1921—Wan ondoo yali pasa

PEE

AINI A Wakititolen fu 1 yanuari 1921, den be poti a akisi ya gi den Beibel Ondoosukuman: ‘San na a moo pelensipali wooko di u mu du a yali ya?’ A artikel be e taki fu a tekisi fu Yesaya 61:1, 2 di be e membee den na a faantiwowtu di den be abi fu peleiki. A tekisi e taki: ‘A yeye fu Yehofa salufu mi fu mi paati bun nyunsu gi den bun ati sama. Mi mu taigi ala sama fu a ten di Yehofa o soi bun-ati gi sama. Mi mu taigi den fu a dei fu a boon-ati fu a Gadu fu u.’

DEN Á BE E FEELE FU PELEIKI

Efu den Beibel Ondoosukuman be wani du a peleikiwooko bun, den á be mu e feele. Bika boiti taki den be mu paati a bun nyunsu, den be mu taigi sama fu a dei di Yehofa ati o boon tu.

Na a sani ya wan baala di be e tan a Kanada den e kai J.H. Hoskin, be e du. Winsi fa sama be e libi ogii anga en, toku a á be e feele fu peleiki. A be miti wan pastoo aini a yali 1921. A taigi a pastoo taki: ‘Mi be sa wani taki fu Beibel anga i. Winsi u nai go na a wan se, toku u ná abi fu kwali.’ Ma a ná dati pasa. Baala Hoskin taki: ‘Wi á taki langa seefi, neen a wai en doo tapu gbalang. Mi denki a gaasi fu a doo be o booko.’

Baka dati a bali taigi mi taki: ‘Saide i nai go peleiki gi den sama di nai go a keliki?’ Di a taki a sani ya, baala Hoskin waka gwe, a á taki nawan sani. Ma a be e denki taki: ‘Yu anga den sama di nai go a keliki na aseefi.’

A taa dei di a pastoo go a keliki, a go taki omen lei fu baala Hoskin. Baala Hoskin taki: ‘A taigi den sama fu a keliki taki a mi na a moo leiman fu a pisi pe wi e tan ya, neen meke den mu sutu mi anga goni.’ Ma a sani ya á tapu baala Hoskin fu peleiki go doo. A taki: ‘Ná pikin switi a peleikiwooko be e switi gi mi. Son sama be e bali taigi mi taki: “Mi sabi taki yu a wan man fu Gadu.” Den be e taigi mi tu taki: “Efi i fuka wan dei, i sa taigi u da wi o yeepi i.”’

BUKU DI BE E YEEPI SAMA FU SUTUDELI BEIBEL

Den Beibel Ondoosukuman be wani yeepi sama fu fusutan Beibel moo bun. Neen meke den be gwenti poti akisi di Beibel e piki aini den Ontwaakt! Dda anga mma be sa taki anga den pikin fu den fu son wan fu den akisi ya. Den be e poti den akisi ya gi den pikin, da den be e yeepi den fu fende den piki aini Beibel. Wantu makiliki akisi be e de aini den artikel ya fu yeepi den pikin fu fusutan a Beibel moo bun. Den be e poti akisi enke: ‘Omen pikin buku de aini Beibel?’ Ma den be e poti akisi tu di be o yeepi yonkuuwan fu den á feele fu peleiki. Akisi enke: ‘Sama o libi ogii anga ala Kelesten?’

Wantu akisi be de tu gi sama di be sabi Beibel kaba. Den piki fu den akisi ya be de aini wan buku (Studies in the Scriptures). A omen sama be e fende wini fu den artikel ya. Ma aini a Ontwaakt! fu 21 december 1921, den piki den sama taki den ná o poti den artikel ya aini a Ontwaakt! moo. Saide den du a sani ya?

WAN NYUN BUKU!

A buku di den be e kai ‘A harpu fu Gadu’

Wan kaita di be e soi pe fu a buku i mu leisi

Wan kaita di abi akisi neen

Den baala di be e teke fesi be kon si taki a be o moo bun efu den sama di be e sutudeli, be leli wan toli te den kaba da den go a wan taa toli. Den á be mu e leli sani fanyafanya. Neen meke aini November 1921, den meke a buku di den be e kai ‘A harpu fu Gadu’. Den sama di be e teke a buku ya, be sa sutudeli anga denseefi. A buku ya be e yeepi sama fu sabi taki Gadu wani den libi fu teego. Fa den be e sutudeli a buku ya?

Te wan sama be teke wan fu a buku ya, a be e fende wan kaita di be e soi en sowtu pisi fu a buku a mu leisi. Bakaten den be e sende wan taa kaita gi en di be e poti akisi fu san a be leisi. Na a kaba fu a kaita a be e si sowtu pisi fu a buku a mu luku gi taa wiki.

A 12 wiki langa den sama di be teke wan buku be e fende den kaita ya. A fasi fu peleiki ya be e yeepi omen sama, moomoo den gaansama anga den sama di á be poi go osu fu osu. Bika a den be e moo sende kaita gi sama. Wan sisa den e kai Anna K. Gardner, di e tan aini wan foto a Pennsylvania na Ameekankondee taki: ‘A buku ya be e yeepi mi sisa Thayle, fu peleiki moo bun bika a á be poi waka bun.’ Te den be sende ala den kaita ya gi wan sama kaba, da wan sama be e go neen osu fu sutudeli anga en go doo.

Thayle Gardner de aini a lolosutuu fi en

WOOKO BE DE FU DU ETE

Na a kaba fu a yali, baala J. F. Rutherford sende wan biifi gi ala den kemeente. A taigi den taki a yali de den peleiki gi moo sama moo den yali di pasa. A be taki tu: ‘Ma moo wooko de fu du, neen meke u mu gi sama taanga-sikin fu du a wooko ya.’ Den Beibel Ondoosukuman be du san baala Rutherford taki, bika aini a yali 1922 den peleiki a bun nyunsu fayafaya.

Mati di be abi deki-ati

Den Beibel Ondoosukuman be e soi taki den lobi denseefi. Bika leti enke fa a ondoofenitoli ya e soi, da den be de kabakaba fu yeepi denseefi te den be de a nowtu.—Odo 17:17.

Tudewooko 31 mei 1921, den be sooto wan baakaman a Tulsa, wan foto aini Ameekankondee, fu di den be fende taki a feti anga wan bakaa uman. A sani ya meke wan gaan feti (sama e kai a feti ya Tulsa race massacre) booko aini a foto ya. A feti ya kon moo bigi di wan sani fu 1000 bakaa go feti anga wan pikin kulu baakaman. A feti ya doo te a Greenwood, wan peesi pe tyaipi baakaman be e tan. Di a sani ya pasa, a moo enke 1400 osu anga wenkii den boon. Boiti dati, den fufuu ala den sani fu den sama tu. Lanti taki a 36 sama dede, ma a gei enke a omen ondoo sama dede a dei de.

Wan baaka baala den e kai Richard Hill, di be e tan a Greenwood, sabi ete san be pasa. A taki: ‘A neti de u be de a komakandaa. Baka a komakandaa u be e yee fa sama be e sutu goni aini a foto. Di wi e go didon, den be e sutu ete.’ A taa dei fi en, sani be kon moo ogii. Baala Hill taki: ‘Wantu sama kon taigi u taki efu wi á wani ogii miti u, u mu go kibii.’ Neen meke baala Hill anga en uman anga den feifi pikin fu den, go kibii a wan gaan osu pe den sama fu a foto e kon makandaa. Di den doo de, a wan sani fu 3000 baakaman be de ape. Lanti be poti suudati ape fu kibii den sama ya.

Wan bakaa baala den e kai Arthur Claus, du wan sani di e soi taki a be abi deki-ati. A taki: ‘Di mi yee san be e pasa a Greenwood, mi be wani sabi fa ai go anga mi mati Hill. Neen meke mi go luku en neen osu.’

Baala Arthur Claus e leli 14 pikin anga a buku di den e kai ‘A harpu fu Gadu’

Di a doo de, wan bakaa man di be e tan koosube fu Baala Hill, hali goni gi en. A man ya seefi a be wan mati fu Baala Hill. A be denki a ogii Baala Arthur be kon du anga Baala Hill. Neen meke a akisi Baala Arthur taki: ‘San i kon du ya?’

Baala Arthur taki: ‘Efu mi á be piki a man ya bun, a be o sutu mi. Mi taigi en taki mi anga Baala Hill a mati. Mi soi en tu taki mi be gwenti kon luku Baala Hill neen osu.’ Na a man ya anga baala Arthur meke sama á boon a osu, efuso fufuu den sani fu baala Hill.

Bakaten baala Arthur kon yee taki baala Hill anga en osufamii be de na a gaan osu. Neen meke a go anda. Di a doo ape, den taigi en taki efu wan sama mu komoto aini a osu, a fesiman fu den suudati mu teken wan pampila gi en fu a gwe. Baala Arthur taki: ‘A be taanga fu miti a fesiman ya fu taki anga en. Ma di mi miti en, mi taigi en taki mi wani tyai baala Hill anga en osufamii gwe. Neen meke a akisi mi taki: “Yu o poi luku den sama ya bun?” Anga ala piisii mi piki en taki, eeye.’

A suudati edeman gi baala Arthur wan pampila di be e soi taki a be sa tyai Baala Hill anga en osufamii gwe. Di a fende a pampila, a lon go anga en na a gaan osu, neen a soi wan fu den suudati en. Di a suudati si a pampila a taki: ‘Na a edeman seefi poti en nen na a pampila ya. A yu na a fosi sama di a gi pampila fu kon puu sama ya.’ Baka dati den go suku baala Hill anga en osufamii. Di den fende den, a hii osufamii go aini a wagi fu Baala Arthur, neen den go a osu.

Baala Arthur yeepi Baala Hill anga en osufamii fu ogii á miti den. A sani di a du ya, soi sama taki a á be e feele fu soi taki a lobi den baala anga sisa fi en. Neen meke moo sama be wani sabi sani fu waaleiti. Baala Arthur taki: ‘A sani ya be meke a man di be hali goni gi mi, moo lesipeki den Kotoigi. Boiti dati, moo sama be wani yee a bun nyunsu, bika den kon si taki a dini di wi e dini Gadu e yeepi u fu wi á paati bee.’

A WAKITITOLEN (SUTUDI-WAKITITOLEN)