1. San a wantu fu den sani di Yesesi du gi wi enke libisama?

 NAWAN LIBI SAMA de di poi yeepi taawan enke Yesesi. Di a be de a goontapu ya, a omen wonduu a du fu yeepi sama (Luk. 9:12-17). A moo gaan bun di Yesesi du, na a dede di a kon dede gi u (Yoh. 15:13). Baka di a weki baka go a hemel seefi, a omen bun a du gi u tu. A be paamisi taki, a be o akisi Yehofa a santa yeye fi en fu tii a foluku fi en (Yoh. 14:16, 17:16, 17, ftn.; 16:13). Wan taa fasi fa ai holibaka gi u, a den komakandaa di we go ala wiki. Na ape we leli faw sa yeepi den sama di we peleiki gi fu toon Yesesi bakaman.​—Mat. 28:18-20.

2. Sama a ‘den mannengee’ di Efeisesama 4:7, 8 e taki fu den?

² Meke u go luku wan fu den taa kado di Yesesi gi u. Apostel Pawlesi be sikiifi taki fosi Yesesi daai go baka a hemel, ‘A poti mannengee na a kemeente di sabi du son sani’ (Leisi Efeisesama 4:7, 8.) Pawlesi be taki Yesesi gi den man ya koni fu yeepi a kemeente a omen sowtu fasi (Efe. 1:22, 23; 4:11-13). Tide na a dei, den e dini enke dinali, owluman anga kelen-owluman. a Ala den man ya a sondu libisama, neen meke son yuu den o go e meke fowtu (Yak. 3:2). Ma toku a den man ya Yesesi Kelestesi e koboloiki fu yeepi u, a gi u den enke kado.

3. Faw sa holibaka gi den wooko di ‘den baala’ ya e du?

 ³ Yesesi gi den baala ya, a wooko fu taanga den kemeente (Efe. 4:12). Ma na ala sama sa holibaka gi den te den e du a pelensipali wooko ya. U sa maiki a sani ya anga a meke di den e meke wan Kownukondee zaal. Te den e wooko, taawan e holibaka te den e tyai nyanyan kon, taawan e tyai den wooko sani di den abi fanowdu kon, efuso yeepi a iniiwan taa sowtu fasi. We a letiso useefi sa holibaka gi den dinali, den owluman, anga den kelen-owluman anga den sani di we taki efuso du. Meke u go luku sowtu wini we fende fu a taanga wooko fu den, anga faw sa soi taki we teke en fu bigi taki Yesesi gi u ‘den baala’ ya.

DEN DINALI E ‘HOLIBAKA GI A WOOKO’

4. Fa den dinali be e ‘yeepi anga a wooko’ na a ten fu den fosi Kelesten?

⁴ Den be poti son baala fu yeepi taawan na a ten fu den fosi Kelesten (1 Tim. 3:8). A gei a den baala ya Pawlesi be taki be e ‘yeepi’ fu du a wooko (1 Kor. 12:28). Den dinali e wooko taanga fu yeepi den owluman, so taki a wooko ná ipi gi den tumisi. A sowan fasi den o moo abi ten fu gi leli anga fu poti pakisei a den baala anga sisa. Aini a ten di pasa den dinali be e yeepi anga a kopie fu den buku-lolo efuso den sani di den be abi fanowdu fu du a wooko ya.

5. San a wantu fu den pelensipali wooko di den dinali e du nownow?

⁵ Meke u luku wantu fu den pelensipali wooko di den dinali e du aini a kemeente (1 Peit. 4:10). Omen fu den baala ya e seeka den kaita di e soi pe u mu go peleiki, den e solugu taki wi abi den Wakititolen anga taa sani di we koboloiki a den komakandaa, den e yeepi anga Audio/Video, den e yeepi fu a komakandaa peesi tan kiin tu. Na ala den sani ya de fanowdu fu a komakandaa waka bun (1 Kor. 14:40). Moo sani de ete di den e du: Den e yeepi anga son pisi fu mindiiwiki komakandaa, den e holi Beibel-lezing. Den e holibaka gi a baala di e teke fesi na a peleikiwooko kulu. Den e go anga den owluman go luku den baala anga sisa fu a kemeente tu.

6. Saide u mu e teke en fu bigi taki den dinali e wooko taanga so?

⁶ Sowtu wini a kemeente e fende fu a taanga wooko di den dinali e du? Wan sisa den e kai Beberly b aini Boliviya taki: ‘Mi e gi den dinali daa, bika mi e nyan bun fu den komakandaa tuutuu. Fu di den e wooko taanga, meke mi poi singi, gi piki, aliki moin lezing anga luku den moin felon di we soi a komakandaa. Den e yeepi wi enke zaal wakitiman, den e yeepi u anga zoom, den e kiin a peesi. Den e solugu taki wi abi ala den buku. Ai bigi gim taki den de anga u!’ Leslie, e tan aini Colombia. A man fu a sisa ya a wan owluman. Leslie taki: ‘A man fu mi sabi taki den dinali o holibaka gi en. Den e yeepi en anga omen wooko. Efu den dinali á be de, a omen wooko en wawan be o abi fu du. Ai bigi gim, taki den de kabakaba fu yeepi u.’ U sabi taki a letiso iseefi e fii tu.​—1 Tim. 3:13.

7. Faw sa soi taki ai bigi gi u taki den dinali e wooko taanga? (Luku a fowtow.)

⁷ A tuu taki ai bigi gi u taki den baala ya e wooko taanga. Ma tokuso Beibel e taigi u taki: ‘I mu soi taki ye teke sani fu bigi’ (Kol. 3:15). Krzysztof, wan owluman di e tan a Finland e du a sani ya fu soi taki ai teke san den dinali e du fu bigi. Ai  taki: ‘Mi e sende wan kaita efuso wan bosikopu gi den a telefon anga wan tekisi aini. Mi e sikiifi pilisisi sowtu wooko a baala e du anga sowtu taanga-sikin mi e fende fu a wooko di ai du’. Pascal anga Jael, di e tan a New Caledonia e begi ibii toon baka gi den dinali. Pascal taki: ‘Den ten di pasa, ná pikin begi we begi gi den dinali fuu kemeente. We gi Yehofa daa tu, taki a gi u den.’ Yehofa e aliki den sowtu begi ya. A kemeente seefi e fende omen wini.​—2 Kor. 1:11.

DEN OWLUMAN AINI A KEMEENTE E ‘WOOKO TAANGA’

8. Saide Pawlesi be poi taki den owluman na a ten fu den fosi Kelesten be e wooko taanga? (1 Tesalonikasama 5:12, 13)

⁸ Den owluman na a ten fu den fosi Kelesten be e wooko taanga (Leisi 1 Tesalonikasama 5:12, 13; 1 Tim. 5:17). Den be e teke fesi aini a kemeente​—fu holi komakandaa. Den be e taki fiti fu sabi fa den be mu du son sani. Den be e poti den baala anga sisa a pasi te a de fanowdu​—anga den sani di den be e leli den, bika den á be wani ogii miti den (1 Tes. 2:11, 12; 2 Tim. 4:2). Den be mu poti pakisei a den eigi osufamii tu. Den be mu tan meke moiti fu den biibi á swaki.​—1 Tim. 3:2, 4; Titesi 1:6-9.

9. San a wantu faantiwowtu di den owluman abi aini a ten ya?

⁹ Den owluman fu a ten ya e wooko taanga. U sabi den enke fayafaya peleikiman (2 Tim. 4:5). Den baala ya e teke fesi aini a peleikiwooko. Den e seeka sani gi u fu man du a wooko ya finifini, den e yeepi u tu fu sabi faw mu peleiki fu man abi bun bakapisi. Son yuu den e du a wooko fu wan kuutubakaa di lobi sama, den nai paatibee. Te wan Kelesten du wan gaan sondu, den owluman e meke moiti fu yeepi en fu toon Yehofa mati baka. Ma na a taa se, den e holi a pakisei taki a kemeente mu tan kiin (1 Kor. 5:12, 13; Gal. 6:1). Ma wan fu den moo pelensipali wooko, a taki u sabi den owluman enke sikapuman (1 Peit. 5:1-3). Den e seeka denseefi fu holi moin lezing di e gi u taanga-sikin. Den e meke moiti fu sabi den baala anga sisa anga fu go luku den a osu. Son owluman e yeepi anga a bow efuso seeka kownukondee zaal. Den e wooko a den peesi pe we holi den gaan komakandaa, yeepi na a Ati-osu Komte efuso du omen taa wooko. Ná pikin wooko den baala ya e wooko taanga!

10. Saide ai bigi gi u taki den owluman e wooko taanga?

¹⁰ Yehofa be taki a fesi taki den sikapuman be o solugu u bun. A be taki ‘A naw de fuu feele moo’ (Yel. 23:4). Johanna, wan sisa a Finland be ondoofeni a sani ya a pisiten di en mma be siki. A taki: ‘Son yuu ai taanga gim fu taigi taawan fa mi e fii. Ma wan owluman be pasensi anga mi, winsi fa mia be kaba sabi a baala ya bun. A be begi anga mi. A yeepi mi fu fusutan taki Yehofa lobi mi. Mia kaba sabi moo pilisisi san a be taigi mi. Ma mi sabi ete taki mi be fii bun di a taki anga mi. Mi e biibi taki a Yehofa be sende en kon yeepi mi na a yuu di mi be abi en fanowdu.’ Fa den owluman aini i kemeente be yeepi i?

11. Faw sa soi taki we teke san den owluman e du fu bigi? (Luku a fowtow.)

¹¹ Yehofa wani taki u soi taki ‘a wooko’ di den owluman e du e bigi gi u (1 Tes. 5:12, 13). Henrietta, di e tan a Finland taki: ‘Den owluman de kabakaba fu yeepi taawan. Ma a sani ya á wani taki a moo ten efuso kaakiti den abi. Den abi den eigi  booko-ede tu. Neen meke son yuu mi e luku den, da mi e taigi den taki: ‘I sabi san! Mi wani taigi i taki, yu a wan bun owluman’”. Wan sisa aini Türkiye c den e kai Sera taki: ‘Owluman abi ‘kaakiti’ fanowdu fu man go doo. U sa meke wan moin kaita gi den, kai den kon a wi osu kon nyan wan sani efuso peleiki makandaa anga den.’ Wan owluman de aini i kemeente di i lobi a fasi fa ai du en wooko? I sa soi en taki ai bigi gii taki ai meke a moiti ya.​—1 Kor. 16:18.

DEN KELEN-OWLUMAN E GI DEN KEMEENTE TAANGA-SIKIN

12. Sowtu taa baala Yesesi gi wi enke kado? (1 Tesalonikasama 2:7, 8)

¹² Yesesi be gi den fositen Kelesten ‘baala’ di be e yeepi den kemeente a wan taa sowtu fasi tu. A be meke den baala di be e luku a wooko a Yelusalem poti Barnabas anga Pawlesi enke kelen-owluman (Toli 11:22). Bika a sani ya be o meke den baala anga sisa fende taanga-sikin (Toli 15:40, 41). Den man ya be e taanga den kemeente. Den be de kabakaba fu holibaka gi den baala anga sisa winsi den be sa lasi den libi.​—Leisi 1 Tesalonikasama 2:7, 8.

13. San a wantu faantiwowtu fu wan kelen-owluman?

¹³ Den kelen-owluman de kabakaba fu go na ala se. A omen faawe peesi den e go luku den kemeente. Pikinmoo ala wiki, den baala ya e seeka den lezing di den mu holi. Den e holi den lezing ya, go luku sama a osu, holi pionili komakandaa, owluman komakandaa anga peleikiwooko komakandaa. Den e gi leli a den pionili sikoo, den mu e poti pakisei a den  pionili aini a kelen. Boiti dati, den mu e poti pakisei a den sani di a Beikantoo e akisi den fu du anga omen taa sani ete.

14. Saide we teke san den kelen-owluman e du fu bigi?

¹⁴ Sowtu wini den kemeente e fende fu di wi abi den kelen-owluman? Baka di wan kelen-owluman be go luku wan kemeente, neen wan baala fu Türkiye taki: ‘Solanga a kelen-owluman kon luku a kemeente, mi e moo kisi a fii fu yeepi den baala anga sisa. A omen kelen-owluman mi miti kaba, ma tokuso nawan fu den meke mi fii enke mia poi go taki anga den.’ Johanna di u be taki fi en kaba, be peleiki anga a kelen-owluman, ma a dei de den á miti nawan sama. Johanna taki: ‘Noiti mi o feegete a dei de. A pisiten de, tu fu den sisa fu mi be foloisi, ná pikin angii mi be e angii fu den. A baala gim taanga-sikin. A soi mi taki a nownow mi anga den á de na a wan peesi moo. Ma aini a nyun goontapu a fu teego wo poi de makandaa.’ A omen fuu abi omen moin ondoofeni toli di u wooko makandaa anga den baala ya. U kon lobi den anga u hii ati.​—Toli 20:37–21:1.

15. (a) Tew luku 3 Yohanisi 5-8, da faw sa teke san den kelen-owluman e du fu bigi? (Luku a fowtow.) (b) Faw sa soi taki ai bigi gi u taki den uman fu den baala ya e holibaka gi den? (Luku a faki ‘ Ná feegete den uman fu den.’)

¹⁵ Apostel Yohanisi be gi Gayus taanga-sikin fu bali wadaa gi den baala ‘bika a dati Gadu wani’ (Leisi 3 Yohanisi 5-8.) Wan fasi faw sa du a sani de, a te we kai a kelen-owluman kon nyan wan sani a wi osu. U sa holibaka gi den peleikiwooko komakandaa tu. Leslie, di u be taki fi en kaba, e du a sani ya fu soi taki ai bigi gi en taki a kelen-owluman anga en uman e kon luku a kemeente. Ai taki: ‘Mi e begi Yehofa fu a  gi den san den abi fanowdu’. Ai taki: ‘Mi anga mi man e sikiifi biifi gi den fu gi den daa. We meke den sabi sowtu wini u fende di den kon luku u.’ Den kelen-owluman a sondu libisama tu. Den seefi e siki, den e booko den ede, son yuu denseefi e fii booko-saka tu. Gafa den fu a moiti di den e meke. Soi den taki ai bigi gii taki den e wooko taanga. Kande a yu Yehofa e koboloiki fu piki a begi fu den!​—Odo. 12:25.

WI ABI DEN ‘MANENGEE’ YA FANOWDU

16. Tew luku Odo 3:27, da san wantu baala sa akisi denseefi?

¹⁶ A hii goontapu wi abi moo baala fanowdu di sabi du son sani. Efu yu a wan dopu baala, i si enke ‘i poi yeepi?’ (Leisi Odo 3:27.) I si enke i sa meke moiti fu toon wan dinali? Efu yu a wan dinali, i sa meke moo moiti fu poti pakisei a den baala anga sisa efuso fu toon wan owluman?  d I poi seeka sani fu go na a Sikoo gi Kownukondee Peleikiman? Efii go na a sikoo ya, den baala sa koboloiki yu a omen fasi, bika a omen sani yo leli. Neen meke efi ye si enke ya bun sai, begi Yehofa fu a yeepi i. Akisi en fu a gi yu en santa yeye, da dati o yeepi i fu du iniiwan wooko dii fende aini a olikanisâsi.​—Lukasi 11:13; Toli 20:28.

17. San a poti di u Kownu Yesesi Kelestesi poti ‘manengee’ aini den kemeente e leli u fi en?

¹⁷ A poti di Yesesi poti ‘baala’ aini den kemeente e soi taki ai tii wi aini den lasti dei ya (Mat. 28:20). A nai bigi gii taki wi abi wan Kownu di e booko en ede anga u, di lobi u efuso di e poti baala a wooko di de kabakaba fu yeepi u noh? A sani ya musu e bigi gii tuutuu! Neen meke, du ala sai poi fu soi taki ye teke en fu bigi. Gi Yehofa daa ala yuu, bika neen na a sama di ‘ala bun sani di naabi fowtu e komoto.’​—Yak. 1:17.