1. San gaanse sama aini a ten ya e du te den yee den leli fu Beibel? (Odo 1:20, 21)

 AINI omen kondee, we si fa den baala anga sisa e taampu e peleiki a peesi pe tyaipi sama e pasa. A lafulafu den e de te den e du a wooko ya. Kande iseefi du a peleikiwooko na a fasi ya tu. Kande a sani ya meke i pakisei a sani di sikiifi a Odo, di e taki fa tuutuu koni e bali kai sama a sitaati. (Leisi Odo 1:20, 21.) Den sani di sikiifi aini Beibel anga den buku fu u a ‘tuutuu koni’, bika den sani ya na a koni fu Yehofa. A den sani ya o yeepi sama fu fende teego libi. We piisii te wan sama teke wan fu den buku fu u. Ma son sama nai wani leli sani fu Beibel. Taawan e lafu u te we peleiki, bika den e si enke Beibel nai teli gi a ten fu u ya moo. Son sama e kuutu den sama di e wooko anga den leli fu Beibel, bika den fende taki den leli ya e kuutu sama sosokaali. Den fende taki ala sama abi a leti fu libi enke fa den wani. Ma winsi fa sama e denki so, toku Yehofa e gi sama a okasi ete fu fende a koni di de aini Beibel. Fa ai du a sani ya?

2. Pe u sa fende tuutuu koni aini a ten ya? Fa gaanse sama e tyai denseefi nownow?

² Wan fasi fa Yehofa e meke sama yee a koni fi en, a te den e leisi Beibel. Nownow beina ala sama sa fende wan Beibel leisi aini wan tongo di den e fusutan. Boiti dati, fu di Yehofa e belesi a wooko di a olikanisâsi fi en e du,  meke den buku fu u de aini moo enke 1000 tongo. A den sama di e du den sani di den leli o fende wini fu den sani ya. Ma gaanse sama nai aliki Yehofa. Te den mu du wan sani, den e wooko anga san denseefi e denki efuso san taa sama e taki. Den e soso den sama di e dini Yehofa, fu di den e wooko anga san Beibel e taki. Aini a artikel ya, wo luku saide sama e du sani na a fasi ya. Ma wo luku fosi faw sa fende a koni fu Yehofa.

3. On ten u sa taki wan sama koni tuutuu?

³ Wan sama di koni á sabi sani namo, ma den sani di a sabi e yeepi en fu du sani di e tyai wini gi en. Ma tuutuu koni a ná dati namo. Beibel taki: ‘A lesipeki di wan sama e lesipeki Yehofa, na a bigin fu koni. A te wan sama abi a koni fu a Moo Santawan da abi fusutan’ (Odo 9:10). Neen meke te u mu du wan pelensipali sani, u mu luku fosi fa Yehofa, ‘a Moo Santawan’ e denki. We du a sani ya te we sutudeli Beibel anga den buku fu a olikanisâsi fu u. Efu we du sani na a fasi ya, we soi taki u koni tuutuu.​—Odo 2:5-7.

4. Saide a Yehofa wawan poi meke u koni tuutuu?

⁴ A Yehofa wawan too poi meke u koni tuutuu (Rom. 16:27). Saide u sa taki a Yehofa na a Sama pe koni komoto? A fosi sani, a taki a sabi den sani di de a hemel anga goontapu bun, bika neen meke ala sani (Ps. 104:24). Du fu tu, a taki ala den sani di Yehofa e du e soi taki a koni tuutuu (Rom. 11:33). Du fu dii, a taki den sama di e wooko anga san Yehofa taki e fende wini fu den sani ya ala yuu (Odo 2:10-12). Efu u wani de sama di koni tuutuu, u mu e fitoow Yehofa anga u hii ati. U mu e wooko anga san a taki aini ala san we du tu.

5. Sai pasa fu di sama nai wani biibi taki a Yehofa wawan poi meke sama koni tuutuu?

⁵ A omen sama di we miti aini a peleikiwooko e taki fa den lobi den sani di de a goontapu. Den sani ya e moin gi den, ma toku den nai biibi taki a wan sama meke den. Den e si enke den sani ya kon fu denseefi. Son sama e biibi taki wan Gadu de, ma toku den e du sani enke fa den wani, bika den fende taki den leli fu Beibel a ná gi a ten ya moo. San na a bakapisi fu den sani ya? Sani e go bun aini a goontapu nownow? I si enke den sama di e du sani enke fa den wani e piisii tuutuu? Den abi wan howpu gi a ten di e kon? Den sani di e pasa e soi taki a sani di Beibel taki a tuu. A taki: ‘A koni fu libisama, a sabi fu den efuso den sani di den e taki, á poi tapu Yehofa fu du san a wani’ (Odo 21:30). A sani ya e gi u taanga-sikin fu tan akisi Yehofa fu a gi u koni. Ma saide omen sama nai wani aliki Yehofa?

6. Enke fa Odo 1:22-25 e soi, da sama a den sama di nai wani aliki Yehofa?

⁶ A omen sama nai aliki te ‘tuutuu koni e bali kai sama a sitaati’. Beibel e paati den sama ya aini dii kulu: Den sama di ‘naabi ondoofeni’, den sama di e ‘soso taawan’, anga den ‘donman’. (Leisi Odo 1:22-25.) Wo luku now saide den sama ya nai wani aliki san Gadu e taki. Wo luku tu san u mu du fu wa waka a den baka.

7. Saide den sama di ‘naabi ondoofeni’ nai kengi?

 ⁷ Den sama di ‘naabi ondoofeni’, a den sama di taawan sa koli makiliki. Den sama ya e biibi ala san sama e taki (Odo 14:15). We miti den sowtu sama ya aini a peleikiwooko son yuu. Pakisei den sama di e biibi den kelikifesiman anga den politikiman. Son wan fu den sama ya e dyombo te den kon sabi taki ná pikin koli den sama ya be e koli den. Ma den sama di naabi ondoofeni di kai a Odo 1:22 nai wani biibi taa sani, bika den lobi den falisi sani di den e leli (Yel. 5:31). Den sama ya e du san den wani. Den nai wani leli sani fu Beibel, bika den á wani du san ai taki. Wan uman a Kibek, aini Kanada di e go a keliki be taigi wan Kotoigi taki: ‘Efu a pilisite fu we koli u, neen abi a fowtu, a ná wi.’ A omen sama e denki enke a uman ya. Wa wani de enke den sama ya.​—Odo 1:32; 27:12.

8. San o yeepi u fu kon moo koni?

⁸ Beibel e gi u taanga-sikin fu wa de enke sama di naabi ondoofeni, ma a ‘fasi fa we denki mu soi taki wi a gaansama’ (1 Kor. 14:20). Te we du sani enke fa Beibel e taki, wo moo abi ondoofeni. Boiti dati, aw yeepi u fu kon moo koni. U naw abi tyaipi booko-ede tu. Efii wani sabi efi ye wooko anga den leli fu Beibel, pakisei fai du sani aini den ten di pasa. Kande ye sutudeli Beibel, efuso e go a komakandaa wan pisiten kaba, ma ya dopu ete. I sa pakisei sai tapu i fu dopu. Efii dopu kaba, i poi meke moiti fu toon wan moo bun leliman? Den sani di ye du e soi taki ye biibi den sani di ye leli aini Beibel? Ye libi anga sama enke fa Yesesi be o libi anga den? Efii si taki i sa du wan fu den sani ya moo bun, i sa pakisei den weiti fu Yehofa, bika den e ‘meke a sama di naabi ondoofeni kon koni’.​—Ps. 19:7.

9. Fa den sama ‘di e soso taawan’ e soi taki den á wani aliki Gadu?

⁹ Du fu tu kulu sama di nai wani aliki Gadu, a den sama ‘di e soso taawan’. Son yuu te we peleiki we miti den sama ya. Den e fii bun te den e soso sama (Ps. 123:4). Beibel taki aini den lasiti dei, sama be o lai di be o go e soso taawan (2 Peit. 3:3, 4). Leti enke den pai fu Lot, son sama aini a ten ya nai biibi taki Gadu o poli a goontapu ya (Gen. 19:14). A omen sama e soso den sama di e libi enke fa Gadu wani. Den e du a sani ya fu di den e wani ‘du den ogii di den fii fu du’ (Yud. 7, 17, 18). A so den sama di daai baka gi a olikanisâsi, anga den sama di á wani aliki Yehofa e tyai denseefi tu.

10. Enke fa Psalm 1:1 e soi, da san u mu du efu wa wani de sama di e soso taawan?

¹⁰ San u mu du efu wa wani de sama di e soso taawan? Wa mu e paa anga sama di e kuutu fu ala pikinpikin sani. (Leisi Psalm 1:1.) A sani ya wani taki wa mu aliki efuso leisi sani fu sama di daai baka gi a biibi. Efu wa luku bun, u sa bigin kuutu fu ala pikinpikin sani di Yehofa e du, efuso den sani di a olikanisâsi taki u mu du. Neen meke u mu akisi useefi taki: ‘Na ala yuu mi e kuutu te sani kengi aini a olikanisâsi? Mi e suku fowtu a den baala di e teke fesi?’ Efu u si taki wi abi a manii ya, u mu meke moiti kengi wanten, da Yehofa o piisii anga u.​—Odo 3:34, 35.

11. Fa ‘den donman’ e si den weiti fu Yehofa?

¹¹ Du fu dii kulu sama di nai wani aliki Gadu, a ‘den donman’. Den sama ya don  fu di den á wani du sani enke fa Gadu weiti e taki. Den e du san denseefi wani (Odo 12:15). Den sama ya nai wani aliki Yehofa, a Sama di abi ala koni (Ps. 53:1). Te u miti den sowtu sama ya aini a peleikiwooko, den e taki goofu anga u fu di we du sani enke fa Beibel taki. Ma u nai aliki den, bika den sani di den e taki naw meke sani waka bun gi u. Beibel taki: ‘Tuutuu koni a wan gaandi di bigi tumisi gi wan donman. A naw fende a okasi fu taki a den gaan doo fu a foto’ (Odo 24:7). Den sani di den sama ya e taki a soso sani. Neen meke Yehofa taigi u taki ‘wa mu mosoo anga sama di don’.​—Odo 14:7.

12. San o yeepi u fu wa du sani enke den sama di nai aliki Gadu?

¹² Den sama di e dini Yehofa á de enke den sama di á lobi den weiti fu Gadu, bika we meke moiti fu du san den weiti fi en e taki. Ma u mu meke moiti fu moo lobi den weiti ya. Wan sani di o yeepi u, a te we luku a libi fu den sama di nai du sani enke fa Gadu wani, anga a libi fu den sama di e meke moiti fu du sani enke fa a taki. Te ye du a sani ya, yo si san e miti den sama di á wani aliki Yehofa. Yo si tu taki i libi e waka moo bun fu di ye du sani enke fa Gadu wani.​—Ps. 32:8, 10.

13. Yehofa e dwengi sama fu du san a taki?

¹³ Yehofa e gi ala sama a okasi fu kon sabi den weiti fi en. Ma a nai dwengi nawan sama fu holi den weiti ya. Ai soi u sai pasa anga den sama di á wani du sani enke fa a taki (Odo 1:29-32). Den sama di nai aliki Yehofa ‘o fii a bakapisi fu den sani di den e du’. A fasi fa den e libi o tyai omen polobelema kon gi den. Boiti dati, Yehofa o poli den bakaten. Ma a paamisi den sama di e aliki en taki: ‘Sani o waka bun gi den sama di e aliki mi. Den naw feele taki ogii o miti den.’​—Odo 1:33.

14-15. San we leli fu Odo 4:23?

¹⁴ Te we du sani enke fa Gadu e taki, we fende wini ala yuu. Enke faw be luku kaba, da na ala sama Yehofa e gi a okasi fu kon sabi den weiti fi en. We si a sani ya tu te u luku den sani di sikiifi aini a Beibel buku Odo. Na ala yuu we fende wini te we wooko anga den sani di sikiifi aini a buku ya. Meke u luku fo sani di sikiifi aini a buku ya.

¹⁵ Kibii yu ati. Beibel e taki: ‘Fu ala den sani di yu abi, a yu ati na a moo pelensipali sani di i mu kibii, bika na ape a libi de’ (Odo 4:23). Pakisei sai mu du fu kibii i tuutuu ati. I mu e nyan bun, i mu e du sport, ya mu e du sani di sa meke i  siki tu. A letiso a de anga a ati di Beibel e taki fi en. Efu u wani kibii wi ati, u mu e leisi Beibel. U mu e seeka useefi fu gi piki te u go a komakandaa. U mu e peleiki ala yuu tu. Boiti dati, wa mu e luku efuso aliki sani di á bun. Wa mu e paa anga sama di nai aliki Gadu tu, bika den sani ya sa meke u denki sani di á bun.

16. Saide we fende wini fu a sani di sikiifi a Odo 23:4, 5?

¹⁶ I mu e tifeedi anga san yu abi. Beibel e taigi u taki: ‘Ná wooko taanga fu di i wani kon gudu. . . . I towe ain fu luku a gudu, ma a á de ape moo. Fosi i denki, ai kon abi mapaapi enke agaa, da ai fee gwe a tapu’ (Odo 23:4, 5). A makiliki sama sa lasi den gudu di den abi. Ma toku a omen sama e wani meke moni namonamo. Neen meke den e du omen sani di e booko den osufamii, di e gi den polinen, efuso di meke den siki (Odo 28:20; 1 Tim. 6:9, 10). Ma den koni sani di Yehofa e leli u, e yeepi u fu wa si moni enke a moo pelensipali sani. A sani ya e yeepi u fu wa giili, ma fu tifeedi anga den sani di wi abi.​—Peleik. 7:12.

17. Faw sa du a sani di sikiifi a Odo 12:18?

¹⁷ I mu e denki fosi i taki wan sani. Efu wa luku bun, u sa taki sani di sa hati taawan. Beibel taki: ‘Te wan sama nai denki fosi a taki, da a leti enke ai sutu taawan anga wan fetihow. Ma a mofu taki fu wan koniman de enke deesi’ (Odo 12:18). Te u nai taki sama sani efuso e kuutu taawan, wi anga den o poi libi na a wan (Odo 20:19). Efu u wani gi sama taanga-sikin anga den sani di we taki, u mu e leisi Beibel da u pakisei den sani di u leisi (Luk. 6:45). Te we du a sani ya, den sani di we taki o de enke wan ‘peesi pe koni e komoto’.​—Odo 18:4.

18. Fa Odo 24:6 sa yeepi u fu du a peleikiwooko moo bun?

¹⁸ Wooko anga den sani di a olikanisâsi e taki. Beibel e taigi u taki: ‘Te i suku koni, yo man feti wan feti fu wini en. Efu yu abi omen sama di e poti ya pasi, yo  wini a feti’ (Odo 24:6). Fa a tekisi ya e yeepi u fu toon moo bun peleikiman anga leliman? Te we peleiki, u nai du sani enke faw wani. We wooko anga den sani di a olikanisâsi taki. Te u de a den komakandaa, we si fa taawan di abi ondoofeni e gi leli. A sani ya e yeepi u fu sabi faw mu taki anga sama aini a peleikiwooko. Boiti dati, a omen buku anga felon a olikanisâsi fu Yehofa meke fu yeepi sama fu fusutan Beibel moo bun. I sabi fa fu wooko anga den sani ya fu yeepi sama?

19. Fa ye si den leli di Yehofa e gi u? (Odo 3:13-18)

¹⁹ Leisi Odo 3:13-18. Ai bigi gi u taki we fende leli di e yeepi u fu koni tuutuu. Den leli ya de aini a Wowtu fu Gadu. Wa sabi faw libi be o de efu wa be sabi den sani ya. Aini a artikel ya, u si wantu fu den leli ya aini a buku Odo. Ma a ná aini a buku ya wawan u sa fende den leli ya. A omen taa leli de aini Beibel di sa meke u koni tuutuu. U mu meke moiti fu wooko anga den leli ya aini u libi. A omen sama nai si den leli ya fu wan sani, ma we biibi taki ‘den sama di e holi den taanga o de koloku’.