1. Fa Yehofa e si den sama di e dini en?

 YEHOFA e si ala den sani di e miti den sama di e dini en. A sabi on ten we piisii anga on ten we tyali (Ps. 37:18). Te a si a moiti di we meke fu dini en winsi kande we fii booko-saka, ná pikin poolo ai poolo. Yehofa de kabakaba fu yeepi u. A wani u kisi useefi baka.

2. San Yehofa e du gi den sama di e fii booko-saka? Sowtu wini we fende fu a yeepi di ai yeepi u?

² Psalm 147:3 taki Yehofa e ‘tei den soo fu den’ sama di e fii booko-saka. A tekisi ya e soi fa Yehofa e yeepi den sama ya. Saw mu du efu u wani fende wini fu a yeepi di Yehofa e yeepi u? Pakisei a toli ya. Wan dataa di sabi du en wooko bun, poi yeepi wan sama di kisi mankei. Ma efu a sama di kisi mankei wani betee, da a mu wooko anga den sani di a dataa e taigi en. Aini a artikel ya, wo si san Yehofa e taigi den sama di e fii booko-saka. Wo si faw sa wooko anga den sani di ai taigi u tu.

YEHOFA E MEMBEE U TAKI U PELENSIPALI GI EN

3. Saide son sama e fii enke den á bun?

³ A omen sama aini a ten ya á lobi taawan, neen meke den e libi ogii anga den. Den e meke den fii enke den á bun. Wan sisa den e kai Helen a taki: ‘Mma anga nda á be abi bun manii. Nda be e du omen ogii. Ala dei a be e taigi  mi taki mia bun.’ Kande leti enke Helen, sama be e libi ogii anga i. Kande den be e meke ye fii enke ya bun. Efu a sani ya miti i kaba, a sani ya sa meke a taanga gii fu biibi taki sama lobi i.

4. Enke fa Psalm 34:18 e soi, da fa Yehofa e si den sama di e fii booko-saka? San a taki aw du gi den?

⁴ Winsi sama be e libi ogii anga i, tokuso i sa biibi taki Yehofa lobi i. I pelensipali gi en. A ‘de koosube fu den sama di booko-saka’. (Leisi Psalm 34:18.) Efi ye fii enke ya bun, holi a pakisei taki Yehofa e si den bun manii fii, neen meke a hali i kon neen (Yoh. 6:44). A de kabakaba fu yeepi i, bika a nai meke sipowtu anga i.

5. Saw sa leli fu Yesesi te we luku a fasi fa a be e libi anga den sama di taawan be e soso?

⁵ Te we luku a fasi fa Yesesi be e libi anga sama, we kon sabi fa Yehofa e fii. Di a be de a goontapu a be e soi switifasi gi den sama di taawan be e soso (Mat. 9:9-12). Di wan uman di be abi wan takuu siki holi a koosi mofu fi en, Yesesi gi en taanga-sikin neen a gafa en fu a biibi fi en. A uman ya be e biibi taki na a koosi mofu fu Yesesi namo fu a holi, da a be o kon betee (Malik. 5:25-34). A denseefi manii di Yehofa abi Yesesi abi (Yoh. 14:9). Neen meke i sa biibi taki Yehofa lobi i. Ai si den bun manii fii. Ai si a biibi fii anga a lobi dii lobi en.

6. Sai sa du efi ye fii enke ya bun?

⁶ Sai sa du efu son yuu ye fii enke ya bun? Leisi den pisi aini Beibel di e soi fa Yehofa e si i. Bakadati dai teke ten pakisei sai leisi b (Ps. 94:19). Kande ya doo wan maiki fii dii be poti efuso kande ye  fii booko-saka fu di ya poi du son sani di taawan e du. Efu a sani ya pasa, ya mu maiki iseefi anga taawan. Ná poti pakisei a sani di ya poi du. Yehofa nai suku fini anga sani. Neen meke a nai akisi u fu du wan sani di a sabi taki u naw poi du (Ps. 103:13, 14). Efu sama e libi ogii anga i, holi a pakisei taki a ná yu a fowtu komoto. Yehofa o kuutu den sama di e libi ogii anga taawan, ma ai yeepi den sama di taawan e libi ogii anga den (1 Peit. 3:12). Sandra, wan sisa di sama be e libi ogii anga en di a be yonkuu taki: ‘Mi e akisi Yehofa ala yuu fu a yeepi mi fu si den bun sani di ai si aini mi.’

7. Faw sa poti taawan a pasi anga den sani di miti wi aini a ten di pasa?

⁷ Yehofa sa meke i yeepi taawan. A gi yu a gaandi fu wooko makandaa anga en te ye du a peleikiwooko (1 Kor. 3:9). Fu di wantu sani miti i kaba, meke i poi fusutan fa taawan e fii tu te son sani e miti den. Na a sani ya meke i poi yeepi den son yuu tu. Helen di u be taki fi en kaba fende yeepi. Nownow enseefi poi yeepi taawan tu. A taki: ‘Na ala yuu mi be e fii enke mia bun. Ma Yehofa soi mi san a lobi. Ai koboloiki mi fu yeepi taawan tu.’ Helen a wan kowownu-pionili nownow. Ná pikin piisii ai piisii.

YEHOFA WANI U BIIBI TAKI A GI U PAADON TUUTUU

8. San Yehofa e taigi u a Yesaya 1:18?

⁸ A omen sama di e dini Yehofa e tan booko den ede fu wan sani di den be du aini a ten di pasa. Son yuu a sani di den be du fosi den kon dini Yehofa. Wa mu feegete taki a fu di Yehofa lobi u tuutuu, meke en manpikin kon dede giw fu u sa fende paadon fu u sondu. Yehofa wani u teke a kado di a gi u. Ai soi u kiin taki baka te wi anga en ‘meke en bun baka’ c, a kaba anga a taki de. (Leisi Yesaya 1:18.) Ai bigi giw taki Yehofa nai pakisei den sondu di u be du aini a ten di pasa. Ma na a taase, noiti Yehofa e feegete den bun di we du tu.​—Ps. 103:9, 12; Heb. 6:10.

9. Saide wa mu tan pakisei den sondu di u be du aini a ten di pasa?

⁹ Efi ye fii booko-saka fu sani dii be du aini a ten di pasa, meke moiti fu poti pakisei a den sani di ye du nownow anga den sani di yo du aini a ten di e kon. Luku a toli fu apostel Pawlesi. A be e hati en taki a be libi ogii anga den Kelesten, ma a be sabi taki Yehofa gi en paadon (1 Tim. 1:12-15). I si enke a be e tan pakisei den sani di a be du aini a ten di pasa? Nono, aa be e pakisei den sani de moo. Aa be e sidon e pakisei den somen sani di a be mu du fu toon wan Faliseiman di taawan be e lesipeki (Filip. 3:4-8, 13-15). Pe fu a be poti pakisei a den sani de, a be e du ala san a poi aini a peleikiwooko. A be e poti pakisei na a ten di e kon. Leti enke Pawlesi ya poi kengi san pasa kaba. Ma i sa gi Yehofa gaandi te ye du ala sai man gi en nownow. I sa pakisei den moin sani di a paamisi wi aini a ten di e kon tu.

10. Saw sa du efu wan sani di u be du aini a ten di pasa hati taawan?

¹⁰ Kande ye fii booko-saka, fu di son sani dii be du aini a ten di pasa be hati taawan. Sai sa du, efu a sani ya e miti i?  Du ala sai poi fu seeka a toli. I sa taigi den taki ai hati i taki i be du so wan sani, kande i sa akisi den paadon (2 Kor. 7:11). Akisi Yehofa fu a yeepi den sama ya. A poi yeepi yu anga den fu dini en go doo. A poi yeepi u fu abi freide tu.

11. Saw sa leli fu a toli fu a polofeiti Yona? (Luku a fowtow a fesise fu A Wakititolen tu.)

¹¹ Leli fu den fowtu dii be meke aini den ten di pasa, dai meke Yehofa koboloiki i enke fa a wani. Luku a toli fu polofeiti Yona. Pe fu a gwa Ninifei a pe Yehofa be sende en go, a naki teke taase. Bakaten Yehofa puu kaasi gi en. Yona leli fu a fowtu di a be meke (Yona 1:1-4, 15-17; 2:7-10). Boiti dati, Yehofa á be poti Yona a wan se taki a naw koboloiki en moo enke polofeiti. Bakaten Yehofa be sende en gwa Ninifei baka. A leisi ya a aliki. Winsi fa a be e hati en taki a ná aliki Yehofa, tokuso bakaten a du san Yehofa be akisi en.​—Yona 3:1-3.

YEHOFA E HOLIBAKA GI U ANGA EN SANTA YEYE

12. Fa Yehofa e gi wi a freide fi en te wan gaan sani miti u? (Filipisama 4:6, 7)

¹² Te wan gaan sani miti u, Yehofa e gi wi a santa yeye fi en fu toosutu u. Luku a toli fu Ron anga Carol. A boi fu den kii enseefi. Den taki: ‘A omen tesi u pasa kaba, ma disi na a moo gaan tesi di miti u. A omen neti wa be e poi siibi, neen meke u be e begi Yehofa. U be e fii tuutuu taki Yehofa gi wi a freide fi en di sikiifi a Filipisama 4:6, 7.’ (Leisi.) Efi ye kusumi fu di wan gaan sani miti i, i sa taigi Yehofa ala san de a yu ati. I sa taki anga en on langa i wani (Ps. 86:3; 88:1). Akisi en ala yuu fu a gi yu a santa yeye fi en. Aw yeepi yu ala yuu.​—Luk. 11:9-13.

13. Fa a santa yeye e yeepi u fu tan dini Yehofa anga u hii ati? (Efeisesama 3:16)

¹³ Wan gaan tesi miti i kaba di meke ye fii enke i naabi kaakiti moo? A santa yeye poi yeepi u fu tan dini Yehofa. (Leisi Efeisesama 3:16.) Luku a toli fu wan sisa den e kai Flora. Anga en man be e du a zendeling wooko di en man waka gi en. Bakaten den booko a toow. A taki: ‘Ná pikin kusumi mi be e kusumi, mia be poi pakisei nawan taa sani. Mi begi Yehofa fu a gi mi en santa yeye fu mi poi holidoo. Yehofa be gi mi san mi be abi fanowdu fu kisi miseefi. Winsi fa aa be makiliki, ma Yehofa holibaka gi mi.’ A be kon fusutan taki Yehofa poi yeepi en fu pasa iniiwan tesi. Flora taki den sani di sikiifi a Psalm 119:32 e soi fa Yehofa yeepi en. A tekisi e taki: ‘Mi e holi den weiti fi yu anga mi hii ati, bika ye yeepi mi fu fusutan den moo bun.’

14. Faw sa meke a santa yeye yeepi u?

¹⁴ Saw mu du baka te u begi Yehofa fu a gi wi a santa yeye? Du sani di o meke Gadu gi yu a santa yeye fi en. Dati wani taki u mu go a den komakandaa, u mu peleiki gi taawan tu. U mu leisi a Wowtu fu Gadu ala dei. A sani ya o yeepi u fu denki enke fa Yehofa e denki (Filip. 4:8, 9). Te ye leisi, poti pakisei a den sama di tesi be miti. Bakadati dai pakisei fa Yehofa yeepi den fu holidoo. Sandra di u be taki fi en kaba be e kusumi fu di a be miti omen tesi aini en libi. A taki: ‘A toli fu Yowsefu gi mi taanga-sikin tuutuu. Sama be e libi ogii anga en. A omen tesi be e miti en tu. Ma aa meke nawan  fu den sani de poli en anga Yehofa.’​—Gen. 39:21-23.

YEHOFA E KOBOLOIKI DEN BAALA ANGA SISA FU GI U TAANGA-SIKIN

15. Sama sa gi u taanga-sikin? (Luku a fowtow.)

¹⁵ Te sani e miti u di e meke we fii booko-saka, den baala anga sisa sa ‘toosutu u’ (Kol. 4:11). A yeepi di den baala anga sisa e yeepi u, a wan fasi fa Yehofa e soi taki a lobi u. Den e gi u taanga-sikin fu di den e de makandaa anga u, den e aliki u te we taigi den fa we fii tu. Boiti dati, den sa leisi wan tekisi gi u efuso begi anga u d (Rom. 15:4). Son yuu wan baala efuso wan sisa sa poti wi a pasi. A sani ya sa yeepi u fu holidoo. Son leisi den e boli gi u tu.

16. Saw mu du efu u wani taawan yeepi u?

¹⁶ Efu u wani taawan yeepi u, daw mu akisi den. Den baala anga sisa lobi u, neen meke den wani yeepi u (Odo 17:17). Ma den á sabi fa we fii, den á sabi san wi abi fanowdu tu (Odo 14:10). Efi ye fii booko-saka, taki anga wan bun mati fii di ye fitoow, taigi en fa ye fii. Taigi den kiin san i si enke sa yeepi i. I sa taki anga wan efuso tu owluman di yu anga den gwenti. Son sisa e fende taanga-sikin te den taki anga taa sisa di abi ondoofeni.

17. San sa meke a taanga gi u fu fende a yeepi di taawan wani gi u?

 ¹⁷ Ya mu e de i wawan ala yuu. Son yuu kande yu ati o boon te dai nai fii fu de makandaa anga taawan. A tuu taki a ná ala yuu den baala anga sisa o fusutan fa ye fii. Son yuu den sa taki sani di hati i tu (Yak. 3:2). Winsi a sani ya pasa, ya mu poti den baala anga sisa a wan se, bika Yehofa sa koboloiki den fu gii taanga-sikin. Wan owluman den e kai Gavin, be abi kusumi siki. A taki: ‘Gaanse leisi mia be e wani taki anga den mati fu mi. Mia be e wani de makandaa anga den tu.’ Ma Gavin meke moiti fu de makandaa anga den mati fi en. A sani ya meke a be e fii moo bun. Wan sisa den e kai Amy taki: ‘Den sani di miti mi, meke ai taanga gi mi fu fitoow sama. Ma mi leli fu lobi den baala anga sisa enke fa Yehofa lobi den. Mi sabi taki a sani ya e meke Yehofa piisii, miseefi e piisii tu.’

DEN SANI DI YEHOFA PAAMISI WI AINI A TEN DI E KON E TOOSUTU U

18. Saw pasa aini a ten di e kon? Saw sa du nownow?

¹⁸ Aa fika langa moo fu Yehofa puu ala den sani di e gi u booko-ede (Openb. 21:3, 4). U ‘naw membee den sani di be e miti u moo’ (Yes. 65:17). Enke faw si aini a artikel ya, Yehofa e ‘tei den soo fu u’ nownow. A omen sani Yehofa seeka fu yeepi u. Teke a yeepi di a wani gii. I sa biibi taki ‘Yehofa e booko en ede anga i’ tuutuu.​—1 Peit. 5:7.