ALA yali a omen sama di be gwe fika Yehofa e daai kon dini en baka. Ná pikin piisii hemel e piisii te den sama ya daai kon na a kemeente baka (Luk. 15:7, 10). Efi yu a wan fu den sama di daai kon dini Yehofa baka, i sa biibi taki Yesesi, den engel, anga Yehofa e poolo anga i. Ma a ná o makiliki fu toon wan mati fu Yehofa baka, bika a omen tesi o miti i. San a wantu fu den sani di sa miti i? San o yeepi i fu pasa den tesi ya?

Somen fu den baala anga sisa di be gwe fika Yehofa e fii booko-saka ete baka te den daai kon na a kemeente baka. Efi yu a wan fu den sama ya, da kande yu o fusutan fa David be e fii. Winsi fa Yehofa be gi en paadon fu den sani di a be du, toku a be taki: ‘Den fowtu di mi meke ipi te mi á poi tyai den’ (Ps. 40:12; 65:3). Te wan sama di be gwe fika Yehofa daai kon na a kemeente baka, son yuu a omen yali sen e kisi en ete fu den sani di a be du. Isabelle, * di be gwe fika Yehofa moo enke 20 yali taki: ‘A be e taanga gi mi fu biibi taki Yehofa gi mi paadon tuutuu.’ Kande a so yu e fii tu. Ma efi yu e tan pakisei den sani di i be du, a sani ya o meke a moo taanga gi i fu toon Yehofa mati baka (Odo 24:10). Gaantangi, ná meke a sani ya miti i.

Son wan fu den baala anga sisa di be gwe fika Yehofa e booko den ede taki den ná o poi du ala den sani di den mu du fu toon Yehofa mati baka. Baka di den teke baala Antoine aini a kemeente baka, a taki: ‘Mi be e fii enke mi be feegete ala den sani di mi be sabi fosi mi be gwe fika Yehofa.’ A sani ya e meke a taanga gi wan sama di daai kon baka, fu bigin du ala den sani di wan Kelesten mu du fu taanga en biibi.

 Meke u taki wan gaan wataa poli omen sani a wan sama osu. Kande te a sama ya luku den somen wooko di a mu du fu seeka a osu fi en baka, ai si enke noiti a o poi seeka en kon enke fa a be de moo. A letiso a de anga a matifasi fu wi anga Yehofa. Te i du wan gaan sondu, yu anga Yehofa e poli. Kande yu e si enke i ná o poi du ala den sani di i mu du fi yu anga Yehofa toon bun mati baka. Ma Yehofa seeka sani fu yeepi i.

Yehofa e taigi u taki: ‘Gaantangi, kon u meke en bun baka’ (Yes. 1:18). A daai di i daai kon na a kemeente baka, e soi kaba taki i wani meke en bun anga Yehofa baka. Yehofa e poolo anga a moiti di i meke. Pakisei a sani: Yehofa sa luku a yu da a taigi Saatan taki: ‘Luku fa a sama de e meke moiti fu dini mi enke fa mi wani.’ A so yu o yeepi fu soi taki Saatan a wan leiman.​—Odo 27:11.

Yehofa paamisi i taki te i kon koosube neen, enseefi o kon koosube a yu (Yak. 4:8). Ma a daai di i daai kon na a kemeente wawan á sai, yu abi fu du moo. I mu meke moiti fu taanga a matifasi fi yu anga i Dda di de a hemel. Fa i sa du a sani ya?

Winsi on langa i be gwe fika Yehofa, toku i sabi den pelensipali sani fi en ete. I sabi san a paamisi u gi a ten di e kon tu. Den sani ya nai kengi. Ma a fasi fa wi e du sani aini a Kelesten kemeente nownow de taa fasi. A fasi fa wi e peleiki kengi tu. Neen meke i mu e paa anga den taa baala anga sisa, efi i wani sabi fa fu du den sani ya bun. Luku wantu maiki di i sa poti.

Taki anga Yehofa ala yuu. Yehofa e fusutan fa yu e fii. A sabi taki a sa taanga gi i son yuu fu begi en fu di yu e fii enke a á gi i paadon (Rom. 8:26). Toku ai taigi i taki i mu e begi naamo. Te yu e begi, taigi Yehofa saide i wani toon en mati baka (Rom. 12:12). Andrey taki: ‘Mi kosensi be e fon mi, sen be e kisi mi, ma ala leisi te mi be begi, den fii ya be e gwe saafisaafi. Baka wan pisiten a be moo makiliki gi mi fu taki anga Yehofa.’ Efi yu á sabi san i mu taki te yu e begi, da kande i sa luku den begi fu Kownu David di sikiifi aini Psalm 51 anga 65.

Sutudeli Beibel ala yuu. Te yu e sutudeli Beibel, a sani ya o yeepi i fi i biibi kon moo taanga, yu o kon moo lobi Yehofa tu (Ps. 19:7-11). Wan sisa den e kai Felipe taki: ‘Na a sutudeli di mi á be e sutudeli Beibel ala yuu be meke a biibi fu mi kon swaki te neen mi be gwe fika Yehofa. Mi á be wani meke aseefi fowtu ya tu leisi, neen meke mi bigin sutudeli Beibel ala yuu.’ I sa du aseefi sani ya tu. Efi yu á sabi sowtu toli i sa sutudeli, da akisi wan baala efuso sisa di abi ondoofeni fu yeepi i.

Meke mati anga den baala anga sisa aini a kemeente. Son wan fu den sama di daai kon dini Yehofa baka, e booko den ede taki den baala anga sisa o go e si den wan fasi. Larissa taki: ‘Sen be e kisi mi, bika den sani di mi be du be tyai polinen gi a kemeente. A wan hii pisiten mi be e fii so.’ Efu a so iseefi e fii, da gaantangi holi a pakisei taki den owluman, anga den baala anga sisa di lobi Yehofa tuutuu, o piisii fu yeepi i fu toon Yehofa mati baka. (Luku a faki ‘ San owluman sa du?’) Den e poolo taki i daai kon dini Yehofa baka, den wani yeepi i fi i biibi taanga baka.​—Odo 17:17.

San o yeepi i fu meke mati aini a kemeente baka? Yu á mu e misi komakandaa, i mu e go a peleikiwooko ala yuu tu. Fa den sani ya o yeepi i? Felix taki: ‘A kemeente be poolo di den baala teke mi baka. Mi be e fii taki den lobi mi. Den baala anga sisa aini a kemeente yeepi mi fu fii taki Yehofa gi mi paadon tuutuu. Den yeepi mi fu toon en mati baka.’​—Luku a faki ‘ San i sa du?’

Na ala yuu Saatan e suku fu koli i fu du sani di sa poli yu anga Yehofa (Luk. 4:13). Ma efi yu e tan meke moiti fu taanga i biibi, da nawan fu den sani di Saatan e du o abi wini.

Yehofa paamisi u taki: ‘Mi o go suku den sikapu di lasi. Mi o tyai den wan di paati go na ala se, kon a wan baka. Mi o tei deesi gi den wan di kisi mankei. Mi o yeepi den wan di swaki’ (Eseik. 34:16). A omen baala anga sisa Yehofa yeepi kaba fu meke en bun baka anga en. I sa biibi taki a o yeepi i tu.