1. Sowtu howpu Yehofa gi u?

 YEHOFA gi wi a howpu fu libi fu teego. Son sama abi a howpu fu libi fu teego a hemel (1 Kor. 15:50, 53). Ma gaanse sama abi a howpu fu libi fu teego aini wan paladeisi a goontapu, pe den naw siki efuso tyali moo (Openb. 21:3, 4). Winsi sowtu wan fu den howpu ya wi abi, toku ai meke u piisii.

2. Faw du sabi taki den sani di we howpu o kon tuu? Saide u sa taki a sani ya?

² Te Beibel e taki fu ‘howpu’, da a wani taki ‘a biibi di wan sama e biibi taki bun sani o pasa’. U sabi taki den sani di we howpu o kon tuu, bika a Yehofa seefi taki den sani ya (Rom. 15:13). U sabi taki ala yuu ai du san a paamisi tu (Num. 23:19). Boiti dati, Yehofa abi a makiti fu du den sani di a taki. A wani du den sani ya tu. Neen meke u sa taki den sani di we howpu, a ná sani di useefi denki o pasa. Ma den sani ya, a sani di u sabi taki o pasa tuu.

3. San wo luku aini a artikel ya? (Psalm 27:14)

³ U Dda di de a hemel lobi u. A wani u fitoow en tu. (Leisi Psalm 27:14.) Efu a howpu fu u taanga, wo go e piisii winsi sai miti u. Wo abi deki-ati fu pasa den sani ya tu. Kow luku fa a howpu di wi abi sa kibii u. Ma wo luku fosi fa a howpu ya de enke wan ankaa anga wan suudati-ati di e kibii u. Baka dati, wo luku san u sa du fu meke a howpu ya kon moo taanga.

4. Fa a howpu fu u de enke wan ankaa? (Hebrewsama 6:19)

⁴ Aini a biifi di apostel Pawlesi be sikiifi gi den Hebrewsama, a be taki a howpu fu u de enke wan ankaa. (Leisi Hebrewsama 6:19.) Pawlesi be lobi waka anga sipi, neen meke a be sabi taki wan ankaa e yeepi wan sipi fu aa diipi komoto a pe a de. Wan leisi di a be de aini wan sipi, wan gaan winta be bigin wai. Di a sani ya pasa, a si fa den botoman be iti a ankaa fu a sipi go aini a se, fu a winta á be wai en go naki a siton (Toli 27:29, 39-41). Leti enke fa wan ankaa e holi wan sipi a wan peesi, a so a howpu fu u e yeepi u fu wa gwe fika Yehofa te polobelema di de enke gaan winta e miti u. A howpu fu u e yeepi u fu wa buuya te den sani ya e miti u, bika u sabi taki sani o go bun aini a ten di e kon. Yesesi be taigi u taki sama be o libi ogii anga u (Yoh. 15:20). Neen meke te we teke ten pakisei den sani di Yehofa paamisi u, a sani ya o yeepi u fu wa gwe fika en.

5. Fa a howpu di Yesesi be abi be yeepi en winsi fa a be sabi taki sama be o kii en?

⁵ A howpu di Yesesi be abi be yeepi en fu holidoo winsi fa a be sabi taki sama be o kii en a wan ogii ati fasi. Na a Pinksterfesa fu a yali 33, Peitilisi be taki wan polofeititoli di sikiifi aini a Beibelbuku Psalm. A sani ya be e soi taki Yesesi á be e buuya. A be taki: ‘Mi o abi howpu tu, bika i naw fika mi aini geebi. I naw meke a sama di e tan dini i sikin poli tu. . . . Mi o piisii, bika i fende mi bun’ (Toli 2:25-28; Ps. 16:8-11). Winsi fa Yesesi be sabi taki aw dede, toku a be e biibi anga en hii ati taki Gadu o weki en baka. A be e biibi tu taki a be o daai go neen Dda a hemel baka.​—Heb. 12:2, 3.

6. San wan baala taki fu a howpu di wi abi?

⁶ A howpu di wi abi e yeepi omen baala anga sisa fu holidoo te tesi e miti den. Pakisei a toli fu wan baala den e kai Leonard Chinn, wan baala di be e tan a Ingiisikondee. Na a ten fu a Fosi Goontapu Feti, den be sooto en fu di aa be wani go a suudati. A tu mun langa den be sooto en wawan a wan peesi. Baka dati den be meke ai wooko enke saafu. Bakaten a baala ya sikiifi taki: ‘Den sani di miti mi yeepi mi fu si taki wi abi howpu fanowdu fu man holidoo. U sa waka a Yesesi, den apostel, anga den polofeiti baka. Ma den sani di Gadu paamisi u o yeepi u tu. Ala den sani ya e gi u howpu gi a ten di e kon, den e yeepi u fu holidoo te sani e miti u.’ A howpu di Beibel e gi be de enke wan ankaa gi Leonard. A howpu ya sa de enke wan ankaa gi u tu.

7. Fa a howpu fu u e kon moo taanga te sani e miti u? (Romesama 5:3-5; Yakowbesi 1:12)

⁷ Te polobelema e miti u, we si fa Yehofa e yeepi u. A sani ya e soi u taki ai piisii anga u. Te a sani ya pasa, a howpu fu we kon moo taanga. (Leisi Romesama 5:3-5; Yakowbesi 1:12.) Neen meke u sa taki nownow, a howpu fu u taanga moo a ten di u be yee a bun nyunsu a fosi leisi. Saatan wani u gi abaa te sani e miti u. Ma Yehofa sa yeepi u fu pasa ala den sani di e miti u.

8. Fa a howpu fu u de enke wan suudati-ati? (1 Tesalonikasama 5:8)

⁸ Beibel e maiki a howpu di wi abi anga wan suudati-ati. (Leisi 1 Tesalonikasama  5:8.) Wan suudati e wei wan ati fu kibii en ede aini wan feti. Useefi de aini wan feti anga Saatan. A wani poli a fusutan fu u, neen meke u mu kibii a denki fu u. A omen sani Saatan e koboloiki fu koli u efuso fu meke u denki sani di á bun. Leti enke fa wan suudati-ati e kibii a ede fu wan suudati, a so a howpu di wi abi e kibii a denki fu u fu wa gwe fika Yehofa.

9. Sai pasa anga den sama di naabi howpu?

⁹ A howpu di wi abi fu libi fu teego, e yeepi u fu du sani anga koni. Ma efu a howpu fu u kon swaki, wo du san den sondu fii fu u wani. A sani ya sa meke u nai pakisei a howpu ya moo. Na a sani ya be pasa anga den Kelesten di be e tan a Korinte. Den á be e biibi wan fu den moo pelensipali sani di Gadu paamisi u moo, dati na a weki di aw weki dedesama baka (1 Kor. 15:12). Pawlesi be sikiifi taki den sama di nai biibi taki sama di dede o weki baka, e du namo san den fii (1 Kor. 15:32). A so sama aini a ten ya e libi tu. Fu di den nai biibi den sani di Gadu paamisi u, meke den e du ala sowtu sani di den si enke o meke den piisii. Ma wi anga den sama ya a ná aseefi. We biibi den sani di Gadu taki o pasa aini a ten di e kon. A howpu fu u de enke wan ati di e kibii a denki fu u. Ai yeepi u fu wa denki useefi namo, bika a sani ya sa poli wi anga Yehofa.​—1 Kor. 15:33, 34.

10. Fa howpu e yeepi u fu wa denki sani di á bun?

¹⁰ A howpu di wi abi sa yeepi u fu wa denki taki wa poi du sani fu meke Yehofa piisii. Kande son sama e denki taki: ‘Mia bun sai, neen meke noiti mi naw fende teego libi. Mi naw poi libi enke fa Gadu wani.’ A so wan sani Elifas be taigi Yopu tu. A be taki: ‘Nawan libisama poi de wan kiin sama. Nawan sama di wan uman meke poi libi a wan letifasi. Gadu nai fitoow den santawan fi en. Hemel seefi á kiin gi en’ (Yopu 15:14, 15). Ma a lei Elifas be e lei. Holi a pakisei taki a Saatan wani u denki na a fasi ya. A sabi taki efu we denki so, u naw abi howpu moo. Neen meke u mu meke moiti fu poti pakisei a den sani di Yehofa paamisi u. Holi a pakisei tu taki Yehofa wani u libi fu teego. Aw yeepi u fu fende a libi ya tu.​—1 Tim. 2:3, 4.

11. Saide u mu wakiti anga pasensi fu Yehofa du san a paamisi?

¹¹ Son yuu ai taanga gi u fu biibi den sani di Gadu paamisi u. A ná ala yuu we abi pasensi fu wakiti fu Yehofa du san a paamisi. Ma a fasi fa Yehofa e si ten anga fa we si en a ná aseefi (2 Peit. 3:8, 9). Yehofa o du den sani di a paamisi u, ma aw du den na a yuu di a wani. San o yeepi u fu taanga a howpu fu u, te we wakiti anga pasensi?​—Yak. 5:7, 8.

12. Enke fa Hebrewsama 11:1, 6 e soi, da fa biibi e yeepi u fu a howpu fu u kon moo taanga?

¹² A howpu fu u e kon moo taanga te we meke moiti fu wi anga Yehofa toon moo bun mati, bika neen na a sama di gi u a howpu ya. Beibel e taki efu u wani abi howpu, u mu e biibi taki Yehofa de tuutuu. U mu e biibi tu taki ‘ai pai den sama di e suku en anga den hii ati’. (Leisi Hebrewsama 11:1, 6.) Efu we biibi taki Yehofa de tuutuu, wo moo biibi taki aw du den sani di a paamisi u. Kow luku san u mu du fu wi anga Yehofa toon moo bun mati, bika na a sani ya o meke a howpu fu u kon moo taanga.

13. San o yeepi u fu kon koosube a Yehofa?

 ¹³ Begi Yehofa. Leisi a Wowtu fi en tu. Winsi wa poi si Yehofa, toku wi anga en sa toon mati. Efu u wani taki anga en u sa begi en, bika u sabi taki ai aliki u (Yel. 29:11, 12). We aliki Yehofa te we leisi a Wowtu fi en, anga te we pakisei den sani di u leisi. Te we leisi aini Beibel fa Yehofa be yeepi den sama di be e dini en a fosi, a howpu fu u e kon moo taanga. Ala den sani di sikiifi aini a Wowtu fu Gadu ‘be sikiifi fu leli u wan sani. Den sani ya e yeepi u fu holidoo, den e meke u fende toosutu aini a Wowtu fu Gadu tu’. Na a sani de o meke wi abi howpu.​—Rom. 15:4.

14. Saide u mu e pakisei den sani di Yehofa be du gi den sama a fositen?

¹⁴ Pakisei fa Yehofa du den sani di a be paamisi den sama a fositen. Pakisei san Yehofa be du gi Abalaham anga Sala. Den sama ya á be poi meke pikin moo, bika den be kon gaandi. Ma toku Gadu be paamisi den taki den o meke wan pikin (Gen. 18:10). San Abalaham du di a yee a sani ya? Beibel taki: ‘A be abi a howpu taki a be o toon a dda fu omen foluku’ (Rom. 4:18). Sama be sa si enke a sani ya á be o pasa. Ma toku Abalaham be e biibi taki Yehofa be o du san a paamisi en. A be abi leti fu biibi a sani ya (Rom. 4:19-21). Den toli ya e leli u taki na ala yuu Yehofa e du san a paamisi, winsi we si enke a naw poi du san a taki.

15. Saide u mu pakisei den sani di Gadu du gi u kaba?

¹⁵ Pakisei san Yehofa du gii kaba. Pakisei den wini di i fende fu di Yehofa du son sani di a be paamisi aini a Wowtu fi en kaba. Yesesi be paamisi u taki en Dda a hemel be o gi u san wi abi fanowdu  (Mat. 6:32, 33). Yesesi be paamisi u tu taki Yehofa be o gi u en santa yeye efu wi akisi en (Luk. 11:13). Yehofa du den sani ya kaba. Ma i sa pakisei taa sani di Yehofa du gii kaba tu. A be paamisi i taki a be o gii paadon. A be paamisi i tu taki a be o yeepi i fi ya gwe fika en (Mat. 6:14; 24:45; 2 Kor. 1:3). Te ye pakisei san Gadu du gii kaba, yo moo biibi taki aw du san a paamisi aini a ten di e kon tu.

16. Saide howpu a wan kado di Gadu gi u?

¹⁶ A howpu di wi abi fu libi fu teego, a wan kado di Gadu gi u. We angii fu si a ten de, bika u sabi taki den sani di a paamisi u o pasa tuutuu. A howpu ya de enke wan ankaa, bika ai yeepi u fu wa buuya te tesi e miti u, te sama e libi ogii anga u, efuso winsi u sabi taki u sa dede. Boiti dati, a howpu fu u de enke wan suudati-ati, bika ai kibii u fu wa denki sani di á bun. Ai yeepi u fu du san bun tu. A howpu fu u e yeepi u fu kon moo koosube a Gadu. Ai soi u fa Gadu lobi u tu. We fende wini te we meke moiti fu meke a howpu ya kon moo taanga.

17. Saide u sa piisii anga a howpu di wi abi?

¹⁷ Apostel Pawlesi be taigi den Kelesten fu Rome taki: ‘Piisii anga a howpu di yu abi’ (Rom. 12:12). Pawlesi be e piisii, bika a be sabi taki efu aa gwe fika Yehofa, a be o fende teego libi a hemel. Useefi sa piisii anga a howpu di wi abi tu, bika u sabi taki Yehofa o du san a paamisi u. A Psalm sikiifiman be taki: ‘A sama di abi a Gadu fu Yakopu enke en yeepiman o piisii. A sama di e biibi en Gadu Yehofa o piisii. . . . A nai gwe fika sama.’​—Ps. 146:5, 6.