NÁ PIKIN lobi den Islayelisama be lobi poku. A omen leisi Beibel e taki fu sama di be sabi pee poku anga sama di be e singi. Wantu fu den Beibel buku, a singi. Wantu fu den buku ya a Psalm, Singi fu Salomo anga Tyali singi. Wan buku di e taki fa a libi be de fosi, e soi taki a omen sowtu fasi den Islayelisama be e koboloiki poku aini den libi.

Poku be de wan aladei sani. Den Islayelisama be e pee poku fu soi fa den e fii (Yes. 30:29). Den umanpikin be e pee pokusani fu soi taki den be e piisii, den sani ya a be harp, cymbaal anga tutu di den be e boo. Den be e dansi tu. Den be e du den sani ya te den be o poti wan nyun Kownu, te den suudati be wini wan feti, efuso te den be e holi fesa fu gi Gadu gaandi (Kuut. 11:34; 1 Sam. 18:6, 7; 1 Kow. 1:39, 40). Den Islayelisama be e singi tu fu soi fa den e fii te wan sama fu den be dede (2 Kolon. 35:25). A de kiin fu si taki ‘den Islayelisama be lobi poku tuutuu’ enke fa McClintock anga Strong’s Cyclopedia e taki.

Den Kownu be lobi poku. Den kownu fu Islayeli be lobi aliki poku. Kownu Saul be e kai David fu kon pee poku gi en (1 Sam. 16:18, 23). Bakaten di David toon Kownu, a omen poku sani a be meke. A be e tyai omen sama kon a wan fu pee poku aini a tempel tu (2 Kolon. 7:6; Am. 6:5). Kownu Solomo be poti uman anga man di be e singi na a Kownu osu.​—Peleik. 2:8.

Den be e koboloiki poku te den be e dini Gadu. Den Islayelisama be e koboloiki poku fu gi Yehofa gaandi. A 4000 pokuman be e pee poku na a tempel (1 Kolon. 23:5). Anga omen sowtu pokusani den be e pee poku. Sani enke cymbaal, harp, den tutu di den be e boo anga omen taawan ete (2 Kolon. 5:12). Ma a ná den sama ya namo be e pee poku te den be e dini Yehofa. Te den Islayelisama be de a pasi e go a Yelusalem fu go dini Gadu, den be e singi a pasi. Den be e singi Psalm 120-134. Ma na a taa se te a pisiten fu a Paska ofaandi be doo, da den be e singi Psalm kapitel 113-118 enke fa den sani di den Dyu sikiifi a fositen e soi. a

Poku pelensipali gi a foluku fu Gadu aini a ten ya ete (Yak. 5:13). A singi di we singi a den komakandaa a wan pisi fu a dini di we dini Yehofa (Efe. 5:19). Poku e yeepi u fu libi na a wan (Kol. 3:16). Te we singi efuso aliki poku di e taki fu Yehofa, a sani ya e yeepi u fu holidoo te polobelema e miti u (Toli 16:25). Poku e yeepi u fu soi taki we biibi Yehofa anga fu soi taki u lobi en.