1-2. Fa Manase be du sani taa fasi enke Akab? Sowtu akisi wi o luku?

MEKE u poti pakisei a tu kownu fu fositen. Wan fu den be e tii a tin lo kownukondee fu Islayeli, a taawan be e tii a tu lo kownukondee fu Yuda. Den tu man ya á be e libi na aseefi ten, ma toku den be abi denseefi sowtu manii. Ala den tu kownu ya be e taangayesi Yehofa. Den be e dini falisi gadu tu. Efu dati á sai, da den be e gi a foluku taanga-sikin fu denseefi dini falisi gadu. A omen sama di á du nawan ogii den kownu ya be kii. Wan fu den kownu ya tan anga den takuu manii fi en te enke a dede. Ma a taawan be soi taki den ogii di a du be e hati en, neen Gadu gi en paadon. Sama a den kownu ya?

² Den tu kownu ya a be Akab di be e tii Islayeli, anga Manase di be e tii Yuda. Wi o luku san a libi fu den kownu ya e leli u fu a soi di wan sama mu soi taki den sondu di a du e hati en (Toli 17:30; Rom. 3:23). Fa wan sama e soi taki a sondu di a du e hati en tuutuu? A pelensipali fu sabi a sani ya, bika u wani Yehofa gi u paadon te u meke wan fowtu. Fu man fende a piki fu a akisi ya, wi o luku a libi fu den tu kownu ya, anga san u sa leli fu den. Baka dati, wi o luku san Yesesi seefi be leli u fu a toli ya.

3. San Akab du di a be de enke kownu fu Islayeli?

³ Akab a be du fu seibin kownu fu a tin lo kownukondee fu Islayeli. A be toow anga Iseibel, a umanpikin fu kownu Sidon. Di Akab toow anga Iseibel, Islayeli be fende omen gudu. Ma a omen takuu bakapisi a sani ya be tyai, bika Iseibel  be e dini Baa-al. A be e gi a foluku taanga-sikin tu fu dini a gadu ya. Den sama di be e dini Baa-al be e libi wan hululibi. Den be e tyai den pikin fu den enke ofaandi gi a gadu ya tu. Boiti dati, Iseibel be e du ogii anga den polofeiti fu Yehofa. A omen fu den a kii (1 Kow. 18:13). Beibel taki Akab be ‘ogii moo ala den taa kownu di be tii neen fesi’ (1 Kow. 16:30). Yehofa be e si den somen ogii di Akab anga en uman be e du. Ma fu di a abi tyali-ati anga sama, meke a be e sende polofeiti fu go wasikoi a foluku fi en fu kengi den manii fosi a lati. Eliya a be wan fu den polofeiti ya. Ma Akab anga Iseibel á be wani aliki den polofeiti fu Yehofa.

4. Sowtu sitaafu Yehofa be o gi Akab? San a du di a yee a sitaafu di Yehofa be o gi en?

⁴ Baka wan pisiten Yehofa be kon weli anga a libi fu Akab anga Iseibel, neen meke a sende polofeiti Eliya fu go taigi den san a be o du anga den. A be taigi den taki a be o kii a hii famii fu den. A bosikopu ya be seke Akab te neen a bigin du sani fu soi taki den ogii di a du be e hati en.​—1 Kow. 21:19-29.

5-6. San e soi taki den sani di Akab be du á be e hati en tuutuu?

⁵ Biginbigin Akab be du enke den sani di a du be e hati en. Ma a fasi fa a du sani bakaten, e soi taki den ogii di a du á be e hati en tuutuu. A á meke nawan moiti fu puu den peesi pe sama be e dini Baa-al aini a kondee. A á meke moiti fu yeepi a foluku fu kon dini Yehofa baka tu. A omen taa sani Akab du di be e soi taki a á be wani daai kon dini Yehofa tuutuu.

⁶ Bakaten Akab kai Kownu Yowsafat fu Yuda fu tyai en go feti anga den Siriyasama. Yowsafat a be wan bun kownu, neen meke a taigi Akab taki den mu taki anga Yehofa fosi den go feti. Biginbigin Akab á be wani. A taigi Yowsafat taki: ‘Wan man de ete di sa taki anga Yehofa gi u. Ma mi e buuse en bika nawan fu den bosikopu fi en di ai tyai e soi taki sani o go bun anga mi. A soso takuu nyunsu ai tyai gi mi.’ Winsi fa Akab á be lobi a toli, toku den go taki anga polofeiti Mikaya. Mikaya á be abi bun nyunsu gi Akab tuu. Ma pe fu Akab begi Yehofa fu a gi en paadon, a meke sama poti Mikaya a sitaafu-osu, fu di a á be lobi a bosikopu fi en (1 Kow. 22:7-9, 23, 27). Winsi fa a kownu ya be sooto a polofeiti fu Yehofa, toku a á be poi tapu a polofeititoli fu kon tuu. Di Akab go na a feti a dede leti enke fa a polofeiti be taki.​—1 Kow. 22:34-38.

7. Fa Yehofa be e si Akab?

⁷ Baka di Akab dede, Yehofa soi kiin fa a be e si a man ya. Di Kownu Yowsafat komoto na a feti di Akab dede aini, Yehofa sende polofeiti Yehu fu go puu kaasi gi en fu di a holibaka gi Akab. Yehu taigi en taki: ‘Saide yu e holibaka gi wan sama di e du ogii? Saide i lobi den sama di e buuse Yehofa?’ (2 Kolon. 19:1, 2) Pakisei a sani ya: Efu den sani di Akab be du be e hati en tuutuu, da a polofeiti á be o kai en wan ogiiman di e buuse Yehofa. Winsi fa Akab be soi biginbigin taki den ogii di a be du be e hati en, toku a á be wani kengi tuutuu.

8. San a toli fu Akab e leli u?

⁸ San a toli fu Akab e leli u? Di Akab yee taki Yehofa be o kii a hii famii fi en, a piiti en koosi, neen a wei koosi di sama gwenti wei te den e tyali. A sani ya a wan bun sani, bika ai soi taki den sani di a du be hati en. Ma dati wawan á be sai. Den sani di a du bakaten e soi taki den ogii di a be du, á be hati en tuutuu, bika a á meke nawan moiti fu kengi en manii. A sani ya e leli u taki te  u meke wan fowtu, a ná hati namo a mu hati u taki u du sani di Yehofa á lobi, ma u mu meke moiti fu wi á du a sani de moo. Meke u luku wan toli aini Beibel fu wan sama di be soi taki den ogii di a be du be e hati en tuutuu.

9. San Manase be e du di a be e tii Yuda?

⁹ Wan sani fu 200 yali baka di Akab dede, Manase toon kownu fu Yuda. Manase be e suku fu ogii moo Akab seefi. Beibel taki: ‘A be e du omen sani di Yehofa á lobi, neen meke Yehofa ati be boon neen’ (2 Kolon. 33:1-9). Manase be meke omen altari fu dini falisi gadu. Boiti dati, a be poti wan pobiki fu wan gadu di be e gi sama taanga-sikin fu libi wan hululibi aini a tempel fu Yehofa. A be e bonu. A be e du tofuuwooko. Manase kii ‘omen sama di á be du nawan ogii’. A be ‘boon en eigi pikin enke ofaandi gi den falisi gadu fi en’.​—2 Kow. 21:6, 7, 10, 11, 16.

10. Fa Yehofa puu kaasi gi Manase? San a kownu ya du di Yehofa puu kaasi gi en?

¹⁰ Leti enke Akab, Manase á be wani aliki den polofeiti di Yehofa be sende fu wasikoi en. Di a du en te, neen ‘Yehofa meke den suudati-edeman fu a kownu fu Asiriya go feti anga den. Den keti Manase anga tu kopoo bui neen den tyai en go a Babilon’. Di Manase be de a sitaafu aini Babilon, a bigin denki den somen ogii di a be du. Neen meke ‘a begi Gadu. A du ala san a be poi fu soi taki ai saka enseefi na a Gadu fu den afo fi en ondoo’. Boiti dati, ‘a begi Yehofa fu soi tyali-ati gi en’. A ná wan leisi namo Manase begi Yehofa. Beibel taki ‘a be e begi en naamo’. A ogiiman ya be kengi. A be e si Yehofa enke en Gadu.​—2 Kolon. 33:10-13.

11. Enke fa 2 Koloniki 33:15, 16 e soi, da fa Manase soi taki den sani di a du be e hati en tuutuu?

¹¹ Baka wan pisiten Yehofa piki den begi fu Manase, bika a be e si aini en ati taki a be kengi tuutuu. Neen meke di Manase begi Yehofa fu soi tyali-ati gi en, a gi en a okasi fu daai go neen kondee baka fu tii enke kownu. Di Yehofa gi Manase paadon, Manase du ala san a be poi fu soi taki den ogii di a be du be e hati en tuutuu. A á be du sani enke Akab. A be kengi en manii, neen a meke moiti fu puu den falisi gadu aini a kondee. Boiti dati, a be e yeepi a foluku fu daai kon dini Yehofa baka. (Leisi 2 Koloniki 33:15, 16.) Manase be abi deki-ati fanowdu fu man du a sani ya, bika neen seefi be e gi den famii fi en, den heiheiman aini a kondee, anga a foluku taanga-sikin fu dini den falisi gadu ya. Ma now a be e du ala san a poi fu du sani enke fa Yehofa wani. Fu di Manase be tyai enseefi na a fasi ya, meke Yosiya, a galanpikin fi en be sa waka neen baka. Bakaten  Yosiya toon wan fu den moo bun kownu fu Islayeli.​—2 Kow. 22:1, 2.

12. San a toli fu Manase e leli u?

¹² A omen sani u sa leli fu a toli fu Manase. Boiti taki den sani di Manase du be e hati en, a be saka enseefi a Yehofa ondoo. A begi Yehofa neen a akisi en fu a gi paadon. A kengi en manii tu. Boiti dati, a du ala san a be poi fu seeka den ogii di a be du. Baka di a bigin dini Yehofa enke fa a be mu dini en, a yeepi taa sama fu dini Yehofa baka. A toli fu Manase e leli u taki winsi u du omen ogii, toku Yehofa sa gi u paadon. Beibel taki: ‘Yehofa de kabakaba fu gi sama paadon’ (Ps. 86:5). Efu den sani di wan sama du e hati en tuutuu, neen a meke moiti kengi, Yehofa o gi en paadon.

13. Gi wan ageisitoli di e soi taki a ná hati namo a mu e hati u taki u du wan sondu.

¹³ Den sani di Manase be du be e hati en. A be taigi Yehofa a sani ya tu, ma a ná dati wawan a be du. A sani ya e leli u wan pelensipali sani. Luku a ageisitoli ya: Meke u taki i go a wenkii fu bai beele. Ma di yu akisi a wenkiiman fu gi i beele, neen a gi i bolon. I be o teke a bolon? Nono. Ma kande a taigi i taki anga bolon den e baka beele. A sani ya be o meke i teke a bolon? Nono, bika a ná bolon i wani, a beele. A letiso a de anga Yehofa tu te u meke wan fowtu. A hati di ai hati i taki i du wan sani di Yehofa á lobi, a wan pelensipali sani, ma dati wawan á sai. San i mu du moo? A ageisitoli di Yesesi be gi fu a lasi manpikin o soi u san a wantu taa sani di u mu du.

14. San na a fosi sani di e soi taki den sani di a lasi manpikin du be e hati en?

¹⁴ Aini Lukasi 15:11-32, Yesesi gi wan toli fu wan lasi manpikin. A boi ya be wani libi en eigi libi, neen meke a foloisi go a wan faawe kondee. Di a doo anda, a bigin libi wan yayo-libi. Baka di a poli ala a moni fi en, a libi be kon taanga gi en. Di a sidon luku a libi fi en te a kaba, a fusutan taki a libi di a be abi neen dda osu be moo bun. Yesesi taki bakaten a yonkuman ya kisi enseefi, neen a teke seeka fu daai go neen dda baka. A wan bun sani taki a boi ya be fusutan taki a libi di a be e libi á be bun, ma dati á be sai. A be abi fu kengi en manii.

15. San a lasi manpikin aini a ageisitoli fu Yesesi be du fu soi taki den sani di a du be e hati en tuutuu?

¹⁵ A lasi manpikin aini a ageisitoli fu Yesesi be du sani fu soi taki den ogii di á be du be e hati en. A waka a langa pasi go a osu baka. Di a doo neen dda a taigi en taki: ‘Nda, mi sondu a yu anga Gadu fesi. Mi á bun moo fi i kai mi i manpikin, ma gaantangi teke mi enke wan fu den wookoman fi i baa’ (Luk. 15:21). Den sani di a  yonkuman ya taki be e soi taki a be wani meke en bun anga Yehofa. A be sabi tu taki den sani di a du be hati en dda, neen meke a akisi en paadon tu. A boi ya be de kabakaba fu wooko taanga fu meke en bun anga en dda baka. Winsi a be mu toon wan fu den wookoman fi en dda, toku a be de kabakaba fu du a sani ya (Luk. 15:19). A ageisitoli ya a wan moin toli, ma ai leli wi omen pelensipali sani. Te owluman mu kuutu a toli fu wan sama di du wan sondu, den mu holi a toli ya a pakisei. A o yeepi den fu si efu a sama wani kengi tuutuu.

16. Saide ai taanga gi owluman fu sabi efu den sondu di wan sama du e hati en tuutuu?

¹⁶ A á makiliki gi owluman fu sabi efu den sani di wan sama du e hati en tuutuu. Saide a sani ya á makiliki? Den owluman á poi si san de aini wan sama ati. Neen meke anga san den poi si den e wooko fu luku efu a sani di a baala efuso sisa du e hati en tuutuu. Son leisi a sani di a sama du e ogii te da ai taanga gi den owluman fu biibi taki ai hati en tuutuu.

17. (a) Gi wan toli di e soi taki a ná ala yuu te wan sama e soi taki a sondu di a du e hati en, da dati wani taki ai hati en tuutuu. (b) Enke fa 2 Korentesama 7:11 e soi, da san wan sama mu du efu a ogii di a du e hati en tuutuu?

¹⁷ Meke u taki wan baala e waka gi en uman omen yali langa. Pe fu a suku yeepi, a moiti ai meke fu kibii a sani di a du gi en uman, den mati fi en, anga den owluman. Ma now a taki kon a ganda. Te den owluman go neen anga a taki, ai piki taki a du en tuu. Kande ai soi enke ná pikin hati a sani di a du e hati en. Ma dati wani taki ai hati en tuutuu? Nono. A o abi fu du moo fu soi taki a sani di a du e hati en tuutuu. A ná ogii miti a man ya wan leisi, ma a omen yali langa a du wan gaan sondu. Te go taki a neen seefi go taki anga den owluman. A di a taki kon a ganda fosi neen a piki. Den owluman o abi fu si bunbun kengi na a sama ya fosi den o biibi taki a sani di a du e hati en tuutuu. (Leisi 2 Korentesama 7:11.) A omen ten a o teke fu a man ya soi taki a kengi tuutuu. Kande den owluman o abi fu puu en na a kemeente fu wan pisiten.​—1 Kor. 5:11-13; 6:9, 10.

18. Fa wan sama di den puu na a kemeente sa soi taki a sani di a du e hati en tuutuu? San o pasa te a du a sani ya?

¹⁸ Efu den sondu di wan sama du e hati en tuutuu, da te den baala puu en na a kemeente a o wooko anga san den taigi en. A o go e begi, a o kon a den komakandaa ala yuu, a o go e sutudeli Beibel tu fu taanga en biibi. Boiti dati, a ná o go e du sani di sa meke a go du aseefi sondu baka. Efu ai meke moiti tuutuu fu kon  bun anga Yehofa baka, da den owluman seefi o yeepi en fu a sa toon wan Kotoigi baka. Te owluman e kuutu a toli fu wan sama, den e holi a pakisei taki ala sama de taa fasi, a fasi fa sani waka ná o de aseefi tu. Den á mu kuutu a sama aini den ati fosi den sabi fa sani waka, ma den mu meke Beibel tii den fu teke wan bun bosoloiti.

19. Fa wan sama e soi taki den sani di a du e hati en tuutuu? (Eseikiyeli 33:14-16)

¹⁹ Enke fa u luku aini a artikel ya, da te wan sama du wan sondu, a ná taki a mu e taki namo taki ai hati en. Ma a mu meke moiti kengi a fasi fa ai denki anga a fasi fa a be e du sani. Bika a den sani di a o du, o soi efu ai hati en tuutuu. (Leisi Eseikiyeli 33:14-16.) A sani di mu moo pelensipali gi wan sama di du wan sondu, na a meke di a mu meke en bun anga Yehofa baka.

20-21. Fa u sa yeepi wan sama di du wan gaan sondu?

²⁰ Di Yesesi be de a goontapu a be taki: ‘Mi kon fu yeepi den sama di sondu fu daai den libi’ (Luk. 5:32). Na a sani ya useefi mu e meke moiti fu du tu. San i mu du efi i kon sabi taki wan mati fi i du wan gaan sondu?

²¹ Efi yu e yeepi en kibii a taki, sani ná o waka bun seefiseefi. A sosokaali i be o du a sani ya tu, bika Yehofa e si ala sani (Odo 5:21, 22; 28:13). Soi en taki den owluman wani yeepi en. Ma efu a á wani go taki anga den owluman, da iseefi mu go taki anga den owluman. A so yu e soi taki i lobi a mati fi i. Bika efi yu á du a sani ya, en anga Yehofa o poli.

22. San wi o luku aini a taa artikel?

²² Ma meke u taki di den owluman luku a toli, den si taki den abi fu puu a sama na a kemeente, da dati wani taki den á lobi en? Aini a taa artikel wi o luku fa Yehofa e sitaafu sama di a lobi, anga fa u sa waka neen baka.