Sani di leisiman akisi
A mana anga wan sowtu mamafoo wawan den Islayelisama be abi fu nyan?
A 40 yali langa den Islayelisama be de aini a sabana. Aini den yali de, a mana den be e nyan (Ek. 16:35). Yehofa be sende wan sowtu mamafoo gi den tu leisi fu nyan tu (Ek. 16:12, 13; Num. 11:31). Boiti dati, den be e fende wantu taa sani e nyan.
Yehofa be e tyai a foluku fi en go a peesi pe den sa teke boo pikinso. Te den be de a den peesi ya, den be e fende kiin wataa anga omen sani fu nyan (Num. 10:33). Wan fu den peesi ya a Elim. Twalufu wataa peti anga seibitenti palmbon be de a Elim (Ek. 15:27). A musu de taki den palmbon ya a be dadelbon. Wan buku taki ‘a palmbon ya e goo a omen peesi. Na a moo pelensipali bon aini a gaan sabana di e meke nyanyan gi omen miliyun sama. Den e puu fatu anga en tu. Boiti dati, sama sa go kibii neen ondoo gi a san’.—Plants of the Bible.
Den Islayelisama be musu e teke boo a taa moin peesi aini a sabana tu. Aini a ten ya wan fu den peesi ya den e kai Feiran koo peesi. A Feiran koo peesi a wan pisi fu a Feiran saka peesi. Wan buku (Discovering the World of the Bible) taki a saka peesi ya ‘langa wan sani fu 130 kilomeiti. Neen na a moo langa saka peesi. A moo moin tu. Na a moo balinen saka peesi na a Sinai pisi kondee’. A buku e taki tu taki efu wan sama be o bigin waka a pe a saka peesi bigin go miti a ze, aw abi fu waka wan sani fu 45 kilomeiti fosi da aw doo a Feiran koo peesi. A peesi ya hei moo a ze wan sani fu 610 meter. A langa wan sani fu 4,8 kilomeiti. A lai anga palmbon. Omen sama e taki a moin enke a dyali fu Eden. A omen dunsu yali langa sama e go na a peesi ya fu di a lai dadelbon.
Dadelbon aini a Feiran koo peesi.
Di den Islayeli be e komoto aini Egepte, den be tyai bolon anga sani fu masi bolon. Kande den be tyai alisi anga oli tu. Baka wan pisiten den sani ya be kon kaba. Den be tyai tyaipi sikapu anga kaw tu (Ek. 12:34-39). Ma fu di den be de aini a sabana omen yali meke aw omen fu den meti fu den be e dede. Kande den Islayelisama be e nyan son wan fu den meti fu den. Kande den be tyai sowan fu den enke ofaandi gi Yehofa. Den be e tyai ofaandi gi falisi gadu tu a (Toli 7:39-43). Ma toku den Islayelisama be abi sikapu anga kaw ete. We si a sani ya te u luku a sani di Yehofa be taigi den di den ná aliki en. A be taigi den taki: ‘Den manpikin fu u o waka lontu aini a sabana 40 yali langa enke sama di e kweki sikapu’ (Num. 14:33). Neen meke a kan taki den be abi meliki anga meti fu nyan son yuu. Ma den sani ya á be o ipi sai gi moo enke 3 miliyun sama aini den 40 yali de. b
Pe den meti be e fende sani fu nyan anga wataa fu diingi? c Kande a ten de, alen be e moo kai aini a sabana. Kande bon anga gaasi be moo ipi aini a sabana tu. Pisi 1 fu a Inzicht buku e soi taki ‘a pisi pe den Islayelisama be de be moo abi wataa. U sabi a sani ya bika a omen saka peesi de a den peesi ya di e soi taki wataa be lai ape fosi’. Ma tokuso sama á be e tan aini a gaan sabana. Den be e feele fu waka aini a sabana, bika a omen ogii be sa miti den (Deit. 8:14-16). Efu Yehofa á be du wan wonduu fu gi den Islayelisama wataa, den anga den meti fu den be o dede.—Ek. 15:22-25; 17:1-6; Num. 20:2, 11.
Mosesi be taigi den Islayelisama saide Yehofa gi den mana fu nyan. A du a sani ya ‘fu leli den taki a ná beele namo sa meke sama tan a libi, ma a te den e du ala san Yehofa taki’.—Deit. 8:3.
a Beibel e taki fu tu okasi di den Islayelisama be tyai meti enke ofaandi gi Yehofa aini a sabana. A fosi leisi a di Yehofa be poti Aron fu wooko enke pilisite. Du fu fu tu leisi a di den be holi a Paskafesa. Den be du ala den tu sani ya na a pisiten fu 1512 Fosi Kelestesi, wan yali baka di den komoto a Egepte.—Lef. 8:14–9:24; Num. 9:1-5.
b Na a kaba fu den 40 yali di den be de aini a sabana, den be e teke omen dunsu sikapu fu den feyanti fu den te den be wini a feti (Num. 31:32-34). Tokuso den be e nyan a mana ete te enke den doo aini a Paamisi Kondee.—Yow. 5:10-12.
c Beibel á taki efu den meti be e nyan mana tu. Yehofa be taki ala sama mu teke san den poi nyan, ma aa be taki nawan sani fu den meti.—Ek. 16:15, 16.
