1. Saide Yesesi taki wi abi Gadu fanowdu? Fa a sani ya sa meke u piisii?

 TE WAN sama e piisii tuutuu, a ná fii ai fii bun fu wan pisiten namo. Ma wan sama di e piisii tuutuu e piisii en hii libi langa. Saide u sa taki a sani ya? Di Yesesi be e holi a lezing na a mongo, a be taki: ‘Koloku fu den sama di sabi taki den abi Gadu fanowdu’ (Mat. 5:3). Yesesi be sabi taki Yehofa, a Sama di meke u, meke wi anga a fii fu dini en. Neen meke a taki wi ‘abi Gadu fanowdu’. Fu di Yehofa na a ‘koloku Gadu,’ meke iniiwan sama di e dini en sa de koloku tu.​—1 Tim. 1:11.

2-3. (a) Enke fa Yesesi be taki, da sama a wantu taa kulu sama di sa piisii tuutuu? (b) San wo luku aini a artikel ya? Saide wo poti pakisei a den sani ya?

² A te ala sani e go bun aini u libi fosi u sa piisii? Nono. Aini a lezing di Yesesi be holi na a mongo, a be taki wan sani di be meke sama foondoo. A be taki ‘den sama di de anga buduufu na ati’ fu di den e pakisei den fowtu di den meke poi de koloku. A taki tu taki winsi omen ogii e miti wan sama a poi de koloku tu. Boiti dati, a taki ‘den sama di den e du ogii anga den fu di den e libi a wan letifasi’, anga ‘den sama di den e gi polinen fi en ede’ poi piisii tu (Mat. 5:4, 10, 11). Ma fai sa de anga piisii winsi den sani ya e miti i?

³ Yesesi be wani soi anga den sani ya taki a ná te wan sama abi wan bun libi fosi da ai piisii. Ma efu wan sama  wani piisii tuutuu, a mu meke moiti fu kon koosube a Gadu (Yak. 4:8). Ma faw sa du a sani ya? Aini a artikel ya, wo poti pakisei a dii sani di u mu du efu u wani piisii tuutuu.

4. San na a fosi sani di u mu du efu u wani piisii tuutuu? (Psalm 1:1-3)

⁴ A fosi sani: Efu u wani piisii tuutuu, u mu e sutudeli Beibel ala yuu. Pakisei a toli ya. Efu libisama anga meti wani tan a libi, den mu e nyan bun. Ma libisama abi Gadu fanowdu tu. A den wawan poi leli sani fu Gadu, meti á poi du a sani ya. Neen meke Yesesi be taki: ‘Nyanyan wawan á poi meke sama tan a libi, ma den mu e du ala san Yehofa taki tu’ (Mat. 4:4). Neen meke dei á mu e pasa da wa leisi efuso sutudeli Beibel. A Psalm sikiifiman be taki: ‘A sama di lobi a weiti fu Yehofa o de koloku. Ai leisi a Weiti fu Gadu saafi dei anga neti.’​—Leisi Psalm 1:1-3.

5-6. (a) San u sa leli aini Beibel? (b) Fa a leisi di we leisi Beibel sa yeepi u?

⁵ Fu di Yehofa lobi u, meke ai soi wi aini Beibel san u mu du, efu u wani piisii. Ai soi u san a abi a pakisei gi libisama. Ai soi u tu san u mu du fu kon koosube neen, anga san u mu du fu a gi u paadon te u meke wan fowtu. Boiti dati, ai soi u san a paamisi wi aini a ten di e kon (Yel. 29:11). We leli den sani ya te we sutudeli Beibel. A sani ya e meke u piisii.

⁶ A omen leli de aini Beibel di u sa wooko anga den aini u libi. Efu we meke  moiti fu du a sani ya, wo go e piisii. Te den polobelema fu a libi e meke ye fii booko-saka, meke moo ten fu leisi Beibel, da i teke ten pakisei sai leisi. Yesesi be taki: ‘A den sama di e yee a wowtu fu Gadu, da den du san a wowtu e taki o de koloku!’​—Luk. 11:28.

7. San o yeepi i fu fende wini te ye leisi Beibel?

⁷ I mu e piisii te ye leisi a Wowtu fu Gadu. Pakisei a toli ya. Kow taki wan sama boli wan nyanyan di i lobi. Ma fu di ye booko yu ede anga wan sani efuso fu di i naabi ten, meke i nyan a nyanyan gawgaw. A di i kaba nyan fosi ye kisi iseefi taki ná pikin gaw i nyan. Efii be teke ten fu nyan a nyanyan, kande a be o moo switi gii. A sani ya sa pasa anga u tu te we leisi Beibel. Son yuu we leisi gaw te da u nai kaba fusutan san u leisi moo. Efii wani piisii tuutuu te ye leisi Beibel, teke ten da i leisi en. Puubei fu si fa den sani di ye leisi e pasa ai fesi. Yee fa den sama e taki. Da i teke ten pakisei sai leisi. Efi ye meke moiti fu du sani na a fasi ya, yo piisii.

8. Fa a ‘koni saafu di u sa fitoow’ e du den wooko? (Luku a maiki tu.)

⁸ Yesesi poti a ‘koni saafu di u sa fitoow’ fu gi u leli na a yuu di wi abi en fanowdu b (Mat. 24:45). Den baala ya e wooko anga a Beibel te den e meke buku fu gi u leli (1 Tes. 2:13). Den leli ya e yeepi u fu kon sabi fa Yehofa e denki fu son sani. Neen meke ala yuu we leisi den Wakititolen, den Ontwaakt anga den artikel a jw.org. We seeka useefi tu gi a mindiiwiki komakandaa anga a komakandaa di e holi sataa efuso sonde. Boiti dati, we luku a JW Broadcasting^® di e kon ala mun. Efu we du ala den sani ya, da wo poi du a taa sani di u mu du efu u wani piisii tuutuu.

9. San a du fu tu sani di u mu efu u wani piisii tuutuu?

⁹ Du fu tu sani: Efu u wani piisii tuutuu, u mu e wooko anga den weiti fu Yehofa. A psalm sikiifiman be taki: ‘Den sama di e lesipeki Yehofa anga den sama di e du san a taki o de koloku’ (Ps. 128:1). Efi ye lesipeki Yehofa i naw du sani di aa lobi (Odo 16:6). Ma yo meke moiti fu holi den weiti fu en di e soi u san bun anga san á bun (2 Kor. 7:1). Efi ye meke moiti fu du sani di Yehofa lobi, da i buuse ogii, yo piisii.​—Ps. 37:27; 97:10; Rom. 12:9.

10. Enke fa Romesama 12:2 e soi, da san u mu du?

¹⁰ Leisi Romesama 12:2. A ná sabi namo u mu sabi taki a Yehofa abi a leti fu taki san bun anga san á bun. Ma u mu wooko anga san a taki tu. Pakisei a toli ya. Aini son kondee, lanti e poti weiti di e soi on taanga i mu lei a wan pasi. Gaanse sama e sabi den sani ya. Ma a na ala sama e wooko anga den weiti ya, den e lei enke fa den wani. A letiso a de anga den weiti fu Yehofa tu. A ná sabi namo u mu sabi den, ma a fasi fa we tyai useefi mu soi taki we biibi taki Yehofa sabi san moo bun gi u (Odo 12:28). A so David be e si a toli ya tu. Neen meke a be taki fu Yehofa taki: ‘A yu e soi mi fa mi mu libi. Ai switi gi mi te mi si taki mi e meke i piisii. Te mi de a yu leti-ana, mi o piisii fu teego.’​—Ps. 16:11.

11-12. (a) Anga san u mu luku bun te wi abi booko-ede efuso te we fii booko-saka? (b) Fa Filipisama 4:8 sa yeepi u te u wani meke piisii?

 ¹¹ Son yuu te wi abi booko-ede efuso te we fii booko-saka, we wani du wan sani fu puu u pakisei a den booko-ede fu u. A sani ya á fowtu, ma toku u mu luku bun fu wa du sani di Yehofa á lobi.​—Efe. 5:10-12, 15-17.

¹² Aini a biifi di apostel Pawlesi be sikiifi gi den Kelesten fu Filipi, a be taigi den taki den mu ‘tan poti pakisei na ala sani di abi wini, ala sani di leti, ala sani di e meke sama lobi taawan, anga ala sani di bun’. (Leisi Filipisama 4:8.) Pawlesi á be e taki fu den sani di we du fu meke piisii aini a tekisi ya. Ma toku den sani di sikiifi ya e yeepi u fu luku bun anga den sani di we du fu meke piisii. Puubei a sani ya: Poti den wowtu ‘singi’, ‘felon’, ‘buku’, anga ‘game’ a den peesi pe ‘ala sani’ sikiifi aini a tekisi. A sani ya o yeepi i fu sabi efu Yehofa lobi den sani di ye du fu meke piisii. U wani du sani enke fa Yehofa e taki (Ps. 119:1-3). A sani ya o yeepi u fu abi wan kiin kosensi. A so wo poi du a taa sani di u mu efu u wani piisii tuutuu.​—Toli 23:1.

13. San a du fu dii sani di u mu du efu u wani piisii tuutuu? (Yohanisi 4:23, 24)

¹³ Du fu dii sani: Efu u wani piisii tuutuu, u mu e si a dini di we dini Yehofa enke a moo pelensipali aini u libi. A Yehofa meke u, neen meke u mu dini en (Openb. 4:11; 14:6, 7). A wani u dini en anga ‘yeepi fu a santa yeye anga a tuu leli’. U mu dini en enke fa a wani. A dati mu de a moo pelensipali sani aini u libi. (Leisi Yoh 4:23, 24.) A sani ya wani taki den sani di we du, mu e kai anga den leli fu Beibel. A te we du a sani ya fosi da Gadu o gi wi en santa yeye. Winsi ye tan aini wan kondee pe lanti tapu a wooko fu u, toku a dini di ye dini Yehofa mu de a moo pelensipali sani gii. A moo enke 100 baala anga sisa fu u de a sitaafu-osu nownow fu a biibi fu den ede. c Winsi fa a sani ya e miti den, toku den e meke ten fu sutudeli, begi, anga fu paati a Kownukondee bosikopu anga taawan. Efu sama e soso i efuso e du ogii anga i fu di ye dini Yehofa, i sa piisii, bika Yehofa o pai i.​—Yak. 1:12; 1 Peit. 4:14.

14. San be pasa anga wan yonkuu baala di e tan aini Tayikistan? Saide den sani ya be miti en?

¹⁴ Den ondoofenitoli fu baala anga sisa e soi taki te wan sama e wooko anga den dii sani di u taki aini a artikel ya, ai piisii tuutuu winsi sai miti en. Luku a toli fu wan baala di den e kai Jovidon Bobojonov. A baala ya e tan aini Tayikistan. Di a be abi 19 yali aa be wani go a suudati. Neen meke den go na a baala ya osu na a 4 oktober 2014, neen den kisi en tyai go sooto. Den be e si a baala ya enke wan ogii man. Na a hii goontapu sama be e taki fu a toli ya. Den be poti a nyunsu taki den be fon mi en fu di den be wani dwengi en fu go a suudati. Den be wani dwengi en fu wei suudati paki tu. Bakaten den leisi sitaafu gi en, neen den sende en go a wan sitaafuman kampu. Ma baka wan pisiten, a peleisidenti fu a kondee meke den losi en. Winsi fa  den sani ya be miti Jovidon, toku a be e piisii. Aa gwe fika Yehofa tu. San be yeepi en? A fu di ala yuu a be e holi a pakisei taki a abi Gadu fanowdu.

15. Fa Jovidon be e sutudeli anga enseefi di a be de a sitaafu-osu?

¹⁵ Di Jovidon be de a sitaafu-osu, a be e sutudeli Beibel ala yuu winsi fa aa be abi Beibel anga den buku fu u. Ma fa a be poi du a sani ya? Den baala anga sisa di be e tyai nyanyan go gi en, be e sikiifi a deiwowtu na a tasi sikin di den be e poti a nyanyan aini. A so a be e poi leisi Beibel ala dei. A be e teke ten pakisei san a leisi tu. Baka di a komoto a sitaafu-osu, a be e taigi den baala anga sisa di á be miti gaan tesi ete taki: ‘A pelensipali fu leisi Beibel anga den buku fu u, bika den sani ya o yeepi u fu kon sabi Yehofa moo bun.’

16. San Jovidon be e pakisei di a be de a sitaafu-osu?

¹⁶ A baala ya be e wooko anga den weiti fu Yehofa. Aa be e pakisei sani di á bun. Aa be e du sani di á bun tu. Ma a be e meke moiti fu du sani di o meke Yehofa piisii. Jovidon be e teke ten pakisei den sani Yehofa meke. Ala mmanten a  be e yee fa den foo e singi. A den foo ya be e weki en. Te neti a be e luku a mun anga den sitali. A taki: ‘Den sani ya be e meke mi piisii. Den be e gi mi taanga-sikin tu.’ Efi ye teke den sani Yehofa meke, anga den sani di de aini a Wowtu fi en fu bigi, a sani ya o yeepi i fu piisii. Aw yeepi i tu fu holidoo winsi sai miti i.

17. Fa den sani sikiifi a 1 Peitilisi 1:6, 7 sa yeepi wan sama di e miti denseefi sani di be miti Jovidon?

¹⁷ Jovidon be e si a dini di ai dini Yehofa enke a moo pelensipali sani aini en libi. A be sabi taki a pelensipali fu aa gwe fika Yehofa. Yesesi be taki: ‘A Yehofa, yu Gadu wawan too i mu dini. Neen wawan i mu du santa wooko gi’ (Luk. 4:8). Den suudati edeman anga den suudati be wani tapu Jovidon fu dini Yehofa. Ma a dei anga neti Jovidon be e begi Yehofa fayafaya fu a yeepi en fu a holidoo. Winsi fa den be e libi ogii anga en, noiti aa gi abaa. Nownow ai piisii, bika a abi wan sani di aa be abi fosi den be sooto en. A sani ya na a taanga di en biibi kon moo taanga baka di a pasa den tesi ya.​—Leisi 1 Peitilisi 1:6, 7.

18. San o yeepi u fu piisii tuutuu?

¹⁸ Yehofa sabi san sa meke u piisii tuutuu. Efi ye meke moiti fu du den dii sani di kai aini a artikel ya, yo piisii tuutuu winsi sai miti i. Iseefi o poi taki: ‘A foluku di abi Yehofa enke en Gadu o de koloku!’​—Ps. 144:15.