Wan pikin baikon be de na a doomofu fosi i doo a den Santa pisi fu a tempel. Den Nyun Goontapu vertaling fu a Beibel di meke fosi 2023 be e taki ‘a baikon be langa wan sani fu 8 te anga 10 meter. A hei sowan 60 (el) efuso 26,70 meter, a be baala 20 (el) efuso 8,90 meter.’ (2 Kolon. 3:4) Taa Beibel seefi e soi taki a baikon be hei wan sani fu 53 meter.

Ma enke fa a Nyun Goontapu vertaling di meke aini 2023 e soi, da a doomofu be hei wan sani fu 9 meter. a Meke u luku saide u kengi a fasi fa u be e si a sani ya.

A tekisi a 1 Kownu 6:3 nai soi on hei a baikon be de. Na a langa anga a dipi fu a baikon wawan Yelemiya be wani soi aini a tekisi ya, aa taki fa a hei. Aini a kapitel baka di a taki den sani ya, a taki finifini fu wantu taa moin sani aini a tempel, sani enke a gaan kopoo beenki, den tin pikin wagi, anga den tu ponsu di be meke anga kopoo, di be de leti na a doomofu fu a baikon (1 Kow. 7:15-37). Efu a baikon be hei moo enke 50 meter, da a be hei kiinkiin moo enke den taa pisi fu a tempel. Ma da saide Yelemiya á be taki fa a be hei? Omen ondoo yali bakadati, son wan fu den Dyu sikiifiman be sikiifi taki a baikon á be hei moo den taa pisi fu a tempel fu Salomo.

Son ondoosukuman taki efu a baikon be hei 53 meter, den sikotu fu a tempel á be o poi holi a baikon. Te den be e mesee sani di hei a fositen, a futu fi en be e baala. Den gaan doo fu den tempel a Egepte be lobi baala na a futu, da den be e fini a tapu. Ma a tempel fu Salomo be meke taa fasi. Ondoosukuman denki taki den sikotu fu a tempel á be poi baala moo enke 2.7 meter na a futu. Wan sabiman den e kai Theodor Busink di e ondoosuku fa osu be e meke a fositen, taki: ‘tei luku fa a futu fu a tempel sikotu be deki, da noiti a baikon wawan be poi hei 53 meter.’

Kande a wan fowtu meke di den e meke kopi fu 2 Koloniki 3:4. Son kopie fu den gaandi Beibel be e taki aini a tekisi ya taki a baikon be hei wan sani fu 53 meter. Taa kopie enke a Codex Alexandrinus anga a Codex Ambrosianus di den be fende wan sani fu 600 yali baka a ten fu den fosi Kelesten, e taki a be hei wan sani fu 9 meter. Fa wan man di be e meke kopie fu den Beibel buku be sa meke a fowtu ya fu go sikiifi ‘53 meter’? A Hebrew wowtu gi ‘wan ondoo’ e gei a wowtu di kai fu soi on hei a baikon ben de. Neen meke den man di be e meke kopie fu a Beibel be sa meke a fowtu ya makiliki.

We meke moiti fu soi finifini fa sani be de aini a tempel fu Salomo, ma a moo pelensipali sani a san den sani aini a tempel wani taki. A tempel ya de enke wan sani di e yeepi u fu fusutan a gaan tempel pe sama be o dini Yehofa bakaten. Ai bigi gi u taki Yehofa kai ala den sama di e dini en nownow fu kon dini en aini a tempel ya!​—Heb. 9:11-14; Opb. 3:12; 7:9-17.