taanga gi omen sama fu den á koboloiki gaanse fu a ten fu den fu meke piisii. Wan sisa den e kai Abigail di abi 18 yali taki: „Baka wan langa dei te mi doo osu, tv e yeepi mi fu boo mi ede pikinso. Ma efu mi á luku  bun, a omen yuu langa mi e sidon na a tv fesi.” Wan yonkuu baala fu 21 yali den e kai Samuel taki: „Son leisi mi e luku omen satu felon a internet. A wan sani mi e si di hali mi pakisei da mi e luku a wan de, ma fosi mi denki a omen yuu e pasa sondee fu mi sabi.”

¹⁷ San o yeepi i fi yu á koboloiki gaanse fi i ten fu meke piisii? A fosi sani di i mu du a fu luku omen yuu yu e teke fu du den sani ya. Kande i sa maiki luku omen ten yu e de a internet aini wan wiki. Sikiifi omen yuu yu e luku tv efuso omen yuu yu e pee game aini wan wiki. Efi i si enke a ten di yu e koboloiki fu du den sani ya ipi tumisi, kande i sa meke wan sikeima. Poti den moo pelensipali sani a fesi, da i luku omen ten i sa teke fu piisii. Baka dati, akisi Yehofa fu a yeepi i fu wooko anga a sikeima di i meke. A sani ya o yeepi i fu fende ten anga kaakiti fu sutudeli Beibel, fu holi a Osufamii Anbegi, fu go a komakandaa anga a peleikiwooko. Efi i poti den sani ya a fesi, yu o moo piisii te i fende a okasi fu luku wan felon, efuso du taa sani fu piisii.

18-19. Fa u sa soi taki a Yehofa wawan wi e dini?

¹⁸ Apostel Peitilisi sikiifi taki a goontapu fu Saatan o poli. A sikiifi tu taki wan nyun goontapu o kon. Baka dati a taki: „Lobiwan, now di wi e wakiti den sani ya, meke u meke ala moiti fu Gadu si wi enke sama di kiin, di ná abi fowtu, di e libi bun anga taawan” (2 Peit. 3:14). Efu wi aliki san Peitilisi taki neen wi e du ala san u man fu libi wan kiin libi, anga fu dini Yehofa enke fa a wani, wi e soi taki a Yehofa wawan wi e dini.

¹⁹ Saatan anga a goontapu fi en o tan meke moiti fu koli u fu poti taa sani na a fosi peesi aini u libi (Luk. 4:13). Ma winsi san e miti u, wi á mu meke nawan sani efuso sama teke a peesi fu Yehofa. U mu dini Yehofa anga u hii ati, bika a fiti fu u dini en wawan.