1. Fa Yehofa e si den sama di abi sakafasi?

YEHOFA lobi den sama di abi sakafasi. Te wan sama abi sakafasi, en anga Yehofa sa de mati. Ma Yehofa „á wani sabi nawan sani fu den sama di abi bigifasi” (Ps. 138:6). Ala u wani Yehofa piisii anga u, u wani a lobi u tu. Neen meke wi e du ala san u man fu abi a manii ya.

2. San wi o luku aini a artikel ya?

² Aini a artikel ya wi o luku den dii akisi ya: (1) San a sakafasi? (2) Saide u mu abi sakafasi? (3) On ten a sa taanga gi u fu soi sakafasi? Wi o si taki te wi abi a manii ya, wi e meke Yehofa piisii, ma useefi e fende wini tu te wi abi sakafasi.​—Odo 27:11; Yes. 48:17.

3. San a sakafasi?

³ Wan sama di abi sakafasi nai si enke a bun moo taawan, a nai fii enseefi. Beibel e soi taki wan sama di abi sakafasi e fusutan taki Yehofa hei moo en. Ai si taa sama enke fa Yehofa e si den. Wan sama di abi sakafasi e holi a pakisei tu taki ala sama abi wan sani di den sabi du moo en.​—Filip. 2:3, 4.

4-5. Saide u sa taki sakafasi a ná wan sani di u poi si wantenwanten a wan sama?

⁴ Son leisi ai gei enke wan sama abi sakafasi fu di a á lobi ligei. Kande a fasi fa a kiya meke ai taki a wan lesipeki fasi. Ma a kan taki ai fii enseefi. Wan sama á poi kibii fa a de tuutuu. Winsi on ten, a o kon a kiin namo efu a abi sakafasi efuso heimembee.​—Luk. 6:45.

 ⁵ Yu abi sama tu di sabi taki den man du son sani bun. Den nai feele fu taki fa den e denki. Ma dati á wani taki den e fii denseefi (Yoh. 1:46, 47). Tokuso den sama ya mu luku bun fu den á fitoow denseefi tumisi. Winsi wi a sama di e sen, efuso sama di nai sen tokuso u mu e meke moiti ala yuu fu abi sakafasi.

6. Enke fa 1 Korentesama 15:10 e soi, da san a toli fu apostel Pawlesi e leli u?

⁶ Luku a toli fu apostel Pawlesi. Yehofa be koboloiki en fu opo nyun kemeente aini omen foto. Kande a peleiki aini moo foto moo ala den taa apostel. Tokuso Pawlesi á be e fii enke a bun moo den taa apostel. A be abi sakafasi, neen meke a be taki: „Mi na a moo pikinwan fu ala den apostel. A á fiti fu den kai mi apostel, bika mi be e du ogii anga a kemeente fu Gadu” (1 Kor. 15:9). Bakaten Pawlesi soi taki a ná bun a bun so meke en anga Yehofa a mati. Ma a di Gadu soi bun-ati gi en meke a be abi a gaandi fu wooko gi en. (Leisi 1 Korentesama 15:10.) A biifi di Pawlesi sikiifi gi den Kelesten a Korente e soi taki a be abi sakafasi tuutuu. A á gafa fu ala den sani di a du, winsi fa son sama aini kemeente be e kuutu en.​—2 Kor. 10:10.

7. Fa wan baala aini a ten ya di be abi omen faantiwowtu soi taki a abi sakafasi? Gi wan ondoofenitoli.

⁷ A omen sama fende taanga-sikin fu a ondoofenitoli fu Baala Karl Frederick Klein. A baala ya a be wan fu den baala di be e tii a wooko. A be abi sakafasi tuutuu, neen meke a taki kiin fu wantu fu den swakifasi fi en. Aini 1922 a baala ya be go peleiki osu fu osu fu a fosi leisi. A sani ya be taanga gi en, neen meke a  baka wan sani fu tu yali fosi a go peleiki baka. Bakaten di a be e wooko a Betel, wan taa baala be poti en a pasi. A á be lobi a sani ya seefiseefi. A omen ten a holi a baala na ati. Boiti dati, wan pisiten Baala Klein be abi wan siki di be e meke ai booko en ede pasa peesi, ma a betee bakaten. Baala Klein be abi omen gaan faantiwowtu aini a olikanisâsi. A omen sama be sabi a baala ya, toku a be taki kiin fu den swakifasi fi en. A sani ya e soi taki a be abi sakafasi tuutuu. A omen baala anga sisa fende wini fu a moin ondoofenitoli fu Baala Klein. *

8. Fa 1 Peitilisi 5:6 e yeepi u fu si taki Yehofa lobi sama di abi sakafasi?

⁸ U mu meke moiti fu abi sakafasi, bika te wi abi a manii ya wi e meke Yehofa piisii. Den sani di apostel Peitilisi sikiifi be soi taki a sani ya a tuu. (Leisi 1 Peitilisi 5:6.) A buku ’Kon, èn tron wan bakaman fu mi’, e taki: „Heimembee de enke wan sani di e kii sama. Te wan sama abi a manii ya, ai tyai takuu bakapisi. Winsi wan sama poi du son sani, ma a abi heimembee, Gadu á poi meke a wooko gi en. Ma Yehofa sa meke wan sama di abi sakafasi wooko gi en, winsi taa sama e si enke a ná o poi du son sani. A o belesi i te yu abi sakafasi.” * A moo bun sani di u sa du a fu meke Yehofa piisii.​—Odo 23:15.

9. Saide sama e wani toon u mati te wi abi sakafasi?

⁹ Boiti taki wi e meke Yehofa piisii te wi abi sakafasi, useefi e fende wini fu a sani ya tu. Te wi abi sakafasi, sama e wani de u mati. Saide u sa taki a sani ya? Anga sama yu e wani paa? (Mat. 7:12) Nawan sama á lobi de makandaa anga sama di e wani taawan du san den wani ala yuu. Ma wi e piisii te u de makandaa anga u baala anga sisa, fu di den e ’soi taki den e fii gi taawan. Den lobi den baala fu den. Den de kabakaba fu soi tyali-ati gi taawan. Den abi sakafasi tu’ (1 Peit. 3:8). Efu wi e meke moiti fu toon mati anga den sowtu sama ya, denseefi o wani toon u mati tu efu wi abi sakafasi.

10. Saide a libi o moo makiliki gi wi te wi abi sakafasi?

¹⁰ Te wi abi sakafasi, u ná o booko-saka tumisi te wi abi polobelema, bika a ná ala  yuu sani e waka a wan letifasi. Kownu Salomo be sikiifi taki: „Mi si futuboi na asi tapu, ma mi si gaanman tu di e waka anga futu enke den a futuboi” (Peleik. 10:7). A ná ala yuu a den sama di koni efuso den sama di sabi du sani taawan e gafa. Neen meke Salomo be taki, peesi fu wi e booko wi ede anga fa u denki sani be mu de, a moo bun fu teke a libi enke fa a de (Peleik. 6:9). Efu wi abi sakafasi u ná o booko wi ede tumisi te sani á go enke fa u be denki.

11. San u mu du te taawan e poti wi a pasi?

¹¹ A omen fasi u sa soi taki wi abi sakafasi. Meke u luku wantu sani di sa pasa pe wi abi fu soi a manii ya. Te taawan e poti wi a pasi. U mu holi a pakisei taki efu wan sama meke moiti fu poti wi a pasi, da kande a fowtu di u meke bigi moo enke san u be denki. Te sama e poti wi a pasi, a fosi sani di wi e wani du, a fu poti a taki fi en a wanse. Kande wi o bigin denki den fowtu di a sama seefi e meke, efuso kande wi o luku a fasi fa a taki anga u. Ma efu wi abi sakafasi, wi o meke moiti fu du sani enke fa Yehofa wani.

12. Enke fa Odo 27:5, 6 e soi, da saide u mu teke en fu bigi te taawan e poti wi a pasi?

¹² Ai bigi gi wan sama di abi sakafasi te taawan e poti en a pasi. Meke u taki i de a komakandaa. Baka di i kaba gi toli anga wantu baala anga sisa, wan fu den kai i go a wan se, neen a taigi i taki nyanyan fasi a yu tifi. Sen o kisi i, ma a o bigi gi i taki i baala efuso sisa taigi i. Kande yu e winsi seefi taki wan sama be taigi i senten fosi i be taki anga moo sama. Na aseefi fasi u mu teke en fu bigi te u baala efuso sisa teke deki-ati kon taigi u fa u sa du wan sani moo bun. Wi e si den baala anga sisa ya enke u mati, u nai holi den na ati.​—Leisi Odo 27:5, 6; Gal. 4:16.

13. Fa u sa soi taki wi abi sakafasi te taawan fende gaandi aini a kemeente?

¹³ Te taawan e fende gaandi aini a olikanisâsi. Wan owluman den e kai Jason taki: „Te mi e si den gaandi di taawan e fende, da son leisi mi e akisi miseefi saide a ná mi fende a gaandi de.” Yu e fii so son leisi? A á fowtu te u wani du moo gi Yehofa (1 Tim. 3:1). Ma toku u mu luku bun anga a fasi fa wi e denki. Efu wi á luku bun, u sa bigin fii useefi. Kande wan Kelesten baala o bigin denki taki neen wawan poi du son wooko aini  a kemeente. Efuso kande wan Kelesten sisa e denki taki: ’Efu a mi man den be gi a wooko de, a be o du en bun moo a baala de.’ Ma efu wi abi sakafasi tuutuu, u ná o pakisei den sani de.

14. San wi e leli fu a fasi fa Mosesi be e si a fende di taawan be e fende gaandi?

¹⁴ U sa waka a Mosesi baka te u luku a fasi fa a be e si a fende di taawan be e fende gaandi. Mosesi be lobi a wooko di Yehofa be gi en fu tii a foluku Islayeli. Ma san a du di Yehofa gi taa sama wantu fu den faantiwowtu di a be abi? Mosesi á be dyalusu (Num. 11:24-29). A be abi sakafasi, neen meke a be piisii taki taawan be sa yeepi en anga a wooko di a be abi fu koti kuutu gi a foluku (Ek. 18:13-24). A sani ya be tyai wini gi a foluku tu, bika den á be abi fu wakiti langa so moo fu Mosesi koti kuutu gi den. Mosesi á be e denki enseefi namo, ma a be e luku san moo bun gi taawan. U sa waka a Mosesi baka. U mu holi a pakisei taki a moo pelensipali manii di u mu abi efu u wani wooko gi Yehofa, a sakafasi. A moo bun fu abi sakafasi, moo enke fu sabi du sani. Winsi fa ’Yehofa hei, toku ai poti pakisei a den sama di abi sakafasi’.​—Ps. 138:6.

15. Fa a libi fu omen baala anga sisa kengi aini den yali di pasa?

¹⁵ Te sani kengi aini u libi. Aini den yali di pasa, a omen baala anga sisa di wooko omen yali gi Yehofa be mu du wan taa wooko aini a olikanisâsi. Aini 2014, den baala di e tii a wooko be taki distrikt owluman á be o de moo. Neen meke den baala di be e du a wooko ya anga den uman fu den be fende taa gaandi aini a olikanisâsi. Aini aseefi yali de, den baala taki te wan kelen owluman tapu 70 yali, a mu tapu anga a kelen wooko. Boiti dati, den baala taki te wan baala doo  80 yali, a á mu de fesiman fu den owluman aini wan kemeente moo. Aini den yali di pasa, a omen baala anga sisa be mu komoto a Betel fu go du a pioniliwooko. Son sama be mu tapu anga a fuuten diniwooko fu di den kon siki, taawan be mu go yeepi den famii.

16. Fa baala anga sisa soi taki den abi sakafasi di den fende taa gaandi aini a olikanisâsi?

¹⁶ A be taanga gi omen fu den baala anga sisa ya fu teke gwenti di sani kengi. Son wan fu den a omen yali den be abi a gaandi fu du son wooko aini a olikanisâsi di den be lobi. Den be e „tyali” taki den be mu du wan taa wooko, bika den be lobi a wooko di den be e du. Ma saafisaafi den baala anga sisa ya kon teke gwenti anga a nyun wooko fu den. San yeepi den? A moo pelensipali sani di yeepi den, na a lobi di den lobi Yehofa. Den á be paamisi Yehofa taki a te den abi son gaandi fosi den o dini en anga den hii ati (Kol. 3:23). Den e piisii taki den sa dini Yehofa winsi sowtu gaandi den abi aini a olikanisâsi. Den „fika ala den polobelema” fu den gi Yehofa, bika den sabi taki ai booko en ede anga den.​—1 Peit. 5:6, 7.

17. Saide ai bigi u taki a Wowtu fu Gadu e gi u taanga-sikin fu meke moiti fu abi sakafasi?

¹⁷ Ai bigi gi u taki a Wowtu fu Gadu e gi u taanga-sikin fu meke moiti fu abi sakafasi, bika te wi abi a manii ya, a omen wini wi e fende. Te wi abi sakafasi taawan o wani paa anga wi. U ná o booko-saka tumisi te wi abi polobelema. Ma a moo gaan wini di wi e fende te wi abi a manii ya, a taki wi anga Yehofa e toon moo bun mati. Ai bigi gi u taki winsi fa Yehofa na „a Moo Heiwan”, toku ai poti pakisei a den sama di abi sakafasi, a lobi den.​—Yes. 57:15.