1. San Yesesi taigi fo fisiman? San den du di Yesesi kai den?

PEITILISI, Andreyas, Yakowbesi, anga Yohanisi a be fisiman. Den be musu foondoo di Yesesi taigi den taki: ‘U waka a mi baka, da mi o meke u toon fisiman di e kisi libisama.’ San den man ya du di Yesesi kai den? Beibel taki: ‘Wantenwanten den fika den seepi fu den, neen den go waka neen baka’ (Mat. 4:18-22). A sani di den du ya kengi den hii libi. Den á be o go e kisi fisi moo, ma den be o go e ‘kisi libisama’ (Luk. 5:10). Aini a ten ya, Yesesi e kai den sama di lobi a tuu biibi fu du aseefi sani ya (Mat. 28:19, 20). I de kabakaba fu bigin du a wooko di Yesesi gi i?

2. Saide a bun fu teke ten pakisei san a wani taki fu toon wan peleikiman? San u mu du efu u wani toon wan peleikiman?

² Kande a wan pisiten yu e sutudeli Beibel kaba. Kande yu e du omen fu den sani di i leli kaba tu. Now a yuu doo fu luku efi i wani toon wan peleikiman. Efi yu e fii enke yu á kaba fu du a wooko ya, yu á mu lasi-ati. Kande yu e fii so, fu di yu e fusutan taki a wan gaan sani fu toon Yesesi bakaman. Beibel taki Peitilisi anga den taa fisiman fika a wooko fu den ‘wantenwanten’ di Yesesi kai den. Ma dati á wani taki den á denki bun fosi den du a sani ya. Wan sani fu sigisi mun pasa den be kon sabi kaba taki a Yesesi na a Mesiyas (Yoh. 1:35-42). Kande iseefi leli omen sani fu Yehofa anga Yesesi kaba. Kande i wani go a fesi a waaleiti tu. Ma fosi i toon wan peleikiman, i mu teke ten  pakisei bun san a wani taki fu toon wan peleikiman. San be yeepi Peitilisi, Andreyas, anga den taawan fu fika den sani fu den fu go waka a Yesesi baka?

3. Sowtu manii o yeepi i fu bigin anga a wooko di Yesesi gi u?

³ Den fosi disipel fu Yesesi be lobi a fisiwooko. Den be sabi den wooko bun, den be abi deki-ati. Boiti dati, den be poi dwengi denseefi. A den manii ya be yeepi den fu du a wooko di Yesesi be gi den enke fisiman di e kisi libisama. Aini a artikel ya, wi o luku fa i sa kon abi den manii ya. A sani ya o yeepi i fu toon wan peleikiman di e du en wooko bun.

4. Saide Peitilisi be e du a fisiwooko?

⁴ Anga a fisiwooko di Peitilisi be e du a be e solugu en osufamii. Ma Peitilisi be lobi a wooko ya tu (Yoh. 21:3, 9-15). Bakaten di Peitilisi toon wan fisiman di e kisi libisama, a be kon lobi a wooko ya tu. Yehofa be e holibaka gi en, neen meke a be poi du a wooko ya bun.​—Toli 2:14, 41.

5. Enke fa Lukasi 5:8-11 e soi, da saide Peitilisi be e feele? San o yeepi u te wi e fii enke Peitilisi?

⁵ A moo pelensipali sani di e meke wi e du a peleikiwooko, a di u lobi Yehofa. A di u lobi Yehofa meke u wani yeepi taawan fu kon sabi en, winsi wi e fii enke u ná o poi du a wooko ya bun. Di Yesesi kai Peitilisi fu go waka neen baka, a taigi en taki: ‘Ná feele moo.’ (Leisi Lukasi 5:8-11.) A ná den sani di be sa miti Peitilisi di a be o bigin waka a Yesesi baka a be e feele. A foondoo a be foondoo di a si den somen fisi di Yesesi be meke den kisi. A be sabi taki a wan wonduu Yesesi be du. Neen meke a be e fii enke a á bun sai  fu wooko makandaa anga Yesesi Kelestesi. Kande yu e fii enke Peitilisi son yuu. Kande yu e si enke i ná o poi du den sani di wan bakaman fu Kelestesi mu du. Efu a so yu e fii, da meke moiti fu moo lobi Yehofa, Yesesi, anga taa sama. A sani ya o gi i taanga-sikin fu bigin du a wooko di Yesesi gi u.​—Mat. 22:37, 39; Yoh. 14:15.

6. San a wantu taa sani di meke u wani peleiki?

⁶ Wi o luku wantu taa sani di e gi u taanga-sikin fu du a peleikiwooko. Wan fu den sani ya na a sani di Yesesi be taki aini Mateyesi 28: 19, 20. A be taki: ‘Go, da u meke sama toon mi bakaman’. Wi e peleiki tu fu di u wani yeepi sama fu kon sabi a tuu leli, bika ‘sama e pina den. Den sama ya e waka buuyabuuya’. Den abi a bun nyunsu fu a Kownukondee taanga fanowdu (Mat. 9:36). Yehofa wani ala sowtu sama sabi a tuu leli, bika na a sani ya o meke den fii.​—1 Tim. 2:4.

7. Enke fa Romesama 10:13-15 e soi, da saide a peleikiwooko pelensipali?

⁷ Efu wi e teke ten pakisei den wini di den sama di wi o peleiki gi o fende, wi o moo fende taanga-sikin fu bigin anga a wooko ya. Den sama di e du fisiwooko e kisi fisi fu seli, efuso fu nyan. Ma wi e yeepi sama fu toon disipel fu di u wani den tan a libi.​—Leisi Romesama 10:13-15; 1 Tim. 4:16.

8-9. San wan fisiman mu sabi? Saide a mu sabi den sani ya?

⁸ Aini a ten fu Yesesi, wan fisiman be mu sabi sowtu fisi a be wani kisi (Lef. 11:9-12). A be mu sabi tu pe a mu suku den sowtu fisi ya. Fisi lobi de a peesi pe den sa fende nyanyan anga pe a wataa bun gi den fu tan. Wan fisiman mu sabi tu on ten a mu go suku son fisi. Wan leisi, wan Kotoigi di e tan a wan tabiki di de aini a Stille Oceaan, be kai wan zendeling fu go uku anga en. A zendeling piki a baala taki: ‘Mi o kon miti i tamaa mamanten neigin yuu.’ Ma a baala taigi a zendeling taki: ‘Nono baala, a ná a yuu di u wani u mu go, ma na a yuu di u sabi taki wi o kisi fisi.’

⁹ Na aseefi sani ya den disipel fu Yesesi di be toon peleikiman fu a bun nyunsu, be e du tu. Den be e go a peesi pe den be sabi taki den o miti sama. Na a yuu di den sama be o de ape den be e go tu. Den disipel ya be e peleiki na a tempel, den snoga, den wowoyo, anga sama osu (Toli 5:42; 17:17; 18:4). Useefi mu meke moiti fu sabi on pe anga on yuu wi o fende sama na a pisi pe wi e peleiki. U mu de kabakaba tu fu kengi sani aini u libi fu man peleiki na a yuu, anga den peesi pe u sabi taki wi o miti sama.​—1 Kor. 9:19-23.

10. Sowtu wookosani a olikanisâsi fu Yehofa gi u?

¹⁰ Wan fisiman mu abi den wookosani di de fanowdu fu kisi fisi. A mu sabi wooko anga den sani ya tu. A so useefi mu abi wookosani fu man du a peleikiwooko bun. U mu sabi fa u mu wooko anga den sani ya tu. Yesesi be leli den disipel fi en fa den be mu du a peleikiwooko. A be taigi den san den be mu tyai te den e go peleiki, pe den be mu peleiki, anga san den be mu taki (Mat. 10:5-7; Luk. 10:1-11). Aini a ten ya, a olikanisâsi fu Yehofa gi wi omen wookosani (Teaching Toolbox) di e yeepi u fu du a wooko ya bun. * Den e leli u tu fa  u mu wooko anga den sani ya. A sani ya e yeepi u fu wi á feele fu peleiki. Ai yeepi u tu fu toon wan moo bun leliman.​—2 Tim. 2:15.

11. Saide peleikiman mu abi deki-ati?

¹¹ Sama di e du fisiwooko mu abi deki-ati, bika son yuu sani di den á be denki e miti den. Gaanse leisi a neti den e wooko. Gaan daaiwinta sa miti den wanboowanboo te den de a mindii wataa. Peleikiman mu abi deki-ati tu. Te wi o bigin peleiki, sama o kon sabi wi enke wan Yehofa Kotoigi. Kande son famii o wani tapu u fu dini Yehofa, kande mati o soso u tu. Boiti dati, son sama ná o wani aliki a bosikopu di wi e paati. Den sani ya de enke ‘gaan winta’. Ma a sani ya nai foondoo wi, bika Yesesi be taigi den bakaman fi en taki sama be o libi ogii anga den te den be o du a peleikiwooko.​—Mat. 10:16.

12. Enke fa Yowsuwa 1:7-9 e soi, da san o yeepi u fu moo abi deki-ati?

¹² San o yeepi i fu abi deki-ati? A fosi sani di o yeepi i, a te yu e biibi taki Yesesi e tii a peleikiwooko a goontapu winsi fa a de a hemel nownow (Yoh. 16:33; Openb. 14:14-16). I mu biibi tu taki Yehofa o solugu yu enke fa a paamisi (Mat. 6:32-34). O moo i biibi e taanga, o moo yu o abi deki-ati. Peitilisi anga den mati fi en biibi be taanga, neen meke den be fika a fisiwooko fu go waka a Yesesi baka. Wantu  fasi fa i soi kaba taki i biibi taanga, a di i taigi den mati anga den famii fi i taki yu e sutudeli Beibel anga Yehofa Kotoigi, efuso taki yu e go a den komakandaa. Kande a omen sani i kengi aini i libi kaba fu man libi enke fa Yehofa wani. I be abi deki-ati anga biibi fanowdu fu man du den sani ya. Te yu e tan meke moiti fu moo abi deki-ati, da i sa fitoow taki ‘i Gadu Yehofa o de anga i winsi pe yu e go’.​—Leisi Yowsuwa 1:7-9.

13. Fa begi, anga a teke di wi o teke ten pakisei fa Yehofa e yeepi a foluku fi en o yeepi u fu abi deki-ati?

¹³ Sowtu taa sani sa yeepi i fu moo abi deki-ati? Begi a wan fu den sani di o yeepi i fu moo abi deki-ati (Toli 4:29, 31). Yehofa o aliki den begi fi i. Noiti a o gwe fika i. Ala yuu a de kabakaba fu holibaka gi i. Teke ten fu pakisei fa Yehofa kibii den sama di be e dini en a fositen. Pakisei fa Yehofa yeepi i di son sani be e miti i, anga fa a gi i kaakiti fu kengi a fasi fa i be e libi. I sa biibi taki a Sama di be yeepi a foluku fi en fu abaa a Lebi Se, poi yeepi i tu fu toon wan bakaman fu Kelestesi (Ek. 14:13). I sa biibi taki Yehofa o holibaka gi i leti enke a psalm sikiifiman di be taki: ‘Yehofa de anga mi. Mi nai feele. San libisama poi du anga mi?’​—Ps. 118:6.

14. San i leli fu den toli fu sisa Masae anga Tomoyo?

¹⁴ Wan taa sani di o yeepi u fu moo abi deki-ati, a te wi e luku fa Yehofa yeepi sama di e sen, fu man peleiki. Luku a toli fu wan sisa den e kai Masae. A sisa ya a sen sama. A be e si enke noiti a be o poi peleiki, bika a be e feele fu taki anga sama di a á sabi. A sani ya be de enke wan hei mongo gi en di a be mu subi. A sisa ya meke moiti fu moo lobi Yehofa anga taa sama. A teke ten pakisei saide sama mu yee a bun nyunsu aini a ten ya, neen a begi Yehofa fu gi en deki-ati fu peleiki. Bakaten a sisa ya á be e feele fu taki anga sama so moo, a bigin du a pioniliwooko. Yehofa sa yeepi den sama di á bigin peleiki langa ete fu abi deki-ati tu. Luku a ondoofenitoli fu sisa Tomoyo. Di a sisa ya bigin peleiki osu fu osu, a fosi sama di a miti bali en taki: ‘Mi á wani yee nawan sani fu Yehofa Kotoigi’, neen a wai en doo tapu. Di a sani ya pasa, Tomoyo á feele. A daai neen a taigi a sama di be e wooko anga en taki: ‘I si san pasa? Mi á taki wan sani seefi, neen a sabi kaba taki mi a wan Yehofa Kotoigi. Ná pikin switi a sani ya switi gi mi.’ Nownow Tomoyo e du a kowownu pioniliwooko.

15. Saide wan Kelesten mu poi dwengi enseefi leti enke wan sama di e du fisiwooko?

¹⁵ Wan bun fisiman mu poi dwengi enseefi. Wan sama di poi dwengi enseefi man du ala san a wani du. Wan fisiman mu dwengi enseefi fu opo fuuku, a mu dwengi enseefi fu tan du en wooko te enke a kaba, a mu poi wooko go doo tu winsi a san ati efuso alen e kai. A so useefi mu poi dwengi useefi fu man kaba a wooko di u mu du.​—Mat. 10:22.

16. San o yeepi u fu dwengi useefi?

¹⁶ Dwengi iseefi a ná wan manii di wi e meke anga en. Gaanse leisi a moo makiliki fu du san u fii. Ma son leisi den moo pelensipali sani di u mu du á makiliki. Neen meke u mu leli fu dwengi useefi fu man du den sani ya. A santa yeye fu Yehofa e yeepi u fu dwengi useefi.​—Gal. 5:22, 23.

17. Enke fa 1 Korentesama 9:25-27 e soi, da san Pawlesi be e du fu dwengi enseefi?

 ¹⁷ Apostel Pawlesi a be wan sama di be poi dwengi enseefi. Toku a taki a be abi fu e ‘naki en sikin anga kofu’ fu man du san bun. (Leisi 1 Korentesama 9:25-27.) Pawlesi be e gi taawan taanga-sikin tu fu dwengi denseefi fu sani be ‘sa waka enke fa a sete’ (1 Kor. 14:40). Efu u wani dini Yehofa, u mu poi dwengi useefi. Na a sani de o yeepi u fu man du a peleikiwooko, anga ala den taa sani di wan Kelesten mu du.​—Toli 2:46.

18. On ten Yehofa e si wi enke sama di e du den wooko bun?

¹⁸ Wan fisiman di sabi du en wooko bun e kisi tyaipi fisi. Ma Yehofa nai luku omen sama u yeepi fu toon wan Kotoigi (Luk. 8:11-15). Solanga wi e tan peleiki a bun nyunsu, Yehofa e si wi enke sama di e du den wooko bun. Saide? Bika te wi e peleiki, wi e du san Yehofa anga en Manpikin sende u fu du.​—Malik. 13:10; Toli 5:28, 29.

19-20. Saide a pelensipali fu du a peleikiwooko nownow?

¹⁹ Aini son kondee, a wantu mun aini a yali namo lanti e meke sama kisi fisi. Te a yuu di den á poi kisi fisi e koosube, da den fisiman e moo meke moiti fu kisi fisi. Na aseefi sani peleikiman e du tu. A kaba fu a goontapu ya koosube. Ten ná ipi moo fu du a wooko ya di o yeepi sama fu tan a libi. Neen meke yu á mu daaidaai. Yu á mu si enke a te ala sani fi yu e waka bun fosi yu o poi bigin anga a wooko ya, ma a nownow i mu bigin.​—Peleik. 11:4.

²⁰ A nownow i mu meke moiti fu lobi a peleikiwooko, fu sutudeli Beibel moo bun, fu abi deki-ati, anga fu dwengi iseefi. Kon wooko makandaa anga den moo enke aitin miliyun sama di e peleiki a bun nyunsu a hii goontapu, da Yehofa o meke i piisii (Neh. 8:10). Tan du ala san i poi aini a peleikiwooko, te enke Yehofa taki a wooko ya kaba. Aini a taa artikel, wi o luku dii sani di o yeepi u fu tan peleiki a bun nyunsu fu a Kownukondee.