DEN sama di e ondoosuku luku efu alen o kai, si taki wan gaan daai winta o pasa a wan peesi pe tyaipi sama e tan. Den e booko den ede anga den sama ya, neen meke den e du ala san den man fu wasikoi den fosi a lati.

A letiso Yehofa e wasikoi libisama taki wan „gaan winta” e kon di ogii moo ala den wan di wi e yee a nyunsu. Fa ai du a sani ya? Saide u sa taki ai gi sama ten sai fu kengi? Fosi u piki den akisi ya, meke u luku fa Yehofa be e wasikoi sama a fositen.

Aini Beibel ten, a omen leisi Yehofa wasikoi sama di be e taangayesi en fu seefi taki a o tyai wan „gaan winta” kon a den. A sani ya wani taki a o sitaafu den fu di den nai holi den weiti fi en (Odo 10:25; Yel. 30:23). Ala yuu a be e wasikoi den sama ya a fesi. A be e taigi den tu san den be mu du fu soi taki den e aliki en (2 Kow. 17:12-15; Neh. 9:29, 30). A be e meke son sama di be e dini en anga den hii ati taigi den sama san be o miti den efu den á be daai den libi. A be e meke den soi den sama tu taki efu den be wani tan a libi den á mu daaidaai fu kengi.​—Am. 3:7.

Nowa a be wan fu den sama di be e wasikoi sama taki Gadu be o sitaafu den. Den sama fu a ten fi en be e du ogii anga taawan. Den be e libi wan hululibi tu. Nowa á be e feele fu wasikoi den taki wan gaan Fuudu be o sungu a hii goontapu (Gen. 6:9-13, 17). A taigi den tu san den be mu du fu tan a libi. Beibel taki Nowa be e „peleiki taki sama mu libi a wan letifasi”.​—2 Peit. 2:5.

Winsi fa Nowa du ala san a be man fu wasikoi den sama, tokuso nawan fu den aliki a bosikopu fu Gadu. Den soi taki den á be e biibi seefiseefi. Neen meke di a Fuudu kon, a „kii ala den” (Mat. 24:39; Heb. 11:7). Di den be de fu dede, den á be poi taki Gadu á be wasikoi den.

Son leisi Yehofa á be e wasikoi sama omen ten a fesi fosi a be sitaafu den. Ma toku a be e solugu taki den sama di a be wasikoi be abi ten sai fu du wan sani fu ogii á miti den. Di a be meke den tin ogii miti den Egeptesama, a be e wasikoi den fosi. Di Yehofa be o meke gaan koko eisi kai fu kii den futuboi fu den Egeptesama anga den meti fu den, a sende Mosesi anga Aron go wasikoi Farao anga den futuboi fi en. Na a taa mamanten a sani ya be o pasa. I si enke Gadu be gi den ten sai fu du wan sani fu ogii á miti den? Beibel taki: „Den futuboi fu Farao di be e biibi san Yehofa taki, meke den futuboi anga den meti fu den go kibii aini osu. Ma den sama di á be e biibi san Yehofa taki, be fika den futuboi anga den meti fu den aini den goon” (Ek. 9:18-21). A sani ya e soi kiin taki Yehofa be wasikoi den a fesi. Sani á be pasa anga den meti anga den futuboi fu den sama di be du wan sani wantenwanten.

Gadu be wasikoi Farao anga den futuboi fi en tu gi du fu tin ogii di be o miti den. Ma den á be aliki (Ek. 4:22, 23). A bakapisi á be bun. Den si fa den fosi manpikin dede. Moo so tyali sani á de (Ek. 11:4-10; 12:29). Den be fende ten sai fu du wan sani fu a  ogii ya á be miti den? Eeye. Mosesi be wasikoi den Islayelisama tu. A taigi den finifini san den be mu du fu du fu tin ogii á be miti a osufamii fu den (Ek. 12:21-28). Omen sama aliki Mosesi? A wan sani fu dii miliyun Islayelisama, Egeptesama anga „omen taa kondee sama” aliki Mosesi neen den komoto a Egepte.​—Ek. 12:38.

Den toli ya e soi kiin taki ala yuu Yehofa be e gi sama ten sai fu kengi (Deit. 32:4). Saide Gadu be e du a sani ya? Apostel Peitilisi sikiifi taki Yehofa „á wani nawan sama dede. A wani ala sama fende a okasi fu tapu anga den sondu fu den” (2 Peit. 3:9). Gadu e booko en ede anga sama. A wani den kengi fosi ogii miti den.​—Yes. 48:17, 18; Rom. 2:4.

Aini a ten ya ala sama mu aliki a bosikopu di e paati na a hii goontapu. Di Yesesi be de a goontapu, a be wasikoi taki a goontapu o poli di a „gaan banowtu” o doo (Mat. 24:21). Yesesi be taigi den bakaman fi en finifini san be o pasa te a gaan banowtu be o koosube. A be taigi den tu san be o miti den. Nownow wi e si fa wantu pelensipali polofeititoli di Yesesi be taki e kon tuu aini a ten ya.​—Mat. 24:3-12; Luk. 21:10-13.

Fosi a gaan banowtu doo Yehofa e gi sama taanga-sikin fu saka denseefi neen ondoo. A wani den sama di e aliki en abi wan bun libi nownow. A wani den libi fu teego tu aini a nyun goontapu pe sani o waka a wan letifasi (2 Peit. 3:13). Yehofa wani yeepi sama fu biibi den sani di a paamisi, neen meke ai meke a foluku fi en paati wan bosikopu di sa yeepi den fu tan a libi. Enke fa Yesesi be taki a fesi, da a „bun nyunsu fu a Kownukondee fu Gadu mu paati na a hii goontapu fu ala sama yee” (Mat. 24:14). Gadu e yeepi a foluku fi en fu paati a bun „nyunsu” efuso a bosikopu fu Gadu aini moo enke 240 kondee. Yehofa wani sama aliki a bosikopu ya fu den sa tan a libi te a o kuutu a goontapu ya a wan letifasi.​—Sef. 1:14, 15; 2:2, 3.

A á de fu wi akisi useefi efu Gadu o gi den sama ten sai fu den daai den libi. U si kiin taki na ala yuu Yehofa e gi sama ten sai fu kengi fu den sa tan a libi. Ma a bun fu akisi useefi efu sama o aliki a bosikopu fu Gadu nownow fosi a lati. A wi a den bosikopuman fu Gadu. Neen meke u mu du ala san u man fu yeepi sama fu den sa tan a libi te a o poli a goontapu ya.