1. San wan engel be taki? Fa a sani di a engel taki e meke u fii?

 KOW taki wan engel be e taki anga i, i be o aliki en? Aini a ten ya wan engel e taki anga ‘sama fu ala nasi, lo anga tongo’. San a engel ya e taki? Ai taki: ‘U lesipeki Gadu, da u gi en gaandi . . . U dini a Sama di meke hemel anga goontapu’ (Openb. 14:6, 7). A Yehofa na a tuu Gadu. Neen meke neen wawan u mu dini. Ná pikin bigi ai bigi giw taki Yehofa giw a gaandi fu dini en aini a ageisi tempel fi en.

2. San na a ageisi tempel fu Yehofa? (Luku a faki di den e kai ‘ San aa wani taki’.)

² San na a ageisi tempel? Pei sa fende moo sani fu a toli ya? A ageisi tempel a ná wan tuutuu osu, ma a den sani di Yehofa sete fu u sa dini en enke fa a wani. A du a sani ya di a meke Yesesi kon dede giw. Apostel Pawlesi be taki fu den sani di Yehofa sete aini a biifi di a be sikiifi gi den Hebrew Kelesten di be e tan a Yudeya. b

3-4. Saide Pawlesi be e booko en ede anga den Kelesten fu Yudeya? Fa a yeepi den?

³ Saide Pawlesi be sikiifi wan biifi gi den Hebrew Kelesten fu Yudeya? Fu tu pelensipali sani. A fosi sani a fu di a be wani gi den taanga-sikin. Gaanse fu den Kelesten ya be kiya aini a Dyu biibi. Kande den Dyu keliki fesiman be e soso den fu di den toon Kelesten. Saide? Bika den Kelesten fu a ten de á be abi wan tempel pe den be e go fu dini Gadu. Altari á be de fu den tyai ofaandi tu. Boiti  dati, pilisite á be de fu yeepi den. Den sani ya be sa meke den fii booko-saka. Den biibi be sa swaki tu (Heb. 2:1; 3:12, 14). Kande sowan fu den be e denki fu go na a Dyu biibi baka.

⁴ Du fu tu sani, a taki Pawlesi be wani soi den Hebrew Kelesten taki den á be e meke moiti fu fusutan nyun sani. Den sani ya a den ‘taanga nyanyan’ di de aini a Wowtu fu Gadu (Heb. 5:11-14). Kande sowan fu den be e holi a Weiti fu Mosesi ete. Pawlesi be soi den Kelesten ya taki den ofaandi di a Weiti be taki den mu tyai á poi fii den fu sondu. Neen meke a Weiti á be e ‘teli moo’. Bakadati Pawlesi leli den wantu dipi toli. A membee den taki a dede di Yesesi kon dede giw, meke wi abi wan ‘moo bun howpu’ di e yeepi u fu kon ‘koosube a Gadu’.​—Heb. 7:18, 19.

5. Saw mu fusutan fu a Beibel buku Hebrewsama? Saide u mu fusutan a sani ya?

⁵ Pawlesi be soi den Hebrew baala anga sisa fi en taki a fasi fa den e dini Yehofa enke Kelesten, bun moo a fasi fa den be e dini en aini a ten di pasa. A fasi fa den Dyu be e dini Gadu be ‘e soi go a den sani di be mu kon ete, bika a tuutuu sani a Kelestesi’ (Kol. 2:17). A fasi fa den Dyu be e dini Gadu be e soi go a wan moo bun fasi faw be o dini Gadu. Dati na a ageisi tempel. Yehofa sete a ageisi tempel fu u sa fende paadon fu sondu anga fu u sa dini en enke fa a wani. Neen meke u mu fusutan san na a ageisi tempel. Wo luku fa den Dyu be e dini Gadu. Wo luku tu fa den Kelesten e dini Gadu enke fa a sikiifi aini a Beibel buku Hebrewsama. Wo si taki a fasi fa den Dyu anga den Kelesten e dini Gadu a ná aseefi. A sani ya o yeepi u fu fusutan san na a ageisi tempel, anga san a wani taki giw.

6. Fa den be e koboloiki a tabernakel?

⁶ A fasi fa den Dyu be e dini Gadu. Pawlesi be taki fu a tabernakel di Mosesi be meke aini a yali 1512 fosi Kelestesi. (Luku a kaita ‘A fasi fa den Dyu be e dini Gadu​—A fasi fa Kelesten e dini Gadu.’) A tabernakel a be wan sowtu tenti di den Islayelisama be e tyai go na ala den peesi pe den be e tan. A wan sani fu 500 yali langa den koboloiki a tabernakel fosi den bow a tempel a Yelusalem  (Ek. 25:8, 9; Num. 9:22). Den be e kai a tabernakel a ‘komakandaa tenti’ tu, bika na ape ala den Islayelisama be e kon a wan fu dini Gadu. Na ape den be e tyai ofaandi gi en tu (Ek. 29:43-46). A tabernakel be e soi go a wan moo bun sani di be mu kon ete. Dati na a fasi fa den Kelesten be o dini Gadu.

7. On ten a ageisi tempel sete?

⁷ A fasi fa Kelesten e dini Gadu. A tabernakel be ‘e soi go a den sani di de a hemel’. Pawlesi taki ‘a tenti [efuso a tabernakel] e soi san be o pasa aini a ten ya’ (Heb. 8:5; 9:9). A sani ya e soi taki a ten di Pawlesi be sikiifi a biifi gi den Hebrew Kelesten, a ageisi tempel be sete kaba. A ageisi tempel sete aini a yali 29, di Yesesi dopu. Aini a yali de Gadu salufu en anga santa yeye tu. A so a bigin wooko gi Yehofa enke ‘gaan pilisite’ aini a ageisi tempel. c​—Heb. 4:14; Toli 10:37, 38.

8-9. Enke fa Hebrewsama 7:23-27 e soi, da sai soi taki den gaan pilisite fu Islayeli anga Gaan Pilisite Yesesi a ná aseefi?

⁸ A fasi fa den Dyu be e dini Gadu. Na a gaan pilisite be e taki anga Gadu gi a foluku. A Aron a be a fosi gaan pilisite fu Islayeli. A Yehofa seefi be poti en enke gaan pilisite di den be gi a tabernakel abaa a Gadu. Ma enke fa Pawlesi be taki, da ‘a omen sama be mu toon gaan pilisite baka makandaa, bika te wan fu den be dede, da wan taa sama be abi fu teke en peesi enke gaan pilisite’. d (Leisi Hebrewsama 7:23-27.) Boiti dati, den gaan pilisite be abi sondu. Den be mu tyai ofaandi fu akisi paadon fu den sondu fu den. Neen meke den gaan pilisite fu Islayeli anga Gaan Pilisite Yesesi a ná aseefi.

⁹ A fasi fa Kelesten e dini Gadu. Yesesi Kelestesi na a Gaan pilisite fu u. Neen na a ‘futuboi di e wooko aini a tuutuu tenti. A ná libisama meke a tenti ya, ma a Yehofa seefi’ (Heb. 8:1, 2). Pawlesi taki ‘fu di [Yesesi] e libi fu teego meke aw du a pilisite wooko fi en fu alaten’. A taki ‘aa tyobo enseefi anga nawan sani. Aa de enke den sama di e du ogii’. Boiti dati, aa be abi fu tyai ofaandi ala dei gi den sondu fi en enke den gaan pilisite fu Islayeli. Meke u poti pakisei now na a altari. Wo si taki den ofaandi di den Dyu be e tyai anga du fu den Kelesten a ná aseefi.

10. San den ofaandi di den be e boon na a kopoo altari wani taki?

¹⁰ A fasi fa den Dyu be e dini Gadu. Wan kopoo altari be de na a doomofu fu a tabernakel pe den be e boon meti gi Yehofa enke ofaandi (Ek. 27:1, 2; 40:29). Ma den ofaandi ya á be e meke den fii tuutuu fu sondu (Heb. 10:1-4). Den meti di den Islayelisama be e tyai enke ofaandi e soi go a wan ofaandi di be o fii libisama tuutuu fu sondu.

11. Sowtu altari tapu Yesesi gi enseefi enke wan ofaandi? (Hebrewsama 10:5-7, 10)

¹¹ A fasi fa Kelesten e dini Gadu. Yesesi be sabi taki Yehofa be sende en kon a goontapu fu gi en libi enke wan paiman fu fii libisama (Mat. 20:28). Neen meke  di Yesesi dopu, a gi enseefi abaa a Yehofa fu du a wani fi en (Yoh. 6:38; Gal. 1:4). A ageisi altari pe Yesesi gi enseefi abaa a Yehofa enke ofaandi, wani taki ‘a wani’ fu Gadu. Yesesi gi en sikin enke wan ofaandi ‘wan leisi namo’ fu fii ala den sama di e biibi en fu teego. (Leisi Hebrewsama 10:5-7, 10.) Wo luku now san den sani di de aini a tabernakel wani taki.

12. Sama be sa go aini den kambaa fu a tabernakel?

¹² A fasi fa den Dyu be e dini Gadu. A tabernakel anga a tempel di den be meke bakaten a Yelusalem be paati aseefi fasi. A be paati a tu pisi, ‘a Santa Peesi’ anga ‘a Moo Santa Peesi’. A wan gaiden be paati den tu kambaa ya (Heb. 9:2-5; Ek. 26:31-33). Wan gowtu kandaa tiki, anga wan altari pe den be e boon sumee switi ofaandi be de aini a Santa Peesi. Wan tafaa be de aini tu pe den be e poti beele a Gadu fesi. A den ‘pilisite di be salufu’ wawan be sa go aini a Santa Peesi fu du pilisite wooko (Num. 3:3, 7, 10). Aini a Moo Santa Peesi a santa kedee fu a kuudei be de. A sani ya be e soi taki Yehofa be de ape (Ek. 25:21, 22). Na a gaan pilisite wawan be sa go aini a Moo Santa Peesi. A be e du a sani ya wan leisi aini wan yali, na a dei di a be o akisi paadon gi a foluku (Lef. 16:2, 17). Ala yali a be e go  aini a Moo Santa Peesi anga a buulu fu den meti fu akisi paadon gi en eigi sondu, anga a sondu fu a foluku. Ma bakaten Yehofa koboloiki a santa yeye fu soi kiin san den sani di be de aini a tabernakel wani taki tuutuu.​—Heb. 9:6-8. e

13. San a Santa Peesi anga a Moo Santa Peesi wani taki tuutuu gi Kelesten?

¹³ A fasi fa Kelesten e dini Gadu. A wan kulu Kelesten namo salufu anga santa yeye. Den sama ya toon Gadu manpikin. Den 144.000 salufuwan o tii makandaa anga Yesesi enke pilisite a hemel (Openb. 1:6; 14:1). A Santa Peesi fu a tabernakel e soi taki Gadu teke den salufu Kelesten enke en manpikin, winsi fa den de a goontapu ete (Rom. 8:15-17). A Moo Santa Peesi fu a tabernakel wani taki hemel pe Yehofa e tan. ‘A gaiden’ di e paati a Santa Peesi anga a Moo Santa Peesi e soi go na a sikin fu Yesesi. Fu di Yesesi be abi wan libisama sikin ete, meke aa be poi go a hemel fu tii enke Gaan Pilisite aini a ageisi tempel. Di Yesesi gi en sikin enke wan ofaandi gi libisama, a opo a pasi gi ala den salufu Kelesten fu go a hemel. Denseefi mu dede fosi den o fende den pai a hemel (Heb. 10:19, 20; 1 Kor. 15:50). Baka di Yesesi weki baka, a go aini a Moo Santa Peesi fu a ageisi tempel. Na ape ala den salufu Kelesten o go tu fu tii makandaa anga en.

14. Enke fa Hebrewsama 9:12, 24-26 e soi, da saide a fasi fa we dini Yehofa aini a ageisi tempel bun moo a fasi fa den Islayelisama be e dini en?

¹⁴ A Yehofa seeka sani fu Yesesi dede giw. Neen seeka sani fu a de enke u pilisite tu. We si kiin taki a sani di Yehofa seeka ya bun moo a wooko fu den pilisite fu Islayeli. Bika aini a ten fu den Islayelisama, na a gaan pilisite be e go anga a buulu fu den meti di den be tyai enke ofaandi na a Moo Santa Peesi. Ma a Yesesi seefi go a Yehofa fesi ‘a hemel’ na a Moo Santa Peesi. A so a gi a libi di a be abi enke libisama fu fii u fu sondu. (Leisi Hebrewsama 9:12, 24-26.) A dede fu Yesesi o fii u fu sondu fu teego. Ma fai sa dini Yehofa aini a ageisi tempel winsi yu abi a howpu fu libi a hemel efuso goontapu?

15. Sama be e wooko aini a dyali fu a tabernakel?

¹⁵ A fasi fa den Dyu be e dini Gadu. A wan dyali namo a tabernakel be abi. Wan sikotu be lontu a dyali ya. Aini a dyali ya den pilisite be e du den wooko fu den. Wan gaan kopoo altari pe den be e boon ofaandi be de aini a dyali. Wan kopoo wataa beki pe den pilisite be e wasi den ana anga den futu be de ape tu (Ek. 30:17-20; 40:6-8). A tempel di den be meke bakaten be abi wan gaan dyali tu. Aini a dyali ya den sama di á be de pilisite be e go fu dini Gadu.

16. Sama e wooko a den tu dyali fu a ageisi tempel?

¹⁶ A fasi fa Kelesten e dini Gadu. Fosi den salufu Kelesten go a hemel fu tii makandaa anga Yesesi enke pilisite, den e wooko fayafaya aini a pikin dyali fu a ageisi tempel. A gaan kopoo wataa beki di be de aini a tabernakel anga a tempel, be e membee den anga ala taa Kelesten taki den mu e libi wan kiin libi. A be e  membee den taki den mu dini Yehofa enke fa a wani tu. A ‘gaan kulu’ a den sama di abi a howpu fu libi a goontapu ya. Den e holibaka gi den salufu Kelesten. Pe den sama ya e dini Yehofa? Apostel Yohanisi be si den ‘na a kownusutuu fu Gadu fesi’. Dati na a gaan dyali a goontapu ya. ‘Den e du santa wooko gi [Gadu] dei anga neti aini a tempel’ (Openb. 7:9, 13-15). Ai bigi giw taki wi abi a gaandi fu dini Yehofa aini a ageisi tempel fi en.

17. Sowtu ofaandi u sa tyai gi Yehofa?

¹⁷ Aini a ten ya ala Kelesten abi a gaandi fu tyai ofaandi gi Yehofa. We du a sani ya te we koboloiki u ten, u kaakiti anga den sani di wi abi fu holibaka gi a Kownukondee fu Gadu. Enke fa Pawlesi be taigi den Hebrew Kelesten, daw mu ‘gafa Gadu ala yuu. A so we tyai wan ofaandi gi Gadu anga u mofu, te we meke sama sabi a nen fi en’ (Heb. 13:15). We soi taki we teke en fu bigi taki u sa dini Yehofa, te we gi en den moo bun sani di wi abi.

18. Enke fa Hebrewsama 10:22-25 e soi, da san wa mu meke sipowtu anga en? San wa mu feegete noiti?

¹⁸ Leisi Hebrewsama 10:22-25. Na a kaba fu a biifi di Pawlesi be sikiifi gi den Hebrew Kelesten, a be taki fu wantu sani di wa mu meke sipowtu anga den. Wantu fu den sani ya na: Begi ala yuu, paati a howpu di wi abi anga taawan, den komakandaa, anga a gi di u mu e gi useefi taanga-sikin ‘o moo we si a dei fu [Yehofa] e koosube’. Na a kaba fu a Beibel buku Openbaring, a engel fu Yehofa taki: ‘Dini Gadu’ (Openb. 19:10; 22:9). Noiti ya mu feegete den sani dii leli fu a ageisi tempel fu Yehofa. A mu e bigi gii taki i sa dini Yehofa aini a ageisi tempel fi en.