1-2. San Polofeiti Hakai be taki o pasa aini a ten ya?

AINI a yali 2015, wan gaan seke-doti be pasa a Nepal. Wan fu den sama di be de ape taki: ‘Aini wantu miniti namo, ala den wenkii anga den osu bigin kai enke wan paki kaita.’ Wan taawan taki: ‘Ala sama be e buuya. Bakaten sama taigi u taki a 2 miniti namo a doti seke, ma mi be e fii enke a omen yuu langa a doti seke.’ Efu a sowtu sani ya be miti i, noiti i be o feegete a dei de.

² Kande seke-doti nai pasa na a pisi pe i de, ma nownow a hii goontapu e seke a wan taa sowtu fasi. A wan hii pisiten kaba a sani ya e pasa. Polofeiti Hakai be taki fu a seke di a goontapu be o seke. A be sikiifi taki: ‘Disi a san Yehofa di e tii den engel fi en taki: “Dyonson mi o seke hemel, goontapu, a se anga a doti ete wan pasi.”’​—Hak. 2:6.

3. Saide u sa taki a seke di Hakai e taki fi en ya a ná aseefi enke wan tuutuu seke-doti?

³ A seke di Hakai e taki fi en aini a polofeititoli ya, a ná aseefi enke te a doti e seke tuutuu, bika te a sani de pasa, a soso takuu bakapisi ai tyai. Ma a seke di Yehofa e seke a goontapu e tyai wini gi sama. Yehofa seefi e taigi u taki: ‘Mi o seke ala den foluku, da ala den gudu fu den foluku o kon aini a tempel ya. Mi o fuu a tempel ya anga gendee, a so Yehofa di e tii den engel fi en taki’ (Hak. 2:7). San a polofeititoli ya be wani taki gi den sama aini a ten fu Hakai? San a wani taki gi wi aini a ten ya? Wi o luku den tu akisi ya aini a artikel ya. Wi o luku tu fa u sa yeepi anga a seke di Yehofa e seke den foluku aini a ten ya.

4. Saide Yehofa be sende polofeiti Hakai go na a foluku fi en?

⁴ Yehofa be gi polofeiti Hakai wan pelensipali wooko fu du. Meke u luku wantu sani di pasa fosi Yehofa gi Hakai  a wooko ya. Aini a yali 537 Fosi Kelestesi, wan kulu Dyu be komoto a Babilon go a Yelusalem baka. A gei enke Hakai be de aini a kulu ya. Den Dyu ya a sama di be lobi Yehofa. Neen meke di den doo Yelusalem, den bigin meke a tempel baka (Esra 3:8, 10). Ma den foluku di be lontu den be e du ala san den poi fu tapu a wooko fu den. Baka wan pisiten den Dyu be kon lasi-ati, neen den fika a meke di den be e meke a osu fu Yehofa (Esra 4:4; Hak. 1:1, 2). Neen meke aini a yali 520 Fosi Kelestesi, Yehofa gi Hakai a wooko fu gi a foluku taanga-sikin fu kaba meke a tempel. *​—Esra 6:14, 15.

5. Saide a bosikopu fu Hakai be musu gi a foluku fu Gadu taanga-sikin?

⁵ A bosikopu di Hakai be tyai gi a foluku be mu yeepi den fu moo biibi Yehofa. Neen meke a taigi den Dyu taki: ‘Ala sama di e tan aini a kondee, u mu abi deki-ati, da u go doo anga a wooko, bika mi de anga u, a so Yehofa di e tii den engel fi en e taki’ (Hak. 2:4). Den wowtu ‘Yehofa di e tii den engel fi en’ be musu gi den Dyu taanga-sikin, bika a sani ya e soi taki Yehofa abi wan gaan kulu engel di de kabakaba fu feti gi en. Neen meke den Dyu á be abi fu feele, a fitoow namo den be mu fitoow Yehofa.

6. San be o de a bakapisi fu a seke di Yehofa be o seke den foluku na a ten fu Hakai?

⁶ Yehofa sende Hakai fu go taigi den Dyu taki a be o seke ala den foluku. A bosikopu di Yehofa be gi Hakai be o gi den Dyu di be tapu anga a bow fu a tempel taanga-sikin. A fisyun di Hakai be si be soi taki Yehofa be o seke Persiya, a moo makiti kondee fu a pisiten de. San be o de a bakapisi fu a seke di Yehofa be o seke Persiya? A fosi sani a taki a foluku fu Gadu be o poi kaba meke a tempel. Baka dati sama di á be de Dyu be o poi dini Yehofa na a tempel ya. Ná pikin taanga-sikin a foluku fu Gadu be musu fende di den yee a bosikopu ya!​—Sak. 8:9.

7. Sowtu wooko di e seke a goontapu ya iseefi sa abi wan ana aini?

⁷ San a polofeititoli fu Hakai wani taki aini a ten ya? Nownow Yehofa e seke ala den foluku baka. Ma useefi abi wan ana aini a sani ya. Poti pakisei a wantu sani di pasa kaba: Aini 1914 Yehofa poti Yesesi Kelestesi enke Kownu fu a Kownukondee fi en aini hemel (Ps. 2:6). A sani ya a ná bun nyunsu gi den tiiman fu a goontapu ya. Fanafu di Yesesi toon Kownu, neen a ‘ten fu den taa kondee sama’ pasa. A ten fu den ‘taa kondee sama’, na a pisiten di Yehofa á be abi wan tiiman a goontapu di be e teke peesi gi en (Luk. 21:24). Fanafu di Yesesi toon Kownu a hemel, moomoo fanafu a pisiten fu 1919 neen a foluku fu Yehofa bigin poti pakisei na a Kownukondee fu Gadu. Den be kon fusutan taki na a Kownukondee ya wawan be o poi puu ala den polobelema fu libisama. A paati di den bigin paati a ‘bun nyunsu fu a Kownukondee’ seke a hii goontapu.​—Mat. 24:14.

8. Enke fa Psalm 2:1-3 e soi, da san gaanse sama du di den yee a bun nyunsu?

⁸ San son sama du di den yee a bosikopu ya? Omen fu den á be wani aliki.  (Leisi Psalm 2:1-3.) Den ati boon. Den á wani a sama di Yehofa poti fu tii den. Den nai si a bosikopu di wi e paati enke ‘bun nyunsu’. Aini son kondee lanti á wani u peleiki seefiseefi. A omen fu den tiiman aini a ten ya e taki den e dini Gadu, ma toku den á wani Gadu tii den. Neen meke leti enke a ten fu Yesesi, den e du ogii anga a foluku fu Gadu.​—Toli 4:25-28.

9. Sowtu okasi Yehofa e gi den sama di á bigin dini en ete?

⁹ Sowtu okasi Yehofa e gi den foluku? Psalm 2:10-12 e taki: ‘Den kownu, u mu e du sani anga koni. Den kuutuman fu goontapu, u mu teke leli. I mu soi lesipeki gi Yehofa da i bigin dini en. I mu e piisii te yu e dini en. I mu e lesipeki a manpikin, efuso Gadu ati o boon a yu da a o puu yu a pasi, bika en ati e boon gaw. Koloku fu den sama di e suku kibii neen.’ Yehofa á wani nawan sama dede. Neen meke ai gi ala den sama ya a okasi fu kengi den manii. Nownow den sa kon dini Yehofa ete, ma a ten di fika ná ipi moo. Na a kaba pisi fu den lasiti dei wi e libi nownow (2 Tim. 3:1; Yes. 61:2). Neen meke efu wan sama wani tan a libi, a nownow a mu meke moiti fu kon dini Yehofa.

10. Enke fa Hakai 2:7-9 e soi, da sowtu wini a seke di Yehofa be o seke den foluku be o abi?

¹⁰ A omen sama be o fende wini fu a seke di Hakai be taki Yehofa o seke den foluku aini a ten ya. A be taki ala den ‘gudu fu den foluku’ be o kon aini a tempel fu Yehofa. Den gudu ya a den sama di abi wan kiin ati di be o kon dini Yehofa. * (Leisi Hakai 2:7-9.) A ná Hakai wawan be taki fu a sani ya. Polofeiti Mika anga Yesaya seefi be taki aini den lasiti dei a omen sama be o kon dini Yehofa.​—Yes. 2:2-4; Mika 4:1, 2.

11. San wan baala du di a yee a Kownukondee bosikopu a fosi leisi?

 ¹¹ Luku san wan baala den e kai Ken du di a yee a bun nyunsu. Nownow a baala ya e wooko na a edekantoo fu Yehofa Kotoigi. A wan sani fu 40 yali pasa di a yee a bun nyunsu fu a fosi leisi. Ken taki: ‘Ná pikin piisii mi be piisii di mi kon sabi san sikiifi aini a Wowtu fu Gadu. Mi be e poolo di mi yee taki aini den lasiti dei fu a ogii goontapu ya wi e libi. Ma mi be fusutan tu taki efu mi wani Gadu piisii anga mi, mi be mu fika den sani fu a goontapu ya. Mi begi Yehofa fu a yeepi mi, neen mi meke moiti fu du wantenwanten san mi leli. A so mi kon aini a olikanisâsi fu Gadu. Pe mi de ya nownow nawan sani efuso sama poi puu mi.’

12. Fa Yehofa e tyai gudu kon aini a tempel fi en aini den lasiti dei ya?

¹² Wi e si kiin taki Yehofa e belesi a foluku fi en. Aini den lasiti dei ya, u si fa moo anga moo sama e kon dini Yehofa. Aini 1914 a wantu dunsu sama namo be e dini Yehofa. Nownow a moo enke aitin miliyun sama e dini Yehofa. Boiti den aitin miliyun sama ya, a omen miliyun sama e kon na a Membeefesa makandaa anga wi ala yali. A so a fesi dyali fu a tempel fu Yehofa e kon fuu anga ‘den gudu fu den foluku’. A tempel ya a den sani di Yehofa sete fu sama dini en enke fa a wani. Yehofa e fende gaandi te sama e daai den libi, da den bigin du san den e leli.​—Efe. 4:22-24.

13. Sowtu taa polofeititoli kon tuu aini a ten ya? (Luku a fowtow a fesise fu A Wakititolen.)

¹³ A fasi fa miliyunmiliyun sama e kon dini Yehofa aini a ten ya, e meke omen taa polofeititoli kon tuu. Wan fu den polofeititoli ya sikiifi a Yesaya 60:22. Ai taki: ‘A pikin kulu o toon wan dunsu. A pikin foluku o toon wan gaan foluku. A mi Yehofa, o meke a sani ya pasa gawgaw te a yuu doo.’ Fu di so fuu sama e kon dini Yehofa nownow, meke omen sama de aini a olikanisâsi di poi du ala sowtu sani. Den sama ya de kabakaba fu peleiki a ‘bun nyunsu fu a Kownukondee fayafaya’. Yesaya be maiki den sani di  den sama ya poi du anga a ‘meliki fu den foluku’ (Yes. 60:5, 16). Fu di ala den sama di e dini Yehofa e wooko taanga, meke nownow a peleikiwooko e du aini 240 kondee. Wi e paati buku aini moo enke wan dunsu tongo tu.

14. San ala sama abi fu du nownow?

¹⁴ Aini den lasiti dei wi e libi nownow, neen meke ala sama abi fu teke wan se. Den mu luku efu den o holibaka gi a Kownukondee fu Gadu, efuso den tiiman fu a goontapu ya. Winsi fa a foluku fu Yehofa e holi den weiti fu lanti, toku den nai mumui anga politiki (Rom. 13:1-7). Bika den sabi taki na a Kownukondee fu Gadu wawan poi puu den booko-ede fu libisama. A Kownukondee fu Gadu a ná fu a goontapu ya.​—Yoh. 18:36, 37.

15. Enke fa Openbaring e soi, da san a foluku fu Yehofa o abi fu du aini den lasiti dei?

¹⁵ A Beibel buku Openbaring e soi taki aini den lasiti dei, a omen sani o miti a foluku fu Yehofa pe den o abi fu soi taki na a se fu Yehofa den de tuutuu. Den tiiman fu a goontapu o wani dwengi ala sama fu du san den wani. Den o go e du ogii anga den sama di nai holibaka gi den (Openb. 13:12, 15). Beibel taki den ‘o dwengi ala sama, pikinwan anga gaanwan, guduman anga pootiman, saafu anga sama di fii, fu poti wan maiki a den leti-ana efuso a den fesi-ede’ (Openb. 13:16). Den sama di be e abi saafu a fositen, be e poti wan boon maiki gi den saafu fu soi taki a den abi den. A letiso den sama aini a ten ya o wani ala sama du sani fu soi sama den e holibaka gi. A o de leti enke den sama ya e poti wan maiki a den fesi-ede efuso den ana.

16. Saide a nownow u mu meke moiti fu wi anga Yehofa toon bun mati?

¹⁶ Yu o meke den tiiman fu a goontapu ya poti a maiki gi i? A libi ná o makiliki gi den sama di ná o abi a maiki fu den. A Beibel buku Openbaring e taki: ‘Nawan sama o poi bai efuso seli sani efu a ná abi a maiki ya’ (Openb. 13:17). Ma a foluku fu Gadu sabi san Openbaring 14:9 taki o pasa anga den sama di abi a maiki. Neen meke pe fu den teke a maiki fu den tiiman, a o de leti enke den sikiifi a den ana taki ‘mi a fu Yehofa’ (Yes. 44:5). A nownow kaba u mu meke moiti fu wi anga Yehofa toon bun mati, da te a dei de o doo Yehofa o si wi enke wan fu den sama fi en.

17. San u mu holi a pakisei te a abi fu du anga a pasensi fu Yehofa?

¹⁷ Ná pikin pasensi Yehofa e pasensi anga libisama aini den lasiti dei ya, bika a á wani nawan sama dede (2 Peit. 3:9). Ai gi ala sama a okasi fu den dini en, fu den sa tan a libi. Ma Yehofa ná o holi pasensi anga sama naamo. Na aseefi sani di be miti Farao o miti den sama di á wani teke a okasi di Yehofa gi den. Aini a ten fu Mosesi Yehofa be taigi Farao taki: ‘Mi be sa langa mi ana naki yu anga a foluku fi yu anga wan takuu siki di be sa kii ala u. Ma mi wani soi yu a kaakiti fu mi, mi wani meke mi nen paati a hii goontapu tu, neen meke mi meke i tan a libi’ (Ek. 9:15, 16). Fosi Yehofa poli a goontapu ya, ala sama o sabi taki a Yehofa na a tuu Gadu (Eseik. 38:23). Fa a sani ya o pasa?

18. (a) San a seke di sikiifi a Hakai 2:6, 20-22 wani taki? (b) Fa u du sabi taki a polofeititoli ya mu kon tuu ete?

 ¹⁸ Omen ondoo yali baka di Hakai dede, apostel Pawlesi sikiifi wan biifi di be e soi taki a sani di Hakai be taki aini Hakai 2:6, 20-22, be mu kon tuu ete aini a ten di e kon. (Leisi en.) A be taki: ‘Ma now a paamisi taki: “Mi o seke goontapu ete wan leisi, mi o seke hemel tu.’ Den wowtu ‘ete wan leisi’ e soi taki Gadu o seke den sani di poi seke puu, da a soso sani di á poi seke o fika”’ (Heb 12:26, 27). Ma a seke di a tekisi ya e taki fi en, a ná aseefi enke a wan di be sikiifi a Hakai 2:7. Di Yehofa o seke goontapu a leisi ya, da a o kii ala den sama di e taangayesi en fu teego, leti enke fa a be du anga Farao.

19. San ná o seke? Fa u du sabi a sani ya?

¹⁹ San ná o seke efuso poli? Pawlesi be taki: ‘Now di u sabi taki wi o fende wan Kownukondee di á poi seke, da meke u du ala san u poi fu Gadu tan soi bun-ati gi u. Na a sani de o meke u tan du santa wooko gi Gadu a wan fasi di a fende bun anga ala lesipeki’ (Heb. 12:28). Baka di Gadu o seke a goontapu wan lasiti leisi, na a Kownukondee fi en wawan o taampu gingin. Nawan sani o poi puu en neen peesi!​—Ps. 110:5, 6; Dan. 2:44.

20. San ala sama mu du nownow? Fa u sa yeepi den?

²⁰ Ten á de fu lasi. A nownow sama mu luku sowtu se den o teke. Den mu luku efu den o tan libi enke fa a goontapu ya wani da den dede bakaten, efuso den o dini Yehofa da den fende a teego libi (Heb. 12:25). Te wi e peleiki fayafaya, wi e yeepi sama fu teke a bun se. Neen meke u mu du ala san u poi fu yeepi omen sama di u man fu teke a se fu a Kownukondee fu Gadu. U mu holi den sani di Yesesi be taki a pakisei tu. A be taki: ‘A bun nyunsu fu a Kownukondee fu Gadu mu paati na a hii goontapu fu ala sama yee. Baka dati a kaba o kon.’​—Mat. 24:14.