1. On ten a sa taanga gi u fu dini Yehofa?

ON TEN i si enke a o moo taanga gi i fu dini Yehofa, te sani e go bun efuso te tesi e miti? Te tesi e miti u, u nai daaidaai fu begi Yehofa fu a yeepi u. Ma san yu e du te sani e go bun? Taa sani e puu i pakisei na a dini di yu e dini Yehofa? Yehofa be taigi den Islayelisama taki den mu luku bun fu a sani ya á miti den.​—Deit. 6:10-12.

2. San Asa du di a be e tii enke kownu?

² Kownu Asa be e fitoow Yehofa anga en hii ati. A be e dini Yehofa te sani á be e go bun, ma a be e dini Yehofa tu te sani be e go bun. ‘Asa dini Yehofa anga en hii ati te enke a dede’ (1 Kow. 15:14). Wan fasi fa Asa soi taki a be e dini Yehofa anga en hii ati, a di a puu falisi gadu aini a kondee. Beibel taki Asa puu ‘ala den altari pe sama be e go dini den gadu fu den taakondee sama. Boiti dati, a booko den faaka tiki anga den santa ponsu fu den’ (2 Kolon. 14:3, 5). Asa gaanmma Maaka be de enke wan umankownu aini a kondee. Ma a be e gi sama taanga-sikin fu dini falisi gadu, neen meke Asa puu a posisi ya neen ana.​—1 Kow. 15:11-13.

3. San wi o luku aini a artikel ya?

³ Boiti taki Asa puu falisi gadu aini a kondee, a gi a foluku taanga-sikin fu bigin dini Yehofa baka enke fa a wani. A so a yeepi den sama fu a kownukondee fu Yuda  fu daai kon a Yehofa baka. Neen meke Yehofa meke sani waka bun gi Asa anga den sama fu Yuda. Di Asa be e tii, a tin yali langa ‘sama á go feti anga den’ (2 Kolon. 14:1, 4, 6). Aini a artikel ya wi o luku san Asa du aini a pisiten di sani be e go bun aini a kondee. Wi o luku tu fa den fosi Kelesten be e du sani anga koni te sani be e go bun. Baka dati, wi o luku fa i sa du sani anga koni efi yu e tan aini wan kondee pe lanti á tapu a wooko.

4. Enke fa 2 Koloniki 14:2, 6, 7 e soi, da san Asa du a pisiten di feti á be de aini a kondee?

⁴ Leisi 2 Koloniki 14:2, 6, 7. Asa be taigi a foluku taki a Yehofa be meke ‘sani e go bun anga den’. Ma winsi fa sani be e go bun, Asa á sidon. A bigin meke foto di lontu anga sikotu, hei osu pe sama be e holi wakiti, anga gaan doo fu tapu den foto. A taigi a foluku fu Yuda taki: ‘A wi abi a kondee.’ San Asa be wani soi a foluku anga a sani ya? A be wani soi den taki den be sa go a pe den wani aini a kondee di Gadu be gi den. Den feyanti fu den á be o poi tapu den fu meke osu a pe den be wani. Asa be gi a foluku taanga-sikin fu wooko taanga aini a pisiten di feti á be de aini a kondee.

5. Saide Asa be e yeepi den suudati fi en fu de seekaseeka winsi fa feti á be de aini a kondee?

⁵ Aini a pisiten de, Asa du ala san a be poi tu fu yeepi den suudati fi en fu de seekaseeka te wan feti be o de (2 Kolon. 14:8). Ma dati á wani taki Asa á be e fitoow Yehofa. Asa be sabi taki enke kownu, a be mu seeka a foluku fi en gi sani di be sa miti den. A be sabi taki kande sani be o kengi aini Yuda. Bakaten sani kengi tuu.

6. San den fosi Kelesten be e du te sani be e go bun?

⁶ Winsi fa sama be lobi du ogii anga den fosi Kelesten, toku den be e abi yuu pe sani be e go bun anga den. San den be e du te sani be e go bun? Den be e tan peleiki a bun nyunsu fayafaya. Den be e poti ala den pakisei na a dini di den be e dini Yehofa tu. Fu di den tan peleiki fayafaya ‘meke den be e kon moo ipi’. A sani ya e soi taki Yehofa be e belesi a wooko fu den.​—Toli 9:26-31.

7-8. San Pawlesi anga den taa Kelesten du di den fende a okasi fu peleiki gi moo sama?

⁷ Den fosi Kelesten be e peleiki gi ala sama di be wani aliki, winsi pe den be miti den sama ya. Di Pawlesi be si taki tyaipi sama be de a Efeise di be wani aliki, a tan ape wan pisiten neen a peleiki gi den.​—1 Kor. 16:8, 9.

⁸ Baka di den seeka a besnei toli aini a yali 49, Pawlesi anga den taa Kelesten be abi a okasi fu peleiki gi moo sama (Toli 15:23-29). Baka di den sende biifi piki den kemeente san na a bosoloiti di den teke, den Kelesten wooko taanga fu paati ‘a bun nyunsu fu a Wowtu fu Yehofa’ anga taawan (Toli 15:30-35). Sowtu wini a sani ya tyai? Beibel taki: ‘A sani ya be taanga a biibi fu den kemeente tuutuu. Dei fu dei den kemeente be e moo bigi.’​—Toli 16:4, 5.

9. Fa sani de aini omen kondee nownow? San u mu akisi useefi?

⁹ Aini omen kondee, lanti nai tapu u fu peleiki. Yu e tan aini wan kondee pe i sa dini Gadu sondee lanti fooseli i? Efi yu e tan aini sowan kondee, akisi iseefi taki: ‘San mi e du anga a ten fu mi aini a pisiten ya pe sama nai tapu mi fu peleiki?’ A omen sani e pasa aini den lasiti dei ya. A olikanisâsi fu Yehofa e wooko taanga aini den lasiti dei ya tu. Den e peleiki na ala se fu goontapu. Den e sutudeli Beibel anga miliyunmiliyun sama (Malik. 13:10). A omen sani u sa du fu holibaka gi a wooko ya.

10. Sowtu taanga-sikin 2 Timotiyesi 4:2 e gi u?

¹⁰ Fa i sa du sani anga koni te sani e go bun? (Leisi 2 Timotiyesi 4:2.) Luku fa sani e go aini yu osufamii, da i luku efu u sa seeka sani fu winsi wan sama aini a osu du moo aini a peleikiwooko, efuso toon wan pionili. A yuu ya a ná fu e feti a gudu baka. Den sani de ná o poi yeepi i fu pasa a gaan banowtu.​—Odo 11:4; Mat. 6:31-33; 1 Yoh. 2:15-17.

11. San son peleikiman du fu man peleiki gi moo sama?

¹¹ A omen peleikiman leli wan taa tongo fu man sutudeli anga den sama di e taki den tongo ya. A olikanisâsi fu Yehofa meke buku, felon, anga taa sani aini omen ondoo tongo. Den sani ya e yeepi u fu du a peleikiwooko moo bun. Aini 2010 u be abi buku, felon anga taa sani aini wan sani fu 500 tongo. Ma nownow wi abi den sani ya aini moo enke 1000 tongo.

12. Sowtu wini a abi te sama yee a Kownukondee bosikopu aini den mamabee tongo? Gi wan ondoofenitoli.

¹² Fa sama e fii te den yee Gadu Wowtu aini den mamabee tongo? Luku a ondoofenitoli fu wan sisa di be go a wan konkelesi a wan foto na Ameekankondee.  A konkelesi ya be holi aini Kinyarwandatongo. A den sama fu Rowanda, Kongo (Kinshasa), anga Uganda e taki a tongo ya. Baka a konkelesi a sisa ya taki: ‘A 17 yali pasa kaba di mi foloisi kon na Ameekankondee, ma a disi na a fosi leisi di mi fusutan ala sani a wan konkelesi.’ Den sani di a sisa ya leli aini en mamabee tongo be doo en ati. I si enke i sa leli wan taa tongo fu yeepi den sama di e taki a tongo de? Kande den o wani aliki te i taki anga den aini den mamabee tongo. Yu o piisii te i meke moiti fu yeepi sama na a fasi ya.

13. Fa den baala anga sisa fu wi a Rosiyakondee du sani anga koni di sani be e go bun?

¹³ A ná ala baala anga sisa poi peleiki enke fa den wani. Son leisi lanti e meke weiti di e tapu den fu peleiki enke fa u gwenti. Luku san pasa anga den baala anga sisa aini Rosiyakondee. A omen yali langa lanti du ogii anga den, ma aini maart 1991 lanti be gi den pasi fu dini Gadu, den á be e fooseli den moo. A pisiten de a wan sani fu 16.000 Kownukondee peleikiman be de aini Rosiyakondee. Baka tutenti yali den be abi moo enke 160.000 peleikiman. A sani ya e soi taki den baala anga sisa ya du sani anga koni di sani be e go bun. Ma bakaten sani kengi baka. Toku den e du ala san den poi fu dini Yehofa fayafaya.

14-15. Fa Yehofa yeepi Asa?

¹⁴ Di Asa be e tii enke kownu, sani be e go bun wan pisiten, ma bakaten sani kengi. Moo enke wan miliyun suudati be komoto a Etiyopiya fu kon feti anga  den. Sera, a edeman fu den suudati be e biibi taki den be o wini Yuda. Winsi fa den be abi tyaipi suudati, toku Kownu Asa á be e feele, bika a be e fitoow en Gadu Yehofa. Asa begi Yehofa taki: ‘Yehofa, te i wani yeepi sama, i nai luku efu den ipi efuso taanga. Yehofa u Gadu, mi e begi i, yeepi u baa, bika a yu wi e fitoow. Aini a nen fi i wi e go feti anga den somen suudati ya.’​—2 Kolon. 14:11.

¹⁵ Den suudati fu Etiyopiya be ipi tu toon moo den suudati fu Yuda. Ma Asa be sabi taki Yehofa taanga moo den. A be e biibi tu taki Yehofa be o yeepi a foluku fi en. Yehofa holibaka gi a foluku fi en tuu. A meke Asa wini den suudati fu den Etiyopiyasama.​—2 Kolon. 14:8-13.

16. Saide u sa biibi taki sani o miti u dyonson?

¹⁶ Wi á sabi pilisisi san o miti wi aini a ten di e kon. Ma u sabi taki sani o kon moo ogii gi u. Wi á mu feegete san Yesesi be taki. A be taki aini den lasiti dei sama fu ala kondee be o buuse den bakaman fi en (Mat. 24:9). Apostel Pawlesi be taki ‘sama be o du ogii anga ala den sama di e meke moiti fu dini Gadu fayafaya enke bakaman fu Kelestesi Yesesi’ (2 Tim. 3:12). Saatan ati e boon, neen meke u sa biibi taki a o suku wan fasi fu du ogii anga u namo.​—Openb. 12:12.

17. Sowtu tesi o miti u kande?

¹⁷ Dyonson sani o miti ala u di o soi efu u biibi taanga. Wan ‘gaan banowtu o kon di noiti be de a goontapu ete’ (Mat. 24:21). A pisiten de, kande famii o suku fu tapu u fu dini Yehofa. Kande lanti o tapu a wooko tu (Mat. 10:35, 36). Yu o fitoow Yehofa leti enke Asa?

18. Enke fa Hebrewsama 10:38, 39 e soi, da san o yeepi u fu de seekaseeka te sani kengi?

¹⁸ Yehofa e seeka u nownow fu u biibi sa taanga te tesi o miti u. Ai meke a koni saafu di u sa fitoow gi u nyanyan na a yuu di wi abi en fanowdu. A sani ya o yeepi u fu holidoo te tesi e miti (Mat. 24:45). Toku ibiiwan sama mu du ala san a poi fu meke en biibi taanga.​— Leisi Hebrewsama 10:38, 39.

19-20. Enke fa 1 Koloniki 28:9 e soi, da san u mu akisi useefi? Saide u mu akisi useefi den sani ya?

 ¹⁹ Leti enke Kownu Asa, u mu ‘suku Yehofa’ (2 Kolon. 14:4; 15:1, 2). A sani ya wani taki u mu meke moiti fu kon sabi Yehofa, da u dopu. U mu du ala san u poi tu fu moo lobi en ala dei. Akisi iseefi taki: ‘Mi e go a den komakandaa ala yuu?’ Te wi e go a den komakandaa di a olikanisâsi fu Yehofa seeka gi u, wi e leli sani di o yeepi u fu tan dini Yehofa. Den baala anga sisa e gi u taanga-sikin tu (Mat. 11:28). I sa akisi iseefi tu taki: ‘Mi e sutudeli Beibel anga miseefi ala yuu?’ Yu e meke ten ala wiki fu holi a Osufamii Anbegi? Winsi a yu wawan e tan, yu e meke moiti ala wiki fu sutudeli Beibel? Yu e du ala san i poi fu peleiki gi sama, anga fu sutudeli anga den?

²⁰ Saide u mu akisi useefi den sani ya? Beibel taki Yehofa e ondoosuku wi ati anga den sani di wi e pakisei, neen meke a be o bun fu useefi du a sani ya tu. (Leisi 1 Koloniki 28:9.) Efi i si taki i mu kengi a fasi fa yu e denki efuso son sani di yu e du, akisi Yehofa fu a yeepi i fu kengi den sani ya. A nownow u mu seeka useefi gi den tesi di o miti u. Ná meke nawan sani tapu i fu du sani anga koni te sani e go bun.