1. San Yesesi paamisi wi a Mateyesi 11:28-30?

YESESI be paamisi wan kulu sama di be e aliki en taki: „U kon a mi, da mi o gi u kaakiti baka”. (Leisi Mateyesi 11:28-30.) Yesesi be poi du a sani di a be paamisi den sama ya. Wi e si a sani ya, te u poti pakisei na a fasi fa Yesesi be deesi wan uman di be abi wan takuu siki.

2. San Yesesi be du gi wan uman di be siki?

² A uman ya be abi yeepi fanowdu. A be suku yeepi a omen dataa bika a be denki den be sa yeepi en. Ma a 12 yali a be abi a siki ya kaba. Nawan sama be poi deesi en. Enke fa a Weiti fu Mosesi be e soi, da wan sama di be abi a siki ya á be kiin (Lef. 15:25). A uman ya be yee taki Yesesi poi deesi siki sama, neen meke a go suku en. Di a doo a Yesesi, na a koosi mofu fi en namo a holi, neen wantenwanten a betee. Ma a ná deesi namo Yesesi deesi a uman ya, a be soi en tu taki a lobi en. Di a taki anga en, a kai en „mi umanpikin”. A uman ya be musu fende kaakiti baka di Yesesi du a sani ya.​—Lukasi 8:43-48.

3. Sowtu akisi wi o piki aini a artikel ya?

³ Na a uman ya seefi go a Yesesi. Efu a á be meke moiti go a Yesesi, a á be o fende yeepi. A so a de anga wi aini a ten ya tu. U mu meke moiti fu „kon” a Yesesi. Aini a ten ya Yesesi ná o deesi den sama di e „kon” neen a wan wonduu fasi enke fa a be deesi a uman ya. Ma te enke now ai kai u fu u ’kon neen, da a o gi u kaakiti baka’. Aini a artikel ya wi o piki feifi akisi. Fa u sa kon a Yesesi? San Yesesi be wani taki di a taki „u teke a tyatyali fu mi”? San u sa leli fu Yesesi? Saide a wooko di a gi u fu du e gi u kaakiti baka? Fa u sa tan fende kaakiti te u teke a tyatyali fu Yesesi?

4-5. San a wantu fasi fa u sa „kon” a Yesesi?

⁴ Wan fasi fa u sa „kon” a Yesesi, a te wi e sutudeli den sani di a be e du anga den sani di a be taki (Luk. 1:1-4). Taa sama á poi du a sani ya gi u. A useefi mu sutudeli fu sabi san Beibel e taki fu Yesesi. U sa „kon” a Yesesi tu te u dopu, da u toon wan bakaman fi en.

⁵ Wan taa fasi fa u sa „kon” a Yesesi, a te wi e go a den owluman te wi abi yeepi fanowdu. A Yesesi seefi poti den man ya „di sabi du son sani” fu yeepi wi aini a kemeente (Efe. 4:7, 8, 11; Yoh. 21:16; 1 Peit. 5:1-3). A useefi mu akisi den owluman fu yeepi u. Den owluman á poi sabi san wi e denki, neen meke a ná ala yuu den e sabi taki wi abi yeepi fanowdu. Wan baala den e kai Julian taki: „Mi be abi fu fika a wooko di mi be e wooko a Betel, bika mi be siki. Wan fu den mati fu mi sende mi fu akisi den owluman fu den kon gi mi deki-ati. Biginbigin, mi á be si enke mi be abi yeepi fanowdu. Ma bakaten mi go a den owluman. A taanga-sikin di den gi mi a be wan fu den moo gaan kado di mi be sa fende.” Owluman di e du den wooko bun enke den wan di be go luku Julian, sa yeepi u fu sabi „fa Kelestesi e denki”. Den sa yeepi u tu fu denki efuso du sani enke Kelestesi (1 Kor. 2:16; 1 Peit. 2:21). A sani ya a wan fu den moo moin kado di den owluman sa gi u.

6. San Yesesi be wani taki di a taki „u teke a tyatyali fu mi”?

⁶ Di Yesesi taki „u teke a tyatyali fu mi”, kande a be wani soi u taki „u mu aliki en”. Ma kande a be wani taigi u tu taki „u kon na a tyatyali ondoo makandaa anga mi, da wi o wooko gi Yehofa”. Winsi san Yesesi be wani soi u di a taki a sani ya, a tyatyali * wani taki wi o abi fu wooko gi a Masaa fu u.

7. Enke fa Mateyesi 28:18-20 e soi, da sowtu wooko wi abi a gaandi fu du? San u sa biibi?

⁷ Wi e teke a tyatyali fu Yesesi te u paamisi Yehofa taki wi o libi enke fa a wani da u dopu. Na ala sama Yesesi e kai fu teke a tyatyali fi en. Yesesi ná o yaki nawan sama di wani dini Gadu tuutuu (Yoh. 6:37, 38). Ala den bakaman fu Kelestesi abi a gaandi fu du a wooko di Yehofa gi Yesesi fu du. U sa biibi taki Yesesi o yeepi u fu man du a wooko ya.​—Leisi Mateyesi 28:18-20.

8-9. Saide sama di abi sakafasi be lobi Yesesi? San u mu akisi useefi?

⁸ Sama di abi sakafasi be lobi Yesesi (Mat. 19:13, 14; Luk. 7:37, 38). Saide? Bika Yesesi á be de enke den Faliseiman. Den man ya á be lobi sama. Den be abi bigifasi (Mat. 12:9-14). Ma Yesesi be lobi sama. A be abi sakafasi. Den Faliseiman be lobi balinen. Ma Yesesi be e leli sama taki den á mu feti fu abi balinen. A be e leli den bakaman fi en taki den mu abi sakafasi. A be e leli den tu taki den mu e dini taawan (Mat. 23:2, 6-11). Den Faliseiman be abi makiti. Sama be e du san den taki fu di den be e feele san be o miti den efu den be pasa den mofu (Yoh. 9:13, 22). Ma Yesesi be e gi sama taanga-sikin fu di a be e libi bun anga den. A be e taki switi anga den tu.

 ⁹ Yu e meke moiti fu waka a Yesesi baka? Akisi iseefi taki: ’Sama sabi mi enke wan sama di abi sakafasi? Den sabi mi enke wan sama di ati nai boon gaw? Mi de kabakaba fu du wooko di taawan e si enke wan lagi wooko? Mi e taki switi anga taawan?’

12-14. Saide u sa taki a wooko di Yesesi gi u fu du e gi u kaakiti baka?

¹² Saide wi e fende kaakiti te wi e du a wooko di Yesesi gi u fu du? Meke u luku wantu sani di e meke u fende kaakiti baka.

¹³ Wi abi den moo bun fesiman. Yehofa, a moo Gaan Fesiman fu u, a wan Gadu di sabi kiyoo. A nai libi ogii anga u, ai teke den sani di wi e du gi en fu bigi (Heb. 6:10). Ai gi wi a kaakiti di wi abi fanowdu fu du den wooko di a gi u (2 Kor. 4:7; Gal. 6:5). U sa waka a Yesesi, a Kownu fu u baka te u luku fa a be e libi anga taawan (Yoh. 13:15). Den owluman di de enke u sikapuman e meke moiti fu waka a Yesesi „a gaan sikapuman” baka (Heb. 13:20; 1 Peit. 5:2). Den e meke moiti fu taki switi anga u, fu gi u taanga-sikin anga fu gi u deki-ati anga den leli di den e gi u. Den e du san den poi fu kibii u tu fu ogii a miti u.

¹⁴ Wi abi den moo bun mati. Sama á de di lobi denseefi enke a foluku fu Yehofa. Wi e du a moo pelensipali wooko di de. Pakisei a sani ya: Wi e wooko makandaa anga baala anga sisa di abi bun manii. Den e meke moiti fu libi wan kiin libi. Den nai si enke den bun moo taawan. Winsi fa den sabi du son sani bun, tokuso den nai gafa. Den nai si wi enke sama di e wooko makandaa anga den namo, ma den e si wi enke mati tu. Den lobi u te neen den de kabakaba fu dede gi u.

15. Fa u mu si a wooko di wi e du?

¹⁵ Wi e du a moo bun wooko. Wi e yeepi sama fu sabi sama a Yehofa tuutuu. Wi e meke den kon sabi den lei di Didibii e paati (Yoh. 8:44). Saatan e fooseli sama anga den lei di ai paati. Wan fu den lei ya, na a wani di a wani u biibi taki noiti Yehofa o gii u paadon fu den fowtu di u meke. A wani u biibi tu taki sama á lobi u. Den lei ya e meke sama fii booko-saka. Te u „kon” a Yesesi, Yehofa e gi u paadon fu den sondu fu u. A lobi wi anga en hii  ati (Rom. 8:32, 38, 39). Ai gi u piisii te wi e yeepi sama fu kon sabi Yehofa. Wi e piisii te u si fa den libi e waka bun te den kon dini en.

16. Saide u sa taki a wooko di Yesesi gi u fu du, anga den taa wooko a ná aseefi?

¹⁶ A wooko di Yesesi gi u fu du, á de enke den taa wooko di wi e du. Saide u sa taki a sani ya? Te omen sama doo osu baka te den komoto a wooko, den e weli, den nai fii enke a wan bun sani den du. Ma te u wooko gi Yehofa anga Yesesi, wi e fii bun. Wi e fii tu taki u du wan bun sani. Son leisi te u komoto a wooko wi e weli te, ma toku wi e meke moiti go a komakandaa. Baka komakandaa wi e fii bun, wi e fende kaakiti baka. Na aseefi sani e pasa tu te u go aini a peleikiwooko anga te wi e sutudeli anga useefi. Te u meke moiti du den sani ya, wi e fende kaakiti baka.

17. San u mu holi a pakisei? Anga san u mu luku bun?

¹⁷ U mu holi a pakisei taki wi á poi du ala sani, neen meke u mu du den sani di moo pelensipali. U sa lasi omen kaakiti te wi e lon a goontapu gudu baka. Luku san Yesesi be taigi wan yonkuu gudu man. A man ya be akisi Yesesi taki: „San mi mu du fu fende teego libi?” A man ya be e du den sani di a Weiti e taki kaba. A be musu de wan bun man, bika Malikisi be sikiifi taki Yesesi „be kon lobi en”. Yesesi taigi a man fu a ’go seli den sani fi en, da a kon toon wan bakaman fi en’. A man á be sabi san a mu du. A á be poi fika den „tyaipi gudu” fi en (Malik. 10:17-22). Neen meke, a fika a tyatyali fu Yesesi, neen a tan dini „Gudu” (Mat. 6:24). Efu a be yu, san i be o du?

18. San u mu e du te a langa? Saide u mu e du a sani ya?

¹⁸ Te a langa a de fanowdu fu luku baka san wi e poti a fesi aini u libi. Saide? A sani ya o yeepi u fu koboloiki u kaakiti a wan koni fasi. Luku san wan yonkuman den e kai Mark taki: „A omen yali langa mi be e si enke mi á be e libi bigi. Mi be e pionili, ma ala yuu mi be e pakisei fa mi be sa meke moo moni fu bai san mi be wani. Mi be e akisi miseefi saide mi á be e piisii moo. Mi be kon fusutan taki a den sani di mi be wani du mi be e poti a fesi aini mi libi, da mi be e gi Yehofa a ten anga a kaakiti di fika.” Mark kengi a fasi fa a be e denki anga a fasi fa a be e libi, fu be man du moo gi Yehofa. A taki: „Son leisi mi be e booko mi ede anga moni, ma Yehofa anga Yesesi be e holibaka gi mi. Neen meke mi be man poti ala mi pakisei na a dini di mi be e dini Yehofa.”

19. Saide a pelensipali fu e si sani enke fa Yehofa e si sani?

¹⁹ Dii sani o yeepi u fu u tan fende kaakiti te u de na a tyatyali fu Yesesi ondoo. A fosiwan, i mu e si sani enke fa Yehofa e si sani. A Yehofa wi e wooko gi, neen meke u mu e du sani enke fa a wani. Wi a den wookoman, a Yehofa a u Masaa (Luk. 17:10). Efu wi e wani du a wooko di Yehofa gi u enke fa u wani, a sani ya o meke a libi taanga gi u. Meke u taki wan kaw e hali wan ibi sani gi en masaa. Winsi fa a kaw taanga, efu ai feti fu go a pe a wani namonamo a o weli. Ma efu wi e meke moiti fu du sani enke fa Yehofa wani, wi o man du omen sani di u be e si enke u ná o poi du. Wi o pasa tesi tu di u be si enke u ná o man pasa anga u eigi  kaakiti. Holi a pakisei taki nawan sama poi tapu Yehofa fu du san a abi a pakisei!​—Rom. 8:31; 1 Yoh. 4:4.

20. Saide wi e wooko gi Yehofa?

²⁰ Du fu tu, i mu wooko gi Yehofa anga wan kiin ati. Wi e wooko gi Yehofa fu di u wani gafa en. Aini a ten fu Yesesi, den sama di be e waka neen baka fu di den be wani fende wini gi denseefi be gwe fika en bakaten (Yoh. 6:25-27, 51, 60, 66; Filip. 3:18, 19). Ma den sama di be lobi Gadu anga taa sama anga den hii ati, tan dini Yehofa den hii libi. Den be abi a howpu fu go tii makandaa anga Kelestesi a hemel. Leti enke den, efu wi e waka a Yesesi baka fu di u lobi Gadu anga taa sama, a sani ya o meke u piisii.

21. Enke fa Mateyesi 6:31-33 e soi, da san u sa biibi taki Yehofa o du?

²¹ Du fu dii, holi a pakisei taki Yehofa ná o gwe fika i noiti. Di u kon dini Yehofa, u soi taki u nai teli useefi moo. U soi tu taki u de kabakaba fu wooko taanga gi en. Yesesi be wasikoi wi a fesi taki tesi be o miti u. Ma u sa biibi taki Yehofa o gi wi a kaakiti di wi abi fanowdu fu holidoo. Efi yu e holidoo te tesi e miti, i biibi o kon moo taanga (Yak. 1:2-4). U sa biibi taki Yehofa o yeepi u fu fende san wi abi fanowdu. U sa biibi tu taki Yesesi o yeepi u fu sabi san u mu du. Boiti dati, den baala anga sisa o gi wi ahala. (Leisi Mateyesi 6:31-33; Yoh. 10:14; 1 Tes. 5:11). Wi abi ala san wi abi fanowdu fu holidoo winsi san e miti u.

22. San u mu teke fu bigi?

²² A uman di Yesesi be deesi be fende kaakiti baka aseefi dei di Yesesi deesi en. Ma a te a be o toon wan bakaman fu Yesesi fosi a be o man fende kaakiti fu teego. San i denki a uman ya du? Efu a be toon wan bakaman fu Yesesi, a be o abi a howpu fu tii makandaa anga en a hemel. Winsi san a be fika a baka fu toon wan bakaman fu Yesesi, a belesi di a be o fende bigi moo den sani de. Winsi wi abi a howpu fu libi fu teego a hemel efuso a goontapu, ai bigi gi u taki wi aliki di Yesesi kai u taki: „U kon a mi!”