1-2. (a) San den tiiman aini son kondee e du anga a foluku fu Yehofa? San den baala anga sisa e du te a sani ya miti den? (b) Saide u sa piisii te sama e libi ogii anga u? (Luku a fowtow a fesise fu A Wakititolen.)

 AINI moo enke 30 kondee a wooko fu den Kotoigi tapu nownow. Aini son wan fu den kondee ya, lanti sooto wantu baala anga sisa fu u. San den baala anga sisa ya du meke den sooto den? Gi Yehofa, den á du nawan sani. Lanti sooto den fu di den e leisi Beibel, fu di den e taigi taawan san den e biibi, anga fu di den e kon makandaa anga taawan fu dini Gadu. Boiti dati, den sooto den fu di den nai teke se aini a goontapu ya. Winsi fa den gaan tesi ya e miti den baala anga sisa, toku den nai gwe fika Yehofa. Ná pikin piisii a sani ya e meke den piisii.

² Kande i si son wan fu den baala anga sisa ya a fowtow. A lafulafu den e de a den fowtow ya, bika den sabi taki Yehofa e piisii anga den fu di den á gwe fika en (1 Kolon. 29:17a). Yesesi be taki: ‘Den sama di den e du ogii anga den fu di den e libi a wan letifasi, o de koloku . . . U mu poolo, u mu piisii, bika wo fende wan gaan paiman.’​—Mat. 5:10-12.

3. Enke fa Toli 4:19, 20 e soi, da san den apostel du di sama be wani tapu den fu taki fu Yesesi? Saide den du a sani ya?

³ Den sani di e miti den baala anga sisa aini den kondee pe lanti tapu a wooko fu u, be e miti den apostel tu.  Sama be e libi ogii anga den fu di den be e taki fu Yesesi. A omen leisi den kuutuman fu a moo hei kuutu-osu fu den Dyu be taigi den taki ‘den á mu taki efuso leli sama sani fu Yesesi moo’ (Toli 4:18; 5:27, 28, 40). San den apostel du di den taigi den a sani ya? (Leisi Toli 4:19, 20.) Den be sabi taki a sama di be wani den ‘peleiki gi ala sama’, be abi makiti moo den tiiman. A be wani den ‘paati a bun nyunsu fu Kelestesi finifini’ (Toli 10:42). Neen meke Peitilisi anga Yohanisi teke deki-ati neen den taigi den taki den á be o tapu fu taki fu Yesesi, bika den be wani aliki Gadu moo libisama. A leti enke den be e taigi den tiiman ya taki: ‘U denki taki wi abi makiti moo Gadu?’

4. Enke fa Toli fu den apostel 5:27-29 e soi, da san den apostel du? Faw sa waka a den baka?

⁴ Kelesten aini a ten ya sa waka a den apostel baka, bika den be de kabakaba fu ‘aliki Gadu moo libisama’. (Leisi Toli 5:27-29.) Baka di den apostel taki a sani ya, den wipi den te a wipi bika den á be wani gwe fika Yehofa. Ma ‘di den apostel komoto na a kuutu osu fu den Dyu, den be e piisii, bika Gadu be si den enke sama di fiti fu teke sen fu Yesesi ede’. Neen meke den tan peleiki go doo.​—Toli 5:40-42.

5. San u mu akisi useefi?

⁵ Fu di den apostel du a sani ya, meke kande ye akisi iseefi taki: Fa den apostel be poi aliki Gadu moo libisama, ma na aseefi yuu den be poi ‘saka denseefi a lanti ondoo’? (Rom. 13:1) Pawlesi be taki u mu ‘saka useefi a lanti anga den sama di abi makiti ondoo’. Ma faw sa du a sani ya, winsi faw nai gwe fika Yehofa?​—Tit. 3:1.

6. (a) San a wowtu lanti aini Romesama 13:1 wani taki? Faw mu si den? (b) San den tiiman fu a goontapu ya á poi du?

⁶ Leisi Romesama 13:1. Aini a tekisi ya, a wowtu ‘lanti’ wani taki den sama di abi a makiti fu tii taawan aini wan  kondee. Ala Kelesten mu aliki den tiiman ya. Bika a den tiiman ya e solugu taki sani waka bun aini wan kondee. Son yuu den e kibii a foluku fu Gadu tu (Openb. 12:16). Neen meke we pai lantimoni, we gi den gaandi, we lesipeki den tu (Rom. 13:7). Ma a fu di Yehofa e gi den tiiman ya pasi fu tii, meke den poi tii taa sama. Yesesi be soi taki a sani ya tuu di Pilatesi be e poti akisi gi en. Pilatesi be taki a be sa kibii a libi fu Yesesi, efuso a be sa meke sama kii en. Ma Yesesi be taigi en taki: ‘Ya be o abi nawan makiti a mi tapu efu a ná Gadu a tapu be gi yu en’ (Yoh. 19:11). Pilatesi á be poi du ala san a wani winsi fa a be abi makiti. A letiso a de anga den tiiman fu a ten ya tu.

7. On ten u mu aliki den tiiman? San den tiiman ya mu holi a pakisei?

⁷ Kelesten e meke moiti fu du san den tiiman e taki, solanga den weiti fu den nai tapu den fu du san Gadu wani. Ma efu den e akisi u fu du wan sani di Gadu e buuse, efuso efu den e tapu u fu du san Gadu wani, u naw aliki den. Aini son kondee den e akisi den yonkuman fu go a suudati. b Son yuu den e tapu a wooko fu u. Den nai wani u leisi Beibel efuso den buku fu a olikanisâsi fu u. Den nai wani u peleiki efuso go a komakandaa tu. Ma Gadu o akisi den tiiman di e libi ogii anga a foluku fi en faantiwowtu fu den sani di den e du. Ai luku den sani di den e du.​—Peleik. 5:8.

8. Saide Yehofa anga den tiiman fu a goontapu ya a ná aseefi?

⁸ Winsi fa den tiiman fu a goontapu ya abi tyaipi makiti, toku wan sama de di abi makiti moo den. A Yehofa na a sama di abi ala makiti. A omen leisi Beibel e kai en ‘a Moo Gaan Gadu’. ​—Dan. 7:18, 22, 25, 27.

9. San Daniyeli si aini wantu fisyun?

⁹ Polofeiti Daniyeli be si wantu fisyun di be e soi taki Yehofa abi makiti moo ala den taa tiiman. Daniyeli be si fo gaan ogii meti di be e soi go a den tiiman fu a ten di pasa. Den tiimakiti ya a be Babilon, Mediya anga Persiya, Giikikondee anga Rome. Den ogii meti ya be e soi go a Ingiisikondee anga Ameekankondee tu, tu tiimakiti di be o de aini a ten fu u ya (Dan. 7:1-3, 17). Baka dati Daniyeli si Yehofa sidon a wan kownusutuu aini wan kuutu-osu a hemel (Dan. 7:9, 10). A sani di a polofeiti ya si baka dati mu de enke wan wasikoi gi den tiiman fu a ten ya.

10. Enke fa Daniyeli 7:13, 14, 27 e soi, da sama Yehofa gi a makiti di a puu a den tiiman fu goontapu ana? San a sani ya e soi u fu Yehofa?

¹⁰ Leisi Daniyeli 7:13, 14, 27. Gadu puu a makiti a den tiiman fu a goontapu ya ana, neen a gi en a taa sama di abi moo makiti anga di a sabi taki o du den wooko moo bun. Sama a den sama ya? Wan fu den sama ya ‘be gei wan manpikin fu libisama’. A sama ya a Yesesi Kelestesi. Den taa sama a ‘den santawan fu a Moo Gaan Gadu’, dati a den 144.000 sama di o tii ‘fu teego, eeye, fu alaten’ (Dan. 7:18). A sani ya e soi kiin taki a Yehofa na a Moo Gaan Gadu, bika neen wawan too abi a makiti fu du a sani ya.

11. San Daniyeli be taki di e soi taki Yehofa abi makiti moo ala taa sama a goontapu?

¹¹ Den sani di Daniyeli si aini den fisyun  e kai anga den sani di a be taki fosi a si den fisyun ya. Daniyeli be taki: ‘A Gadu fu hemel e puu kownu, poti taa kownu.’ A be taki tu taki: ‘A Moo Gaan Gadu na a tiiman fu a kownukondee fu goontapu. A sama a wani ai gi a kownukondee ya’ (Dan. 2:19-21; 4:17). A tuu taki Yehofa be e puu tiiman efuso poti tiiman a wooko? Eeye a tuu.

12. Gi wan toli di e soi fa Yehofa be e puu kownu a fosi.

¹² A omen leisi Yehofa soi taki a abi makiti moo den tiiman fu a goontapu ya. Wo luku dii leisi di a du a sani ya. Di a foluku fu Yehofa be de enke saafu a Egepte, a omen leisi a kownu be koti mofu taki a naw sende den gwe. Ma Yehofa fii a foluku fi en, neen a kii a kownu ya aini a lebi se (Ek. 14:26-28; Ps. 136:15). A kownu fu Babilon, Kownu Belsasar, be holi wan gaan fesa pe ‘a du sani di a Masaa fu hemel á lobi’. Boiti dati, pe fu a gi Yehofa gaandi, ‘a gi gaandi a den gadu di meke anga gowtu anga solufu’ (Dan. 5:22, 23). Ma Gadu gi a heimembee man ya sen. ‘Aseefi neti de’ den kii Belsasar, neen den Mediya anga den Persiyasama teke a kownukondee fi en (Dan. 5:28, 30, 31). Kownu Herodes Agripa a fosiwan, be meke sama kii apostel Yakowbesi. Baka dati a meke den sooto Peitilisi fu den be sa kii en bakaten. Ma Yehofa á gi en a okasi fu a du san a be wani, bika ‘a engel fu Yehofa naki en’, neen a dede.​—Toli 12:1-5, 21-23.

13. Gi wan toli di e soi fa Yehofa wini omen kownu di be kon makandaa fu feti anga a foluku fi en.

¹³ Winsi omen tiimakiti kon a wan, toku Yehofa abi makiti moo den. A be soi a sani ya di 31 kownu fu den Kaana-ansama be kon makandaa fu feti anga Islayeli. Di den kownu ya kon feti anga den, Yehofa meke den Islayelisama wini den. Boiti dati, a meke den teke omen pisi fu a paamisi kondee abaa (Yow. 11:4-6, 20; 12:1, 7, 24). Yehofa be meke den Islayelisama wini Kownu Ben-hadad anga 32 taa kownu fu Siriya tu.​—1 Kow. 20:1, 26-29.

14-15. (a) San Kownu Nebukadnesar anga Kownu Dariyus be taki fu Yehofa? (b) San a Psalm sikiifiman be taki fu Yehofa anga a foluku fi en?

 ¹⁴ A omen leisi Yehofa soi taki a abi makiti moo ala den taa tiiman. Wan leisi, a kownu fu Babilon, Kownu Nebukadnesar be e gafa enseefi fu a ‘kaakiti’ di a abi. A be taki neen ‘sama mu gafa, neen den mu gi gaandi’. Di a du a sani ya Yehofa meke a law, bika neen a be mu gi gaandi. Di a kownu ya kisi enseefi a ‘gafa a Moo Heiwan’, bika a be kon si taki ‘a tiimakiti fi en e tii fu teego’. Nebukadnesar taki: ‘Sama á de di poi tapu Yehofa fu du san a wani’ (Dan. 4:30, 33-35). Di Daniyeli be soi taki a nai gwe fika Yehofa, Yehofa puu en aini wan lew-olo. Di a sani ya pasa, Kownu Dariyus be taki: ‘Sama mu lesipeki a Gadu fu Daniyeli, den mu feele en, bika neen na a libilibi Gadu di o tan fu teego. A kownukondee fi en e tan fu ala ten, a o tii fu teego.’​—Dan. 6:7-10, 19-22, 26, 27.

¹⁵ A Psalm sikiifiman be taki: ‘Yehofa buuya den sani di den foluku be wani du. A fanya den foluku te neen den á poi du san den be abi a pakisei.’ A be taki tu taki: ‘A foluku di abi Yehofa enke den Gadu o de koloku. A foluku di a teke enke en gudu o de koloku’ (Ps. 33:10, 12). Den sani ya e soi u kiin saide wa mu gwe fika Yehofa.

16. San u sabi taki o pasa na a ten fu ‘a gaan banowtu? Saide u sa biibi a sani ya? (Luku a fowtow.)

¹⁶ U sabi san Yehofa du aini a ten di pasa. Ma san aw du aini a ten di e kon? U sa biibi taki na a ten fu ‘a gaan banowtu’, Yehofa o kibii den sama di nai gwe fika en (Mat. 24:21; Dan. 12:1). Te Gok fu Magok, den kondee di o bonduu kon a wan, o kon feti anga a foluku fu Gadu,  Yehofa o kibii den sama fi en. Winsi na ala den 193 kondee di de aini a Verenigde Naties o kon feti anga u, toku u sabi taki den naabi makiti enke a Moo Gaan Gadu anga den engel fi en. Yehofa paamisi u taki: ‘Mi o soi taki a mi na a sama di abi a makiti fu tii. Mi o santa a nen fu mi. Mi o meke omen foluku sabi sama a mi. Mi o meke den sabi taki a mi a Yehofa.’​—Eseik. 38:14-16, 23; Ps. 46:10.

17. San o pasa anga den kownu fu goontapu anga den sama di nai gwe fika Yehofa?

¹⁷ A te Gok o kon feti anga a foluku fu Gadu, a feti fu Alimakedon o bigin. Yehofa o kii ‘ala den kownu fu goontapu’ na a feti ya (Openb. 16:14, 16; 19:19-21). Ma aw ‘kibii a libi fu den sama di nai gwe fika en’. A den sama ya wawan o libi fu teego a goontapu.​—Ps 97:10.

18. San omen Kelesten du aini den ten di pasa? Saide den du a sani ya? (Daniyeli 3:28)

¹⁸ Aini den ten di pasa, a omen Kelesten soi taki den lobi Yehofa winsi fa a sani ya be sa meke den lasi den libi efuso go a sitaafu-osu. Den Kelesten ya á be wani gwe fika Yehofa. Den be de enke de dii Hebrew boi di Yehofa be puu aini a onfuu fu di den á be gwe fika en.​—Leisi Daniyeli 3:28.

19. San Yehofa o luku te aw kuutu a foluku fi en? San u mu du?

¹⁹ A Psalm sikiifiman be soi saide a pelensipali fu wa gwe fika Yehofa. A be taki: ‘Ai bali kai hemel anga goontapu, fu a sa kuutu a foluku fi en. Ai taki: “Tyai den sama di nai gwe fika mi, kon a mi”’ (Ps. 50:4, 5). David seefi be taki: ‘Yehofa lobi te sani e waka a wan letifasi, neen meke noiti aw gwe fika den sama di nai gwe fika en. Aw kibii den fu ala ten, ma aw kii den pikin fu den ogii sama’ (Ps. 37:28). A moo bun sani di u sa du, a fu tan a Yehofa se. Winsi sai miti u, noiti wa mu gwe fika en. Efu we du a sani ya, wo fii enke a Psalm sikiifiman di be taki: ‘Den sama di nai gwe fika i, o bali fu piisii.’​—Ps. 132:9.