Pawlesi be taki a 1 Korentesama 15:8 taki: ‘Te fu kaba, a meke miseefi si en, enke mi a wan pikin di meke fosi en yuu doo.’ Pawlesi be si wan fisyun di e soi fa Yesesi de enke Kownu a hemel. Fosi, u be e denki taki a den sani di a be si aini a fisyun ya a be e taki. A be de enke a fende a gaandi fu meke fosi en yuu doo, dati wani taki a leti enke a be kisi opobaka fu go a hemel winsi fa sama á be e go a hemel ete. A baka omen ondoo yali fosi sama be bigin weki baka fu go a hemel. Ma di u luku a tekisi moo bun, u kon si taki a de fanowdu fu kengi a fasi faw be e fusutan en.

Di Pawlesi taki a meke fosi en yuu doo, a den sani di pasa di a toon wan Kelesten a be e taki. Ma sa a be abi a pakisei di a taki a be ‘meke fosi en yuu doo’? Kande a be abi wan fu den sani ya a pakisei:

A toon wan Kelesten wanboowanboo. A sani de seke en tuutuu. Te wan pikin meke fosi a yuu fi en doo, a omen sama e dyombo te den yee a sani de, bika den á be denki a be o meke so fuuku. Di Sawlesi be de a pasi e go a Damaskus fu du ogii anga den Kelesten, aa be sabi taki a be o si wan fisyun fu Yesesi. (Bakaten sama kon sabi Sawlesi enke Pawlesi.) Aa be sabi taki a be o toon wan Kelesten. Den Kelesten fu a ten de á be denki a sani de seefiseefi, bika a omen ogii Pawlesi be e du anga den. Ná pikin dyombo Pawlesi dyombo di a kisi a fisyun ya. A sani ya meke a be beendi wan pisiten tu.​—Toli fu den apostel 9:1-9, 17-19.

A toon wan Kelesten a wan yuu di sama á be denki. Di Pawlesi toon wan Kelesten, Yesesi be go a hemel kaba. Aini den taa vers, Pawlesi e taki fu wantu sama di be si Yesesi fosi a go a hemel, ma enseefi á be fende a okasi fu si en (1 Kor. 15:4-8). Di Yesesi taki anga Pawlesi, a fende a okasi fu si Yesesi, baka di a kisi wan opobaka, winsi fa a be gei enke a na a bun yuu a si en.

Aa be wani gafa di a be e taki fi enseefi. Son Beibel ondoosukuman taki, kande Pawlesi be e kuutu enseefi aini den vers ya. Efu a so, da a sani ya e soi taki Pawlesi be e fii enke aa be bun sai fu fende a gaandi fu toon wan apostel. A be taki: ‘Mi na a moo pikinwan fu ala den apostel. A á fiti fu den kai mi apostel, bika mi be e du ogii anga a kemeente fu Gadu. Ma a di Gadu soi mi bun-ati meke mi de enke fa mi de nownow.’​—1 Kor. 15:9, 10.

Te u luku den sani ya, da san Pawlesi be wani soi di a taki a meke fosi en yuu doo? Kande a be e taki fu a fasi fa Yesesi taki anga en wanboowanboo a wan yuu di aa be denki. A kan tu taki a be wani soi taki a toon wan Kelesten a wan ten di aa be denki. Efuso kande a be wani soi taki aa be bun sai fu kisi a moin fisyun ya. Ma san u sabi, a taki a be e bigi gi Pawlesi taki a fende a gaandi ya. A be si kiin taki Yesesi be weki baka tuu. Neen meke Pawlesi be lobi gi sama a toli ya te a be e peleiki fu a opobaka fu Yesesi.​—Toli fu den apostel 22:6-11; 26:13-18.