‘Efu wan fu u á wani go feti anga Faansikondee efuso Ingiisikondee, da ala u fiya o dede’, a so wan Nasi suudati be taigi wan kulu Yehofa Kotoigi na a ten fu a du fu Tu Goontapu Feti. Winsi fa den Nasi suudati be taampu anga den goni koosube, toku nawan fu den baala ya á go aini a feti. Ná pikin deki-ati den be abi. A sani ya e soi fa Yehofa Kotoigi e si feti. Winsi sama wani kii u, toku u nai mumui anga den feti fu a goontapu ya.

1. A WAN KODO FOLUKU BE DE DI BE E DINI GADU A FOSI

Fosi, a wan kulu sama namo Yehofa be teke enke a foluku fi en. Den sama ya a be den Islayelisama. Gadu be taki den Islayelisama ‘be o toon wan apaiti gudu gi en a den taa foluku mindii’ (Ek. 19:5). A be gi den wan moin kondee tu. Neen meke te Gadu be sende den fu go feti anga den taa foluku, a ná sama di be e dini Yehofa den be e kii. a

Aini a ten ya, a sama ‘fu ala sowtu nasi, lo, foluku anga tongo’ e dini Yehofa (Openb. 7:9). Neen meke efu a foluku fu Gadu be o go a feti, da den be o kii den baala anga sisa fu den.

2. YEHOFA BE E SENDE DEN ISLAYELISAMA GO A FETI

Fosi, a Yehofa be e taki on ten den Islayelisama be mu go a feti. A be e taigi den  saide den mu go feti tu. Di Gadu be kuutu den Kaana-ansama, a den Islayelisama a be sende go feti anga den. A be du a sani ya fu di den sama ya be e dini falisi gadu, fu di den be e kii den pikin fu den gi den gadu ya. Den be e libi wan hululibi tu. Yehofa be taigi den Islayelisama taki den be mu kii ala den sama ya puu aini a Paamisi Kondee, bika aa be wani den Islayelisama waka den sama ya baka (Lef. 18:24, 25). Baka di den Islayelisama go aini Paamisi Kondee, Yehofa be e gi den pasi fu feti anga den feyanti fu den fu kibii denseefi (2 Sam. 5:17-25). A ná den Islayelisama seefi be e taki on ten den be wani go a feti. Te den be du a sani ya, sani á be e waka den bun.​—Num. 14:41-45; 2 Kolon. 35:20-24.

Aini a ten ya, Yehofa nai sende sama go a feti moo. Den kondee e go a feti fu di den e suku wini gi denseefi, ma den nai du a sani ya fu di den wani Gadu fende den bun. Den e go a feti tu fu di den e wani teke wan kondee efuso wan foto abaa. Den e du a sani ya tu fu di den wani tyaipi moni, efuso fu di den wani dwengi sama fu denki enke den. Son sama e taki den e go a feti fu di Gadu wani den kibii a keliki fu den. Ma a sani ya a ná tuu, bika aini a ten di e kon fosi Yehofa o feti fu kibii a foluku fi en. Na a feti ya aw kii den feyanti fi en. Den e kai a feti ya Alimakedon (Openb. 16:14, 16). A ná libisama Gadu o teke fu feti a feti ya, a den engel fi en o feti a feti ya.​—Openb. 19:11-15.

3. DEN ISLAYELISAMA Á BE E KII SAMA DI BE E SOI TAKI DEN E BIIBI YEHOFA

Fosi, den suudati fu Islayeli á be e kii den sama di be e soi taki den e biibi Yehofa. A den sama di Yehofa be gi dedesitaafu den be e kii. Kow luku tu toli di e soi fa den be e du a sani ya. Winsi fa Yehofa be sende den Islayelisama fu poli a foto Yerikow, toku den be kibii Rakab anga en osufamii fu di den be e biibi Yehofa (Yow. 2:9-16; 6:16, 17). Bakaten, den Islayelisama á be kii den Gibiyonsama,  bika den be soi taki den be e lesipeki Gadu.​—Yow. 9:3-9, 17-19.

Aini a ten ya, na ala sama den suudati e kii te den go a feti. Den nai fika den sama di e dini Gadu. Boiti dati, son yuu den e kii sama di á sabi nawan sani fu a feti seefi.

4. DEN ISLAYELISAMA BE MU HOLI DEN WEITI DI YEHOFA BE GI DEN TE DEN BE E GO A FETI

Fosi, den suudati fu Islayeli be mu wooko anga den weiti fu Yehofa te den be e go a feti. Son leisi a be e meke den ‘akisi den taa foto fosi efu den wani saka denseefi a den ondoo’ (Deit. 20:10). Boiti dati, Yehofa á be wani den tyobo a kampu fu den. Den á be mu libi wan hululibi tu (Deit. 23:9-14). Den suudati fu den taa kondee be e suwa anga den uman te den be wini wan foto. Ma Yehofa á be e gi den Islayelisama pasi fu du a sani ya. Te den be teke wan foto abaa, a baka wan mun fosi den be sa toow anga den uman fu a foto ya.​—Deit. 21:10-13.

Aini a ten ya, a omen kondee meke mofu fu holi wantu weiti te den e go a feti. Den meke den weiti ya fu kibii den sama fu a kondee fu den. Ma toku den kondee ya nai holi denseefi a den weiti di den meke.

5. GADU BE E FETI GI A FOLUKU EN

Fosi, Yehofa be e feti gi den Islayelisama. Son leisi a be e du wonduu gi den fu den be sa wini wan feti. Fa den Islayelisama be poi wini a foto Yerikow? Yehofa be taigi den fu ‘den bali enke a feti den e go, neen a sikotu booko kai’. A so den be man wini a foto makiliki (Yow. 6:20). Fa den Islayelisama be wini den Amorietsama? ‘Yehofa meke gaan koko eisi kai a den tapu. . . . Den Amorietsama di den koko eisi kii, be ipi moo den Amorietsama di den Islayelisama be kii anga fetihow.’​—Yow. 10:6-11.

TUUTUU KELESTEN E MEKE MOITI FU LIBI BUN ANGA ALA SAMA

Enke faw luku kaba, da a ten ya anga a ten fu den Islayelisama a ná aseefi. Ma a ná a sani ya namo meke u nai go a feti. Wan fu den taa sani di meke u nai go a feti, a fu di Gadu be taki aini den lasiti dei den sama di e dini en ‘naw leli feti moo’. A sani ya e soi kiin taki den á be o go e go a feti (Yes. 2:2-4). Boiti dati, Yesesi be taki den bakaman fi en á be o ‘mumui anga a goontapu’. Den á be o teke se aini den feti fu a goontapu ya.​—Yoh. 15:19.

Yesesi be taigi den bakaman fi en taki a ná feti den á mu feti namo. Ma a be taigi den tu taki den be mu kengi den manii di be sa meke den holi sama na ati, efuso go feti anga sama (Mat. 5:21, 22). Boiti dati, a be leli den bakaman fi en taki den mu libi bun anga ala sama. A taigi den taki den mu lobi den feyanti fu den.​—Mat. 5:9, 44.

Faw sa du a sani di Yesesi taki ya? Kande u nai denki fu go a feti, ma kande we si wan sama aini a kemeente enke u feyanti. Efu a sani ya e pasa, u mu meke moiti fu du sani taa fasi.​—Yak. 4:1, 11.

U nai mumui aini den feti fu a goontapu ya. Ma we meke moiti fu libi bun anga ala sama. We meke moiti fu lobi useefi tu (Yoh. 13:34, 35). We meke moiti fu wa mumui anga den feti fu a goontapu ya, ma we wakiti a ten pe Yehofa paamisi taki feti naw de moo.​—Ps. 46:9.