A peleikiwooko be e go a fesi, neen meke u be abi moo buku fanowdu. A Wakititolen anga Ontwaakt! wawan den baala a Brooklyn Betel be e doloki, ma denseefi á be e doloki taa buku. A pai den be e pai fu doloki den taa buku. A omen mun wa be e abi buku fu du a peleikiwooko, bika a bodeleifi di be e doloki buku gi u, á be e poi doloki ala den buku di u be abi fanowdu. Neen meke Baala Rutherford akisi Robert Martin, a baala di be e teke fesi a pe u be e doloki den Wakititolen efu useefi á be o poi doloki den taa buku fu u.

Baala Martin e membee ete fa a be fende a sani di Baala Rutherford be taki. Baala Martin taki: ‘Mi be lobi a sani di a be taki, bika dati wani taki u be o abi u eigi peesi fu doloki buku.’ Neen meke den baala be yuu wan peesi a Concord Street aini Brooklyn. Den bai den masini fu doloki den buku tu.

Ma a ná ala sama be lobi a sani di den baala be du ya. A man di abi a bodeleifi pe u be e doloki buku kon na a nyun kantoo fuu, neen a taki: ‘A peesi fu u moin. A den moo bun masini wi abi tu. Ma a dina u naabi sama di sabi wooko anga den masini ya. Baka sigisi mun, a soso booko masini o de ya.’

Baala Martin taki: ‘A be gei enke a sani di a be taki be sa pasa tuu. Ma u be sabi taki Yehofa be de anga u, bika na ala yuu ai yeepi u.’ Baala Martin be abi leti. A wan sani fu 2000 buku u be e doloki ala dei.

A ná buku wawan a foluku fu Yehofa be bigin doloki aini 1922. Den baala be fende wan nyun fasi fu paati a bun nyunsu tu. Den be bigin peleiki a laadiyow. A wan sonde bakadina Baala Rutherford taki a laadiyow fu a fosi leisi. A sani ya be pasa a 26 februari 1922. A be holi a lezing di den e kai ‘Miliyunmiliyun sama di e libi nownow naw dede noiti’. Na a laadiyow sitasiyon  di den e kai KOG a be holi a lezing ya. A sitasiyon ya be de a Los Angeles, California, na Ameekankondee.

A gei a wan sani fu 25.000 sama aliki a lezing ya. A omen sama sende biifi kon gi daa fu den sani di den be leli. Wan fu den sama ya a Willard Ashford, di e tan a Santa Ana, California. A gi Baala Rutherford daa fu a fasi fa a be holi a lezing. A taki: ‘We tan koosube fu a peesi pe a lezing be holi. Ma fu di dii sama aini a osufamii be siki, meke wa be poi doo na a peesi pe a lezing be e holi. Efu aa be de a laadiyow, wa be o poi yee a lezing ya.’

Baka di Baala Rutherford holi a lezing ya, a omen taa lezing den holi a laadiyow. Na a kaba fu 1922 A Wakititolen be sikiifi taki ‘a wan sani fu 300.000 sama yee Kownukondee bosikopu a laadiyow’.

Di den Beibel Ondoosukuman si fa omen sama fende wini fu den lezing di be holi a laadiyow, den seeka sani fu meke wan laadiyow sitasiyon a Staten Island, koosube fu Brooklyn Betel. Den be kai a laadiyow sitasiyon ya WBBR. A omen yali langa den Beibel Ondoosukuman paati a Kownukondee bosikopu anga a laadiyow sitasiyon ya. Ná pikin sama yee a bun nyunsu na a fasi ya.

A be sikiifi aini A Wakititolen fu 15 yuni 1922 taki, wan konkelesi be o holi a Cedar Point, Ohio. A konkelesi ya be o holi a 5 september te anga 13 september 1922. Anga ala piisii den Beibel Ondoosukuman be go na a konkelesi ya.

Di Baala Rutherford be e bali wadaa gi den sama di be kon na a konkelesi ya, a be taki: ‘Mi e biibi taki Masaa o belesi a konkelesi ya. Aw meke a bun nyunsu paati a goontapu a wan fasi di aa be du noiti ete.’ Ala den baala di be holi lezing na konkelesi ya, gi den baala anga sisa taanga-sikin fu peleiki fayafaya.

Feeda 8 september a wan sani fu 8000 sama be de na a peesi pe a konkelesi be e holi. Ala den sama ya be e angii fu aliki a lezing fu Baala Rutherford. ‘ADV’ be sikiifi na a pampila di den be e kai sama. Den be e howpu  taki Baala Rutherford be o taigi den san a sani ya wani taki. A omen fu den be si wan gaan boo koosi lolo a tapu se fu a podium. Arthur Claus be komoto a Tulsa, Oklahoma fu kon na a konkelesi ya. A be fende wan sidon peesi a pe a be sa yee a taki man bun, bika a ten de den á be abi mikrofon ete.

Den á be wani sama puu den alikiman pakisei na a lezing. Neen meke a fesiman be piki ala sama taki den á be o meke den sama di be kon lati kon aini se moo, te Baala Rutherford be o bigin anga a lezing fi en. Baala Rutherford be bigin anga a lezing fi en wan pisiten fu alufu tin mmanten. A bigin a lezing anga a sani di Yesesi be taki a Mateyesi 4:17: ‘A Kownukondee fu Gadu di de a hemel koosube.’ Di a be e taki fu a fasi fa sama be o yee a bosikopu ya, a be taki: ‘Yesesi seefi be taki di aw kon a be o du wan gaan koti wooko, fu tyai den bakaman fi en kon a wan.’

Baala Claus di be sidon aini a komakandaa peesi taki: ‘U be e aliki anga ala u pakisei.’ Ma Baala Claus á be e kaba fii bun. Neen meke a be abi fu komoto aini a komakandaa peesi, winsi fa a be sabi taki aa be o poi kon aini se moo.

Baka wantu miniti, a be bigin fii bun baka. A taki di ai daai go baka a pe a komakandaa be e holi, neen a yee den sama e naki ana. A be wani sabi sai pasa anda, neen meke a subi go na a daki tapu. A 23 yali a be abi a ten de. Den fensee fu a daki be opo, neen meke a be poi yee a lezing kiin.

Ma a ná Arthur wawan be de na a daki tapu. Wantu mati fi en be de na a daki tapu tu. Frank Johnson a be wan fu den. Di a si Arthur a akisi en taki: ‘Yu abi wan pikin nefi a yu?’

Arthur piki en taki: ‘Eeye, mi abi wan ya.’

Frank taigi en taki: ‘Yehofa piki a begi fu u, bika a dyonson ya u kaba begi en fu fende wan  sama di abi wan nefi. Ye si a gaan boo koosi di lolo de? Wan sani sikiifi neen tapu. I mu aliki a kuutubakaa bun. a Di aw taki: “Neen meke u mu peleiki, peleiki”, da u mu koti den fo tetei ya.’

Arthur anga den taawan be de seekaseeka anga den nefi a den ana e wakiti Baala Rutherford. Di Baala Rutherford doo a moo simpan pisi fu a lezing fi en, a bigin taki anga moo faya. A be e taki moo taanga tu. A be musu e bali pikinso di a taki: ‘Soi taki yu a wan tuutuu bakaman fu Masaa. Tan feti fayafaya te enke nawan enkii sani fu Babilon á de moo. Paati a nyunsu na ala se. Goontapu mu sabi taki Yehofa a Gadu, taki Yesesi Kelestesi a Kownu fu den kownu anga Masaa fu den masaa. Tide a wan pelensipali dei. Luku, a Kownu e tii kaba. A yu a den bosikopu man fi en. Neen meke, i mu peleiki, peleiki, peleiki, fu a Kownu anga a Kownukondee fi en.’

Arthur e membee ete taki di den koti a boo koosi, a lolo salla opo. Ná pikin moin a be moin fu si. Den letter ‘ADV’ di be de na a pampila di den be e paati fu kai sama, a wan satu fasi fa den be sikiifi a wowtu ‘peleiki’ aini Ingiisitongo. Na a sani ya be sikiifi na a koosi di be lolo opo. A be sikiifi taki: ‘Peleiki fu a Kownu, anga a Kownukondee fi en.’

A konkelesi di be holi a Cedar Point be gi den baala anga sisa taanga-sikin fu si a peleikiwooko enke wan pelensipali sani. A omen sama be de kabakaba fu du a wooko ya. Wan pionili fu Oklahoma be sikiifi taki: ‘A pisi pe u be e peleiki, sama be lai na ape di be e wooko aini den olo di den be e puu koofaya. Gaanse fu den sama di e wooko aini den olo ya a be pootiman.’ A taki son leisi te den sama be leisi a Ontwaakt!, ‘den be e kee’. A taki: ‘A be e bigi gi u te taki u be poi toosutu den.’

Den Beibel Ondoosukuman be si fa den wowtu di Yesesi taki a Lukasi 10:2 pelensipali. Ai taki: ‘A koti wooko bigi, ma tyaipi wookoman á de.’ Na a kaba fu a yali 1922, den bigin paati a Kownukondee bosikopu fayafaya na ala se.