1-2. San Peleikiman 11:6 e leli u?

AINI son kondee sama e poolo te den yee a bosikopu di wi e paati, bika na a sani ya den be e suku senten. Ma yu abi kondee tu pe sama nai wani aliki. Den sama na a pisi pe yu e peleiki e poolo te den yee a bun nyunsu fu a Kownukondee? Winsi sama e aliki efuso den nai aliki, Yehofa wani u peleiki te enke a yuu fi en doo fu tapu a wooko ya.

² Yehofa poti a yuu kaba te a wooko ya o kon a wan kaba. Te a yuu de doo da, ‘a kaba o kon’ (Mat. 24:14, 36). Ma fosi a ten de doo, fa u sa soi taki u nai ‘meke wi ana boo’? *​—Leisi Peleikiman 11:6.

3. San wi o luku aini a artikel ya?

³ Aini a artikel di pasa u be luku fo sani di o yeepi u fu man du a peleikiwooko bun (Mat. 4:19). Aini a artikel ya wi o luku dii sani di o yeepi u fu tan du a wooko ya winsi san e pasa. Wi o luku saide (1) wi á mu meke sani puu u pakisei na a peleikiwooko, (2) saide u mu abi pasensi, anga (3) saide u mu meke moiti fu u biibi á swaki.

4. Saide u mu poti ala u pakisei na a wooko di Yehofa gi u?

⁴ Yesesi be taigi den disipel fi en san be o pasa aini den lasiti dei, anga fa sama be o go e tyai denseefi. A be sabi taki den sani ya be o meke a taanga gi den bakaman fi en fu tan du a peleikiwooko anga den hii ati. Neen meke a taigi den taki den mu ‘de na ain’ ala yuu (Mat. 24:42). Aini a ten fu Nowa a omen sani be e puu den sama pakisei na a  bosikopu di Nowa be e paati. Den seefi sani ya sa puu u pakisei na a wooko di wi e du tu (Mat. 24:37-39; 2 Peit. 2:5). Ma u mu tan du a wooko di Yehofa gi u sondee fu meke sani puu u pakisei.

5. Enke fa Toli fu den apostel 1:6-8 e soi, da on pe a bun nyunsu be o paati doo?

⁵ Aini a ten ya u mu poti ala u pakisei na a wooko di wi e du fu paati a bun nyunsu fu a Kownukondee. Yesesi be taki den bakaman fi en be o go doo anga a wooko ya baka di a be o dede. Den be o peleiki doo peesi pe a á be doo di a be de a goontapu (Yoh. 14:12). Di Yesesi dede, wantu fu den disipel fi en go du den fisiwooko baka. Di a weki baka, a meke den disipel fi en kisi tyaipi fisi. Baka di Yesesi du a wonduu ya, a soi den taki a peleikiwooko pelensipali moo iniiwan taa wooko (Yoh. 21:15-17). Fosi Yesesi go a hemel, a taigi den disipel fi en taki a bun nyunsu fu a Kownukondee be o paati doo te a den moo faawe peesi fu goontapu. (Leisi Toli fu den apostel 1:6-8.) Omen yali baka dati, Yesesi soi apostel Yohanisi wan fisyun di e soi san be o pasa na ‘a dei fu Masaa’. * Wan fu den sani di Yohanisi be si, a wan engel di be e ‘paati teego bun nyunsu gi den sama di e tan a goontapu, sama fu ala nasi, lo anga tongo’ (Openb. 1:10; 14:6). A sani ya e soi kiin taki Yehofa wani u peleiki na a hii goontapu te enke a yuu fi en doo.

6. San o yeepi u fu tan du a peleikiwooko?

⁶ Efu wi e teke ten pakisei ala den sani di Yehofa du gi u, a sani ya o yeepi u fu tan du a peleikiwooko anga ala u pakisei. Yehofa gi u buku, felon, anga taa sani di e yeepi u fu du a wooko ya. Aini moo enke 1000 tongo i sa fende sani na a website fu u (Mat. 24:45-47). Politiki, keliki anga moni e meke den sama aini  a goontapu ya nai libi na a wan. Ma den moo enke aitin miliyun sama di e dini Yehofa e libi enke baala anga sisa. U be man si a sani ya kiin di Kotoigi a hii goontapu be meke ten fu luku a deiwowtu fu feeda 19 april 2019 makandaa. A neti de, a 20.919.041 sama kon makandaa a hii goontapu fu membee a dede fu Yesesi. Efu wi e teke ten pakisei a gaandi di wi abi fu de aini a olikanisâsi ya, da a sani de o yeepi u fu tan poti pakisei na a peleikiwooko.

7. Fa a libi fu Yesesi e yeepi u fu tan poti pakisei na a peleikiwooko?

⁷ Wan taa sani di o yeepi u fu tan poti pakisei na a peleikiwooko, a te wi e meke moiti fu waka a Yesesi baka. Yesesi á be meke nawan sani puu en pakisei na a wooko ya (Yoh. 18:37). Di Saatan taigi en taki a o gi en ‘ala den Kownukondee fu goontapu’, Yesesi á be denki seefi fu fika a wooko fi en fu teke a sani di Saatan be wani gi en. Di sama be wani poti en enke kownu a goontapu ya, a á be poti pakisei na a sani de tu (Mat. 4:8, 9; Yoh. 6:15). A á be e suku fu kon gudu. Winsi sama be e libi ogii anga en, toku a tan du a wooko fi en go doo (Luk. 9:58; Yoh. 8:59). Te tesi e miti u, u mu meke moiti fu du a sani di Pawlesi be taki. A be taki Kelesten mu waka a Yesesi baka. Na a sani ya be o yeepi u fu ‘wi á gi abaa, efuso lasi-ati’.​—Heb. 12:3.

8. San a wani taki fu abi pasensi? Saide a pelensipali fu abi a manii ya?

⁸ Wan sama di abi pasensi e wakiti te enke sani kengi. Ala u mu abi pasensi. Kande wi abi wan polobelema nownow di wi e wakiti fu pasa, efuso kande wi e wakiti fu fende wan sani di u be wani senten. Polofeiti Habakuk be e winsi taki den sama fu Yuda be o tapu anga den ogii di den be e du (Hab. 1:2). Den disipel fu Yesesi be e winsi taki a Kownukondee fu Yesesi be o puu den na a tiimakiti fu Rome ondoo (Luk. 19:11). Wi e angii fu a ten di Gadu Kownukondee o puu ala ogii a goontapu, anga a ten di soso sama di e du san Gadu wani o de a goontapu (2 Peit. 3:13). Winsi fa u wani den sani ya pasa esi-esi, toku wi abi fu wakiti te enke a yuu di Yehofa poti fu du den doo. Wi o luku wantu fasi fa Yehofa e leli u fu abi pasensi.

9. Sowtu toli e soi taki Yehofa abi pasensi?

⁹ A fasi fa Yehofa e du sani e soi taki a abi pasensi tuutuu. A be gi Nowa ten fu meke a ark anga fu peleiki gi den sama aini a ten fi en (2 Peit. 2:5; 1 Peit. 3:20). Yehofa aliki Abalaham anga pasensi di a akisi en omen leisi efu a be o poli Sodom anga Gomora tuutuu (Gen. 18:20-33). A omen ondoo yali Yehofa pasensi anga den taanga-ede Islayelisama (Neh. 9:30, 31). Aini a ten ya seefi wi e si taki Yehofa e pasensi anga libisama, bika ai gi ala sama ‘a okasi fu tapu anga den sondu fu den’, fu den sa toon en mati (2 Peit. 3:9; Yoh. 6:44; 1 Tim. 2:3, 4). Efu wi e teke ten pakisei ala den fasi fa Yehofa e soi pasensi, a sani ya o yeepi u fu pasensi anga den sama di wi e peleiki gi. Yehofa meke sama sikiifi wan ageisitoli poti aini a Beibel tu di e leli u fu abi pasensi. Meke u luku a ageisitoli ya.

10. San a toli fu a goonman di sikiifi a Yakowbesi 5:7, 8 e leli u?

¹⁰ Leisi Yakowbesi 5:7, 8. U sa leli omen sani fu a ageisitoli fu a goonman. Son sani e goo gaw te i paandi den. Ma gaanse bon di e meke nyanyan e moo teke  ten fu bigi. A wan sani fu sigisi mun langa den Islayelisama be e wooko goon aini wan yali. Den goonman be e bigin paandi aini oktober, da den be e koti nyanyan aini april (Malik. 4:28). U mu abi pasensi leti enke wan sama di e paandi goon. Ma a ná ala yuu a sani ya e makiliki.

11. Fa pasensi o yeepi u te wi e yeepi sama fu toon Yesesi bakaman?

¹¹ Gaanse leisi, sondu libisama nai abi boo anga sani. Den e wani fende wini fu den sani di den e du wantenwanten. Ma efu wan goonman wani den sani di a paandi meke nyanyan, a abi fu e solugu den naamo. A mu e gi den wataa. Boiti dati, a mu e puu uwii na a goon. Efu u wani yeepi sama fu toon wan bakaman fu Yesesi u mu wooko taanga tu. Ai teke ten fu leli wan Beibelsutudi taki a á mu e paati bee. A sani ya sa de enke uwii di i mu puu aini a goon. Te wi abi pasensi, u ná o booko-saka te sama á wani aliki u. Ma winsi sama e aliki u, u mu abi pasensi tu, bika wi á poi dwengi den Beibelsutudi fu u fu go a fesi. Son leisi den disipel fu Yesesi seefi á be e fusutan ala den sani di a be e leli den wantenwanten (Yoh. 14:9). A tuu taki a wi e paandi, a wi e nati den sani di u paandi tu, ma toku u mu holi a pakisei taki a Yehofa e meke sani goo.​—1 Kor. 3:6.

12. Fa u sa soi pasensi te wi e peleiki gi den famii fu u?

¹² Kande ai moo taanga gi u fu abi pasensi te wi e peleiki gi den famii fu u. A sani di sikiifi a Peleikiman 3:1, 7 sa yeepi u. A tekisi e taki: ‘Wan ten de fu taki anga wan ten de fu de pii.’ A fasi fa wi e tyai useefi sa meke den famii fu u wani aliki u. Ma u mu e luku san na a moo bun yuu tu fu taki anga den (1 Peit. 3:1, 2). U mu e peleiki fayafaya, ma u mu e pasensi anga den sama di wi e peleiki gi, winsi a u famii.

13-14. Gi wantu ondoofenitoli fu sama di be abi pasensi.

 ¹³ Den toli fu sama aini Beibel, anga toli fu baala anga sisa aini a ten ya sa yeepi u fu abi pasensi. Winsi fa Habakuk be wani den sama fu Yuda tapu anga den ogii di den be e du, toku a be soi taki a abi pasensi di a taigi Yehofa taki: ‘Mi o taampu a pe mi e holi wakiti’ (Hab. 2:1). Apostel Pawlesi be e angii fu kaba a wooko fi en fu a be sa fende en pai. Ma a be abi pasensi, neen meke a tan paati a bun nyunsu finifini.​—Toli 20:24.

¹⁴ Luku a toli fu wan toowpaa di be go na a Gileyad sikoo. Den sende a toowpaa ya go a wan kondee pe wantu Kotoigi namo be de. Gaanse fu den sama aini a kondee a ná be Kelesten tu. A wantu sama namo be e wani sutudeli Beibel. Ma den mati fu a toowpaa ya di be go na a Gileyad sikoo, be e gi den toli fu den somen Beibelsutudi di den be abi a den kondee pe den e du a zendeling wooko. Omen fu den sutudi fu den be e go a fesi tu. Toku a toowpaa ya tan du a wooko fu den anga pasensi winsi fa gaanse sama á be e aliki. Baka di den peleiki aitin yali langa a wan peesi pe sama á be lobi aliki, ná pikin poolo den poolo di wan fu den Beibelsutudi fu den dopu. San a toli fu Habakuk anga a toli fu a toowpaa ya e leli u? Den e soi fa sama di be e dini Yehofa a fositen, anga sama di e dini en aini a ten ya, tan du den wooko fayafaya. Den sama ya á be meke den ana boo, neen meke Yehofa belesi den fu di den be abi pasensi. Useefi mu meke moiti fu ‘libi enke den sama di fende den sani di Gadu be paamisi den, fu di den be abi biibi anga pasensi’.​—Heb. 6:10-12.

15. Fa a biibi di wi e biibi den sani di sikiifi aini Beibel e yeepi u fu tan du a peleikiwooko fayafaya?

¹⁵ A di wi e biibi den sani di wi e leli sama meke u wani paati den anga ala sama di wani aliki. Wi e biibi taki den sani di sikiifi aini a Wowtu fu Gadu o pasa tuu (Ps. 119:42; Yes. 40:8). Wi e si fa den sani di Beibel be taki a fesi e pasa aini a ten ya. Wi e si tu taki te sama e wooko anga den sani di Beibel taki, den libi e moo waka bun. Den sani ya e meke u wani paati a bun nyunsu fu a Kownukondee anga ala sama, bika u wani denseefi fende den belesi ya.

16. Enke fa Psalm 46:1-3 e soi, da fa a biibi di wi e biibi Yehofa anga Yesesi o gi u taanga-sikin fu tan du a peleikiwooko?

¹⁶ Wi e biibi Yehofa tu, a Sama di sende u fu paati a bun nyunsu fu a Kownukondee. Boiti dati, wi e biibi Yesesi, a sama di a poti enke Kownu fu a Kownukondee fi en (Yoh. 14:1). Winsi san e miti u, u sa biibi taki ala yuu Yehofa de anga u, ai gi u kaakiti. (Leisi Psalm 46:1-3.) Boiti dati, u sabi taki Yesesi de a hemel e tii a peleikiwooko, bika Yehofa gi en a makiti anga a kaakiti fu du a sani ya.​—Mat. 28:18-20.

17. Gi wan ondoofenitoli di e soi saide u mu tan peleiki.

¹⁷ Efu u biibi taanga, wi o fitoow Yehofa taki a o belesi u te wi e meke moiti fu du san a taki. Son leisi a wan fasi di wi á be denki seefi ai belesi u (Peleik. 11:6). Ala dei a dunsudunsu sama e waka pasa den pikin wagi anga den tafaa di wi e sete a pe tyaipi sama e pasa. Sama e fende wini fu a peleiki di wi e peleiki na a fasi ya? Eeye. A Kownukondee Diniwooko fu november 2014 e taki fu wan yonkuu  uman di be de a universiteit. A uman ya be wani sikiifi wan toli fu Yehofa Kotoigi. A á be poi fende wan Kownukondee zaal, ma a be fende wantu buku anga taa sani a wan tafaa di den Yehofa Kotoigi be sete na a universiteit pe a be e go. A so a be poi fende ala den sani di a be abi fanowdu fu meke a sikoo wooko fi en. Bakaten a uman ya toon wan Kotoigi. Nownow ai du a kowownu pioniliwooko. Den sowtu toli ya e soi taki sama de ete di wani yee a bun nyunsu fu a Kownukondee. A sani ya e gi u taanga-sikin fu tan peleiki.

18. Saide u sa biibi taki a Kownukondee peleikiwooko o kaba na a yuu di Yehofa poti?

¹⁸ U sa biibi taki a Kownukondee peleikiwooko o kaba na a yuu di a mu kaba. A toli fu Nowa e soi kiin taki Yehofa nai lati anga sani. Wan sani fu 120 yali fosi a Fuudu, Yehofa be sabi a dei kaba di a be o meke a Fuudu kon. Omen yali baka dati Yehofa sende Nowa fu meke a ark. A wan sani fu 40 efuso 50 yali a teke Nowa fu kaba meke a ark. Winsi fa den sama aini a ten fu Nowa á be wani aliki, toku a peleiki gi den te enke Yehofa taigi en taki a yuu be doo fu tyai den meti go aini a ark. Di Nowa go aini a ark neen ‘Yehofa tapu a doo’.​—Gen. 6:3; 7:1, 2, 16.

19. Sowtu belesi wi o fende efu wi e tan peleiki?

¹⁹ A yuu di Yehofa o meke u tapu anga a Kownukondee peleikiwooko á langa moo. Di a yuu ya o doo, Yehofa o ‘tapu a doo’ fu a goontapu fu Saatan, da a o seeka wan nyun goontapu. Ala den sama di o de aini o go e du sani a wan letifasi. Ma solanga a ten de á doo, u mu tan du a wooko di Yehofa gi u fu du, leti enke Nowa, Habakuk, anga den taa sama di tan wooko gi Yehofa. U mu abi pasensi te wi e du a wooko ya. U mu e biibi anga u hii ati tu taki Yehofa o du den sani di a paamisi u.