1. San Yehofa e toon gi den sama di e dini en anga den hii ati?

YESESI na a fosi sani di Yehofa meke. En anga omen miliyun taa engel de aini a osufamii fu Yehofa (Kol. 1:15; Ps. 103:20). Di Yesesi be de a goontapu, a be soi taki Yehofa e toon a Dda fu den sama di e dini en anga den hii ati. Di a be e taki anga den bakaman fi en, a be kai Yehofa ‘Nda anga u Dda’ (Yoh. 20:17). Te u paamisi Yehofa taki wi o libi enke fa a wani da u dopu, wi e kon aini a osufamii fi en. A omen taa baala anga sisa de aini a osufamii ya tu.​—Malik. 10:29, 30.

2. San wi o luku aini a artikel ya?

² Ai taanga gi son sama fu si Yehofa enke wan Dda di lobi u. Ai taanga gi son wan fu u fu lobi den baala anga sisa fu u tu. Aini a artikel ya, wi o luku fa Yesesi e yeepi u fu si Yehofa enke wan Dda di lobi u, anga fa u sa toon en mati. Wi o luku tu fa u sa libi anga den baala anga sisa fu wi enke fa Yehofa e libi anga den.

3. Saide a fasi fa Yesesi leli den bakaman fi en fu begi e yeepi u fu kon koosube a Yehofa?

³ Yesesi wani u si Yehofa enke wan Dda di lobi u, a á wani u si en enke wan sama di ná abi fii gi u. Wi e si a sani ya te u luku a fasi fa Yesesi be leli den bakaman fi en  fu begi. Di a be e leli den fu begi, a bigin anga den wowtu: ‘U Dda’ (Mat. 6:9). Yesesi be sa meke u kai Yehofa ‘a moo Heiwan’, ‘a Mekeman,’ efuso ‘Kownu fu teego’ enke fa Beibel e soi (Gen. 49:25; Yes. 40:28; 1 Tim. 1:17). Ma Yesesi á du a sani ya, bika a wani u si Yehofa enke wan ‘Dda’.

4. Fa u du sabi taki Yehofa wani u kon koosube neen?

⁴ Ai taanga gi i fu si Yehofa enke wan Dda di lobi i? A fasi fa son wan fu u kiya, e meke a sani ya taanga gi u. Ma Yehofa e fusutan fa wi e fii. A wani u kon koosube neen, neen meke a sikiifi aini en Wowtu Beibel taki: ‘Kon koosube a Gadu, da enseefi o kon koosube a yu’ (Yak. 4:8). Yehofa lobi u. A paamisi u taki neen na a moo bun Dda di u be sa abi.

5. Enke fa Lukasi 10:22 e soi, da fa Yesesi e yeepi u fu kon koosube a Yehofa?

⁵ Yesesi sa yeepi u fu kon koosube a Yehofa. Yesesi sabi Yehofa bun, ai du sani pilisisi enke en tu. Neen meke a be taki: ‘A sama di si mi, si a Dda tu’ (Yoh. 14:9). Leti enke wan gaan baala aini wan osufamii, a so Yesesi e leli u fu aliki Yehofa. Ai leli u tu fu wi á du sani di a á lobi, anga san u mu du fu meke a piisii. A fasi fa Yesesi be e tyai enseefi di a be de a goontapu ya, e soi taki Yehofa lobi sama tuutuu. (Leisi Lukasi 10:22.) Meke u luku wantu fasi fa Yesesi du a sani ya.

6. Fa Yehofa be e aliki Yesesi?

⁶ Yehofa e aliki den pikin fi en. Luku fa Yehofa be e aliki en fosi Manpikin. Yehofa be e aliki a fosi Manpikin fi en te a be e begi di a be de a goontapu ya (Luk. 5:16). Yehofa be aliki Yesesi di a begi en fosi a teke den twalufu apostel fi en (Luk. 6:12, 13). Yehofa be e aliki Yesesi tu te a be e begi te sani be e moo en. Fosi Yudasi konkuu Yesesi, a begi en Dda fayafaya fu yeepi en anga den tesi di be  o miti en. Yehofa á be aliki Yesesi namo, ma a be sende wan engel fu kon gi en taanga-sikin.​—Luk. 22:41-44.

7. Fa yu e fii fu di i sabi taki Yehofa e aliki den begi fu den sama di e dini en aini a ten ya?

⁷ Yehofa e aliki den begi fu den sama di e dini en aini a ten ya tu. Boiti dati, ai piki den na a moo bun yuu (Ps. 116:1, 2). Luku fa Yehofa piki a begi fu wan sisa a Indiya. A sisa ya be e booko en ede pasa peesi, neen meke a begi Yehofa fu yeepi en. A taki: ‘A Broadcasting fu mei 2019, a be pilisisi san mi be abi fanowdu. Mi be si kiin taki a Yehofa piki a begi fu mi.’

8. Fa Yehofa be soi taki a lobi Yesesi?

⁸ Yehofa lobi u, leti enke fa a be lobi Yesesi. Te sani be e miti Yesesi a goontapu ya Yehofa be e holibaka gi en, a so ai holibaka gi u tu (Yoh. 5:20). A be e yeepi Yesesi fi en biibi á swaki, a be e toosutu en te sani be e moo en, a be e gi en ala san a be abi fanowdu tu. Boiti dati, na ala yuu a be e taigi Yesesi taki a lobi en (Mat. 3:16, 17). Yesesi be sabi taki en Dda e holibaka gi en ala yuu, neen meke noiti a be e fii enke neen wawan de.​—Yoh. 8:16.

9. San e soi taki Yehofa lobi u?

⁹ A omen fasi Yehofa soi u taki a lobi u. A hali u kon neen, neen a poti wi aini wan osufamii di lobi u. Den baala anga sisa di de aini a osufamii ya e toosutu u te wi e fii booko-saka (Yoh. 6:44). Boiti taki Yehofa e gi wi ala san wi abi fanowdu fu taanga a biibi fu u, ai yeepi wi anga den sani di wi abi fanowdu fu tan a libi (Mat. 6:31, 32). Te wi e teke ten pakisei fa Yehofa soi taki a lobi u, a sani ya e meke u moo lobi en.

10. San u sa leli fu a fasi fa Yehofa e libi anga den baala anga sisa fu u?

¹⁰ Yehofa lobi den baala anga sisa fu u. Ma son leisi ai taanga gi u fu lobi den, bika wi á kiya na aseefi fasi. Fu di wi a sondu libisama meke son leisi den o go e du sani di e hati u tu. Toku u sa lobi den. Fa wi o du a sani ya? A te wi e meke moiti fu libi anga den enke fa u Dda di de a hemel e libi anga u (Efe. 5:1, 2; 1 Yoh. 4:19). Meke u luku san u sa leli fu Yehofa.

11. Fa Yesesi soi taki a be e ‘fii gi sama’ leti enke Yehofa?

¹¹ Yehofa e fii gi sama (Luk. 1:78). Wan sama di e fii gi taawan e booko en ede te a si taawan e pina. Neen meke ai suku fasi fu yeepi den. Ai meke moiti fu toosutu den tu. Te wi e luku a fasi fa Yesesi be e libi anga sama, da wi e si taki a be e fii gi taawan leti enke Yehofa (Yoh. 5:19). Wan leisi di wan kulu sama be kon neen, ‘tyali kisi en bika den be de enke sikapu di ná abi sikapuman’ (Mat. 9:36). A ná fii namo Yesesi be e fii gi sama, ma a be e yeepi den tu. A be e deesi sama di be siki, ‘a be e toosutu den sama di be e tyotyo anga den sama di be e wooko taanga’.​—Mat. 11:28-30; 14:14.

12. Fa u sa soi taki wi e fii gi taawan?

¹² Te u sabi san e miti den baala anga sisa fu u, a o moo makiliki fu soi taki wi e fii gi den. Kande wan sisa abi wan siki di meke a nai poi du son sani. Winsi fa a nai kuutu fu a siki fi en, toku a be o fii bun efu wan sama be yeepi en anga son sani. Kande i sa boli tyai go gi en, efuso yeepi en kiin en osu. Kande wan baala de aini i kemeente di lasi en wooko. A be  o poolo efu wan sama gi en wan moni fu pasa den dei te enke a fende wan taa wooko. I ná abi fu meke a sabi sama gi en a moni.

13-14. Fa u sa soi taki u lobi gi taawan sani leti enke Yehofa?

¹³ Yehofa lobi gi sama sani (Mat. 5:45). Wi á mu wakiti fu u baala efuso sisa akisi u fosi wi o yeepi den a sani. Leti enke Yehofa, u sa du sani gi den sondee fu den akisi u. Na ala dei Yehofa e meke a san pii gi ala sama, sondee fu wi akisi en. A gi di Yehofa e gi u den sani di wi abi fanowdu, e soi taki a lobi u tuutuu. Wi e teke en fu bigi taki Yehofa e gi u san wi abi fanowdu ala dei.

¹⁴ Den sama di e dini Yehofa lobi gi taawan sani leti enke en. Aini 2013 di wan gaan daaiwinta be pasa aini Filipeinikondee, a omen baala anga sisa fu u be lasi den osu anga taa sani di den be abi. Ma baala anga sisa a hii goontapu meke moiti fu den be sa fende san den be abi fanowdu gawgaw. Son wan be poti moni, taawan be go yeepi meke den osu di be booko. Aini wan sani fu wan yali, den meke wan sani fu 750 osu gi den baala anga sisa fu den. Di a COVID-19 siki ya paati a hii goontapu, baala anga sisa du ala san den poi fu yeepi taawan fu fende san den abi fanowdu. Te u de kabakaba fu yeepi u baala anga sisa te den fuka, da wi e soi taki u lobi den.

15-16. Enke fa Lukasi 6:36 e soi, da san a wan taa pelensipali fasi fa u sa waka u Dda di de a hemel baka?

¹⁵ Yehofa lobi gi sama paadon. (Leisi Lukasi 6:36.) Na ala dei Yehofa e gi u paadon (Ps. 103:10-14). Den bakaman fu Yesesi be e meke fowtu ala yuu, toku a be e gi den paadon. A be de kabakaba fu dede gi u fu u be sa fende paadon fu den sondu fu u (1 Yoh. 2:1, 2). A gi di Yehofa anga Yesesi e gi u paadon, e meke u kon moo koosube a den.

¹⁶ Te wi e gi u baala anga sisa paadon, wi o moo lobi den (Efe. 4:32). A ná ala yuu a makiliki fu gi taawan paadon,  neen meke a moiti u mu e meke fu du a sani ya. Wan sisa taki A Wakititolen artikel di den e kai ‘Gi taawan paadon anga i hii ati’, yeepi en fu si saide a pelensipali fu e gi taawan paadon. A taki: ‘A artikel ya yeepi mi fu si taki te yu e gi taawan paadon, dati á wani taki yu á fii a sani di a sama du anga i. * Ma a fu di yu á wani holi a sama na ati meke yu e gi en paadon. Te i gi wan sama di du wan hati sani anga i paadon, ai de leti enke wan hebi komoto ai tapu. Yu e moo piisii.’ Te wi e gi taawan paadon leti enke u Dda di de a hemel, da wi e soi taki u lobi den.

17. Enke fa Mateyesi 5:16 e soi, da fa u sa gi u Dda di de a hemel gaandi?

¹⁷ Ai bigi gi u taki wi abi baala anga sisa a hii goontapu di lobi u. U wani yeepi ala sama di u poi fu kon dini Yehofa makandaa anga u. Neen meke u mu luku bun fu u nai du sani di sa tapu taawan fu kon dini Yehofa. Wi á mu e du sani di o gi Yehofa efuso a olikanisâsi fi en polinen. A fasi fa wi e tyai useefi mu meke sama wani kon sabi moo fu den sani di wi e leli.​—Leisi Mateyesi 5:16.

18. San o yeepi u fu wi á feele fu taigi taawan san wi e biibi?

¹⁸ Son leisi sama e soso u, efuso e libi ogii anga u fu di wi e dini Yehofa. San i mu du efi yu e feele taki i ná o sabi san fu taki te sama akisi i san yu e biibi? Yehofa anga Yesesi o holibaka gi i. Yesesi paamisi u taki u ná abi fu booko wi ede anga san wi o taki ‘bika na a santa yeye fu u Dda di de a hemel o meke u sabi san u mu taki’.​—Mat. 10:19, 20.

19. Gi wan ondoofenitoli fu wan sama di á be e feele fu taki san ai biibi.

¹⁹ Luku a toli fu baala Robert. Di a be bigin sutudeli Beibel den be kai en a kuutu fu go taki saide a á wani go aini  suudati. A ten de a á be sabi a Beibel bun ete. Robert taigi den taki a ná o go aini suudati fu di a lobi den baala anga sisa fi en di de a hii goontapu. Neen a kuutubakaa akisi en taki: ‘Sama a den baala fi i?’ Winsi fa Robert á be denki den be o akisi en sowan sani, toku wantenwanten a pakisei a deiwowtu fu a mamanten de. Dati a be Mateyesi 12:50. Neen meke a piki den taki: ‘Ala sama di e du san Nda di de a hemel wani a mi baala, mi sisa anga mma.’ Winsi fa Robert á be sutudeli langa ete, toku a santa yeye fu Yehofa be yeepi en fu piki ala den akisi fu a kuutubakaa a dei de. Yehofa be musu poolo taki Robert be fitoow en di a sani ya miti en. A o piisii anga u tu te wi e soi taki wi e biibi taki a o holibaka gi u te u mu taigi taawan san wi e biibi, winsi a á makiliki.

20. San u mu e meke moiti fu du ala yuu? (Yohanisi 17:11, 15)

²⁰ Wi e teke en fu bigi taki u de aini wan osufamii anga baala anga sisa di lobi taawan. Wi abi a moo bun Dda di wan sama sa abi tu. Saatan anga den bakaman fi en e du ala san den poi fu poli wi anga u baala anga sisa. Den wani u fii enke Yehofa á lobi u. Di Yesesi be de a goontapu, a be begi en Dda fu yeepi u fu u sa tan libi na a wan. (Leisi Yohanisi 17:11, 15.) Yehofa e aliki a begi fi en Manpikin te anga now ete. Leti enke fa Yesesi be e biibi ala yuu taki en Dda lobi en, a so useefi sa biibi taki u Dda di de a hemel lobi u tu. Meke u du ala san u poi fu moo lobi Yehofa anga den baala anga sisa fu u.