Luku fa Beibel e piki den akisi ya.

Toli fu den apostel 24:15 e soi taki ‘Gadu o weki den dedesama baka, den sama di be libi a wan letifasi anga den sama di á be libi a wan letifasi’. Den sama di libi a wan letifasi, a den sama di be e dini Yehofa fosi den dede. Den sama ya nen sikiifi aini a buku fu libi (Male. 3:16). Den sama di á be libi a wan letifasi, a den sama di á be fende a okasi fu leli sabi Yehofa fosi den dede. Den nen fu den sama ya á sikiifi aini a buku fu libi.

A fu den sama ya Yohanisi 5:28, 29 e taki tu. Yesesi be taki ‘den sama di libi a wan letifasi,’ o weki baka ‘fu libi’. A taki tu taki ‘den sama di du ogii, o weki baka fu fende kuutu’. Den sama di be libi a wan letifasi be e tyai denseefi bun fosi den dede. Den o weki baka fu fende libi, bika den nen sikiifi aini a buku fu libi. Ma den sama di á be e libi a wan letifasi, be e du ogii fosi den dede. Den o weki baka fu fende kuutu. Te den sama ya o weki, den nen naw sikiifi aini a buku fu libi ete. Den mu kisi kuutu fosi. Dati wani taki den o fende a okasi fu leli sabi Yehofa. Efu den libi enke fa Yehofa wani, da den nen o sikiifi aini a buku fu libi.

Openbaring 20:12, 13 e soi taki ala den sama di o weki baka mu wooko anga ‘den sani di sikiifi aini den bukulolo’. Den bukulolo ya, a den nyun weiti di Gadu o gi wi aini a nyun goontapu. Yehofa o kii ala den sama di naw wooko anga den weiti ya.​—Yes. 65:20.

Daniyeli 12:2 e soi san o pasa anga den sama di o weki baka. Ai soi taki son sama di dede o weki baka fu ‘teke sen anga fu toon wan sani di sama e buuse fu teego’. Na a kaba fu a dunsu yali son sama o fende teego libi, ma taawan o dede fu teego.​—Openb. 20:15; 21:3, 4.

Meke u luku wan ageisitoli. U sa maiki den tu kulu sama di o weki baka, anga sama di wani go tan aini wan taa kondee. Den sama di be libi a wan letifasi, de enke den sama di fende pampila fu wooko efuso fu tan langa aini wan taa kondee. Den sama di abi a pampila ya, poi du omen sani di den sama fu a kondee seefi poi du. Ma den sama di á be libi a wan letifasi di o weki baka, de enke sama di fende pampila fu tan wan satu pisiten namo aini wan taa kondee. Den tu kulu sama ya mu holi den weiti fu a kondee, efu den wani fende pampila fu tan fu ala ten aini a kondee. A so a de tu anga den sama di á be libi a wan letifasi. Te den o weki baka den o abi fu holi den weiti fu Yehofa efu den wani tan aini a paladeisi. Winsi wan sama fende pampila fu tan langa aini wan taa kondee efuso fu tan wan satu pisiten namo, na a fasi fa aw tyai enseefi o soi efu aw fende pampila fu tan fu ala ten aini a kondee. Efu a nai holi den weiti fu a kondee, lanti o puu en aini a kondee. A so a de tu anga den sama di o weki baka. Efu den wani tan aini a paladeisi, den mu soi taki den e aliki Yehofa. Den mu e tyai denseefi bun tu.

Yehofa naabi tyali-ati namo, ma ai du sani a wan letifasi tu (Deit. 32:4; Ps. 33:5). Fu di Yehofa lobi sama, meke aw weki sama di be libi a wan letifasi anga sama di á be libi a wan letifasi. Ma a naw fika den sama di e taangayesi en fu tan aini a paladeisi. A den sama di lobi en, di e holi den weiti fi en wawan o tan libi aini a nyun goontapu.