1. San Yehofa poi du fu meke san a abi a pakisei kon tuu?

YEHOFA sa toon iniiwan sani di a wani toon fu meke san a abi a pakisei kon tuu. Yehofa sa toon wan Leliman, wan Dda di e toosutu u efuso wan Peleikiman. Tyaipi sani de ete di Yehofa poi toon (Yes. 48:17; 2 Kor. 7:6; Gal. 3:8). Winsi fa Yehofa poi du ala den sani ya, tokuso ai gi libisama a gaandi fu du son sani gi en (Mat. 24:14; 28:19, 20; 2 Kor. 1:3, 4). Yehofa sa gi iniiwan sama di a wani a kaakiti fu meke den sani di a abi a pakisei kon tuu. Enke fa son sabiman e taki, da a nen fu Yehofa e soi taki a poi du ala den sani ya.

2. (a) Saide son sama e si enke den ná o poi du moo gi Yehofa? (b) San wi o luku aini a artikel ya?

² Ala u wani Yehofa koboloiki u fu du san a abi a pakisei. Ma kande son sama e si enke Yehofa ná o wani den wooko gi en. Saide? Kande den e si enke den á poi du moo gi Yehofa fu di den gaandi efuso yonkuu tumisi. Taawan e si enke den á poi du son sani. Son wan e si enke den e du ala san den man gi Yehofa kaba, neen meke den nai meke moiti fu du moo. Aini a artikel ya wi o luku fa Yehofa sa yeepi iniiwan fu u, fu du san a abi a pakisei. Wi o luku wantu toli tu fu sama fu fositen di Yehofa be gi a kaakiti fu meke san a abi a pakisei kon tuu. Baka dati wi  o luku san u mu du efu u wani Yehofa meke u wooko gi en.

3. Enke fa Filipisama 2:13 e soi, da fa Yehofa sa meke wi angii fu du moo gi en?

³ Leisi Filipisama 2:13. * Yehofa sa meke wi angii fu du moo gi en. Fa a sa du a sani ya? Kande i si taki wan sama aini a kemeente abi yeepi fanowdu, efuso kande wan taa wooko mu du aini a kemeente. Kande den owluman leisi wan biifi di e soi taki den baala e suku sama fu du wan wooko a wan taa peesi. Te den sani ya pasa, kande yu e akisi iseefi fa i sa yeepi. Kande den kai i fu go du wan wooko, ma yu e akisi iseefi efi yu o poi du en bun. Efuso kande yu e leisi wan pisi aini Beibel da yu akisi iseefi fa i sa yeepi taawan anga a pisi di i leisi. Yehofa ná o dwengi u fu du wan sani. Ma te a si taki u wani du moo, da a sa gi wi a kaakiti fu wooko gi en.

4. Fa Yehofa sa gi wi a kaakiti fu du san a abi a pakisei?

⁴ Yehofa sa gi wi a kaakiti di wi abi fanowdu tu fu du san a abi a pakisei (Yes. 40:29). Fa ai du a sani ya? A sa gi wi en santa yeye fu man du son sani moo bun (Ek. 35:30-35). Yehofa sa meke a olikanisâsi fi en leli u fa u sa du son sani. Efi yu e si enke yu á poi du wan sani, yu á mu feele fu suku yeepi. Begi i Dda Yehofa fu a gi yu a „kaakiti di bigi pasa maiki” (2 Kor. 4:7; Luk. 11:13). A omen toli de aini Beibel di e soi fa Yehofa gi man anga uman a kaakiti anga a fii fu du san a abi a pakisei. Te wi e luku den toli ya, pakisei fa Yehofa sa yeepi u fu wooko gi en tu.

5. San wi e leli fu a fasi fa Yehofa meke Mosesi fii a foluku fi en?

⁵ Yehofa meke Mosesi puu den Islayelisama a katibo. Ma on ten a meke Mosesi du a sani ya? A ná di Mosesi be si enke a doo peesi fu fii den Islayelisama fu di a be sabi „ala den koni fu den Egeptesama” (Toli 7:22-25). Fosi Yehofa meke Mosesi du a sani ya, a yeepi en fu abi sakafasi. A yeepi en tu fi en ati nai boon gaw (Toli 7:30, 34-36). Yehofa yeepi en fu abi deki-ati tu fu go taki anga a moo makiti man fu Egepte (Ek. 9:13-19). San wi e leli fu a fasi fa Yehofa meke Mosesi wooko gi en? A sani ya e leli u taki a den sama di e meke moiti fu abi den manii fu Yehofa anga den sama di e fitoow en ai meke wooko gi en.​—Filip. 4:13.

6. San wi e leli fu a fasi fa Yehofa meke Barsilai yeepi Kownu David?

⁶ Bakaten Yehofa meke Barsilai yeepi Kownu David. Di David be e lowe gi en manpikin Absalom, „angii” be e kii en anga den sama di be de anga en. Den be „weli”, „wataa” be e kii den tu. Winsi fa Barsilai be gaandi, en anga wantu taa sama yeepi David anga san den be abi fanowdu, winsi fa a sani ya be sa tyai dede gi en. Barsilai á be e si enke a be gaandi tumisi fu Yehofa koboloiki en fu wooko gi en. Ma a gi san a be abi fu holibaka gi den mati fu Yehofa di be de a nowtu (2 Sam. 17:27-29). San a sani ya e leli u? Winsi omen yali wi abi, Yehofa sa koboloiki u fu yeepi taa baala anga sisa anga nyanyan sani efuso taa sani di den  abi fanowdu (Odo 3:27, 28; 19:17). Efu useefi á poi go a pe den de, u sa poti moni fu holibaka gi a wooko di e du a hii goontapu. Na a moni ya den e koboloiki fu yeepi u baala anga sisa te wan gaan ogii pasa a wan peesi.​—2 Kor. 8:14, 15; 9:11.

7. Fa Yehofa meke Simeyon wooko gi en? Sowtu taanga-sikin a sani ya e gi u?

⁷ Yehofa be paamisi Simeyon taki a á be o dede fosi a si a Mesiyas. A ten de Simeyon be gaandi kaba, toku noiti a gwe fika Yehofa. Simeyon be musu fende taanga-sikin di Yehofa paamisi en a sani ya, bika a omen yali kaba a be e wakiti fu a Mesiyas kon. Yehofa belesi Simeyon fu a fasi fa a holidoo. Wan dei, a santa „yeye meke” Simeyon kon na a tempel neen a si a beibi Yesesi. Yehofa meke Simeyon taki wan polofeititoli tu fu a pikin di be o toon Kelestesi (Luk. 2:25-35). Kande Simeyon á libi langa sai fu si fa Yesesi bigin du a wooko fi en a goontapu ya. Toku a be teke a gaandi di Yehofa be gi en fu bigi. Aini a nyun goontapu Simeyon o fende moo belesi. A o si den wini di ala sama o fende te Yesesi o tii a hii goontapu (Gen. 22:18). Useefi e teke iniiwan gaandi di Yehofa gi u fu bigi.

8. Fa i sa wooko gi Yehofa enke fa a be meke Barnabas wooko gi en?

⁸ Aini a ten fu den fosi Kelesten, wan man den be e kai Yowsefu di be abi switifasi meke Yehofa koboloiki en a omen fasi (Toli 4:36, 37). A man ya be lobi toosutu sama, neen meke den apostel be e kai en Barnabas. A nen ya wani taki „Manpikin fu Toosutu”. Baka di Sawlesi toon wan Kelesten, omen baala anga sisa be e feele fu paa anga en, fu di a be e du ogii anga den Kelesten fosi. Ma Barnabas yeepi en. A toosutu en tu. A sani ya be musu bigi gi Sawlesi (Toli 9:21, 26-28). Bakaten den owluman a Yelusalem be si taki den baala anga sisa fu Antiyokiya aini Siriya be abi taanga-sikin fanowdu. Sama den sende fu go yeepi den baala anga sisa ya? Barnabas! Den fende wini di den du a sani ya. Beibel e soi taki Barnabas „bigin gi ala den taanga-sikin fu den tan dini Masaa anga den hii ati” (Toli 11:22-24). Aini a ten ya Yehofa sa koboloiki u fu toosutu taa baala anga sisa tu. A sa koboloiki u fu toosutu den te wan sama fu den dede, fu go luku den efuso telefon den te den siki fu gi den taanga-sikin. Yu o meke Yehofa koboloiki yu enke fa a be koboloiki Barnabas?​—1 Tes. 5:14.

9. San wi e leli fu a fasi fa Yehofa be yeepi wan baala den e kai Vasily fu toon wan bun sikapuman?

⁹ Yehofa be yeepi wan baala den e kai Vasily fu toon wan bun sikapuman. Di Vasily toon owluman a be abi 26 yali. A be e si enke a á be o poi yeepi a kemeente, moomoo den baala anga sisa di be abi toosutu fanowdu fu di sani be e miti den. Ma den baala di be abi moo ondoofeni yeepi en fu du en wooko bun. A Kownukondee Diniwooko Sikoo yeepi a baala ya tu fu tyai den faantiwowtu fi en. Vasily meke moiti fu go a fesi. A be poti wantu maiki di a be wani doo. Te a be doo wan fu den maiki ya, da a sani ya be e yeepi en fu a á feele so moo. A taki: „Den sani di be e meke mi e feele na a ten de, e meke mi piisii nownow. Te Yehofa yeepi mi fu fende wan tekisi di gi wan baala efuso sisa taanga-sikin, a  sani ya e meke mi fii bun.” Efu leti enke Vasily yu e gi Yehofa a okasi fu a meke i wooko gi en, a o yeepi i fu tyai moo gaan faantiwowtu aini a kemeente.

10. San Abigayeli be du? Fa u sa waka neen baka?

¹⁰ Di David anga den man di be e holibaka gi en be e kibii gi Kownu Saul, den be abi yeepi fanowdu. Neen meke wan leisi den man fu David akisi wan guduman fu Islayeli di den be e kai Nabal, wan pikin sani fu nyan. Den be si enke Nabal be o yeepi den, bika den be yeepi en luku den meti fi en aini a sabana fu sani á du den. Ma Nabal a be wan giiliman, neen meke a á be wani gi den nawan sani. A sani ya meke David ati boon te neen a be wani kii Nabal anga ala den man di be e tan aini en osu (1 Sam. 25:3-13, 22). Ma a moin uman fu Nabal di den be e kai Abigayeli, a be wani koni uman. Neen meke a teke deki-ati go begi David fu a á poti buulu paiman neen tapu. Anga sakafasi a akisi David fu fika a toli gi Yehofa. Den sani di Abigayeli taki anga a fasi fa a tyai enseefi meke David á du a ogii di a be o du moo. A be si taki a Yehofa seefi sende Abigayeli fu tapu en fu a meke wan fowtu (1 Sam. 25:23-28, 32-34). Abigayeli be abi bun manii, neen meke Yehofa be poi koboloiki en. Efu Kelesten sisa e du sani anga koni, efu den e taki switi anga taawan, Yehofa sa koboloiki den tu fu gi taawan aini a kemeente taanga-sikin.​—Odo 24:3; Tit. 2:3-5.

11. San den umanpikin fu Salum be du? Sama e waka a den baka aini a ten ya?

¹¹ Omen ondoo yali baka dati, den umanpikin fu Salum be yeepi seeka a sikotu fu Yelusalem (Neh. 2:20; 3:12). Winsi fa den dda a be tiiman, tokuso den uman ya be de kabakaba fu du a taanga wooko ya (Neh. 4:15-18). Den á be de enke den bigiman fu Tekowa di „á be wani saka denseefi fu du a wooko di den sama di be e teke fesi be gi den fu du” (Neh. 3:5). Den umanpikin fu Salum be musu piisii di a wooko ya kaba aini 52 dei namo (Neh. 6:15). A omen sisa aini a ten ya de kabakaba tu fu yeepi meke, efuso seeka den Kownukondee zaal anga taa peesi pe wi e go fu dini Yehofa. Wi abi den sisa ya taanga fanowdu fu man du a wooko ya, bika den sabi a wooko, den e wooko anga den hii ati tu.

12. Fa Yehofa sa meke u wooko gi en enke fa a be meke Tabita wooko gi en?

¹² Wan taa uman di be de kabakaba fu wooko gi Yehofa a Tabita. A uman ya be e meke omen sani gi den „pootiman”, moomoo den uman di man be dede kaba (Toli 9:36). A uman ya be abi switifasi, a be lobi gi sama sani. Neen meke di a dede, ná pikin sama kee gi en. Den piisii te di Peitilisi weki en baka (Toli 9:39-41). San a toli fu Tabita e leli u? Winsi u yonkuu efuso gaandi, man efuso uman, ala u sa du sani fu yeepi u baala anga sisa.​—Heb. 13:16.

13. Fa Yehofa koboloiki wan sisa den e kai Ruth winsi fa a be e sen? San a sisa ya taki?

¹³ Wan sisa den e kai Ruth be wani toon wan zendeling, ma a be e sen. Di a be yonkuu a be lobi paati talakitaati. A taki: „Mi be lobi a wooko ya tuutuu.” A sisa ya be lobi paati buku, ma a be e taanga gi en fu taki anga sama fu Gadu Kownukondee. Winsi fa Ruth be e sen, tokuso a bigin  pionili di a tapu 18 yali. A go na a Gileyad sikoo aini 1946. Bakaten a du a zendeling wooko a Hawai anga Yapan. Yehofa yeepi en fu paati a bun nyunsu aini den kondee ya. Baka di a du a peleikiwooko wan sani fu 80 yali a taki: „Yehofa be e gi mi taanga-sikin ala yuu. A yeepi mi fu mi a sen so moo. Mi e biibi taki Yehofa sa yeepi ala sama di e fitoow en.”

14. Enke fa Kolosesama 1:29 e soi, da san u mu du efu u wani Yehofa meke u wooko gi en?

¹⁴ Aini den ten di pasa, a omen fasi Yehofa koboloiki den sama di e dini en. San a o meke i du gi en? Efi i wani wooko gi en, i mu de kabakaba fu wooko taanga. (Leisi Kolosesama 1:29.) Efi i gi Yehofa a okasi fu a koboloiki i, a sa meke i toon wan sama di e peleiki fayafaya, wan bun leliman, wan sama di e toosutu taawan efuso wan bun mati. A sa koboloiki yu taa fasi tu, fu du san a abi a pakisei.

15. Enke fa 1 Timotiyesi 4:12, 15 e soi, da san yonkuu baala mu begi Yehofa?

¹⁵ Yu a wan yonkuu baala? Fa a de anga yu? A kemeente abi yonkuu baala fanowdu di sa toon dinali. Aini omen kemeente den owluman ipi moo den dinali. Efi yu a wan yonkuu baala, i si enke i sa meke moiti fu du son wooko aini a kemeente? Kande son baala e pakisei taki: „A bun gi mi kaba fu de wan dopu baala.” Efu a so yu e denki, begi Yehofa fu a yeepi i fu kon abi a fii fu du san de fanowdu fu toon wan dinali. Begi en tu fu a yeepi i fu man du ala san a wani i du gi en (Peleik. 12:1). Wi abi i fanowdu!​—Leisi 1 Timotiyesi 4:12, 15.

16. San u sa akisi Yehofa? Saide u mu akisi en a sani ya?

¹⁶ Yehofa sa meke i toon iniiwan sani di de fanowdu fu man du san a abi a pakisei. Neen meke yu á mu feele fu begi en fu a gi yu a fii anga a kaakiti di yu abi fanowdu fu wooko gi en. Winsi i yonkuu efuso gaandi, koboloiki i ten, i kaakiti anga den sani di i sabi du fu gafa Yehofa (Peleik. 9:10). Kande yu e feele taki i ná o poi wooko gi Yehofa, ma yu á mu meke a sani de tapu i fu du ala san i man gi en. A wan gaandi wi abi fu du ala san u man fu gafa u Dda di lobi u!