1. Saide omen sama e buuya aini a ten ya?

A OMEN keliki de nownow di e taki den a Kelesten. Winsi fa ala den keliki ya e leli taa sani, toku ala den e fende taki den e dini Gadu enke fa a wani. A sani ya e buuya omen sama. Neen meke omen sama e akisi denseefi taki: ‘Na ala keliki Gadu e fende bun?’ Yu e biibi tuutuu taki a den Yehofa Kotoigi abi a tuu biibi? Yu e biibi taki a fasi fa wi e dini Yehofa na a moo bun wan? Wi o luku wantu sani di o yeepi i fu taanga i biibi.

2. Enke fa 1 Tesalonikasama 1:5 e soi, da saide Pawlesi be e biibi taki a be de aini a tuu biibi?

² Apostel Pawlesi be e biibi anga en hii ati taki a be de aini a tuu biibi. (Leisi 1 Tesalonikasama 1:5.) A ná fu di Pawlesi be lobi den sani di sama be taigi en meke a be e biibi a sani ya. Ma enseefi be e teke ten ondoosuku a Wowtu fu Gadu. A be e biibi taki ‘a Gadu seefi be meke sama sikiifi ala den sani di de aini a buku fi en’ (2 Tim. 3: 16). San Pawlesi be kon fusutan di a ondoosuku Gadu Wowtu? Pawlesi kon si wantu sani di be e soi en kiin taki a Yesesi na a Mesiyas di Gadu be paamisi. Den Dyu kelikifesiman be abi a Wowtu fu Gadu tu, ma den á be wani wooko anga den sani di den be e leisi aini. Den man ya be e du enke den e dini Gadu, ma toku den á be e du sani enke fa Gadu wani (Tit. 1:16). Den be e wooko anga den pisi fu Beibel di be e kai anga den. Den pisi di den á be lobi, den be e poti a wan se. Ma Pawlesi á be e du sani enke den. A be e meke moiti fu du ala san a be e leli aini a Wowtu fu Gadu.​—Toli 20:27.

3. A te u sabi ala sani fosi wi o man sabi san na a tuu biibi? (Luku a faki ‘ Den foondoo sani di Yehofa e du ipi te wi á poi teli den.’)

 ³ Son sama e fende taki den sama di abi a tuu biibi mu man piki ala den akisi di den abi, winsi Beibel nai taki fu den toli de. Ma i si enke libisama o poi piki ala den akisi di wi abi? Luku a toli fu Pawlesi baka. A be e gi sama taanga-sikin fu ondoosuku sani, ma a be taigi den tu taki son sani de di enseefi á be e fusutan (1 Tes. 5:21). Pawlesi be taki: ‘Nownow wi á sabi ala sani di u mu sabi ete.’ A be taki tu: ‘Nownow wi e luku aini wan sipikii pe u nai si kiin’ (1 Kor. 13:9, 12). Pawlesi á be e fusutan ala sani. Useefi nai fusutan ala sani aini a ten ya. Ma toku Pawlesi be fusutan den moo pelensipali sani. A be fusutan san Yehofa abi a pakisei gi libisama. Den sani di a be sabi be yeepi en fu biibi taki aini a tuu biibi a be de.

4. San o yeepi u fu biibi taki aini a tuu biibi u de? San wi o luku aini a artikel ya?

⁴ A sani di o yeepi u fu biibi taki a disi na a tuu biibi, a te wi e maiki den sani di Yesesi be taki den bakaman fi en be o du, anga den sani di den Yehofa Kotoigi e du aini a ten ya. Aini a artikel ya wi o si taki tuu Kelesten (1) nai dini Gadu anga pobiki efuso taa sani. Wi o si tu taki (2) den e lesipeki a nen fu Yehofa. Boiti dati, (3) den lobi a tuu. (4) Den lobi denseefi tu.

5. Fa Yesesi be e dini Gadu? Fa u sa waka neen baka?

⁵ Yesesi be lobi Yehofa, neen meke neen wawan too a be e dini (Luk. 4:8). Di a be de a goontapu ya, a leli den bakaman fi  en tu taki a Yehofa wawan den mu dini. Nawan fu den bakaman fu Yesesi be e koboloiki pobiki efuso taa sani fu dini Gadu. U sabi taki Gadu a wan yeye. Neen meke libisama á poi meke sani fu gei Gadu (Yes. 46:5). Ma fa a de anga den sama di e koboloiki pobiki efuso fowtow fu balinen sama fu fositen fu dini Gadu? Aini den tin weiti di Yehofa be gi den Islayelisama, a be taigi den taki: ‘Wi á mu meke pobiki di e gei wan sani a hemel efuso wan sani a goontapu. Wi á mu boigi gi den’ (Ek. 20:4, 5). Den sama di wani dini Gadu enke fa a wani tuutuu, e fusutan taki a á wani u koboloiki pobiki efuso taa sani fu dini en.

6. Fa den Yehofa Kotoigi e dini Gadu aini a ten ya?

⁶ Den koniman di e ondoosuku sani fu fositen, taki a Gadu wawan den Kelesten fu a ten fu den apostel be e dini. Wan buku e taki: ‘Efu wan sama be go taigi den Kelesten fu fosi taki den mu koboloiki pobiki efuso taa sani fu dini Gadu, den be o dyombo, bika den be sabi taki a wan sani di Gadu e buuse.’ Den Yehofa Kotoigi aini a ten ya e waka a den sama ya baka. U nai begi sama fu fositen, den engel, efuso Yesesi. U nai singi gi a faaka fu wan kondee, efuso du iniiwan sani di e soi taki wi e dini wan kondee efuso wan taa sama. Winsi san e pasa wi e meke moiti fu du san Yesesi be taki. A be taki: ‘A Yehofa, yu Gadu wawan too i mu dini.’​—Mat. 4:10.

7. Fa den Yehofa Kotoigi de taa fasi fu taa keliki?

⁷ Gaanse sama aini a ten ya lobi go a keliki di abi balinen kelikifesiman. Son leisi den e si den kelikifesiman ya enke gadu. Sama e go a den keliki fu den gbullu, den e bai den buku fu den, den e poti omen moni tu fu holibaka gi den. Son sama e biibi ala san den kelikifesiman e taigi den. Den e tyai den kelikifesiman a tapu. Te den si den, den e fii enke a Yesesi seefi taampu ape e leli den. Ma den tuutuu Kelesten ná abi kelikifesiman, bika u nai waka a libisama baka. Winsi fa wi e lesipeki den sama di e teke fesi, toku wi e holi a sani di Yesesi be taki a pakisei. A be taki: ‘Ala wi a baala’ (Mat. 23:8-10). U nai si libisama enke gadu, winsi a wan balinen kelikifesiman efuso politikiman. U nai go poti moni fu holibaka gi den politiki sani di den man ya wani du tu. U sabi taki wi a ná wan pisi fu a goontapu ya, neen meke u nai mumui anga nawan sani di abi fu du anga politiki. Disi a wan fu den fasi fa i sa sabi sama a den tuu Kelesten.​—Yoh. 18:36.

8. Fa u du sabi taki Yehofa wani ala sama sabi a nen fi en?

⁸ Wan leisi di Yesesi be e begi, a taki: ‘Nda gi a nen fi i gaandi.’ Yehofa piki a begi fu Yesesi. A meke wan siten taki komoto a hemel, neen a paamisi en taki a o gi en nen gaandi (Yoh. 12:28). Aini ala den yali di Yesesi be de a goontapu ya, a be e gi en Dda nen gaandi (Yoh. 17:26). A letiso den tuu Kelesten mu e gi a nen ya gaandi. Den mu meke sama sabi a nen ya tu.

9. Fa den fosi Kelesten be soi taki den e lesipeki Gadu nen?

⁹ Baka di a Kelesten kemeente sete aini a ten fu den apostel, Gadu bigin teke ‘taa nasi sama fu toon wan foluku di e tyai a nen fi en’ (Toli 15:14). Den fosi Kelesten be e si en enke wan gaandi taki den sabi Gadu nen, neen meke den be e leli taa sama a nen ya. Den be e koboloiki Gadu nen te den be e peleiki, efuso te den be  mu sikiifi Beibel buku. * A fasi fa den be e tyai denseefi be e soi kiin taki den be e lesipeki a nen fu Gadu.​—Toli 2:14, 21.

10. San e soi taki a den Yehofa Kotoigi e yeepi taawan fu kon sabi a nen fu Yehofa?

¹⁰ Den Yehofa Kotoigi aini a ten ya e lesipeki Gadu nen? A omen kelikifesiman aini a ten ya, nai wani sama sabi a nen fu Gadu. Den e puu a nen ya aini den Beibel di den e koboloiki. Son leisi den nai wani sama kai a nen ya aini den keliki fu den seefi. * Ma te i luku a fasi fa den Yehofa Kotoigi e du sani, da wi e si kiin taki den e lesipeki a nen fu Yehofa. Nawan taa keliki á de, di e leli sama a nen fu Gadu enke wi. A so wi e soi taki wi a Kotoigi fu Yehofa (Yes. 43:10-12). A moo enke 240 miliyun Beibel u doloki, pe u poti a nen fu Yehofa baka a den peesi pe den taa keliki be puu en. Boiti a Beibel, wi e meke taa buku tu di e yeepi sama fu kon sabi a nen fu Yehofa aini moo enke 1000 tongo.

11. Fa den fosi Kelesten be e soi taki den lobi den tuu leli fu Beibel?

¹¹ Yesesi be lobi den tuu leli fu Beibel. A fasi fa Yesesi be e libi be e soi taki a be e biibi den sani di Gadu paamisi wi  aini Beibel. A be e leli sama den sani ya tu (Yoh. 18:37). Den bakaman fu Yesesi seefi lobi den leli ya anga den hii ati (Yoh. 4:23, 24). Apostel Peitilisi be taki a den fosi Kelesten be abi a tuu biibi (2 Peit. 2:2). Fu di den Kelesten ya be lobi den leli fu Beibel, meke den á be e aliki te sama be e leli den falisi sani, te den be wani mokisa a tuu leli anga den gwenti fu den gaansama fu den, efuso te den be wani mokisa a tuu leli anga libisama denki di á be e kai anga a Wowtu fu Gadu (Kol. 2:8). Leti enke den fosi Kelesten, a so den tuu Kelesten aini a ten ya e meke moiti fu libi enke fa Beibel taki. A den sani di sikiifi aini a Wowtu fu Yehofa den e leli sama tu.​—3 Yoh. 3, 4.

12. San den sama di e teke fesi aini a olikanisâsi e du, te den si taki den á be e fusutan wan toli bun? Saide den e du a sani ya?

¹² Den Yehofa Kotoigi nai taigi taawan taki den sabi a hii Beibel efuso taki den e fusutan ala sani fu a Beibel. Son leisi u be abi fu kengi a fasi fa u be e fusutan wan toli, bika wi á be e fusutan en bun. Ma a sani ya nai foondoo u, bika Beibel e taigi u taki a saafisaafi Gadu o yeepi u fu fusutan den sani di sikiifi aini a Wowtu fi en (Kol. 1:9, 10). Efu Yehofa á yeepi u fu fusutan wan toli ete, wi abi fu wakiti anga pasensi te enke a yuu doo fu a yeepi u fu fusutan en moo bun (Odo 4:18). Te den baala di e teke fesi kon si taki den á be e fusutan wan toli bun, den nai daaidaai fu kengi a fasi fa den be e si sani. Omen fu den Kelesten keliki fu a goontapu ya e kengi sani aini a keliki fu den, fu di den wani moo sama kon aini a keliki efuso fu di den á wani son sama komoto na a keliki fu den. Ma a olikanisâsi fu Yehofa nai du a sani ya. Te den e kengi sani aini a olikanisâsi, a fu yeepi taawan fu toon wan moo bun mati fu Yehofa, anga fu dini en na a fasi fa Yesesi be taki den bakaman fi en mu dini en (Yak. 4:4). A ná fu di u wani sama kon aini a kemeente fu u meke wi e kengi son wan fu den leli fu u, ma a fu di wi e fusutan den leli fu Beibel moo bun meke wi e kengi a fasi fa u be e si son toli. U lobi den tuu leli fu Beibel.​—1 Tes. 2:3, 4.

13. San na a moo pelensipali manii di tuu Kelesten mu abi? Fa Yehofa Kotoigi e soi a manii ya aini a ten ya?

¹³ A omen bun manii den fosi Kelesten be abi, ma a moo pelensipali wan a be lobi. Yesesi be taki: ‘A so ala sama o sabi taki wi a mi bakaman, te u lobi useefi’ (Yoh. 13:34, 35). Aini a ten ya, Yehofa Kotoigi a hii goontapu e libi na a wan. Nawan taa olikanisâsi á de di lobi denseefi enke a olikanisâsi ya. U nai paati bee. U de enke wan gaan famii di abi ala sowtu nasi sama aini, anga sama fu ala kondee. Winsi son wan fu u pooti efuso gudu toku wi e libi na a wan. Te wi e go a den komakandaa anga den konkelesi, da wi e si fa u lobi useefi. A sani ya e yeepi u fu moo biibi taki a disi na a tuu biibi.

14. Enke fa Kolosesama 3:12-14 e soi, da san a wan pelensipali fasi fa u sa soi taki u lobi useefi?

¹⁴ Beibel taki ‘u mu lobi useefi anga u hii ati’ (1 Peit. 4:8). Wan fasi fa wi e soi taki u lobi useefi, a te wi e gi u baala anga sisa paadon. Wi á mu e holi den na ati te den du wan sani anga u. Wi e soi taki u lobi u baala anga sisa tu, te wi e suku fasi fu yeepi den. Winsi a wan sama di be du wan sani anga i, toku efi i si taki a fanowdu wan sani i mu yeepi en. A so yu e soi  taki i lobi en tuutuu. (Leisi Kolosesama 3:12-14.) Na a lobi di u lobi useefi e soi taki a wi a den tuu Kelesten.

15. Fa Yehofa Kotoigi e soi taki den e waka a den fosi Kelesten baka?

¹⁵ A omen fasi wi e waka a den fosi Kelesten baka. Leti enke den, wi abi kelen owluman, owluman, anga dinali aini a kemeente (Filip. 1:1; Tit. 1:5). Wi e lesipeki a fasi fa Yehofa taki u mu si a toowlibi, a fasi fa u mu si man anga uman libi, anga a fasi fa a wani u si buulu. Boiti dati, efu wan sama nai tyai enseefi enke fa Beibel taki, da wi e puu a sama ya aini a kemeente fu a á poli den taawan.​—Toli 15:28, 29; 1 Kor. 5:11-13; 6:9, 10; Heb. 13:4.

16. San a sani di sikiifi a Efeisesama 4:4-6 e leli u?

¹⁶ Yesesi be taki a omen sama be o taki den neen bakaman, ma gaanse fu den á be o de tuutuu bakaman fi en (Mat. 7:21-23). Boiti dati, Beibel be wasikoi u taki: ‘Aini den lasiti dei a omen sama be o du enke den e dini Gadu’ (2 Tim. 3:1, 5). Ma Beibel e taigi u kiin tu taki a wan tuu biibi namo de di Gadu e fende bun.​—Leisi Efeisesama 4:4-6.

17. Sama a den sama di e dini Gadu enke fa Yesesi be taki aini a ten ya?

¹⁷ Sama a den sama di abi a tuu biibi aini a ten ya? We, u luku a fasi fa Yesesi be taigi den bakaman fi en taki den mu dini Gadu, neen u luku fa den fosi Kelesten be e dini Gadu. Te u luku ala den sani ya, da wi e si kiin taki a den Yehofa Kotoigi wawan e du ala den sani di Yesesi be taki. A wan gaandi wi abi fu de aini a olikanisâsi ya. Wi e si en enke wan gaandi tu taki Yehofa taigi u san a abi a pakisei gi libisama. Neen meke i mu du ala san i poi fi yu á komoto na a tuu biibi.