Den baala a Betel be wooko moo enke wan yali, fu meke wan laadiyow sitasiyon a Staten Island a New York. Den be kai a laadiyow sitasiyon ya WBBR. Baka di den kiin a peesi, den meke wan osu gi den wookoman anga wan osu pe den be o poti den sani di den be abi fanowdu gi a laadiyow sitasiyon. Di den baala kaba, den bigin suku den sani di den be abi fanowdu fu opo a laadiyow sitasiyon. Ma a omen polobelema den be abi ete.

Aa be makiliki gi den baala fu sete a antenne di den be abi fanowdu fu opo a laadiyow sitasiyon, bika a antenne be langa 91 meter. Den baala be abi fu fasi en a tu ponsu di be langa 61 meter. A fosi leisi di den be puubei fu fasi en, aa be go. Ma fu di den be e fitoow Yehofa meke te fu kaba den be poi fasi en. Calvin Prosser wan fu den baala di be e yeepi anga a wooko ya be taki: ‘Efu a antenne be fasi a fosi leisi di u be puubei fu fasi en, u be o fii useefi.’ Te fu kaba den baala be gafa Yehofa fu di a be yeepi den. Ma den be abi ete wan polobelema.

A ten de, laadiyow sitasiyon be kon a modo, neen meke aa be makiliki fu fende den sani di den be abi fanowdu. Den be e koboloiki wan 500-watt transmitter anga wan mikrofoon fu wan telefon. Den á be bai nyun wan. Aini februari, den luku efu den sani di den be seeka be o wooko. A wan neti mofu den be du a sani ya. Fu di den be abi sani fanowdu fu pee na a laadiyow sitasiyon, meke den be singi Kownukondee singi. Ernest Lowe be taki fu wan sani di be pasa wan dei, di be meke den lafu. A taki di den be e  singi, baala Rutherford b di be de a Brooklyn, wan peesi di be de 25 kilometer fu pe den be de, be yee den neen laadiyow, neen a telefon den.

Baala Rutherford taigi den taki: ‘U tapu wanten anga a sowtu sani di we meke de. We bali e go a sama ede.’ Sen be kisi den baala, neen meke den sitopu a sani wanten, den á be singi go doo moo. Ma tokuso den be fusutan taki ai wooko. Den be kon fusutan taki, te den de na a laadiyow sitasiyon sama poi yee den. Neen meke den be de kabakaba fu opo en.

Di den opo a laadiyow sitasiyon a 24 februari 1924, baala Rutherford be taki, den o koboloiki en fu du a wooko di Kelestesi, a kownu fu den be gi den. A taki tu taki, den opo a laadiyow sitasiyon ya fu yeepi sama fusutan a Beibel moo bun, anga fu yeepi den fu si aini sowtu ten we libi.

A fosi leisi di den pee a laadiyow sitasiyon, sani be go bun. A 33 yali langa den koboloiki en.

Aini yuli 1924, den Beibel Ondoosukuman be holi wan konkelesi a Columbus, Ohio. Den be komoto na alase fu goontapu. Lezing be holi aini Arabiyatongo, Ingiisitongo, Faansitongo, Doisilitongo, Giikitongo, Hongariyatongo, Italiyatongo, Litoniyatongo, Polentongo, Rosiyatongo, Skandinaviyatongo, anga Ukrainitongo. Sama be poi aliki son wan fu den lezing a laadiyow. Boiti dati den baala be akisi wantu sama di e sikiifi kolanti fu sikiifi wantu sani fu a konkelesi aini den kolanti fu den.

Na a 24 yuli, moo enke 5000 baala anga sisa be go peleiki na a foto pe a konkelesi be o holi. Den paati moo enke 30.000 buku. Boiti dati den be bigin sutudeli anga omen dunsu sama tu. A be sikiifi aini A Wakititolen taki, a dei ya a be a moo ‘switi dei’ fu a konkelesi.

Di baala Rutherford be holi a lezing fi en a feeda 25 yuli, a be leisi wan pampila di be e soi san den keliki fesiman be e du. A be taki, den politiki fesiman, den keliki fesiman anga den bisnisman e ‘tapu sama fu sabi den tuu leli fu a Kownukondee fu Gadu.’ A taki tu taki, den man ya nai du bun bika den e holibaka gi a Volkenbond. Den taki neen Gadu e  koboloiki fu tii goontapu. Den Beibel Ondoosukuman be mu abi deki-ati te den be o peleiki fu a sani ya.

Bakaten wan artikel aini a Wakititolen be taki, a konkelesi di be holi a Columbus be taanga a biibi fu den baala anga sisa di be de kabakaba fu dini Gadu anga den hii ati. A be gi den taanga-sikin fu peleiki winsi sai pasa. Leo Claus di be go na a konkelesi ya be taki: ‘Baka a konkelesi wa be poi tan fu go peleiki’ fu a sani ya.

Aini Oktober, den Beibel ondoosukuman soi deki-ati te den be e peleiki. Den be bigin paati omen miliyun fu a sani di den be e kai Ecclesiastics Indicted. Dati a wan copie fu wan talakitaati fu a lezing di baala Rutherford be holi di be abi fu du anga den keliki fesiman. Aini a pikin foto fu Cleveland, Oklahoma, baala Frank Johnson be paati omen talakitaati. Di a be kaba, a be abi fu wakiti 20 miniti fosi den taa peleikiman be kon teke en. Aa be poi wakiti a wan peesi pe den be sa si en makiliki, bika wantu man aini a kondee di á be lobi a peleikiwooko be e suku en. Neen meke baala Johnson be go kibii aini wan keliki di be de koosube. Nawan sama a be de aini a keliki, neen meke a fika a Ecclesiastics Indicted talakitaati aini a Beibel fu a keliki fesiman a wan bangi tapu. A du gawgaw, neen a komoto aini a keliki. Fu di a be abi moo ten, meke a du aseefi sani ya aini ete 2 taa keliki.

Frank daai go baka gawgaw na a peesi pe a be o miti den taa baala anga sisa. A be go kibii a wan peesi pe den e lai oli, da a be e luku den man di be wani du ogii anga en. Den man lei pasa, ma den á be si en. Baka di den pasa gwe, den taa baala anga sisa di be e peleiki koosube be kon teke en, neen den gwe wanten.

‘Di u be e gwe’, wan fu den baala taigi u taki: ‘u pasa a dii keliki. A wan sani fu 50 sama be de na a doomofu fu ibiiwan fu den keliki ya. Son wan fu den sama be e leisi a talakitaati, taawan be e opo en go a tapu fu a keliki fesiman be si en. U be gwe gawgaw fosi ogii be miti u! We gi Yehofa daa fu di a yeepi u, anga fu di a meke u paati a wowtu sondee fu sama kisi u.’

Den Beibel ondoosukuman di be de aini den taa kondee be e peleiki sondee fu feele tu. Aini a noordse fu Faansikondee, Józef Krett be e peleiki gi den sama di be e kon aini a kondee, den sama ya be e wooko gowtu a Poland. Aa be teke langa fosi a holi wan lezing di nen ‘A weki di dede sama o weki baka’. Di den baala anga sisa be e paati a kai gi den sama fu a kondee, wan pilisite taigi den sama fu a keliki fi en taki den á mu go. Ma a betee aa be bali den. Bika a moo enke 5000 sama be go aliki a lezing boiti a pilisite! Baala Krett be kai a pilisite fu taki san ai biibi, ma aa be wani kon. Baka a lezing baala Krett gi den sama ala den buku di a be abi, bika den be wani sabi moo fu a wowtu fu Gadu.​—Am. 8:11.

Aini Afiikan, Claude Brown be e paati a bun nyunsu a Gaana. A omen sama be yee a tuu leli, fu di a be e holi omen lezing, boiti dati a be e paati omen buku tu. John Blankson be go a wan fu den lezing di baala Brown be holi. A man ya be e leli fu toon wan sama di e seli deesi na apoteiki. A be fusutan wanten taki a fende a tuu biibi. John taki: ‘A tuu  e meke mi piisii. Mia be e feele fu taigi den sama na a sikoo san mi be e leli.’

John be fusutan taki Beibel nai leli u taki Yehofa, Yesesi, anga a santa yeye a wan sama, neen meke wan dei a go a wan keliki, fu akisi a pilisite a sani ya. A pilisite ati boon neen, a bali taigi en taki: ‘Yu á na wan Kelesten; yu a fu didibii. Gwe komoto ya!’

Di John go a osu, a sikiifi wan biifi gi a pilisite neen a kai en fu den go a lanti fesi da den o taki fu a toli di e soi, efu Gadu a dii aini wan. Ma a pilisite sikiifi taigi John taki meke a go na a kantoo fu a edeman fu a sikoo fi en. Di a go, neen a edeman fu a sikoo akisi en taki efu a tuutuu a be sende wan biifi kai a pilisite.

John piki taki: ‘eeye, a tuu.’

A so a edeman fu a sikoo taigi en taki a be mu sikiifi wan biifi gi a pilisite fu akisi en paadon. John sikiifi taki:

‘A moneli fu mi akisi mi fu sikiifi wan biifi gii fu akisi i paadon. Mi de kabakaba fu akisi i paadon efi i piki taki a falisi sani ye leli sama’

A edeman fu a sikoo dyombo, a akisi en taki: ‘Blankson, na a sani ya i wani sikiifi’?

John piki taki: ‘eeye, na ala san mi poi sikiifi de ape, bika mia du nawan sani.’

A edeman fu a sikoo taigi en taki: ‘I naw poi kon naa sikoo ya moo efu ye tan taki ogii fu a pilisite, bika a omen sama e holibaka gi a biibi ya’

John piki taki: ‘Ma moneli, . . . Te ye leli u wan sani di u nai fusutan, i nai meke u poti akisi gii no’?

‘A edeman fu a sikoo piki taki, eeye we akisi’

John piki baka taki: ‘We na a sani de mi du. A pilisite be e leli u sani fu Beibel neen mi poti wan akisi gi en. Efu aa piki a akisi, da saide mi mu sikiifi wan biifi fu akisi en paadon’?

Te fu kaba, den á puu Blankson na a sikoo. Aa be abi fu sikiifi wan biifi fu akisi paadon tu.

Den sani di pasa aini a yali de. A Wakititolen e taki: Leti enke David, useefi poi taki: ‘Yo gi mi kaakiti fu go a feti’ (Ps. 18:39). Ná pikin deki-ati u be fende a yali de, bika u be si fa Yehofah yeepi u anga a wooko fi en. . . Ná pikin yeepi a yeepi u fu be man peleiki fayafaya.

Baka wan pisiten aini a seefi yali, den baala be e seeka sani fu meke wan taa laadiyow sitasiyon. Den be meke a laadiyow sitasiyon ya a Chicago. Den be kai a nyun sitasiyon ya WORD. A leisi ya den be koboloiki moo bun wooko sani. A sani ya meke sama be o poi yee a bun nyunsu winsi on faa den be de. Winsi a te a Kanada seefi.

Aini a yali 1925, Yehofa yeepi den baala fu fusutan den nyun sani fu Openbaring kapitel 12. Fu di den be tyai kengi kon, meke a omen sama á be e dini Yehofa moo. Ma na a taa se, omen taa sama be poolo, bika den be kon fusutan moo bun san pasa aini hemel, anga fa sani be o waka anga a foluku fu Gadu a goontapu ya.