1-2. San pasa di tu fu den bakaman fu Yesesi be e waka go a Emma-us?

 A BE 16 Nisan aini a yali 33 baka di Yesesi dede. Den bakaman fu Yesesi be e tyali, boiti dati den be e feele tu. Tu fu den be komoto a Yelusalem, den be e go a Emma-us wan foto di be de wan sani fu 11 kilomeiti fu Yelusalem. Den man ya be e fii booko saka, bika den be kii Yesesi a sama di den be e waka neen baka. Den be e howpu taki a Mesiyas be o du omen sani gi den Dyu, ma now a dede. Ma wan sani di den á be poti pakisei be o pasa.

² Wan man di den á be sabi miti den a pasi, neen a bigin waka anga den. Den disipel be bigin taigi a man ya sowtu ogii den sama be du anga Yesesi. Baka dati a man taigi den wantu sani di noiti den be o feegete. A ‘bigin na a buku fu Mosesi te doo ala den buku fu den taa polofeiti’. A taigi den tu saide a Mesiyas be mu dede a so wan fasi. Di den dii man waka doo Emma-us, a man soi den sama neen, den fusutan taki​—a Yesesi di Gadu be weki baka! Ná pikin poolo den be e poolo, bika a Mesiyas be de a libi!​—Luk. 24:13-35.

3-4. San pasa anga den bakaman fu Yesesi? San wo leli aini a artikel ya? (Toli 1:3)

³ Yesesi be fika 40 dei a goontapu ya fosi a daai go baka a hemel. Aini den 40 dei ya, a omen leisi a soi enseefi a den bakaman fi en (Leisi Toli 1:3.) Den bakaman fu Yesesi be e tyali, den be e feele tu, neen meke a be gi den taanga-sikin. A sani ya be gi den a deki-ati fu go peleiki  anga fu leli sama a bun nyunsu fu a Kownukondee  a

⁴ A omen wini we fende te we sutudeli den pisi toli ya. Aini a artikel ya, wo si fa Yesesi be e koboloiki a ten fi en fu (1) gi den bakaman fi en taanga-sikin, (2) fu yeepi den fu fusutan den leli fu Beibel moo bun, anga (3) fu yeepi den fu tyai moo faantiwowtu aini a ten di e kon. Wo luku faw sa waka a Yesesi baka, te we poti pakisei a ibiiwan fu den penti ya.

GI TAAWAN TAANGA-SIKIN

5. Saide den bakaman fu Yesesi be abi taanga-sikin fanowdu?

⁵ Saide den bakaman fu Yesesi be abi taanga-sikin fanowdu? Sowan fu den be abi fu gwe fika den osu, den famii anga den wooko fu waka a Yesesi baka (Mat. 19:27). Son sama á be e wani paa anga den moo, fu di den be toon Yesesi bakaman (Yoh. 9:22). Ma den be de kabakaba fu du a sani ya, fu di den be e biibi taki a Yesesi a be a Mesiyas di Gadu be paamisi (Mat. 16:16). Ma baka di den kii Yesesi, ná pikin tyali be kisi den bakaman fi en, den be fii booko-saka tu fu di den á be sabi san be o pasa.

6. San Yesesi du di a weki baka?

⁶ Yesesi be fusutan taki a ná fu soso den bakaman fi en be e tyali di a be dede. A be sabi tu taki a ná fu di den biibi be swaki meke den be e tyali. Neen meke a seefi dei di a weki baka, a gi den mati fi en taanga-sikin. Wan fasi fa a be du a sani ya, a di a be soi enseefi a Maliya Makidaleina di be e kee na a geebi mofu (Yoh. 20:11, 16). A be soi enseefi a den tu apostel di be e go a Emma-us, anga apostel Peitilisi tu (Luk. 24:34). San a toli fu Yesesi e leli u tew luku a fosi leisi di a be meke Maliya Makidaleina si en?

7. Enke fa Yohanisi 20:11-16 e soi, da san Yesesi be si Maliya e du a fuuku mmanten fu 16 Nisan? San Yesesi du di a si a sani ya? (Luku a fowtow)

⁷ Leisi Yohanisi 20:11-16. Na a fuuku mmanten fu 16 Nisan, wan tu uman be go  na a geebi pe den be beli Yesesi (Luk. 24:1, 10:1, 10). Meke u poti pakisei a wan fu den uman ya di den be e kai Maliya Makidaleina. Di Maliya doo na a geebi, a si taki a dede sikin fu Yesesi á be de ape moo, ma a be leigi. A lon go taigi Peitilisi anga Yohanisi san a si, neen den tu man ya lon go na a geebi, Maliya seefi go a den baka tu. Di den tu man si taki a dede-sikin fu Yesesi á de aini a geebi moo, den daai go baka a osu. Ma Maliya be taampu fika ape e kee. Aa be sabi taki Yesesi be taampu de e luku en. Yesesi be sabi taki a fi en ede Maliya be e kee, neen meke a be wani gi en taanga-sikin. A meke Maliya si en, neen a taigi en wan sani fu gi en taanga-sikin. A taigi en fu a tyai wan pelensipali bosikopu gi den baala fi en​—a be mu go taigi den taki Yesesi weki baka.​—Yoh. 20:17, 18.

8. Faw sa waka a Yesesi baka?

⁸ Faw sa waka a Yesesi baka? We waka a Yesesi baka te we gi u baala anga sisa taanga-sikin fu tan dini Yehofa. Leti enke Yesesi u mu e meke moiti fu sabi san a den booko-ede fu taawan, u mu puubei fu fusutan fa den e fii tu, da dati o yeepi u fu gi den taanga-sikin. Luku a toli fu wan sisa den e kai Jocelyn di lasi en sisa a wan ongooku fasi. ‘A omen mun langa mia be sabi san fu du, fu di mi be e tyali’. A taki. Wan baala anga en uman be kai en kon a den osu, neen den meke a taki puu koko neen ati. Den be aliki en anga pasensi. Den taigi en taki Yehofa e teke den sani di ai du fu bigi. Jocelyn taki: ‘Mi be e fii booko saka, mi be e fii enke mi dede a wataa aini wan kaasi se. Ma Yehofa be sende a baala ya anga en uman fu yeepi mi, a be gei enke den be hali mi poti aini wan boto. Den be yeepi mi fu kisi mi seefi baka anga fu tan dini Yehofa go doo’. Useefi sa gi taawan taanga-sikin te we aliki den anga pasensi anga te we gi den a okasi fu taki puu koko a den ati. A so wo poi yeepi den fu tan dini Yehofa.​—Rom. 12:15.

YEEPI TAAWAN FU FUSUTAN A WOWTU FU GADU

9. Sowtu tesi be miti den bakaman fu Yesesi? Fa a yeepi den?

⁹ Den bakaman fu Yesesi be e biibi a wowtu fu Gadu, boiti dati den be e meke moiti fu du sani enke fa Yehofa wani tu (Yoh. 17:6). Yesesi be sabi taki a ná biibi den bakaman fi en á be abi, a be sabi taki den lobi Yehofa tu. Ma den be mu fusutan a Beibel moo bun (Luk. 9:44, 45; Yoh. 20:9). Neen meke a be yeepi den fu fusutan den sani di den e leisi aini Beibel moo bun. We si fa a be du a sani ya di a be go waka anga den tu disipel di be e go a Emma-us.

10. Fa Yesesi be yeepi den bakaman fi en fu fusutan taki neen a be a Mesiyas? (Lukasi 24:18-27)

¹⁰ Leisi Lukasi 24:18-27. Yesesi á be taigi den tu man ya sama neen. Ma a sani di a du, a taki a poti akisi gi den, fu di a be wani kon sabi san be de aini den ati anga san den be e denki tuutuu. We, a dati den man ya du tu. Den taigi en taki den be denki taki Yesesi be o toon kownu aini Islayeli fu a be sa tii a peesi fu Rome. Yesesi be meke den taki fa den e fii. Bakadati a wooko anga a Beibel fu yeepi den man ya fu fusutan taki a omen Beibel polofeiti toli be kon tuu kaba. b A bakadina de, en anga den taa apostel miti, neen a leli den tu san den polofeiti toli ya wani taki (Luk. 24:33-48). San a toli ya e leli u?

11-12. (a) Saw sa leli fu a fasi fa Yesesi be e leli sama san sikiifi aini a Wowtu Gadu? (Luku a fowtow.) (b) Fa a sama di be e sutudeli anga Nortey be yeepi en?

 ¹¹ Faw sa waka a Yesesi baka? A fosi sani di u mu du te we sutudeli Beibel anga wan sama, a taki u mu poti akisi gi den di o meke den taki fa den e fii (Odo. 20:5). Tei kon fusutan fa den e fii kaba, i sa soi den fa den sa fende Beibel tekisi di o yeepi den fu losi den polobelema fu den. Holi a pakisei taki ya mu taigi den san den mu du, efuso teke bosoloiti gi den. Ma i sa akisi den fa den sa wooko anga den sani di den e leisi efuso leli aini Beibel. Meke u luku a toli fu wan baala den e kai Nortey di e tan a Gaana.

¹² Di Nortey be abi 16 yali, a be bigin sutudeli Beibel. Aa teke langa, neen den famii fi en bigin libi ogii anga en. San yeepi en fu tan sutudeli go doo? A sama di be e sutudeli anga en be taki anga en fu Mateyesi kapitel 10, fu soi en taki den be o libi ogii anga ala tuu Kelesten. Nortey taki ‘di den bigin libi ogii anga mi,’ mi be fusutan wanten taki mi be fende a tuu biibi’. A baala be soi en Mateyesi 10:16 tu taki a mu du sani anga koni. A be taigi en tu taki, a mu e taki a wan lesipeki fasi te ai soi den famii fi en san ai biibi. Baka di Nortey dopu, a be wani toon wan pionili, ma en dda be wani a go a hei sikoo. A baala di be e sutudeli anga Nortey á taigi en san a mu du. Ma a poti wantu akisi gi en. A yeepi en tu fu go pakisei fu wantu tekisi. San be de a bakapisi? Nortey bigin du a pionili wooko. Di a bigin, neen en dda yaki en puu neen osu. Fa Nortey fii di a sani ya pasa? A taki: ‘Mi e fii taki na a moo bun sani mi be du’. Te we yeepi taawan fu denki dipi fu den san di den e leli, we yeepi den fu taanga a biibi fu den, anga fu tan dini Yehofa.​—Efe. 3:16-19.

YEEPI BAALA FU ‘SABI DU SON SANI’

13. San Yesesi be du fu meke a peleikiwooko go doo, te a be o daai go a hemel? (Efeisesama 4:8)

¹³ Di Yesesi be de a goontapu, a be du ala san en dda be akisi en fu du (Yoh. 17:4). Ma Yesesi á be e denki taki neen na a wan kodo sama di be sa du sani enke fa Yehofa wani. Aini den dii anga afu yali di Yesesi du a peleikiwooko a goontapu, a be e leli taawan fa den sa du a wooko ya tu. Yesesi be e fitoow den disipel fi en​—neen meke fosi a daai go baka a hemel,  a gi den a gaandi fu peleiki, fu leli taawan a bun nyunsu, anga fu luku a foluku fu Yehofa, di de enke wan gudu. Sowan fu den bakaman fu Yesesi di be e teke fesi fu du a wooko ya á be doo 30 yali (leisi Efeisesama 4:8.) Den man ya be e wooko taanga anga Yesesi, den be e du sani enke fa a wani tu. Ma fosi a go a hemel, a gi den moo leli fu den sa toon ‘mannengee aini a kemeente di sabi du son sani.’ Fa Yesesi be e leli den?​—Luku a maiki di de a Efeisesama 4:8.

14. San Yesesi be leli den bakaman fi en den lasiti 40 dei di a be de a goontapu ya? (Luku a fowtow.)

¹⁴ Te Yesesi be e leli den bakaman fi en efuso poti den a pasi, i be e poi si kiin taki a lobi den. Yesesi be fusutan taki a ná ala den disipel fi en be e biibi taki a be dede neen a weki baka, neen meke a be e yeepi den fusutan a sani ya moo bun (Luk. 24:25-27; Yoh. 20:27). A taigi den tu taki den be mu poti moo pakisei a fa den sa yeepi a foluku fu Gadu. A soi den taki a ná den eigi wooko efuso meke moni be mu de a moo pelensipali sani gi den (Yoh 21:15). A membee den tu taki den á mu e maiki denseefi anga taawan (Yoh 21:20-22). A yeepi den fu kengi son denki di den be abi fu a Kownukondee, bika a dati be o yeepi den fu peleiki moo bun (Toli 1:6-8). San owluman sa leli fu Yesesi?

15-16. (a) Fa owluman sa waka a Yesesi baka? (b) San Patrick be du di taawan be poti en a pasi?

¹⁵ Fa owluman sa waka a Yesesi baka? Den mu yeepi ala baala aini a kemeente. Winsi a baala yonkuu, toku den mu leli en fa a sa tyai moo faantiwowtu. c Owluman e fusutan taki a omen sani den baala ya mu leli ete. Den mu yeepi den yonkuu baala a wan lobi-ati fasi. Den mu leli den tu fu abi sakafasi, fu den biibi taanga anga fu de kabakaba fu yeepi taawan tu.​—1 Tim. 3:1; 2 Tim. 2:2; 1 Peit. 5:5.

¹⁶ Meke u luku san wan baala den e kai Patrick be du di taawan be e poti en a  pasi. Di a be moo yonkuu, a be e taki goofu anga sama. Aa be e lesipeki umansama. Ma wan owluman be fusutan taki Patrick be mu du sani taa fasi. Neen meke a wan switi fasi a poti en a pasi. Patrick taki: ‘Ná pikin poolo mi poolo di a baala be soi mi fa mi sa du sani moo bun’. Son yuu mi be e lasi-ati te mi be e si taa baala e fende son gaandi di mi be wani. A owluman yeepi mi fu si taki mi mu abi sakafasi, mi mu soi lobi gi den baala anga sisa. A yeepi mi fu fusutan taki mi naafu suku son gaandi efuso faantiwowtu namonamo’. A sani ya yeepi Patrick tuutuu, bika di a pasa den sani fu 20 yali neen a toon owluman.​—Odo. 27:9.

17. Fa Yesesi be soi taki a be e fitoow den bakaman fi en?

¹⁷ Yesesi be taigi den bakaman fi en taki, a ná peleiki wawan den mu peleiki, ma den be mu soi den sama tu fu wooko anga san den leli (Luku a maiki a Mateyesi 28:20. ‘Leli den’). Kande den bakaman be e si enke den naw poi du a wooko de. Ma tokuso Yesesi soi den taki den naafu feele. A be taigi den taki: ‘Leti enke fa a Dda sende mi kon a goontapu, a so miseefi e sende u go tu.’​—Yoh. 20:21.

18. Fa owluman sa waka a Yesesi baka?

¹⁸ Fa owluman sa waka a Yesesi baka? Den owluman di abi ondoofeni nai si enke a den wawan mu du ala den wooko di de fu du (Filip. 2:19-22). Den e leli taawan fu tyai faantiwowtu tu. Te den gi wan baala efuso sisa wan wooko fu du, den e soi en taki den e biibi taki a poi du en bun. Wan owluman den e kai Matthew taki ai teke en fu bigi taki taa owluman leli en fa a mu du en wooko moo bun. A taki ai fii bun taki den baala be e fitoow en. Ai taki moo faa taki: ‘Te mi be e meke fowtu, den be e holi a pakisei taki a leli mi de. A sani ya yeepi mi fu go a fesi.’ d

19. Saw mu de kabakaba fu du?

¹⁹ Den lasiti 40 dei di Yesesi be de a goontapu ya, a be gi taawan taanga-sikin, a be leli den, a be e yeepi den tu. U seefi mu du ala san u poi tu fu waka a Yesesi baka (1 Peit. 2:21). Aw yeepi u fu du a sani ya tu. A paamisi u taki: ‘Mio de anga u ala yuu, te enke a kaba fu a goontapu doo.’​—Mat. 28:20.