1. Fa wan sama di abi tyali-ati e tyai enseefi?

TE yu e pakisei wan sama di abi tyali-ati, da kande yu e pakisei wan sama di e taki switi anga taawan, wan sama di abi bun manii, di lobi yeepi taawan, efuso wan sama di lobi gi sama sani. Kande yu e pakisei a toli di Yesesi be gi fu a Samaliyaman. Winsi fa den Samaliyasama anga den Dyu á be e go, toku a be soi tyali-ati gi wan Dyu di fufuuman be fon. Beibel taki di a si a man ya ‘tyali fi en kisi en’, neen meke a du ala san a poi fu yeepi en (Luk. 10:29-37). A ageisitoli di Yesesi be gi ya, e yeepi u fu poti pakisei na a fasi fa Yehofa e soi sama tyali-ati. A tyali-ati fu Yehofa a wan fasi fa ai soi taki a lobi u. Na ala dei Yehofa e du sani di e soi taki a abi tyali-ati anga u.

2. San a wan taa fasi fa wan sama sa soi taki a abi tyali-ati gi taawan?

² Wan taa fasi fa wan sama e soi taki a abi tyali-ati, a te a nai gi wan sama ala a sitaafu di a mu fende fu wan ogii di a du. Na ala dei Yehofa e soi tyali-ati gi u na a fasi ya. Beibel taki Yehofa ‘nai gi u ala a sitaafu di u mu fende fu den sondu fu u’ (Ps. 103:10). Ma son yuu Yehofa abi fu puu kaasi gi wan sama te a du wan gaan sondu.

3. San wi o luku aini a artikel ya?

³ Wi o luku dii akisi aini a artikel ya. A fosiwan, saide Yehofa e soi tyali-ati gi sama? Du fu tu, a sitaafu di Yehofa e sitaafu sama a wan fasi fa ai soi tyali-ati gi u? Du fu dii, san o yeepi u fu soi tyali-ati leti enke Yehofa? Wi o luku fa Beibel e piki den dii akisi ya.

4. Saide Yehofa e soi tyali-ati gi u?

⁴ Yehofa lobi soi tyali-ati gi sama. Apostel Pawlesi taki a gi di Yehofa gi libisama a howpu fu go tii makandaa a hemel  anga en manpikin, a wan fasi fa ai soi tyali-ati gi u (Efe. 2:4-7). Ma a ná den sama di o go a hemel wawan Yehofa e soi tyali-ati gi. A psalm sikiifiman David be taki: ‘Yehofa e du bun gi ala sama. Ai soi tyali-ati gi ala den sani di a meke’ (Ps. 145:9). Fu di Yehofa lobi libisama, meke na ala yuu ai suku fasi fu soi tyali-ati gi u.

5. Fa Yesesi be du sabi taki en Dda a wan Gadu di abi tyali-ati?

⁵ A wan hii pisiten Yesesi be de makandaa anga Yehofa a hemel, neen meke a sabi ala den fasi fa Yehofa e soi tyali-ati gi u (Odo 8:30, 31). Di Yesesi be de a hemel, a omen leisi a si fa Yehofa soi tyali-ati gi sondu libisama (Ps. 78:37-42). Neen meke di a be de a goontapu, na ala yuu a be e taki fu a fasi fa Yehofa e soi tyali-ati gi sama.

6. Fa Yesesi soi u taki en Dda abi tyali-ati?

⁶ Enke fa u be luku aini a artikel di pasa, da Yesesi be gi a ageisitoli fu a lasi manpikin fu soi taki Yehofa a wan Gadu di abi tyali-ati. A boi ya be komoto a osu neen a go libi wan yayo-libi, te enke a poli ala den gudu di en dda be gi en (Luk. 15:13). Bakaten di a kisi enseefi, a fusutan taki a mu kengi a fasi fa a be e libi. San a dda du di a boi ya daai kon a osu baka? Yesesi taki: ‘Di en dda si a opo uku e kon, tyali kisi en, neen a lon go baasa en, a bosi en.’ A dda fu a boi ya á be soso en efuso ligei anga en. Ma fu di a be lobi en boi, meke a teke en anga piisii aini a famii baka. A wan gaan sondu a boi ya be du. Ma fu di a be soi taki a sondu di a be du be e hati en tuutuu, meke en dda gi en paadon. A dda aini a ageisitoli ya a Yehofa. Yesesi be wani soi u taki en Dda di de a hemel de kabakaba fu gi sama paadon, te den soi taki den sani di den du e hati den.​—Luk. 15:17-24.

7. Fa a fasi fa Yehofa e soi tyali-ati gi u, e soi taki a koni tuutuu?

⁷ Wan fu den taa sani di meke Yehofa e soi tyali-ati gi u, na a koni fi en. Beibel taki: ‘A koni di e komoto a tapu soifili.’ Ai soi u tu taki Yehofa de kabakaba ‘fu soi tyali-ati gi sama. A de kabakaba fu du bun gi taawan’ (Yak. 3:17). Yehofa e soi tyali-ati gi u, leti enke wan mma anga wan dda di lobi den pikin fu den, bika a sabi taki wi e fende wini fu a sani ya (Ps. 103:13; Yes. 49:15). Fu di Yehofa e soi tyali-ati gi wi enke sondu libisama meke wi abi howpu.  A di Yehofa sabi a sani ya, meke te a si taki wan sama wani kengi tuutuu, da ai soi tyali-ati gi en. Ma a sani ya á wani taki na ala yuu Yehofa e soi tyali-ati gi sama. Efu a si taki wan sama e du ogii fuseefi, a nai soi tyali-ati gi a sama de.

8. San den baala abi fu du son yuu? Saide den e du a sani ya?

⁸ Meke u taki wan sama di e dini Yehofa bigin libi wan hululibi. San u mu du? Santa yeye be meke Pawlesi sikiifi taki: ‘Wi á mu paa anga den sowtu sama de’ (1 Kor. 5:11). Efu a fuseefi wan sama e du wan sani di Yehofa á lobi, neen a á wani tapu anga a manii ya, da den baala e puu en aini a kemeente. Den e du a sani ya fu di den wani kibii den taa baala anga sisa di e meke moiti fu du sani enke fa Yehofa wani. Ma son sama fende taki te den puu wan sama aini a kemeente, da Yehofa á soi tyali-ati gi a sama ya. A so a de tuu? Meke u luku a toli ya moo fini.

9-10. Enke fa Hebrewsama 12:5, 6 e soi, da saide u sa taki a puu di den baala e puu son sama aini a kemeente a wan fasi fa Yehofa e soi tyali-ati gi u? Gi wan ageisitoli.

⁹ Te u de a komakandaa, te den baala piki u taki wan baala efuso sisa a ná wan Kotoigi fu Yehofa moo, ala wi e tyali. Son leisi kande wi e akisi useefi efu a be de fanowdu fu puu a sama aini a kemeente. A tyali-ati den baala e soi te den e puu son sama aini a kemeente? Eeye. Te i nai puu kaasi gi wan sama di abi en fanowdu, a omen takuu bakapisi a sani ya e tyai (Odo 13:24). Wan sama di den puu aini a kemeente sa kon dini Yehofa baka? Eeye. A omen baala anga sisa di be du gaan sondu kisi denseefi baka di den baala puu den aini a kemeente. Na a sani ya den be abi fanowdu fu fusutan taki den mu kengi a fasi fa den e libi.​—Leisi Hebrewsama 12:5, 6.

¹⁰ Luku wan ageisitoli di o yeepi u fu fusutan a sani ya moo bun. Meke u taki wan sikapuman si taki wan fu den sikapu fi en siki. A sabi taki efu a wani a sikapu betee, a mu puu en a den taawan mindii. Ma a sabi tu taki sikapu á lobi tan den wawan. Winsi fa a sikapuman sabi a sani ya, toku a puu a sikapu di siki a den taawan mindii. Dati wani taki a lobi a á lobi a sikapu ya? Nono. Ma ai fusutan taki efu a fika a siki sikapu anga den taawan, a siki sa paati. Te a puu a wan di siki a den taawan mindii, da ai kibii den taa sikapu fi en.​—Luku Lefitikesi 13:3, 4 tu.

11. (a) Saide u sa maiki wan sama di den baala puu aini a kemeente anga wan siki sikapu? (b) San wan sama di den puu aini a kemeente mu du efu a wani kon dini Yehofa baka?

¹¹ Wan sama di den puu aini a kemeente, de enke a sikapu di siki. Fu di a sama ya siki a yeyefasi, meke en anga Yehofa a ná mati moo (Yak. 5:14). Leti enke fa son siki e paati makiliki, a so wan sama di e du sani di Yehofa á lobi sa meke taawan go du denseefi sani ya tu efu den e paa anga en. Neen meke den baala abi fu puu sowan sama aini a kemeente. A sani di den e du ya e soi taki Yehofa lobi den taa baala anga sisa di e meke moiti fu du sani enke fa a wani. A sani ya sa yeepi a sama di den puu aini a kemeente tu fu kengi en manii. Te den puu wan sama aini a kemeente, a sa kon a komakandaa ete. A sani ya o yeepi en fu taanga a biibi fi en baka. A sa koboloiki den Wakititolen anga den buku fu u, efuso den taa sani di a olikanisâsi seeka gi u fu taanga u biibi. A sa e luku a JW Broadcasting^® tu. Te den owluman si taki sowan sama e meke moiti, denseefi o taki  anga en fu luku fa den sa yeepi en fu a kon dini Yehofa baka. *

12. San owluman mu du te wan sama á wani kengi?

¹² U mu holi a pakisei taki a te wan sama á soi taki a ogii di a du e hati en, da den baala e puu en aini a kemeente. Den baala sabi taki a puu di den e puu wan sama aini a kemeente a ná wan lawlaw sani. Neen meke den e ondoosuku sani bun fosi den puu wan sama aini a kemeente. Den e meke moiti fu du sani a wan letifasi leti enke Yehofa (Yel. 30:11). Den lobi den baala anga sisa fu den, neen meke den á wani du sani anga den di o meke den anga Yehofa poli. Ma son yuu a moo bun fasi fa den sa yeepi den baala anga sisa fu den, a ten de puu wan sama di á wani kengi aini a kemeente.

13. Saide den be abi fu puu wan Kelesten fu Korente aini a kemeente?

¹³ Luku san apostel Pawlesi be du anga wan Kelesten fu Korente di á be wani kengi a fasi fa a be e libi. A man ya be teke en dda uman, winsi fa a be sabi taki Yehofa be taigi den Islayelisama taki: ‘Efu wan man siibi anga a uman fi en dda, a gi en dda sen. U mu kii a man anga a uman di du a ogii de. A denseefi suku en’ (Lef. 20:11). Pawlesi á taigi a kemeente fu kii a man ya, bika den á be e wooko anga a weiti fu Mosesi moo, ma a taigi den taki den mu puu en aini a kemeente. A fasi fa a man ya be e tyai enseefi be e poli a kemeente. Son baala anga sisa á be e si a sani di a man ya be e du enke wan ogii seefi!​—1 Kor. 5:1, 2, 13.

14. Fa Pawlesi soi tyali-ati gi a man di den be puu aini a kemeente fu Korente? Saide a soi tyali-ati gi a man ya? (2 Korentesama 2:5-8, 11)

¹⁴ Baka wan pisiten, Pawlesi kon yee taki a man ya be soi taki a ogii di a be du be hati en tuutuu, neen a meke moiti kengi. Winsi fa a man ya be gi a kemeente sen, toku Pawlesi taigi den owluman taki den á mu libi ogii anga en. A taigi den taki: ‘U mu gi en paadon, da u toosutu en.’ Saide Pawlesi taigi den a sani ya? A taa pisi fu a tekisi e taki: ‘Efu wi á du a sani ya, a o kusumi te da a lasi-ati.’ Tyali fu a man ya be e kisi Pawlesi. A á be wani a kusumi tumisi. Bika a be sabi taki efu a be e booko en ede tumisi, a sani ya be sa meke a á meke  moiti fu kengi moo.​—Leisi 2 Korentesama 2:5-8, 11.

15. Fa owluman e soi taki den lobi den baala anga sisa fu den tuutuu?

¹⁵ Leti enke Yehofa, den owluman e soi tyali-ati gi den baala anga sisa fu den. Den e puu kaasi gi den te a de fanowdu. Ma efu den si taki wan sama e meke moiti tuutuu, da den e soi tyali-ati gi en. Efu wan sama e du sani di Yehofa á lobi neen a á wani kengi, neen den owluman nai puu kaasi gi a sama ya, da den á lobi en. Ma a den owluman wawan mu soi tyali-ati gi taawan?

16. Enke fa Odo 21:13 e soi, da fa Yehofa o libi anga den sama di nai soi tyali-ati gi taawan?

¹⁶ Ala Kelesten mu meke moiti fu abi tyali-ati enke Yehofa. Saide? Yehofa taki efu u nai soi tyali-ati gi taawan, a ná o aliki den begi fu u. (Leisi Odo 21:13.) Ala u wani Yehofa aliki den begi fu u, neen meke wi e meke moiti fu soi tyali-ati gi taawan leti enke en. Efi i sabi wan Kelesten di sani miti, i mu de kabakaba fu yeepi en. U mu holi a sani di Yakowbesi be taki a pakisei. A be taki: ‘Efu wan sama nai gi taawan paadon, Gadu seefi ná o gi en paadon te a o kuutu en’ (Yak. 2:13). Te wi abi sakafasi, wi o holi a pakisei taki na ala dei Yehofa abi fu soi tyali-ati gi u. Te wi e holi a sani ya a pakisei, da useefi o soi tyali-ati gi taawan. Moomoo gi den sama di daai kon dini Yehofa baka.

17. San e soi taki Kownu David be abi tyali-ati?

¹⁷ A omen toli de aini Beibel di e yeepi u fu si taki a moo bun fu soi tyali-ati gi taawan, pe fu u libi ogii anga den. Luku a toli fu Kownu David. A omen leisi David be soi tyali-ati gi sama. Winsi fa Saul be wani kii en, toku noiti David denki fu du ogii anga a kownu di Yehofa be salufu.​—1 Sam. 24:9-12, 18, 19.

18-19. On ten David á be soi tyali-ati gi taawan?

¹⁸ Ma a ná ala yuu David be e soi tyali-ati gi taawan. Di Nabal be wisiwasi David anga den man fi en di den be akisi en nyanyan, David ati boon te neen a be wani kii Nabal anga ala den manengee aini en osufamii. Koloku meke Abigayeli, a uman fu Nabal, be du sani gawgaw fu tapu David fu a á du a gaan ogii ya.​—1 Sam. 25:9-22, 32-35.

¹⁹ Wan taa leisi baka, polofeiti Natan be gi David wan toli fu wan guduman, di be fufuu a sikapu fu wan pootiman. A sani ya be meke David ati boon te neen a taki: ‘Leti enke fa u sabi taki Yehofa de tuutuu, a so a man ya musu fu dede’ (2 Sam. 12:1-6). David be sabi taki a weiti fu Mosesi be e taki, efu wan sama be fufuu wan sikapu, a be mu gi a sama di abi a sikapu ete fo sikapu enke paiman (Ek. 22:1). Ma Yehofa á be taigi den taki den mu kii sama fu sikapu ede. A wan ibi sitaafu David be wani gi a man ya. Te go taki a sani ya a ná be wan tuu toli seefi. A soi Natan be wani soi en anga a toli ya taki a wan gaan ogii a  be du. A sani di David be du be ogii moo a fufuu di wan sama sa fufuu wan sikapu. Ma Yehofa á be e denki enke David. Winsi fa David á be wani soi tyali-ati gi a guduman, toku Yehofa soi tyali-ati gi en.​—2 Sam. 12:7-13.

20. San a toli fu David e leli u?

²⁰ Luku tu sani di be tapu David fu soi tyali-ati gi taawan, winsi fa a be gwenti du a sani ya. Aini a toli fu Nabal, David ati be boon. Neen meke a be wani kii Nabal anga den man fi en. Aini a toli fu a sikapu anga a guduman, David kosensi be e fon mi en fu a ogii di a be du. Neen meke winsi fa David be lobi soi tyali-ati gi sama, di a yee a toli ya, a á be e denki moo enke fa Yehofa e denki. Te wan sama gaw fu kuutu taawan, a sani de e soi taki en anga Yehofa a ná bun mati moo. Yesesi be taigi den bakaman fi en taki: ‘Wi á mu kuutu sama moo, da Gadu ná o kuutu u. Bika a leti enke fa wi e kuutu sama Gadu o kuutu u’ (Mat. 7:1, 2). Neen meke wi á mu e kuutu u baala anga sisa. Ma u mu soi tyali-ati gi den, leti enke a Gadu fu u.

21-22. San a wantu fasi fa u sa soi tyali-ati gi taawan?

²¹ Te wan sama abi tyali-ati gi taawan tuutuu, ai du san a poi fu yeepi den. Neen meke ala u di e dini Yehofa sa luku fa u sa soi tyali-ati gi den sama aini wi osufamii, gi den baala anga sisa aini a kemeente, efuso gi den sama na a pisi pe wi e tan. A omen fasi de fa u sa du a sani ya. Kande i sa yeepi wan sama anga nyanyan sani efuso i sa yeepi en du son wooko. Efu a wan baala efuso sisa di daai kon dini Yehofa baka, i sa luku fa i sa yeepi en fu taanga a biibi fi en. A peleiki di wi e peleiki a bun nyunsu gi sama, a wan fu den moo bun fasi fa wi e soi taki wi abi tyali-ati gi den.​—Yopu 29:12, 13; Rom. 10:14, 15; Yak. 1:27.

²² Te wi e poti pakisei a taawan, wi o si omen fasi fa u sa yeepi den. Te wi e soi tyali-ati gi taawan, u Dda di de a hemel o piisii anga u, bika neen na ‘a Gadu di e soi tyali-ati gi sama ala yuu’.