1. Fa son sama e fii te den puu wan sama di den lobi na a kemeente?

DEN puu wan sama di i lobi na a kemeente kaba? A sani de a wan hati sani. Wan sisa den e kai Hilda * taki: ‘Mi anga a man fu mi be toow 41 yali. Di a dede, ná pikin hati a sani de hati mi. Mi be si enke a dati na a moo gaan sani di be sa miti mi. Ma di a boi fu mi gwe fika a kemeente, en uman anga den pikin fi en, a sani ya hati mi moo di a man fu mi be dede.’

2-3. Enke Psalm 78:40, 41 e soi, da fa Yehofa e fii te wan sama gwe fika en?

² Pakisei fa Yehofa be e fii di son wan fu den engel di be de aini a osufamii fi en daai baka gi en (Yud. 6). Pakisei fa a be e fii di den Islayelisama, a foluku fi en di a be lobi be e taangayesi en ibii toon baka. (Leisi Psalm 78:40, 41.) Ai hati Yehofa te wan sama di i lobi daai baka gi en. Ai fusutan fa yu e fii. Holi a pakisei taki Yehofa o holibaka gi i, a o yeepi i fu go doo.

³ Aini a artikel ya wi o luku san u sa du te wan sama di u lobi nai dini Yehofa moo. Wi o luku tu fa u sa yeepi den baala anga sisa aini a kemeente di a sani ya miti. Ma wi o luku fosi san wi á mu du te den puu wan sama aini a kemeente.

4. Fa omen mma anga dda e fii te wan pikin fu den gwe fika Yehofa?

⁴ Te wan pikin gwe fika Yehofa, son mma anga dda e akisi denseefi efu den du ala san den poi fu be yeepi a pikin fu tan a waaleiti. Baka di den puu wan boi fu wan baala den e kai Luke na a kemeente, a baala ya taki: ‘Mi be e gi miseefi a fowtu. Mi be e si enke a mi du meke a boi fu mi gwe fika Yehofa, mi á be e poi siibi a neti. Ala yuu mi be e pakisei a sani ya. Mi be e kusumi te da mi be e kee.’ Na aseefi  sani ya be miti wan sisa den e kai Elizabeth. A taki: ‘Mi be e pakisei son leisi taki kande a mi á kiya a boi fu mi bun. Mi be e fii enke mi á du ala san mi be mu du fu yeepi en fu tan dini Yehofa.’

5. Sama a fowtu de te wan sama nai dini Yehofa moo?

⁵ Yehofa gi ibiiwan fu wi a okasi fu luku san u wani du anga u libi. Dati wani taki na ala sama seefi mu luku efu a o dini Yehofa, efuso efu a ná o dini en. A omen yonkuuwan ná abi mma anga dda di de a waaleiti, ma tokuso den e dini Yehofa anga den hii ati. Yu abi taa yonkuuwan di kiya a waaleiti, ma bakaten den e gwe fika Yehofa te den kon moo bigi. A wan sama seefi mu luku efu a wani dini Yehofa (Yow. 24:15). Neen meke efi yu a wan mma efuso dda, neen a pikin fi i nai dini Yehofa moo, yu á mu fii enke a yu a fowtu komoto.

6. Fa son yonkuuwan e fii te den mma efuso dda gwe fika Yehofa?

⁶ Son yuu a den mma anga den dda e gwe fika Yehofa anga den famii fu den (Ps. 27:10). Te a sani ya pasa, ai hebi gi den pikin, bika na a mma anga dda den be e luku fu soi den fa fu du sani anga koni. Wan sisa den e kai Esther di dda gwe fika Yehofa taki: ‘Son yuu mi be e kee bika mi be e si kiin taki a ná sani be miti nda, a wani a á be wani dini Yehofa moo. Mi lobi nda, neen meke di den puu en na a kemeente, mi be e booko mi ede anga en ala yuu. Son yuu mi be e booko mi ede te da a be e toon wan sowtu siki gi mi.’

7. Fa Yehofa e si den yonkuuwan di mma efuso dda komoto a waaleiti?

⁷ Yonkuuwan, efi i mma efuso dda gwe fika Yehofa, wi e kee pina anga i. Yehofa seefi sabi fa yu e fii, ai booko en ede anga i, a lobi i, ai teke en fu bigi taki yu e tan dini en. Den taa baala anga sisa aini a olikanisâsi e si a moiti di yu e meke tu fu tan dini Yehofa. Gaantangi holi a pakisei taki a ná yu du meke i mma efuso dda gwe fika Yehofa. A denseefi teke a bosoloiti de. Beibel taki ala sama di dopu baka di den paamisi Yehofa taki den o libi enke fa a wani, o abi fu gi faantiwowtu a Yehofa fu den sani di den e du.​—Gal. 6:5.

8. San i sa du te wan sama fi i gwe fika Yehofa? (Luku a faki ‘ Daai kon a Yehofa baka.’)

⁸ Te wan sama di i lobi gwe fika Yehofa, na ala yuu yu e howpu taki a sa kon baka. Ma san i sa du a pisiten di yu e wakiti fu a sama fi i daai kon a Yehofa baka? Meke moiti taanga i biibi. Te i biibi taanga, taa sama sa waka ai baka. Kande te a sama di gwe fika Yehofa si fa yu e du sani enke fa Yehofa wani, a sani de sa meke a daai kon baka. Efi i biibi taanga yu o poi holidoo winsi fa ai taanga gi i. Meke u luku wantu sani di i sa du fu taanga i biibi.

9. Fa Yehofa e taanga u? (Luku a faki ‘ Wantu tekisi di o toosutu yu efu wan sama fi i gwe fika Yehofa’.)

⁹ Meke moiti taanga i biibi. Du san i poi fu yeepi den taa famii fi i tu. Fa i sa du a sani ya? Efi yu e leisi Beibel ala dei, e go a  komakandaa ala yuu, i biibi o moo taanga. Joanna dda anga en sisa gwe fika Yehofa. A taki: ‘Te mi e leisi den toli fu sama enke Abigayeli, Ester, Yopu, Yowsefu, anga Yesesi mi e fii bun. A fasi fa den holidoo e yeepi mi fu mi á kusumi tumisi. Mi e fii bun tu te mi e aliki den singi di e kon na a Broadcasting.

10. San Psalm 32:6-8 taki u mu du te sani e moo wi?

¹⁰ Taigi Yehofa fa yu e fii. Solanga i bigin pakisei sani di e meke i fii booko-saka, begi Yehofa da i taigi en fa yu e fii. Akisi en fu a yeepi i fu si sani enke fa ai si sani, bika a paamisi u taki ‘a o gi u koni fu sabi fa u mu du sani’. (Leisi Psalm 32:6-8.) A ná ala yuu a makiliki fu taigi Yehofa pilisisi san de a yu ati. Ma Yehofa e fusutan fa yu e fii. Ai si a pen di de a yu ati. A di a lobi i meke a wani i puu ala den ibi fi i fika gi en.​—Ek. 34:6; Ps. 62:7, 8.

11. Enke fa Hebrewsama 12:11 e soi, da saide u mu lesipeki a fasi fa Yehofa seeka sani fu kuutu wan sama di du wan gaan sondu? (Luku a faki ‘ A puu di Yehofa e puu son sama na a kemeente a wan fasi fa ai soi taki a lobi u.’)

¹¹ Holibaka gi a bosoloiti di den baala teke te den puu wan sama aini a kemeente. A Yehofa seefi wani sani waka so aini a kemeente. A fu a bun fu a kemeente meke Yehofa seeka sani na a fasi ya. A sete ya e yeepi a sama di du a gaan sondu fu bigin du sani baka enke fa Yehofa wani. (Leisi Hebrewsama 12:11.) Den sama di e kuutu a bosoloiti di den baala teke fu puu wan sama aini a kemeente, ná o taigi i finifini fa sani waka. Son yuu denseefi á sabi ala san pasa seefi. Fu di wi á poi sabi pilisisi fa sani waka, meke u mu lesipeki a bosoloiti di den baala teke, bika a den Yehofa poti fu kuutu den sowtu toli ya.​—2 Kolon. 19:6.

12. Sowtu wini son sama fende di den du sani enke fa Yehofa wani?

 ¹² Te yu e lesipeki a bosoloiti di den owluman teke fu puu wan sama aini a kemeente, da a so yu e yeepi a sama fi i fu daai kon baka. Elizabeth di u be taki fi en kaba taki: ‘A á be makiliki seefiseefi gi mi fu mi á taki anga a boi fu mi di a komoto a waaleiti. Ma baka di a daai kon baka a taki a fusutan saide den baala be abi fu puu en aini a kemeente. A fasi fa sani waka di den puu a boi fu mi aini a kemeente yeepi mi fu moo lesipeki den sete fu Yehofa.’ Mark, a man fu Elisabeth taki: ‘Baka di den teke a boi fu u baka, a taigi mi taki a sani di yeepi en fu daai kon baka, a di mi anga en mma holi useefi a den weiti fu Yehofa. Mi e gi Yehofa daa taki a yeepi u fu holi useefi.’

13. San sa yeepi i te yu e fii booko-saka?

¹³ Taki anga mati di e fusutan i. I mu e paa anga baala anga sisa di biibi taanga, da den o yeepi i fi yu á gi abaa (Odo 12:25; 17:17). Joanna, di u be taki fi en kaba taki: ‘Aini mi ati, mi be e fii enke a mi wawan de, ma te mi be e taki anga mati di e fusutan mi, da mi be e kisi miseefi baka.’ Ma son leisi a den baala anga sisa aini a kemeente e taki hati sani di e meke i moo fii booko-saka. San i mu du te a sani ya e pasa?

14. Saide u mu e ‘gi taawan paadon anga u hii ati te den du wan hati sani anga u’?

¹⁴ I mu abi boo anga den baala anga sisa fi i. Den a sondu libisama, neen meke son leisi kande son wan fu den o taki sani di hati i (Yak. 3:2). Son leisi a ná taki den be wani taki sani fu hati i, ma na a sondu e meke den nai sabi san fu taki ala yuu. Neen meke te den sani ya e pasa, holi a sani di Pawlesi be taki a pakisei. A be taki: ‘U mu abi boo anga taawan. U mu e gi taawan paadon anga u hii ati te den du wan hati sani anga u’ (Kol. 3:13). Wan sisa di a sani ya miti taki: ‘Yehofa yeepi mi fu gi den baala anga sisa paadon di taki sani di hati mi baka di wan sama fu mi komoto a waaleiti. Mi be e holi a pakisei taki a yeepi den be wani yeepi mi, winsi fa den á du en na a fasi.’ Fa a kemeente sa yeepi den famii fu wan sama di gwe fika Yehofa?

15. Fa u sa yeepi den famii fu wan sama di gwe fika Yehofa?

¹⁵ Libi switi anga den famii fu den sama di gwe fika Yehofa. Wan sisa den e kai Miriam taki a be e feele fu go a komakandaa baka di den puu a baala fi en aini a kemeente. A taki: ‘Mi be e booko mi ede anga san sama be o taki. Ma di mi go a komakandaa, den baala anga sisa taki switi anga mi te. Den tyali anga mi sondee fu kuutu a baala fu mi. A fasi fa den libi anga mi meke mi á be e fii enke a mi wawan de moo.’ Wan taa sisa taki: ‘Baka di a boi fu u gwe fika Yehofa, wantu mati kon toosutu u. Taawan taigi u taki den á sabi san fu taki, ma toku den be kon. Den kee anga u.  Taawan sende biifi gi u. Ná pikin taanga-sikin den mati ya gi u.’

16. Sowtu fasi a kemeente sa holibaka gi den famii fu a sama di gwe fika Yehofa?

¹⁶ Tan poti pakisei a den famii di e dini Yehofa ete. Den abi mati fanowdu fu man pasa den taanga ten ya (Heb. 10:24, 25). Son leisi den famii fu a sama di gwe fika Yehofa e si taki son baala anga sisa nai taki anga den moo. Den e libi anga den enke denseefi gwe fika Yehofa. Luku bun fi yu á meke i baala efuso sisa fii so noiti. I mu e poti pakisei a den yonkuuwan di mma efuso dda komoto a waaleiti. I mu e gafa den fu a moiti di den e meke. Baka di a man fu Maria gwe fika Yehofa, a towe en uman anga ala den pikin tu. Maria taki: ‘Mi abi mati aini a kemeente di be e kon a mi osu kon boli gi u. Den be e yeepi mi anga a Osufamii Anbegi tu. Den be e fusutan fa mi e fii, te mi be e kee den be e kee anga mi. Te sama be e lei gi mi, den be e opo taki gi mi. A den mati ya yeepi mi fu piisii baka.’​—Rom. 12:13, 15.

17. Fa owluman sa toosutu den sama di booko-saka?

¹⁷ Owluman mu e du ala san den poi fu toosutu den famii fu a sama di gwe fika Yehofa (1 Tes. 5:14). Meke ten fu e taki anga den fosi a komakandaa efuso baka a komakandaa. E go luku den a osu, begi anga den, wooko anga den aini a peleikiwooko, efuso kai den fu kon a yu Osufamii Anbegi. Owluman mu e soi den sikapu fu Yehofa di e fii booko-saka taki den e booko den ede anga den, den mu e meke ten gi den. A so den e soi taki den lobi den.​—1 Tes. 2:7, 8.

18. Enke fa 2 Peitilisi 3:9 e soi, da san Yehofa wani den sama di gwe fika en du?

¹⁸ Yehofa ‘á wani nawan sama dede. A wani ala sama fende a okasi fu tapu anga den sondu fu den’ fu den sa fende a  teego libi di a paamisi u. (Leisi 2 Peitilisi 3:9.) Winsi wan sama du wan gaan sondu di meke den puu en na a kemeente, toku Yehofa lobi en ete. Ná feegete taki Yehofa meke en Manpikin kon dede gi sondu libisama fu di a lobi u. Yehofa e langa wan ana gi den sama ya fu den sa daai kon neen baka. A ageisitoli di Yesesi be gi fu a lasi manpikin e soi taki Yehofa wani u daai kon neen baka (Luk. 15:11-32). A omen sama di be gwe fika Yehofa daai kon dini en baka. Di den kon baka, a kemeente bali wadaa gi den. Ná pikin poolo Elizabeth poolo di a boi fi en daai kon dini Yehofa baka. A taki: ‘Mi e gi ala den sama daa, di be e gi mi taanga-sikin fu mi á gi abaa.’

19. Saide u sa fitoow Yehofa ala yuu?

¹⁹ U sa fitoow Yehofa ala yuu. Noiti a o meke u du sani di e tyai takuu bakapisi gi u. Yehofa a wan Dda di lobi u, ai fii gi u, a wani sani waka bun anga ala u (Heb. 13:5, 6). Mark taki: ‘Noiti Yehofa gwe fika u. Te sani e moo i, ala yuu a o yeepi i. A o gi yu a kaakiti fi en di bigi moo san libisama poi fusutan fu yeepi i fu holidoo’ (2 Kor. 4:7). Eeye, i poi tan dini Yehofa anga piisii winsi wan sama di i lobi komoto a waaleiti.