1. Enke fa Maleyaki 3:16 e soi, da sowtu buku Yehofa e sikiifi? San de aini a buku ya?

 YEHOFA e sikiifi wan pelensipali buku omen dunsu yali kaba. A omen sama di holidoo nen de aini a buku ya. A fosi sama nen di de aini a Abel b. Neen na a fosi kotoigi (Luk. 11:50, 51). A omen miliyun sama nen de aini a buku ya nownow, bika senten a ten de neen Yehofa e sikiifi sama nen aini. Beibel e kai a buku ya ‘a buku fu libi’.​—Leisi Maleyaki 3:16; Openb. 3:5; 17:8.

2. Sama nen de aini a buku fu libi? San u mu du efu u wani u nen sikiifi aini a buku ya?

² A omen sama nen sikiifi aini a buku fu libi. Den sama ya a sama di e dini Yehofa anga den hii ati. Den lobi a nen fi en tu. A den sama ya o fende a teego libi. Efu we meke moiti fu toon Yehofa mati, u nen sa sikiifi aini a buku ya tu. A dede fi en Manpikin, Yesesi Kelestesi, opo a pasi gi u fu u nen sa sikiifi aini a buku ya (Yoh. 3:16, 36). Winsi wi abi a howpu fu libi a hemel efuso a goontapu, ala u wani u nen sikiifi aini a buku fu libi.

3-4. (a) Efu u nen sikiifi aini a buku fu libi nownow, a sani ya wani taki wo fende teego libi? (b) San wo luku aini a artikel ya anga a taawan di e kon?

 ³ A sani ya wani taki ala den sama di nen de aini a buku fu libi o fende teego libi? Efu u wani sabi a piki fu a akisi ya, u mu luku a sani di Yehofa be taigi Mosesi a Ekisodesi 32:33. Yehofa be taigi en taki: ‘Ala den sama di nai aliki mi, mi o sibi den nen puu aini mi buku.’ A sani ya e soi taki den nen di sikiifi aini a buku ya, sa sibi puu baka. A leti enke anga potolowtu Yehofa e sikiifi sama nen aini a buku ya (Openb. 3:5). Neen meke u mu meke moiti fu u nen á komoto aini a buku fu libi, te enke Yehofa sikiifi en anga enki.

⁴ Ma kande we akisi useefi taki: ‘San Beibel e taki fu den sama di nen sikiifi aini a buku fu libi anga den sama di nen á sikiifi aini? On ten den sama di nen sikiifi aini a buku fu libi o fende teego libi? San o pasa anga den sama di á be sabi Yehofa fosi den dede? Den sama ya nen sa kon aini a buku fu libi ete?’ Wo luku den piki fu den akisi ya aini a artikel ya, anga a taawan di e kon.

SAMA NEN SIKIIFI AINI A BUKU FU LIBI?

5-6. (a) Enke fa Filipisama 4:3 e soi, da sama nen sikiifi aini a buku fu libi? (b) On ten den nen o kon aini a buku ya fu teego?

⁵ Sama nen sikiifi aini a buku fu libi? Fu man piki a akisi ya, wo poti pakisei a feifi kulu sama. Son wan fu den sama ya nen sikiifi aini a buku fu libi, ma son wan fu den nen á de aini.

⁶ A fosi kulu, a den sama di Yehofa teke fu go tii makandaa anga Yesesi a hemel. Den nen sikiifi aini a buku fu libi nownow? Eeye. Den sani di apostel  Pawlesi be taigi den baala anga sisa fu Filipi, e soi taki den salufuwan nen de aini a buku fu libi nownow. (Leisi Filipisama 4:3.) Ma efu den wani fende teego libi tuutuu, den mu meke moiti fu den á gwe fika Yehofa. Te den o kisi a lasiti maiki fosi den dede, efuso fosi a gaan banowtu bigin, den nen o sikiifi aini a buku fu libi fu teego.​—Openb. 7:3.

7. Enke fa Openbaring 7:16, 17 e soi, da on ten den taa sikapu nen o sikiifi aini a buku fu libi fu teego?

⁷ Du fu tu kulu sama, na a gaan kulu efuso den taa sikapu. Den sama ya nen de aini a buku fu libi nownow? Eeye. Baka Alimakedon seefi den nen o de aini a buku fu libi ete (Openb. 7:14). Yesesi be taki den sama ya di de enke sikapu ‘o libi fu teego’ (Mat. 25:46). Ma den sama di pasa Alimakedon libilibi naw fende teego libi wantenwanten. Den nen sa sibi puu aini a buku ya ete. Aini a Dunsu Yali Tii, Yesesi o tyai den go ‘a peti di abi wataa di e gi sama libi’. A den sama di o aliki Yesesi na a ten de, nen o sikiifi aini a buku fu libi fu teego.​—Leisi Openbaring 7:16, 17.

8. Sama nen á de aini a buku fu libi? San o pasa anga den sama ya?

⁸ Du fu dii kulu, a den sama di de enke kaabita, efuso den sama di o dede na a feti fu Alimakedon. Den sama ya nen á de aini a buku fu libi. Yesesi be taki den sama ya ‘o dede fu teego’ (Mat. 25:46). Pawlesi sikiifi anga yeepi fu a santa yeye taki ‘a sitaafu fu den sama ya a teego poli’ (2 Tes. 1:9; 2 Peit. 2:9). Na aseefi sani ya o pasa anga den sama di sondu teige a santa yeye. Den sama ya seefi o kisi poli fu teego, den naw fende teego libi. A sani ya e soi taki Yehofa naw weki den baka (Mat. 12:32; Malik. 3:28, 29; Heb. 6:4-6). Now wo poti pakisei a tu kulu sama di o weki baka fu libi a goontapu ya.

DEN SAMA DI O WEKI BAKA

9. Enke fa Toli fu den apostel 24:15 e soi, da sowtu tu kulu sama o weki baka? Saide den tu kulu ya a ná aseefi?

⁹ Beibel e taki fu tu kulu sama di o weki baka fu libi a goontapu ya. Den sama ‘di be libi a wan letifasi, anga den sama di á be libi a wan letifasi’. (Leisi Toli 24:15.) ‘Den sama di be libi a wan letifasi’, a den sama di be dini Yehofa anga den hii ati di den be de a libi. Ma ‘den sama di á be libi a wan letifasi’, a den sama di á be e dini Yehofa. Den be e du omen sani di Yehofa á lobi. Ma na ala den tu kulu sama ya nen sikiifi aini a buku fu libi? Fu man piki a akisi ya, wo taki fu iniiwan fu den kulu ya.

10. Saide den sama di be libi a wan letifasi o weki baka? Sowtu gaandi son wan fu den o fende? (Luku a artikel di den e kai ‘Sani di leisiman akisi’ aini A Wakititolen ya.)

¹⁰ Du fu fo kulu sama, a ‘den sama di be libi a wan letifasi’. Fosi den sama ya dede, den nen be de aini a buku fu libi kaba. Yehofa e sibi den nen puu aini a buku te den dede? Nono, bika aini Yehofa pakisei ‘den de a libi ete’. Yehofa a ‘ná wan Gadu fu dedesama, ma en a wan Gadu fu libisama’ (Luk. 20:38). A sani ya wani taki te den leti-ati sama o weki baka, den nen o de aini a buku fu libi. Ma dati á wani taki den o fende teego libi wantenwanten. A leti enke  den nen sikiifi anga potolowtu. A sa sibi puu baka (Luk. 14:14). Son wan fu den sama ya o fende a gaandi fu de enke ‘tiiman fu hii goontapu’.​—Ps. 45:16.

11. San ‘den sama di á be libi a wan letifasi’ mu du efu den wani den nen sikiifi aini a buku fu libi?

¹¹ Du fu feifi kulu sama, a ‘den sama di á be libi a wan letifasi’. Fu di den sama ya á be sabi Yehofa, meke den á be e du sani enke fa a wani fosi den dede. Neen meke den sama ya nen á de aini a buku fu libi. Ma te den o weki baka, den o fende a okasi fu Gadu poti den nen aini a buku ya. Den sama ya o abi yeepi fanowdu, bika a omen ogii son wan fu den du fosi den dede. Neen meke den o abi sama fanowdu fu leli den libi enke fa Yehofa wani. Fu man du a sani ya, a Kownukondee fu Gadu o seeka sani fu leli sama a hii goontapu.

12. (a) Sama o leli den sama di á be libi a wan letifasi fu du sani enke fa Yehofa wani? (b) San o pasa anga den sama di naw wani wooko anga den sani den o leli?

¹² Sama o leli den sama di á be libi a wan letifasi fu du sani enke fa Yehofa wani? A den sama di de aini a gaan kulu, anga den leti-ati sama di o weki baka o leli den sama ya. Efu den sama di á be libi a wan letifasi wani den nen sikiifi aini a buku fu libi, den mu meke moiti fu den anga Yehofa toon mati. Den mu paamisi en taki den o libi enke fa a wani tu. Yesesi anga ala den sama di o tii makandaa anga en, o luku fa den sama ya o tyai denseefi baka te den yee a bun nyunsu (Openb. 20:4). Ala den sama di naw wani du sani enke fa Yehofa wani o dede, winsi a 100 yali den abi (Yes. 65:20). Yehofa anga Yesesi poi si san de aini wan sama ati, neen meke den naw gi nawan sama a  okasi fu du ogii aini a nyun goontapu.​—Yes. 11:9; 60:18; 65:25; Yoh. 2:25.

DEN SAMA DI O WEKI BAKA FU FENDE LIBI, ANGA DEN SAMA DI O WEKI BAKA FU FENDE KUUTU

13-14. (a) Faw be e fusutan a sani di Yesesi taki a Yohanisi 5:29 fosi? (b) Fa we fusutan a tekisi ya nownow?

¹³ Yesesi be taki fu den sama di o weki baka fu libi a goontapu ya tu. Wan leisi a be taki: ‘Wan ten o kon di ala den sama di de aini den geebi o yee en siten, da den o kon a doo. Den sama di be libi a wan letifasi, o weki baka fu libi. Den sama di be du ogii o weki baka fu fende kuutu’ (Yoh. 5:28, 29). San Yesesi be wani taki anga a sani ya?

¹⁴ Yesesi taki fu tu kulu sama. Den sama di be libi a wan letifasi, anga sama di be du ogii. Fosi te u be leisi a tekisi ya, u be e si enke son sama di be o weki baka be o du bun sani, da taawan be o du ogii aini a nyun goontapu. Ma Yesesi á taki den sama di o weki baka o du bun efuso ogii. U kon fusutan taki a den sani di den sama be du fosi den dede Yesesi be e taki. Bika a taki den sama ‘di be libi a wan letifasi, anga den sama di be du ogii’. A sani ya a tuu, bika sama naw fende a okasi fu du ogii aini a nyun goontapu. Ma saide Yesesi taki ‘sama o weki baka fu fende libi efuso kuutu’?

15. Sama o weki baka ‘fu fende libi’? Saide den o weki baka?

¹⁵ Den sama di libi a wan letifasi ‘o weki baka fu fende libi’, bika den nen sikiifi aini a buku fu libi kaba. Den sama di libi a wan letifasi di kai a Yohanisi 5:29, anga den wan di kai a Toli fu den apostel 24:15 na aseefi kulu sama. A sani ya e kai anga a sani di sikiifi a Romesama 6:7. Ai taki: ‘A sama di dede, pai fi en sondu kaba.’ Yehofa e gi sama di be libi a wan letifasi paadon fu den sondu fu den te den dede. A nai feegete den bun sani di den be du tu (Heb. 6:10). Ma efu den wani den nen tan aini a buku fu libi, den mu tan meke moiti fu libi enke fa Yehofa wani te den o weki baka.

16. San Yesesi be wani taki di a taki son sama ‘o weki baka fu fende kuutu’?

¹⁶ San o pasa anga den sama di be e du ogii fosi den dede? Yehofa e gi den sama ya paadon fu den sondu tu te den dede. Ma den sama ya á be e dini Yehofa fosi den dede, neen meke den nen á de aini a buku fu libi. A sani ya e soi taki den sama ‘di be du ogii’ di kai a Yohanisi 5:29, anga ‘den sama di á be libi a wan letifasi’ di kai a Toli fu den apostel 24:15 na aseefi kulu sama. Den sama ya o weki baka ‘fu fende kuutu’. c A sani ya wani taki Yesesi o luku fa den o tyai denseefi te den weki baka (Luk. 22:30). Aw teke ten fu sabi efu den sama ya nen sa kon aini a buku fu libi. Efu den sama ya wani den nen sikiifi aini a buku fu libi, den mu tapu anga den sani di den be e du fosi den dede, da den paamisi Yehofa taki den o libi enke fa a wani.

17-18. San ala den sama di o weki baka mu du? Enke fa Openbaring 20:12, 13 e soi, da san a kuutu di Yesesi o kuutu den sama di o weki baka wani taki?

 ¹⁷ Ala sama mu wooko anga den sani di sikiifi aini den nyun bukulolo di wo fende na a ten fu a Dunsu Yali Tii. Apostel Yohanisi be taki: ‘Mi si den dedesama, den bigiman anga den pootiman, e taampu na a kownusutuu fesi. Bukulolo be e opo. Ma wan taa bukulolo be e opo tu. A wan ya na a buku fu libi. Den be e kuutu den dedesama gi den sani di den du.’​—Openb. 20:12, 13.

¹⁸ Saide Yesesi o kuutu den sama di o weki baka? A fu den sani di den be du fosi den dede aw kuutu den? Nono. Holi a pakisei taki di den dede, den pai fu den sondu di den be du a ten di den be de a libi. Neen meke Yesesi naw kuutu den fu den sani de moo. Ma a den sani di den o du baka te den kisi leli aw luku. Den sama enke Nowa, Samuweli, anga David seefi o abi fu leli sani fu Yesesi Kelestesi. Denseefi mu soi taki den e biibi taki a dede fu Yesesi o tyai wini gi den. Efu den man ya seefi o abi fu leli den sani ya, da pakisei den somen sani di den sama di be e du ogii o abi fu leli.

19. San o pasa anga den sama di naw wani du san den leli?

¹⁹ San o pasa anga den sama di naw wani du san den leli? Openbaring 20:15 e taki: ‘A fiingi ala den sama di nen á de aini a buku fu libi go aini a se di e boon anga faya.’ Den sama ya o dede fu teego. Neen meke u mu meke moiti fu u nen sikiifi aini a buku fu libi. Wa mu du sani di o meke Yehofa sibi u nen puu aini a buku ya.

20. Sowtu wooko wo du na a ten fu a Dunsu Yali Tii? (Luku a fowtow a fesise fu A Wakititolen.)

²⁰ A ten fu a Dunsu Yali Tii o simpan. Na a ten de, wo du wan gaan wooko fu leli sama a hii goontapu. Boiti dati, Yesesi o luku fa den sama di o weki baka o tyai denseefi (Yes. 26:9; Toli 17:31). Fa wo leli sama aini a nyun goontapu? Wo taki fu a toli ya aini a taa artikel.