1. Enke fa 2 Korentesama 3:1-3 e soi, da saide u sa taki a wan gaandi Yehofa gi u fu sutudeli anga wan sama te enke a dopu? (Luku a fowtow a fesise fu A Wakititolen.)

FA YU e fii te i si wan Beibelsutudi fi i kemeente dopu? I musu e piisii te i si a sani ya (Mat. 28:19). Efu a yu sutudeli anga en, yu e moo piisii baka (1 Tes. 2:19, 20). A go di a go a fesi te enke a dopu e soi taki yu anga den taa baala anga sisa aini a kemeente wooko taanga fu yeepi en.​—Leisi 2 Korentesama 3:1-3.

2. (a) Sowtu akisi wi o luku? Saide wi o luku a akisi ya? (b) On ten u sa teli wan sama enke wan Beibelsutudi? (Luku a maiki a ondoo.)

² A moin fu si taki aini den fo yali di pasa, a wan sani fu tin miliyun sama a hii goontapu sutudeli Beibel * anga Yehofa Kotoigi ala mun. Aini den yali ya, a wan sani fu 280.000 sama dopu ala yali. Fa u sa yeepi moo Beibelsutudi fu go a fesi te enke den dopu? Nownow Yehofa e gi sama a okasi ete fu kon dini en, ma a ten di fika á langa moo. Neen meke u mu du ala san u man fu yeepi den Beibelsutudi fu u fu dopu.​—1 Kor. 7:29a; 1 Peit. 4:7.

3. San wi o luku aini a artikel ya?

 ³ A de taanga fanowdu fu den sutudi meke moiti go a fesi nownow fu man dopu, neen meke den baala di e tii a wooko akisi den beikantoo fa u sa yeepi den sutudi fu den sa dopu. Aini a artikel ya, anga a taawan di e kon neen baka, wi o luku san u sa leli fu pionili, zendeling anga den kelen owluman * (Odo 11:14; 15:22). Den o soi u fa u sa yeepi wan sutudi fu a go a fesi. Ma den o soi den sutudi tu san den mu du fu go a fesi fu den sa dopu. Aini a artikel ya, wi o luku feifi sani di wan sutudi mu du fu go a fesi te enke a dopu.

4. Wan sama o poi go a fesi te enke a dopu efu neen doomofu wi e sutudeli anga en wantu miniti namo?

⁴ A omen baala anga sisa e sutudeli anga sama leti na a sama doomofu. A sani ya a wan moin fasi fu bigin sutudeli anga wan sama. Ma te u de taamputaampu wi á poi taki langa, a ná ala wiki wi e man taki anga a sama na fasi ya tu. Son baala anga sisa e teke a sama nombuu da den e telefon en fu taki satu anga en fu wan moin toli aini Beibel. Son leisi a omen mun den e sutudeli anga a sama na a fasi ya. Ma wan sama o poi go a fesi fu dopu efu a wantu miniti namo ai teke fu sutudeli a Wowtu fu Gadu? Ehee.

5. Te u luku Lukasi 14:27-33, da san u mu du fu yeepi den sutudi fu u fu go a fesi?

⁵ Wan leisi Yesesi be gi wan ageisitoli fu soi san wan sama mu du efu a wani toon en bakaman. A be taki fu wan sama di wani meke wan osu, anga wan kownu di e seeka fu go a feti. Yesesi be taki a sama di wani meke a osu, mu ‘sidon luku fosi efu a moni di a abi o sai fu kaba meke en’. A kownu di wani go a feti o taki anga den sama fi en ‘luku fosi efu den suudati fi en taanga sai fu feti anga den suudati fu a taa kownu’. (Leisi Lukasi 14:27-33.) Yesesi be taki a letiso wan sama di wani toon en bakaman mu sidon luku fosi san a wani taki fu waka neen baka. Neen meke u mu soi den sama di wi e sutudeli anga den taki a pelensipali fu sutudeli ala wiki. Fa u sa du a sani ya?

6. San i sa du fu yeepi wan sutudi fu go a fesi?

 ⁶ A fosi sani di i sa du, a fu tan pikinso moo langa na a sama, winsi neen doomofu u de. Kande i sa taki fu ete wan tekisi. Te i si taki a sama lobi den takimakandaa, i sa akisi en efu u sa sidon taki moo bun. A fasi fa a sama o piki i, o soi yu efu a wani sutudeli tuutuu. Bakaten i sa akisi en efu a wani sutudeli tu leisi aini wan wiki. Winsi fa ala den sani ya a bun sani, toku dati wawan á sai fu yeepi a sama fu go a fesi.

7. Fa i mu seeka fosi i go sutudeli anga wan sama?

⁷ Ala leisi te yu e go sutudeli anga wan sama, i mu seeka bun. Leisi a pisi pe yu o luku anga a sama, i mu leisi den tekisi tu. Luku san a den moo pelensipali sani di den baala wani leli wi anga a pisi di yu o sutudeli anga a sama. Luku a nen fu a pisi di wi o luku, den pisi di sikiifi anga fatu letter, den akisi, den tekisi pe sikiifi taki u mu leisi den, anga den fowtow. Luku tu efu felon de di o yeepi a sutudi fu fusutan a pisi de moo bun. Baka dati, luku san na a moo bun fasi fu yeepi a sutudi fu a fusutan a pisi di wi o luku anga fa a sa wooko anga san a leli.​—Neh. 8:8; Odo 15:28a.

8. San den sani di apostel Pawlesi taki a Kolosesama 1:9, 10 e leli u fu a begi di u mu e begi gi den sutudi fu u?

⁸ Te yu e seeka fu go na a sutudi, begi Yehofa fu a yeepi i fu si fa i sa yeepi a sama moo bun. Akisi Yehofa fu a yeepi i fu den sani di yu o leli a sama aini Beibel sa doo en ati. (Leisi Kolosesama 1:9, 10.) Luku efu sani de aini a pisi ya di o taanga gi a sama fu fusutan, efuso sani di i sabi taki a nai kaba biibi ete. Holi a pakisei taki a yeepi i wani yeepi en fu dopu.

9. Fa i sa yeepi a sutudi fu seeka enseefi?

⁹ Te wi e sutudeli anga wan sama, u wani yeepi en fu teke den sani di Yehofa anga Yesesi du gi u fu bigi. Kande a sani ya o meke a wani sabi moo (Mat. 5:3, 6). Efu a sutudi wani fusutan den sani di ai leli, da a mu e poti ala en pakisei a den sani di ai leli. Neen meke i mu yeepi en fu fusutan taki a mu e leisi a pisi di wi o luku a fesi, da a sidon  pakisei fa a sa wooko anga den sani di a leisi. Fa i sa yeepi a sutudi fu du a sani ya? Soi en fa a mu seeka enseefi. I sa du wan pisi makandaa anga en. * Soi en fa a sa fende a piki fu den akisi aini a paragraaf, anga fa a sa maiki son pisi di o yeepi en fu membee a piki fu a akisi. Baka dati, meke a gi a piki enke fa a fusutan en sondee fu leisi en aini a paragraaf. A sani ya o yeepi i fu si efu a fusutan a pisi di u luku. Ma wan taa sani de ete di i sa yeepi a sutudi fu du.

10. Saide u mu e leisi Beibel ala dei? Fa i sa yeepi a sutudi fu fende wini fu den sani di ai leisi?

¹⁰ Boiti taki wi e sutudeli anga wan sama, enseefi mu e du son sani ala dei tu. A mu e aliki Yehofa. A mu e taki anga en tu. Fa a o du a sani ya? Ai aliki Yehofa te ai leisi a Beibel ala dei (Yow. 1:8; Ps. 1:1-3). Soi en fa fu wooko anga a sikeima fu leisi Beibel ala dei di de a jw.org. * Soi en tu taki a ná leisi namo a mu e leisi a Beibel, ma a mu teke ten pakisei san den sani di ai leisi e leli en fu Yehofa anga fa a sa wooko anga den sani di a leisi.​—Toli 17:11; Yak. 1:25.

11. San o yeepi wan sutudi fu sabi fa a mu begi? Saide a mu e begi Yehofa ala dei?

¹¹ Gi a sutudi taanga-sikin fu begi Yehofa ala dei. Te yu e begi fosi u bigin sutudeli anga baka te u kaba sutudeli, i mu e taki sani di o gi a sutudi taanga-sikin. Kai en nen aini den begi, akisi Yehofa fu a yeepi en anga den booko-ede fi en. A fasi fa yu e begi o soi a sutudi fa enseefi mu taki anga Yehofa te ai begi (Mat. 6:9; Yoh. 15:16). A leisi di a sutudi e leisi Beibel ala dei (te ai aliki Yehofa) anga a begi di ai begi ala dei (te ai taki anga Yehofa) o yeepi en fu toon Yehofa mati (Yak. 4:8). Den sani ya o yeepi a sutudi fu go a fesi fu a sa dopu bakaten. Sowtu taa sani o yeepi en?

12. Fa i sa yeepi wan sutudi fu toon Yehofa mati?

¹² A sutudi á mu e si den sani di ai leli enke sani di bun fu sabi namo, ma den sani ya mu doo en ati tu. Saide? A te den sani di ai leli e doo en ati fosi a o  meke moiti du den. Yesesi be e leli sama sani di be makiliki fu fusutan, ma a ná a sani de meke den be e waka neen baka. Den be e toon Yesesi bakaman fu di den sani di a be e leli den be e doo den ati (Luk. 24:15, 27, 32). A sutudi fi i mu e si Yehofa enke wan tuutuu Sama di a sa kon sabi moo bun. A mu e si Yehofa enke en Dda, en Gadu anga en Mati (Ps. 25:4, 5). Te yu e sutudeli anga a sama, poti pakisei a den moin manii fu Yehofa (Ek. 34:5, 6; 1 Peit. 5:6, 7). Aini ala toli di wi e luku i sa soi en san a sa leli fu Yehofa, anga den manii fi en. Yeepi en fu si taki Yehofa a lobi, a abi switifasi, ai booko en ede anga sama. Yesesi be taki ‘a fosi weiti, a taki u mu lobi u Gadu Yehofa anga u hii ati’. A disi na a moo gaan weiti tu (Mat. 22:37, 38). Neen meke i mu yeepi a sutudi fu lobi Yehofa.

13. Fa i sa yeepi a sutudi fu kon sabi den manii fu Yehofa moo bun?

¹³ Taigi a sutudi saide i lobi Yehofa. A sani ya o yeepi en fu si taki enseefi mu meke moiti fu toon Gadu mati (Ps. 73:28). Kande i si wan tekisi efuso wan pisi aini a buku di wi e luku di e taki fu wan manii fu Yehofa di i lobi. Kande a pisi de e soi fa Yehofa lobi u, fa a koni, fa ai du sani a wan letifasi ala yuu efuso a makiti di a abi. I sa soi a sutudi taki na a manii fu Yehofa ya meke i moo lobi en. Ma wan sani de ete di ala sama di e sutudeli Beibel mu du efu den wani dopu.

14. Enke fa Hebrewsama 10:24, 25 e soi, da fa den komakandaa o yeepi a sutudi fu go a fesi?

¹⁴ Ala u wani den sutudi fu u go a fesi fu den sa dopu. Wan sani di o yeepi den fu du a sani ya a te den e kon a den komakandaa. Neen meke i mu e kai den fu kon a komakandaa. Peleikiman di abi ondoofeni taki den sutudi di bigin kon a komakandaa faisi den bigin sutudeli, e go a fesi moo gaw (Ps. 111:1). Son peleikiman e soi den sutudi fu den taki te den e kon a komakandaa den o leli sani di den nai leli na a sutudi. Leisi Hebrewsama 10:24, 25 anga a sutudi fi i, da i soi en san a den wini di a o fende efu ai kon a komakandaa. Soi en a felon di den e kai San e pasa aini wan  Kownukondee zaal? * Yeepi a sutudi fu si den komakandaa enke wan pelensipali sani.

15. Fa i sa gi a sutudi fi i taanga-sikin fu kon a den komakandaa?

¹⁵ Ma kande a sutudi fi yu á bigin kon a komakandaa ete. Efuso kande ai kon ma a wanwan leisi namo. San i sa du? I sa e gi en toli fu den moin sani di yu e leli a komakandaa. Di a o si taki i lobi go a den komakandaa, kande enseefi o wani go tu. Gi en A Wakititolen anga a Komakandaa buku di wi e luku a mun de. Soi en san wi o luku na a komakandaa fu a wiki de, da i akisi fu sowtu pisi a be sa wani sabi moo. A o foondoo fu a fasi fa sani o de te a kon a komakandaa a fosi leisi, bika a ná o de enke san a gwenti a den taa keliki efuso fesa di a be e go (1 Kor. 14:24, 25). A o miti sama di a sa waka a den baka. Den sama ya o yeepi en fu go a fesi.

16. San i mu du fu yeepi wan sama te enke a dopu? San wi o luku aini a taa artikel?

¹⁶ Fa i sa yeepi wan sutudi fu a sa dopu? I mu e sutudeli ala wiki anga a sama, a so a o si taki a sutudi pelensipali. Seeka iseefi ala yuu fosi i go sutudeli anga en. Gi en taanga-sikin fu taki anga Yehofa ala dei. A mu e si Yehofa enke wan tuutuu Sama di sa toon en mati tu. Gi a sutudi taanga-sikin fu kon a den komakandaa. (Luku a faki ‘ San wan sutudi mu du fu a sa dopu?’) Aini a taa artikel wi o luku feifi sani di u sa du fu yeepi wan sama fu a dopu.