1. Sowtu gaandi wi abi?

WI E si en enke wan gaandi fu tyai a nen fu Yehofa. A peleiki di wi e peleiki e soi taki a wi a den Kotoigi fu Yehofa tuu. Wi e piisii te u yeepi ‘wan sama di ati bun fu fende teego libi’ fu kon dini Yehofa (Toli 13:48). Leti enke Yesesi, ‘a santa yeye e meke u piisii’ te wi e du a peleikiwooko.​—Luk. 10:1, 17, 21.

2. Fa u sa soi taki wi e si a peleikiwooko enke wan pelensipali sani?

² Wi e si a peleikiwooko enke wan pelensipali sani. Apostel Pawlesi be taigi Timotiyesi taki: ‘Tan poti pakisei a iseefi. Tan poti pakisei na a fasi fa yu e leli sama tu.’ Saide a be taigi Timotiyesi a sani ya? A taa pisi fu a tekisi e taki: ‘Bika te i du so, da yu anga den sama di e aliki yu o man fende a libi’ (1 Tim. 4:16). A peleiki di wi e peleiki sa yeepi sama fu tan a libi. Ala sama di e dini Yehofa mu tan poti pakisei a denseefi efu den wani tan wan mati fu Gadu. Noiti u wani du sani di o tyai polinen gi Yehofa. A fasi fa wi e tyai useefi mu soi tu taki wi e biibi den sani di wi e leli sama (Filip. 1:27). Wi e soi taki wi e poti pakisei a useefi te wi e seeka fosi u go aini a peleikiwooko, anga te wi e akisi Yehofa fu yeepi u fu fende sama di wani aliki.

3. Na ala sama o wani aliki a bosikopu di wi e paati?

³ Son leisi wi e du ala san u poi fu du u peleikiwooko bun, ma toku den sama na a pisi pe wi e tan nai wani aliki. Luku a toli fu Baala Georg Lindal. Na a baala ya wawan too be e peleiki aini Eisikondee fanafu a yali 1929 te anga 1947. A paati omen dunsu buku anga Wakititolen, toku nawan sama á kon a waaleiti. A baala ya taki: ‘Mi be e si kiin taki son wan fu den sama á be lobi a bosikopu di  mi be e paati seefiseefi. Ma taawan be de tu di á be e poti pakisei a mi seefi.’ Bakaten den baala di e tii a wooko be sende spesuutu pionili di be go na a Gileyad sikoo go a Eisikondee. Ma toku a baka 9 yali fosi wantu sama fu Eisikondee kon dini Yehofa. *

4. Fa wi e fii son yuu te sama nai aliki a bosikopu di wi e paati?

⁴ A ná ala yuu sama e wani aliki a bosikopu di wi e paati. Di gaanse fu den Dyu á be wani si Yesesi enke a Mesiyas, ‘a sani ya be e meke Pawlesi kusumi. A be e du en ogii’ (Rom. 9:1-3). Kande i be e sutudeli anga wan sama wan hii pisiten. Winsi fa i meke moiti, toku i si taki a nai go a fesi. A sani ya meke i be abi fu tapu a sutudi. Kande noiti i sutudeli anga wan sama te enke a dopu. Dati wani taki a wan sani i nai du bun, efuso kande Yehofa nai holibaka gi i? Aini a artikel ya wi o luku: (1) On ten wan sama e du en wooko bun. Anga (2) san u mu holi a pakisei te wi e peleiki.

5. Saide a ná ala yuu den sani di wi e du gi Yehofa e go enke fa u wani?

⁵ Beibel taki te wan sama e du san Gadu wani, da ‘ala san ai du o waka bun’ (Ps. 1:3). Ma dati á wani taki na ala sani di wi e du gi Yehofa o go enke fa u wani. Fu di wi abi sondu, meke son yuu sani o miti u di wi á be denki (Yopu 14:1). Son leisi den feyanti fu wi e tapu u fu peleiki enke fa u wani (1 Kor. 16:9; 1 Tes. 2:18). On ten Yehofa e si wi enke sama di e du den wooko bun? Wi o poti pakisei a wantu toli aini Beibel di o piki a akisi ya.

6. On ten Yehofa e si wi enke sama di e du den wooko bun?

⁶ Yehofa e poti pakisei na a moiti di wi e meke fu wooko gi en. Te wi e peleiki fayafaya fu di u lobi Yehofa, da ai piisii anga u kaba winsi sama nai aliki u. Pawlesi be taki: ‘Gadu nai du sani a wan kukutu fasi. Neen meke a ná o feegete a wooko di u du gi en, anga a soi di u soi taki u lobi a nen fi en fu di u yeepi den santawan. Te anga now wi e yeepi den’ (Heb. 6:10). Yehofa nai feegete a taanga wooko di yu e du gi en. A nai feegete a fasi fa i soi taki i lobi en tu, winsi fa kande sani nai go enke fa i wani. A bun fu holi a sani di Pawlesi be taigi den Korentesama a pakisei. A be taigi den taki ‘a wooko di wi e du gi Masaa a ná fu soso’, winsi sama nai aliki u.​—1 Kor. 15:58.

7. San a toli fu apostel Pawlesi e leli u?

⁷ Pawlesi a be wan zendeling di be e du en wooko bun. A omen foto Pawlesi be  opo nyun kemeente. Ma toku di a be de fu taigi sama saide en a wan tuutuu Kelesten, a á be poti pakisei a den somen sama di a be yeepi fu kon dini Yehofa. A taigi den sama di be e kuutu en taki: ‘Mi wooko taanga moo u’ (2 Kor. 11:23). Leti enke Pawlesi, u mu holi a pakisei taki na a moiti di wi e meke fu peleiki gi sama pelensipali gi Yehofa.

8. San u mu holi a pakisei te wi e du a peleikiwooko?

⁸ Yehofa e piisii anga u te wi e du a peleikiwooko. Wan leisi Yesesi be sende 70 bakaman fi en go peleiki. Di den daai kon baka den be e piisii. Saide? Den taigi Yesesi taki: ‘Masaa, te u kai a nen fi i den ogii yeye seefi e du san u taki.’ Ma Yesesi taigi den taki: ‘Wi á mu piisii fu di den ogii yeye e du san u taki, ma u mu piisii fu di u nen sikiifi a hemel’ (Luk. 10:17-20). Yesesi be sabi taki a ná ala yuu sani be o go bun aini a peleikiwooko. Anga ala wi á sabi efu den sama di aliki den a dei de be toon Yesesi bakaman seefi. Neen meke a be wani yeepi den bakaman fi en fu fusutan taki a ná a aliki di sama e aliki u mu meke u piisii. Ma u mu e piisii fu di u sabi taki u wooko taanga gi Yehofa.

9. Enke fa Galasiyasama 6:7-9 e soi, da sowtu wini wi o fende te wi e tan peleiki?

⁹ Efu u tan du a peleikiwooko fu u winsi san e pasa, wi o fende teego libi. Te wi e paati a bun nyunsu fu a Kownukondee, wi e gi a santa yeye a okasi fu yeepi u. Yehofa paamisi u taki winsi noiti u yeepi wan sama fu kon dini en, toku a o gi wi a teego libi solanga wi e du ala san u poi aini a peleikiwooko.​—Leisi Galasiyasama 6:7-9.

10. Saide a ná ala sama e aliki a bosikopu di wi e paati?

¹⁰ Na a fasi fa wan sama ati de, o meke a aliki a bosikopu di wi e paati. A ageisitoli di Yesesi be gi fu a man di be e sai sii, e soi taki a den sii di be kai a bun doti namo be meke nyanyan. Efu a doti á bun, a sii ná o poi meke nyanyan (Luk. 8:5-8). Yesesi be taki den sowtu a sowtu doti aini a ageisitoli ya, a den ati fu den sama di wi e peleiki gi (Luk. 8:11-15). Son sama o aliki u, ma taawan ná o wani aliki u, winsi na aseefi bosikopu wi e paati gi ala den. Ma a wooko fu wi a fu tan paati a Kownukondee bosikopu gi ala sama. Pawlesi be taki ‘ibiiwan sama o fende en paiman gi a wooko di enseefi du’.​—1 Kor. 3:8.

11. Saide Yehofa be poolo anga a wooko di Nowa du, winsi fa nawan sama ná aliki en? (Luku a fowtow a fesise fu A Wakititolen.)

¹¹ Aini den ten di pasa, a omen fu den sama di be e dini Yehofa be e peleiki winsi fa sama á be e aliki den. Beibel e kai Nowa ‘wan peleikiman fu letidu’. A omen yali langa Nowa peleiki (2 Peit. 2:5). Nowa be musu e winsi taki sama be e aliki a bosikopu ya. Ma Yehofa á be taigi en taki a sani ya be o pasa. Di a taigi Nowa fu meke a ark, a taigi en taki: ‘I mu go aini a ark, yu anga den manpikin fi yu anga yu uman, anga den uman fu den manpikin fi i’ (Gen. 6:18). Di Yehofa taigi Nowa on bigi a be mu meke a ark, kande Nowa be fusutan taki sama á be o aliki en ipi, bika peesi á be o de sai gi tyaipi sama (Gen. 6:15). Ma a be ogii moo enke san Nowa be e denki seefi.  Nawan sama ná aliki a bosikopu fu Nowa (Gen. 7:7). Yehofa be e si enke a Nowa á du en wooko bun? Nono. Yehofa be e si Nowa enke wan leti-ati man, bika a be du pilisisi san a be taigi en fu du.​—Gen. 6:22.

12. San be yeepi polofeiti Yelemiya fu piisii winsi fa sama á be e aliki en?

¹² A moo enke fotenti yali langa Yelemiya peleiki gi sama di á be wani aliki en. Boiti dati, den be e soso en. Baka wan pisiten, den sani di den be e du anga en be kon ibi gi en te, neen a be wani fika a wooko di Yehofa be gi en (Yel. 20:8, 9). Ma toku Yelemiya á gi abaa. San yeepi en fu holidoo? A be poti pakisei a tu pelensipali sani. A fosiwan, Yelemiya be e holi a pakisei taki a bosikopu di a be e tyai gi sama be o gi den howpu fu a ten di e kon (Yel. 29:11). Du fu tu sani a taki a Yehofa seefi be teke Yelemiya fu du a wooko ya (Yel. 15:16). Leti enke Yelemiya, useefi e tyai wan bosikopu di e gi sama howpu aini a ogii goontapu ya. Boiti dati, wi a Kotoigi fu Yehofa di e tyai en nen. Te wi e poti pakisei a den tu sani ya, wi o piisii winsi sama nai aliki u.

13. San a ageisitoli fu Yesesi di sikiifi a Malikisi 4:26-29 e leli u?

¹³ Ai teke ten fu wan sama biibi kon taanga. A ageisitoli di Yesesi be gi fu a man di be e sai sii, e yeepi u fu fusutan a sani ya moo bun. (Leisi Malikisi 4:26-29.) Baka di a man ya sai den sii, a á be poi du wan sani fu meke den goo moo gaw efuso fu meke nyanyan moo gaw. Leti enke a man ya, kande iseefi mu wakiti wan pisiten fu si fa a sutudi fi yu e go a fesi. Wi á poi dwengi a Beibelsutudi fu u fi en biibi taanga moo gaw. Neen meke u mu abi pasensi anga den sutudi fu u, bika a denseefi mu luku efu den wani dini Yehofa tuutuu.​—Yak. 5:7, 8.

14. Gi wan ondoofenitoli di e soi taki a ná ala yuu sama o aliki u wantenwanten.

¹⁴ Son peesi pe wi e peleiki, a baka omen yali fosi da wan sama dopu. Luku a toli fu tu sisa den e kai Gladys anga Ruby Allen. Aini a yali 1959, den baala sende den tu sisa ya go enke kowownu pionili a Kibek, wan foto aini Kanada. * Gaanse fu den sama aini a foto ya be e feele san taawan be o taki, neen meke den á be e wani aliki den Kotoigi. Den pilisite seefi be e taigi sama taki den á mu aliki efuso taki anga Kotoigi. Gladys taki: ‘Son leisi a aitin yuu wan dei u be e peleiki osu fu osu sondee taki wan sama aliki u. Te den sama be si u na a baka doo, da den hali den fensee koosi tapu. Ma baka wan pisiten wantu sama bigin aliki u.’ Nownow a dii kemeente de aini a foto ya.​—Yes. 60:22.

15. San 1 Korentesama 3:6, 7 e leli u fu a peleikiwooko?

¹⁵ A omen sama de fanowdu fu yeepi wan sutudi fu go a fesi te enke a dopu. Aini wan fu den artikel di pasa, u be taki na a hii kemeente mu yeepi wan sama fu go a fesi te enke a dopu. (Leisi 1 Korentesama 3:6, 7.) Fa a sani ya e pasa? Kande wan peleikiman miti wan sama di wani sabi moo. Ma baka te en anga a sama ya taki, ai kon si taki a ná o poi go na a sama baka na a dei di a sama wani.  Neen meke ai akisi wan taa peleikiman fu go luku a sama ya. A taa peleikiman e bigin sutudeli Beibel anga a sama. Bakaten ai tyai taa peleikiman fu a kemeente go anga en na a sutudi. Ala den baala anga sisa di ai tyai go na a sutudi ya, e yeepi a sutudi fu sabi moo fu Yehofa. Neen meke te a sama ya dopu bakaten, na ala den peleikiman di be abi wan ana aini yeepi en e piisii.​—Yoh. 4:35-38.

16. San o yeepi i fu piisii winsi yu á poi du ala san i be sa wani du gi Yehofa?

¹⁶ Kande nownow yu á poi du so fuu aini a peleikiwooko moo fu di i kon gaandi, efuso fu di i siki. Toku i sa piisii anga san i poi du. Luku san u sa leli fu Kownu David. Di a be mu go feti anga den sama fu Amelek, 200 fu den man fi en be weli tumisi fu go a feti. Neen meke den be fika a baka fu luku den lai fu den taawan. Baka di den wini a feti, David gi den man ya denseefi gudu di a be gi den man di be go feti (1 Sam. 30:21-25). A letiso a de anga a peleikiwooko di wi e du tu. Winsi yu á poi du ala san i be sa wani du gi Yehofa, toku efu yu e du san i poi, yu o go e piisii ala yuu te wan nyun sama kon dini Yehofa, winsi a ná yu yeepi en fu kon a waaleiti.

17. Saide u mu gi Yehofa daa?

¹⁷ Wi e gi Yehofa daa fu a fasi fa ai libi anga u. A nai akisi u fu du moo enke san u poi du. A sabi taki wi á poi dwengi sama fu kon dini en. Neen meke na a moiti di wi e meke fu yeepi sama ai luku, a nai luku a san den sama e du. Ai leli u tu fu piisii anga a wooko di wi e du (Yoh. 14:12). Solanga wi e du ala san u poi gi Yehofa, u sa biibi taki ai piisii anga u.