1-2. Enke fa 1 Timotiyesi 6:20 e soi, da san Timotiyesi be mu du?

SON leisi te wi abi wan gudu efuso wan sani di u lobi, wi e meke taa sama luku en gi u fu a á lasi efuso poli. Kande yu e poti i moni a banku, fu di yu á wani sama fufuu en. Yu e du a sani ya fu di yu e biibi taki a banku o poi kibii a moni fi i.

² Leisi 1 Timotiyesi 6:20. Apostel Pawlesi be membee Timotiyesi taki a sabi di a sabi den tuu leli fu Gadu Wowtu a wan gaan gudu. Yehofa be gi Timotiyesi a gaandi ‘fu du a wooko fu wan peleikiman fu a bun nyunsu’ (2 Tim. 4:2, 5). Pawlesi be gi Timotiyesi taanga-sikin fu tan si a sani di Gadu be gi en enke wan gudu. Leti enke Timotiyesi, Yehofa gi u gudu tu. San a den gudu ya? Saide u mu luku den gudu di Yehofa gi u bun?

3-4. Saide a fusutan di u poi fusutan den leli fu Beibel a wan gaan sani?

³ Yehofa meke u fusutan den sani di sikiifi aini en Wowtu Beibel. A sani ya a wan gaan sani, bika Beibel e leli u fa u sa toon Gadu mati, anga san e meke wan sama de koloku tuutuu. Te u fusutan den sani ya, da wi e du san u leli, u libi e waka moo bun. U nai biibi den lei fu a goontapu ya moo tu.​—1 Kor. 6:9-11.

⁴ Wan taa sani di meke ai bigi gi u taki wi e fusutan san sikiifi aini Beibel, a fu di a den sama di ‘ati bun fu fende a teego libi’ Yehofa e yeepi fu fusutan den sani ya (Toli 13:48). Den sama ya abi sakafasi, neen meke den e wooko anga den sani di a koni saafu e leli wi aini a ten ya  (Mat. 11:25; 24:45). Den sani di sikiifi aini Beibel a den moo pelensipali sani di wan sama sa leli. Efu a koni saafu á be e yeepi u, wi á be o poi fusutan a Beibel.​—Odo 3:13, 15.

5. Sowtu taa gaandi wi abi?

⁵ Yehofa gi wi a gaandi tu fu yeepi taawan fu kon sabi en. A gi wi a wooko fu taigi taawan san a abi a pakisei gi libisama (Mat. 24:14). A bosikopu di wi e paati pelensipali, bika ai yeepi sama fu kon aini a gaan osufamii fu Yehofa. Den sama ya abi a okasi tu fu fende a teego libi (1 Tim. 4:16). Ala sama di e peleiki, e holibaka gi a moo pelensipali wooko di e du a goontapu nownow (1 Tim. 2:3, 4). A wan gaandi wi abi fu wooko makandaa anga Gadu.​—1 Kor. 3:9.

6. San pasa anga wantu Kelesten di á be e si den sani di Yehofa gi den enke gudu moo?

⁶ Son Kelesten aini a ten fu Timotiyesi á be e si a gaandi di Yehofa be gi den enke wan gudu. Wan fu den Kelesten ya a be Deimasi. Deimasi be gwe fika Pawlesi fu di a be lobi den sani fu a goontapu (2 Tim. 4:10). Figelus anga Hermogenes be gwe fika Pawlesi tu. A gei enke den be du a sani ya fu di den be e feele taki den sani di be e miti Pawlesi be o miti den tu (2 Tim. 1:15). Himeneyus, Aleksander anga Fileitus be bigin paati falisi leli, bakaten den daai baka gi a tuu biibi (1 Tim. 1:19, 20; 2 Tim. 2:16-18). Di den sama ya be teke a waaleiti den be lobi Yehofa. Ma bakaten den be meke sani puu den pakisei na a gaandi di den be abi, neen meke den gwe fika Yehofa.

7. San Saatan e du fu meke u gwe fika Yehofa?

⁷ Saatan wani u lasi den gudu di Yehofa gi u. Fa ai puubei fu du a sani ya? Ai koboloiki tv, felon, buku, poku, anga internet fu kengi a fasi fa wi e denki saafisaafi. Bika a sabi taki te u bigin denki enke den sama fu a goontapu ya, a o moo taanga gi u fu du sani enke fa Yehofa wani. A sani ya o meke wi á lobi Yehofa anga u hii ati moo. Saatan e meke sama taki sani fu meke u tapu anga a peleikiwooko. Son leisi ai du ogii anga u tu fu u sa tapu anga a wooko di wi e du. A wani u poti pakisei a den lei di sama di komoto a waaleiti e paati, fu di a wani useefi gwe fika Yehofa.​—1 Tim. 6:20, 21.

8. San a toli fu Daniel e leli i?

⁸ Efu wi á luku bun, wi o gwe fika a tuu biibi saafisaafi. Luku a toli fu Daniel *.  A yonkuman ya di be lobi pee game, taki: ‘A tin yali mi be abi di mi bigin pee game. Fosi mi á be e pee ogii game. Ma bakaten mi bigin pee feti game anga game di abi fu du anga ogii yeye.’ A wan sani fu 15 yuu aini wan dei Daniel be e pee game. A taki: ‘Aini mi ati mi be sabi taki den game di mi be e pee, anga den somen yuu di mi be e lasi fu pee den, be e meke mi gwe fika Yehofa saafisaafi. Ma mi be e koli miseefi taki mi á be abi fu du ala san Beibel e taki.’ Efu wi á luku bun, den sani di wi e du fu piisii sa meke u bigin si den leli fu Beibel enke soso sani. A sani ya o meke u lasi den gudu di Yehofa gi u.

9. Enke fa 1 Timotiyesi 1:18, 19 e soi, da anga san Pawlesi be maiki Timotiyesi?

⁹ Leisi 1 Timotiyesi 1:18, 19. Pawlesi be taigi Timotiyesi taki leti enke wan suudati, a mu ‘tan feti a bun feti’. Pawlesi á be e taki fu wan tuutuu feti pe sama e feti anga denseefi, ma a be e taki fu a moiti di Timotiyesi be mu meke fu tan dini Yehofa. Fa Kelesten de enke suudati di de aini wan feti? Sowtu manii u mu abi fu man feti a feti ya? Meke u luku feifi sani di a ageisitoli fu Pawlesi e leli u. Den sani ya o yeepi u fu wi á komoto a waaleiti.

10. Saide u mu meke moiti fu dini Gadu fayafaya?

¹⁰ U mu dini Gadu anga u hii ati. Wan bun suudati e feti fu kibii wan sama di a lobi, efuso wan sani di pelensipali gi en. Pawlesi be gi Timotiyesi taanga-sikin fu meke moiti fu dini Gadu fayafaya (1 Tim. 4:7). O moo u lobi Gadu, o moo wi o meke moiti fu tan a waaleiti.​—1 Tim. 4:8-10; 6:6.

11. Saide u mu poi dwengi useefi?

¹¹ Dwengi iseefi fu du san bun. Wan suudati mu e wooko taanga ala yuu efu a wani de seekaseeka te a mu go a feti. Saatan á be poi kisi Timotiyesi, bika Timotiyesi be e du den sani di Pawlesi be leli en. A be e meke moiti fu dwengi enseefi fu a á du sani di á bun. A be e meke moiti fu kon abi den manii di wan Kelesten mu abi. A be e paa anga baala anga sisa tu (2 Tim. 2:22). A fu di a be poi dwengi enseefi meke a be man du den sani ya. Useefi mu poi dwengi useefi tu, da u ná o du den sani di a sondu sikin wani (Rom. 7:21-25). Boiti dati, u mu meke taanga moiti fu kengi u manii, fu man du sani enke fa Gadu wani (Efe. 4:22, 24). Baka te u wooko hii dei, a moiti u mu meke fu go a komakandaa bika wi e weli. Efu wi á poi dwengi useefi, u ná o man du a sani ya.​—Heb. 10:24, 25.

12. San o yeepi u fu wooko moo bun anga a Beibel?

¹² Wan suudati mu sabi wooko anga den fetisani fi en, neen meke na ala yuu a mu e leli fa a sa wooko moo bun anga den sani ya. A letiso useefi mu leli fa u mu wooko anga a Wowtu fu Gadu (2 Tim. 2:15). Te wi e go a den komakandaa wi e leli fa u sa wooko anga a Beibel. Ma efu u nai sutudeli Beibel anga useefi, u ná o poi yeepi taawan fu biibi den sani di sikiifi aini. Efu u wani a Wowtu fu Gadu taanga u biibi, wi á mu e leisi en namo da a kaba, ma u mu e teke ten pakisei den sani di u leisi. U mu e ondoosuku sani aini den buku di a olikanisâsi meke tu. Den sani ya o yeepi u fu sabi fa u mu wooko anga den sani di u leli aini Beibel (1 Tim. 4:13-15). Efu u sabi fa u mu wooko anga  a Beibel, wi o man koboloiki en fu leli taawan tu. A ná Beibel tekisi namo wi o go e leisi gi den, ma wi o man yeepi den fu fusutan san den leisi, anga fa den sa wooko anga a sani di den leisi. Te wi e sutudeli Beibel anga useefi ala yuu, wi o moo sabi fa fu wooko anga en.​—2 Tim. 3:16, 17.

13. Enke fa Hebrewsama 5:14 e soi, da san o yeepi u fu du sani anga koni?

¹³ Du sani anga koni. Wan suudati mu sabi sowtu ogii sa miti en, fu a sa wai pasi gi en. A letiso useefi mu meke moiti fu sabi sowtu sani sa tyai takuu bakapisi gi u, fu u sa wai pasi gi den sani de (Odo 22:3; leisi Hebrewsama 5:14.) U mu luku bun anga den sani di wi e du fu piisii. Gaanse felon anga taa sani di den e daai a tv e soi fa sama e libi wan hululibi. Yehofa á lobi den sowtu sani ya. Efu wi e luku den, sani ná o waka bun anga u, bika den o meke wi á lobi Gadu anga u hii ati moo.​—Efe. 5:5, 6.

14. Fa Daniel libi kengi di a bigin du sani anga koni?

¹⁴ Bakaten Daniel di u be taki fi en kaba be kon fusutan taki den game di á be e pee á be bun. A go suku sani aini a Waktitoren Library, fu di a be wani sabi fa a be sa tapu anga a takuu gwenti ya. Fa sani waka? A tapu anga den game di a be e pee. A á be e mati anga sama di e pee den game ya moo tu. Daniel taki: ‘Pe fu tapu aini osu hii dei e pee game, mi bigin go a peesi anga baala anga sisa.’ Nownow Daniel a wan owluman, ai du a pioniliwooko tu.

15. Saide u mu luku bun anga lei toli di sama e paati?

¹⁵ Leti enke Timotiyesi u mu de na ain fu si te wan sama daai baka gi a tuu (1 Tim. 4:1, 7; 2 Tim. 2:16). Kande den sama ya bigin paati lei fu baala anga sisa. Efuso kande den e taki sani fu meke u si enke a olikanisâsi fu Yehofa á bun. Den sani ya sa swaki a biibi fu u. U mu luku bun fu sama á fende u koli anga den sowtu lei ya. Saide? Bika den sama di e paati den toli ya, ‘á sabi moo san na a tuu’. A toobi den e suku anga den toli di den e paati (1 Tim. 6:4, 5). Den sama ya wani u biibi den lei fu den fu u sa poli anga den baala anga sisa fu u.

16. Sowtu sani sa puu u pakisei na a wooko di wi e du?

 ¹⁶ Ná meke sani puu i pakisei. Enke ‘wan bun suudati fu Kelestesi’ Timotiyesi á be meke gudu efuso taa sani puu en pakisei na a wooko di a be e du (2 Tim. 2:3, 4). Leti enke Timotiyesi, wi á mu meke den gudu fu a goontapu ya puu u pakisei na a peleikiwooko. Efu wi á luku bun, ‘wi o lobi gudu te’ da wi á lobi Yehofa anga u hii ati moo. A sa meke wi á si a Wowtu fu Gadu, efuso a gaandi di wi abi fu taigi taa sama den sani di u leli enke wan gudu moo (Mat. 13:22). Ma te u nai libi bigi, wi o man koboloiki ala u kaakiti anga u ten fu ‘poti a Kownukondee fu Gadu a fesi’.​—Mat. 6:22-25, 33.

17-18. San u mu du fu wi anga Yehofa á poli?

¹⁷ I mu de seekaseeka ala yuu. Wan suudati mu sabi a fesi san a o du te son sani miti en. Efu wi á wani lasi den sani di Yehofa gi u, u mu du wan sani wantenwanten te u si taki wan sani sa meke u lasi a gudu ya. San o yeepi u fu du a sani ya? U mu bigin luku nownow kaba san wi o du te a sani de pasa fu a á meke u lasi den gudu di Yehofa gi u.

¹⁸ Aini son kondee, te sama go a wan dansi, efuso wan taa peesi pe tyaipi sama de, da den e taigi den taki den mu luku a fesi pe den sa lon go a doose efu wan sani pasa. A letiso useefi mu luku a fesi san wi o du efu u si sani di sa poli a denki fu u. Kande u si wan soso sikin fowtow efuso felon pe sama e siibi anga denseefi, kande a wan felon pe feti e feti, efuso kande u si website pe sama e taki ogii fu a olikanisâsi. Efu u sabi a fesi san wi o du te u si wan fu den sani ya a tv, efuso te u de a internet, a sani ya o yeepi u fu wai pasi gi den gawgaw, da den ná o meke wi anga Yehofa poli.​—Ps. 101:3; 1 Tim. 4:12.

19. Sowtu belesi wi o fende te wi e luku den sani di Yehofa gi u?

¹⁹ U mu luku den gudu di Yehofa gi u. Den gudu ya na a fusutan di wi e fusutan den leli fu Beibel, anga a gaandi di wi abi fu paati den leli ya anga taawan. Te wi e du den sani ya, da wi o abi wan kiin kosensi, wi o de koloku tuutuu. Wi o piisii fu di wi e yeepi taawan fu kon sabi a Gadu fu u. Yehofa o yeepi u fu wi á lasi den gudu di a gi u.​—1 Tim. 6:12, 19.