SUTUDI-ARTIKEL 43
SINGI 90 Gi taawan taanga-sikin
Saw yeepi u te we pakisei sani di e gi u booko-ede?
‘Ondoosuku ala sani luku efu a tuu.’—1 TES. 5:21.
SAN WO LELI
Wo luku saw yeepi u te sani de, di sa meke a taanga gi u fu dini Yehofa.
1-2. (a) San a wantu sani di e gi den sama di e dini Yehofa booko ede? (b) San wo luku aini a artikel ya?
WINSI u gaandi efuso yonkuu, tokuso a omen sani de di we booko wi ede anga den. a Pakisei wantu fu den sani ya: Wan yonkuu peleikiman e akisi enseefi efu Yehofa e booko en ede anga en, neen meke ai daaidaai fu dopu. Wan baala e du ala san a poi fu poti a Kownukondee a fesi, a peesi fu go suku balinen aini a goontapu. Ma nownow di a kon moo gaandi á moni nai sai moo, ai sidon e denki efu a wan bun sani a du anga en libi. Wan gaandi sisa e fii booko-saka bika aa poi du so fuu moo enke fosi. I akisi iseefi den sani ya kaba: ‘Yehofa e poti pakisei a mi? A abi wini taki mi e fika so fuu sani fu man dini Gadu? Mi poi du sani gi Yehofa ete?’
2 Efu u nai meke moiti fu piki den akisi ya, a sani ya sa meke wa dini Yehofa moo. Aini a artikel ya wo luku fa Beibel sa yeepi u te we (1) si enke Yehofa nai booko en ede anga u, (2) te we si enke den sani di u be du aini a ten di pasa á be bun, efuso (3) te we si enke Yehofa á poi wooko anga u moo.
SAW YEEPI U TE WE BOOKO WI EDE?
3. Saw sa du te we booko wi ede anga son sani?
3 Wan sani di o yeepi u fa wa booko wi ede moo, a te we ondoosuku a Beibel. Te we du a sani ya, wi anga Yehofa o toon moo bun mati. A sani ya o ‘meke u biibi taanga.’ Aw yeepi fu taampu gingin.—1 Kor. 16:13.
4. Faw sa ‘ondoosuku luku efu ala sani a tuu’? (1 Tesalonikasama 5:21)
4 Leisi 1 Tesalonikasama 5:21. A Beibel seefi e taigi u taki u mu ‘ondoosuku ala sani luku efu a tuu.’ Faw sa du a sani ya? U sa luku efu den sani di we biibi e kai anga san Beibel e taki. Pakisei a toli fu a yonkuu peleikiman di e akisi enseefi efu Yehofa e booko en ede anga en tuutuu. A fu di ai akisi enseefi a sani ya, meke a sa biibi taki Yehofa nai booko en ede anga en? Nono, a mu go ‘ondoosuku luku’ fu kon sabi fa Yehofa e si en tuutuu.
5. Fa Yehofa e piki den akisi fuu?
5 Te we leisi a Beibel, a leti enke Yehofa e taki anga u. Ma efu u wani fende piki fu den akisi fuu, da a ná leisi namo u mu e leisi a Beibel. Ma u mu e teke ten ondoosuku den sani di e gi u booko-ede. U mu koboloiki den wooko sani di a olikanisâsi seeka gi u fu ondoosuku sani (Odo 2:3-6). U sa akisi Yehofa aini begi fu a yeepi u fu fende den piki fu den akisi di wi abi. Bakadati u sa luku sowtu leli aini Beibel o yeepi u. A omen wini wo fende te we ondoosuku toli fu sama aini Beibel ten di be miti denseefi sani enke u.
6. Fa den komakandaa e yeepi u te wi abi booko-ede?
6 Yehofa e taki anga u tew de a den komakandaa tu. Te we gwa den komakandaa ala yuu, wo yee wan sani aini wan lezing efuso aini wan piki di wan sama gi. A kan tu taki na a sani di u yee a dei de u be abi fanowdu (Odo 27:17). Meke u go luku now saw sa du te we booko wi ede anga son sani.
TE YE AKISI ISEEFI EFU YEHOFA E BOOKO EN EDE ANGA I
7. San son wan fu u sai akisi useefi?
7 I be akisi iseefi kaba efu ‘Yehofa e si i?’ Efu ye fii enke ya pelensipali, yo bigin denki taki noiti yo poi toon mati anga a Sama di meke ala sani. We a gei enke na aseefi sowtu sani ya Kownu David be e pakisei. A be e foondoo taki Yehofa e poti pakisei a wi enke libisama. Neen meke a taki: ‘Yehofa, san a wan libisama fi i mu e booko yu ede anga en? Sama a den pikin fu wan libisama fi i mu e pakisei den? (Ps. 144:3). Pe u sa fende a piki fu a akisi ya?
8. Enke fa 1 Samuweli 16:6, 7, 10-12 e soi, da san Yehofa e si aini wi enke libisama?
8 A Beibel e leli u taki Yehofa e si den sama di taawan nai poti pakisei. Pakisei a toli ya: Yehofa be sende Samuweli go na a osu fu Isai fu salufu wan fu den boi fi en enke kownu fu Islayeli. Ma fu den aitin boi di Isai be abi, a seibin namo a be kai. Aa be kai David, a moo yonkuuwan. b Ma tokuso, a David Yehofa be teke. (Leisi 1 Samuweli 16:6, 7, 10-12.) Yehofa be si fa David be de tuutuu. A be sabi tu taki a yonkuman ya be lobi en.
9. Saide i sa biibi taki Yehofa e booko en ede anga i? (Luku a fowtow.)
9 Pakisei fa Yehofa soi i kaba taki ai booko en ede anga i. Ai taigi i san na a moo bun sani fu du te yu abi polobelema (Ps. 32:8). A fu di a sabi i bun, fu di ai booko en ede anga i meke ai du a sani ya (Ps. 139:1). Te ye wooko anga den leli fu Yehofa anga tei si fa den e yeepi i, da a sani ya o yeepi fu biibi taki ai booko en ede anga i tuutuu (1 Kolon. 28:9; Toli 17:26, 27). Yehofa e si a moiti di ye meke fu dini en anga i hii ati. Ai si den bun manii fii, neen meke a wani toon i mati (Yel. 17:10). Ma enseefi o piisii efii wani toon en mati tu.—1 Yoh. 4:19.
‘Efu yu e suku en, aw meke i fende en, ma efi i gwe fika en, aw gwe fika i fu teego.’—1 Kolon 28:9 (Luku paragraaf 9) c
TE WE SI ENKE DEN SANI DI U BE DU AINI A TEN DI PASA Á BE BUN
10. Saw sa akisi useefi te we denki son bosoloiti di u teke aini a ten di pasa?
10 Son yuu te son wan fuu e pakisei den bosoloiti di u teke aini a ten di pasa, a kan taki we akisi useefi efu a wan koni sani u du tuutuu. Kande son wan fu u be abi wan bun wooko efuso u be sa bigin wan bisnis, ma fu di u be wani du moo gi Yehofa meke wa du en. Ma now, baka di omen yali pasa kaba, ye si wantu sama di libi e waka bun nownow fu di den du sani taa fasi. Kande den sama ya abi moni efuso a gei enke ala sani fu den e waka bun. A sani ya sa meke yu akisi iseefi taki: ‘A wan bun bosoloiti mi teke fu dini Yehofa? Na a sani ya e tapu mi fu naabi wan bun libi enke fa mi wani?’
11. Anga san a sikiifiman fu Psalm 73 be e booko en ede?
11 Efi iseefi e booko yu ede anga wantu sani, da gaantangi luku san Beibel e taki fu a sikiifiman fu Psalm kapitel 73. A be e si fa sama di á be e dini Yehofa be e libi wan switi libi, den be e piisii, den á be abi polobelema tu (Ps. 73:3-5, 12). Te a be si fa den sama di á be e dini Yehofa libi be e waka bun, da a be e fii enke a fu soso ai meke moiti fu dini Yehofa. A denki ya be e ‘toobi en ala dei’ (Ps. 73:13, 14). Ma san a du anga a denki ya?
12. Leti enke fa Psalm 73:16-18 e soi, da san yeepi a psalm sikiifiman di a be e booko en ede anga a sani ya?
12 Leisi Psalm 73:16-18. A psalm sikiifiman be go na a santa peesi fu Yehofa. Di a go ape, a miti den taa sama di be e dini Yehofa. A sani ya yeepi en fu be man si sani kiin baka. A kon fusutan taki winsi fa son wan fu den sama abi wan switi libi, tokuso den naabi wan tuutuu howpu gi a ten di e kon. A kon si tu taki a dini di a be e dini Yehofa na a moo bun sani di a be sa du. A so a man ya be fende taanga-sikin fu holidoo.—Ps. 73:23-28.
13. Sai sa du efii be du wan sani di á bun aini a ten di pasa? (Luku a fowtow.)
13 Leti enke a psalm sikiifiman, a Wowtu fu Gadu poi yeepi i te ye booko ye ede anga wan sani. A sani di i sa du, a fu pakisei fa Yehofa e belesi i, fa ai holibaka gii anga sowtu howpu yu abi. Den sama fu a ten ya e libi gi tide wawan, den naabi nawan howpu. Ma na a taa se, wi di e dini Yehofa o fende omen bun sani aini a ten di kon (Ps. 145:16). Pakisei fa i libi be o de nownow efu yu á be e dini Yehofa. Noiti ya mu feegete a sani ya: Efi i lobi Gadu anga taa sama, i libi o waka bun.
Si iseefi aini a paladeisi (Luku paragraaf 13) d
TE WE SI ENKE YEHOFA Á POI WOOKO ANGA U MOO
14. San e miti son baala anga sisa? San den e akisi denseefi?
14 Son wan fu den sama di e dini Yehofa á poi du sani gi en enke fosi moo fu di den kon gaandi, kande a gusontu fu den e go a baka efuso kande den e feti anga wan siki. A sani ya sa meke den fii enke den á bun sai gi Yehofa. Neen meke den sa e akisi denseefi taki: ‘Mi poi wooko gi Yehofa ete?’
15. San a sama di sikiifi Psalm 71 be sabi?
15 A sikiifiman fu psalm 71 be e booko en ede anga a aseefi sani ya. A be e begi taki: ‘Ná gwe fika mi te mi kon swaki’ (Ps. 71:9, 18). Winsi fa a psalm sikiifiman ya be e fii swaki son yuu, tokuso a be sabi taki Yehofa be o holibaka gi en efu a be tan dini en anga en hii ati. A psalm sikiifiman be leli taki Yehofa e poolo anga den sama di tan dini en anga den hii ati winsi sai miti den.—Ps. 37:23-25.
16. Saide u sa taki den gaandiwan pelensipali gi Yehofa? (Ps. 92:12:12-15)
16 Efu ya a wan gaandi baala efuso sisa, a bun fu si iseefi enke fa Yehofa e sii. A poi yeepi i fu tan dini en winsi yu abi gosontu polobelema. (Leisi Psalm 92:12-15.) A moo bun fu poti pakisei a sai poi du nownow, pe fii sidon e pakisei san ya poi du. Wan fu den sani di i sa du nownow, a fu soi taki ye booko yu ede anga taawan. I sa meke moiti fu tan tyai iseefi a wan bun fasi go doo. I sa taigi taawan fa Yehofa yeepi i ala den yali di pasa anga fa den sani di Beibel taki o pasa e taanga i biibi. I sa begi gi den baala anga sisa tu. Bika dati o yeepi den fu holidoo (1 Peit. 3:12). A naabi toobi winsi sai miti u, ala u poi du wan sani gi Yehofa anga taa sama.
17. Saide wa mu e maiki useefi anga taawan?
17 Ya mu booko yu ede efu ye fii enke ya poi du moo enke fosi. Holi a pakisei taki Yehofa e piisii anga sai poi du gi en. Kande son yuu yo wani maiki iseefi anga taawan. Ma ya mu du a sani de! Bika Yehofa nai du en (Gal. 6:4). Pakisei a toli fu Maliya: A be kandi wan gaan dii oli a Yesesi futu (Yoh. 12:3-5). Ma na a taase, a uman di man be dede kaba be poti tu pikin tii sensi di a be go na a tempel (Luk. 21:1-4). Ma tokuso, Yesesi á be maiki den tu uman ya anga denseefi, ma a be si a biibi di den be abi. A so Yehofa e si ala den sani di ye du gi en fu dii lobi en. Ai piisii tu anga sai poi du gi en.
18. Saw yeepi u fu wa booko wi ede moo? (Luku a faki ‘ A Wowtu fu Gadu poi yeepi i te ye booko yu ede.’)
18 Ala u e booko wi ede son yuu. Enke faw si aini a artikel ya, da a Wowtu fu Gadu poi yeepi u te we booko wi ede. Neen meke efu yu abi akisi di e meke ye booko yu ede, meke moiti fu fende den piki fu den akisi ya. Yehofa lobi ibiiwan fu wi apaiti. Ai si sai poi du gi en anga a moiti di ye meke fu dini en. Efu u holi a sani ya a pakisei, aw pai u. Bika a lobi ala den sama di e dini en, ai booko en ede anga den tu.
SINGI 111 Den sani di e meke wi e poolo
a SAN DEN WOWTU YA WANI TAKI: Aini a artikel ya, we taki fu den sani di e meke we fii enke wa pelensipali moo gi Yehofa. We poti pakisei tu na a bosoloiti di u teke fu dini Gadu, fu luku efu disi na a moo bun sani di u be sa du. Ma a fii ya á wani taki u nai fitoow Yehofa moo efuso u nai biibi den sani di a paamisi u.
b Winsi fa Beibel nai taigi u pilisisi omen yali David be abi di Yehofa be meke den salufu en, tokuso u sabi taki a be yonkuu ete a pisiten de.—Luku A Wakititolen fu 1 september 2011, blz. 29, par. 2.
