1. Saide u mu saka useefi a Yehofa ondoo?

U MU saka useefi * a Yehofa ondoo, bika neen meke u. A abi a leti fu taki san bun anga san á bun (Openb. 4:11). Wan taa sani saide u mu saka useefi a Yehofa ondoo, a fu di neen na a moo bun tiiman di de. A omen ondoo yali kaba libisama e tii taa libisama. Ma a fasi fa den e tii, anga a fasi fa Yehofa e tii a ná aseefi. Yehofa na a moo koni Tiiman di de, a abi tyali-ati, a abi switifasi tu.​—Ek. 34:6; Rom. 16:27; 1 Yoh. 4:8.

2. Enke fa Hebrewsama 12:9-11 e soi, da saide u mu saka useefi a Yehofa ondoo?

² Yehofa á wani wi aliki en namo fu di wi e feele en, ma a wani wi aliki en fu di wi e si en enke u Dda di lobi u. Aini a biifi di Pawlesi be sende gi den Hebrewsama, a taki u mu „de kabakaba fu saka useefi na a Dda” ondoo, bika ai leli u fu „sani sa go bun anga u”.​—Leisi Hebrewsama 12:9-11.

3. (a) Fa u sa soi taki wi e aliki Yehofa? (b) Sowtu akisi wi o luku aini a artikel ya?

³ Wi e soi taki wi e aliki Yehofa te wi e du ala san u man fu du san a taki, anga te u nai fitoow useefi tumisi (Odo 3:5). A o moo makiliki gi u fu saka useefi a Yehofa ondoo, te wi e poti pakisei a den sani di ai du. Saide? Bika te wi e poti pakisei a den sani di ai du, wi e si den manii fi en (Ps. 145:9). Moo wi e kon sabi Yehofa, moo wi o lobi en. Te u lobi Yehofa, u ná abi omen weiti fanowdu di e soi u san u mu du anga san wi á mu du. Wi o meke moiti fu  denki enke fa Yehofa e denki. U ná o du sani di a á lobi tu (Ps. 97:10). Ma a á makiliki ala yuu fu du san Yehofa taki. Saide? San owluman, dda, anga mma sa leli fu den toli fu Nehemiya di be de gaanman fu Islayeli, David di be e tii enke kownu, anga Maliya, a mma fu Yesesi? Wi o fende a piki fu den akisi ya aini a artikel ya.

4-5. Enke fa Romesama 7:21-23 e soi, da saide a á makiliki fu du san Yehofa taki ala yuu?

⁴ Wan sani di e meke ai taanga gi u fu du san Yehofa taki, a di wi a sondu libisama. Na a sani ya meke wi e fii fu du sani di Yehofa á lobi. Adan anga Efa taangayesi Gadu, neen den nyan a sii fu a bon di Gadu be taigi den taki den á mu nyan. Di den du a sani ya, den taki gi denseefi san bun anga san á bun (Gen. 3:22). Tide na a dei, gaanse sama e waka a Adan anga Efa baka. A denseefi e taki gi denseefi san bun anga san á bun.

⁵ Winsi wi e dini Yehofa anga u hii ati, toku a á makiliki fu du san a taki ala yuu. Na a sani ya be e miti apostel Pawlesi. (Leisi Romesama 7:21-23.) Leti enke Pawlesi wi e wani du san Yehofa lobi. Toku ala yuu wi abi fu e feti anga a fii fu du sani di á bun.

6-7. San a wan taa sani di sa meke a taanga gi u fu du san Yehofa taki ala yuu? Gi wan ondoofenitoli.

⁶ Wan taa sani di sa meke a taanga gi u fu du san Yehofa taki ala yuu na a fasi fa u kiya. A peesi pe wi e tan anga a fasi fa den sama di lontu wi e denki abi kaakiti a u tapu. Gaanse leisi sama e gi u taanga-sikin fu du sani di Yehofa á lobi, neen meke wi abi fu e meke moiti ala yuu fu wi á denki enke den sama ya. Meke u luku wan fu den sani di sama e gi u taanga-sikin fu du.

⁷ Aini son kondee, sama lobi dwengi yonkuuwan fu du ala sani fu meke tyaipi moni. Na a sani ya be pasa anga wan sisa den e kai Mary *. Fosi a leli sabi Yehofa, a be e go a wan fu den moo bun universiteit fu a kondee pe ai tan. Den famii fi en be wani a suku wan wooko pe a be o meke tyaipi moni. A dati Mary be wani du tu. Ma di a leli sabi Yehofa, a kon lobi en. Neen meke a be wani du sani taa fasi. Toku a sani ya á be makiliki. A taki: „Son leisi mi e fende wooko pe mi sa meke tyaipi moni, ma mi sabi taki efu mi teke den wooko ya, mi ná o man du ala san mi mu du gi Yehofa moo. A fasi fa mi kiya be e meke a taanga gi mi fu mi á teke den wooko ya. Na ala yuu mi e begi Yehofa fu a yeepi mi fu mi á teke wan wooko di o tapu mi fu du ala san mi poi gi en.”​—Mat. 6:24.

8. San wi o luku now?

⁸ Te wi e saka useefi a Yehofa ondoo, sani e waka u bun. Ma te sama di abi faantiwowtu e saka denseefi a Yehofa ondoo, da taawan e fende wini fu a sani ya tu. Neen meke owluman, dda, anga mma mu moo saka denseefi a Yehofa ondoo, bika a wan gaan faantiwowtu den abi. Wi o luku wantu toli aini Beibel di o soi fa u sa soi taki wi e saka useefi a Yehofa ondoo te wi abi faantiwowtu.

9. San a wantu tesi di miti Nehemiya?

⁹ Yehofa gi owluman a pelensipali wooko fu luku den sikapu fi en (1 Peit. 5:2).  Owluman sa leli omen sani fu a fasi fa Nehemiya be e libi anga a foluku fu Gadu. Enke gaanman fu Yuda, Nehemiya be abi makiti (Neh. 1:11; 2:7, 8; 5:14). Pakisei san den sama be e du na a ten di Nehemiya be de gaanman. A be yee taki den Dyu be e du sani aini a tempel di Yehofa e buuse. Den á be e gi den Leifisama den sani di a Weiti be taki den be mu e gi den. Den weiti fu a Sabadei seefi den á be e holi moo. Son wan fu den Dyu man be toow anga taa kondee uman di á be e dini Yehofa. Gaanman Nehemiya be abi fu suku wan fasi fu losi den polobelema ya. Fa a be o du a sani ya?​—Neh. 13:4-30.

10. Fa Nehemiya yeepi a foluku fu du san Yehofa wani?

¹⁰ Nehemiya á koboloiki a makiti di a be abi fu dwengi a foluku fu Gadu fu du san a be wani. Ma a begi Yehofa fayafaya fu a yeepi en fu sabi san a mu du. Baka dati, a leli a foluku den Weiti fu Yehofa (Neh. 1:4-10; 13:1-3). Nehemiya be abi sakafasi tu, neen meke a á be fika a wooko gi a foluku wawan. Ma a be e wooko makandii anga den fu meke den sikotu fu Yelusalem baka.​—Neh. 4:15.

11. Enke fa 1 Tesalonikasama 2:7, 8 e soi, da fa owluman mu e libi anga den baala anga sisa?

¹¹ Kande owluman nai miti denseefi tesi di be miti Nehemiya, toku den sa waka neen baka te den luku a fasi fa a tyai enseefi. Leti enke Nehemiya, den e wooko taanga fu yeepi den baala anga sisa. Den nai si enke den bun moo taawan fu di den abi moo faantiwowtu. Ma den e libi bun anga den baala anga sisa aini a kemeente. (Leisi 1 Tesalonikasama 2:7, 8.) Den owluman lobi taawan, den abi sakafasi, neen meke den e taki switi anga den baala anga sisa. Andrew, wan baala di du a owluman wooko omen yali kaba taki: „Mi si taki den baala anga sisa e moo fii bun te owluman e soi taki den e booko den ede anga den anga te den e taki switi anga den.” Tony, wan taa baala di du a  owluman wooko omen yali kaba taki: „Mi e meke moiti fu wooko anga a sani di sikiifi a Filipisama 2:3. Mi e meke moiti fu si taawan pelensipali moo mi. A sani ya e yeepi mi fu mi á pee basi gi den.”

12. Saide owluman mu abi sakafasi?

¹² Owluman mu abi sakafasi, leti enke Yehofa. Winsi fa Yehofa na a Moo Gaan Gadu, tokuso ai „bendi” diki „a pootiman puu a doti” (Ps. 18:35; 113:6, 7). Beibel taki Yehofa e buuse den sama di e fii denseefi.​—Odo 16:5.

13. Saide owluman mu e meke moiti fu ’basi den tongo’?

¹³ Wan owluman di e saka enseefi a Yehofa ondoo, e meke moiti fu „basi en tongo” ala yuu. Efu a nai du a sani ya, a o taki goofu anga sama di nai kaba lesipeki en (Yak. 1:26; Gal. 5:14, 15). Andrew, di u be kai a fesi kaba taki: „Son leisi, mi be e fii fu taigi son baala efuso sisa hati sani, te mi be si enke den nai lesipeki mi. Ma di mi sidon pakisei den man fu fositen di be e dini Yehofa anga den hii ati, mi kon si taki mi mu abi sakafasi anga safu-ati.” Te owluman e taki switi anga denseefi, anga te den e taki switi anga den taa baala anga sisa aini a kemeente, den e soi taki den e saka denseefi a Yehofa ondoo.​—Kol. 4:6.

14. Sowtu faantiwowtu Gadu gi dda? Fa Gadu wani den dda tyai a faantiwowtu ya?

¹⁴ Yehofa poti dda enke edeman fu a osufamii. A wani den dda leli den pikin fu den. Den mu e poti den pikin a pasi tu (1 Kor. 11:3; Efe. 6:4). Ma den dda á mu kiya den pikin enke fa den wani. A Yehofa sete a osufamii, neen meke a o akisi den dda faantiwowtu fu a fasi fa den e tii a osufamii (Efe. 3:14, 15). Wan dda di e saka enseefi a Yehofa ondoo, e tii en osufamii a wan fasi di e meke Yehofa piisii. Dda sa leli omen sani te den e ondoosuku a libi fu Kownu David.

15. Saide dda sa waka a Kownu David baka?

¹⁵ David a be edeman fi en osufamii, ma Yehofa be poti en enke edeman fu a foluku Islayeli tu. David a be kownu, neen meke a be abi makiti. Son leisi a be e koboloiki a makiti fi en a wan fasi di á bun. A meke gaan fowtu tu (2 Sam. 11:14, 15). Ma a be e aliki te Yehofa be puu kaasi gi en, a so a soi taki a be e saka enseefi a Yehofa ondoo. Te a be e begi, a be e taigi Yehofa fa a be e fii (Ps. 51:1-4). David be abi sakafasi, neen meke a be e aliki te taawan be e poti en a pasi. A ná mannengee  wawan a be e aliki, ma a be e aliki te umanpikin be e poti en a pasi tu (1 Sam. 19:11, 12; 25:32, 33). David leli wan sani fu den fowtu di a be meke. Boiti dati, a be e si a dini di a be e dini Yehofa enke a moo pelensipali sani aini en libi.

16. San dda sa leli fu David?

¹⁶ San a wantu sani di dda sa leli fu Kownu David? Noiti i mu koboloiki a makiti di yu abi fu du sani di á bun. Yu á mu feele fu piki taki i meke wan fowtu. I mu aliki te taawan koboloiki Beibel fu poti yu á pasi. Efi yu e du den sani ya, yu uman anga den pikin fi yu o lesipeki i fu di yu abi sakafasi. Te yu e begi, taigi Yehofa san de a yu ati. Meke yu uman anga den pikin fi i si kiin taki yu abi Yehofa fanowdu tuutuu. Boiti dati, poti a dini di yu e dini Yehofa a fesi aini i libi. A dati mu de a moo pelensipali sani gi i (Deit. 6:6-9). Efi yu e du den sani ya, yu osufamii o man waka a yu baka. A sani ya a wan fu den moo gaan kado di i sa gi den.

17. Sowtu faantiwowtu Gadu gi den mma?

¹⁷ Yehofa gi den mma a faantiwowtu fu leli den pikin tu (Odo 6:20). Den sani di wan mma e du anga den sani di ai taki sa abi kaakiti a wan pikin en hii libi (Odo 22:6). Meke u luku san mma sa leli fu Maliya, a mma fu Yesesi.

18-19. San mma sa leli fu Maliya?

¹⁸ Maliya be sabi a Wowtu fu Gadu bun. A be e lesipeki Yehofa. En anga Yehofa a be mati tu. A be de kabakaba fu du san Yehofa wani, winsi fa a sani ya be o kengi en hii libi.​—Luk. 1:35-38, 46-55.

¹⁹ Mama, a omen fasi i sa waka a Maliya baka. Fa i sa du a sani ya? Wan fasi fa i sa du a sani ya, a te yu e sutudeli Beibel anga iseefi. I mu e meke ten fu begi Yehofa tu. Den sani ya o yeepi i fi yu anga en toon bun mati. Du fu tu fasi fa i sa waka a Maliya baka, a te i de kabakaba fu kengi i libi fu du sani di e meke Yehofa piisii. Kande i mma anga i dda ati be e boon gaw. Kande den be lobi bali den pikin fu den te den ati be boon. A sani ya sa meke yu e si enke a so i mu kiya i pikin. Winsi fa i kon sabi fa Yehofa wani i kiya den pikin fi i, toku kande ai taanga gi i fu du sani enke fa a wani. Kande ai taanga gi i fu holi iseefi efuso fu pasensi anga den pikin te den du wan sani di á bun, moomoo te i weli (Efe. 4:31). Te a sani ya pasa, a de taanga fanowdu fu begi Yehofa fu a yeepi i. Wan mma den e kai Lydia taki: „Son leisi mi be abi fu begi Yehofa fu mi á taigi a boi fu mi  hati sani te a be du wan sani di meke mi ati boon. Son leisi te mi bigin taki wan sani di á bun, da mi e tapu da mi begi Yehofa aini mi ati. Begi yeepi mi tuutuu fu mi á lasi miseefi.”​—Ps. 37:5.

20. San e taanga gi son mma fu du? San o yeepi den fu du a sani ya?

²⁰ Wan taa sani di e taanga gi son mma fu du, a fu soi den pikin fu den taki den lobi den (Tit. 2:3, 4). A omen fu den mma ya kiya aini wan osufamii pe den mma anga dda á be e poolo anga den pikin fu den. Efi i kiya na a fasi ya, i ná abi fu meke aseefi fowtu di i mma anga i dda be meke. Wan mma di e saka enseefi a Yehofa ondoo, e soi den pikin fi en taki a lobi den. Kande ai taanga gi son mma fu kengi a fasi fa den e denki anga a fasi fa den e du son sani. Ma winsi a á makiliki, toku den poi du sani enke fa Yehofa wani. A sani ya o meke den anga den pikin fu den piisii.

21-22. Enke fa Yesaya 65:13, 14 e soi, da sowtu wini wi e fende te wi e saka useefi a Yehofa ondoo?

²¹ Kownu David si a wini di a abi te sama e saka denseefi a Yehofa ondoo. A sikiifi taki: „Den sani di Yehofa e taigi u, a soso bun sani. Den e meke wi ati piisii. Den weiti fu Yehofa bun, den e meke wi ain beenki. Den de enke wasikoi gi i futuboi. Te ai aliki den, a omen wini ai fende” (Ps. 19:8, 11). Aini a ten ya wi e si taki a libi fu den sama di e saka denseefi a Yehofa ondoo, e waka bun moo a libi fu den sama di nai wooko anga den leli fu Yehofa. Den sama di e saka denseefi a Yehofa ondoo e „piisii fu di den ati bun”.​—Leisi Yesaya 65:13, 14.

²² Te owluman, dda, anga mma e saka denseefi a Yehofa ondoo, den e moo tyai denseefi bun, den osufamii e moo piisii tu. Boiti dati, a hii kemeente e libi na a wan. Ma a moo gaan wini di den e fende, na a piisii di den e meke Yehofa piisii (Odo 27:11). Sani á de di switi enke a sani ya.