Mi meke aini a yali 1934. Nda anga mma a be fu Switzerland. Den be foloisi go a Timmins wan foto aini Kanada. A pisiten fu 1939, mma be bigin e leisi den Wakititolen fu den Yehofa Kotoigi. Neen a bigin go a den komakandaa. A be e tyai mi anga den baala anga sisa fu mi go tu. Satu bakadati, a toon wan Yehofa Kotoigi.

Nda á be lobi en di mma toon wan Kotoigi. Ma mma be lobi a waaleiti, neen meke nawan sama be poi tapu en fu dini Yehofa. A be e tan du a sani ya tu, winsi fa den be tapu a wooko fu Yehofa Kotoigi na a pisiten fu 1940 a Kanada. Winsi fa nda be e taigi mma hati sani, tokuso mma be e taki switi anga en, a be e lesipeki en tu. A sani ya yeepi mi anga den sigisi baala anga sisa fu mi fu dini Yehofa tu. Bakaten nda be bigin libi switi anga u. A sani ya be meke we fii bun.

Aini augustus 1950, mi be go a wan konkelesi aini a foto New York. Na ape, mi be miti baala anga sisa di be komoto na ala se fu goontapu. Mi be yee ondoofenitoli tu fu baala anga sisa di be go na a Gileyad sikoo. Den sani ya be moo gi mi taanga-sikin fu bigin anga a fuuten-diniwooko! Faisi mi doo osu, neen mi poti mi nen fu toon wan kowownu pionili. Ma a beikantoo fu Kanada sende piki mi taki mi mu dopu fosi. Neen meke mi dopu a 1 oktober 1950. Baka wan mun, mi toon wan kowownu pionili, neen den sende mi go a Kapuskasing. A foto ya á be de koosube fu pe mi be e tan.

Aini 1951, a beikantoo be akisi baala anga sisa di be e taki Faansi, efu den be wani foloisi go a Kibek a pe sama be e taki Faansitongo. Den be abi peleikiman  fanowdu ape. Mi be e taki Ingiisi anga Faansi, neen meke mi go di den kai mi fu go a Rouyn. Mia be sabi sama ape. A wan kodo sani di mi be sabi, na a osu di mi be mu go enke fa mi be taki kaba na a bigin fu a toli. Ma sani be waka bun. Mi anga Marcel toon bun mati. Mi be e piisii di mi be e wooko a Kibek. Na a kaba fu den fo yali di mi be de ape, mi toon wan spesuutu pionili.

Di mi be de a Kibek, den baala kai mi fu go na a du fu 26 kalasi fu a Gileyad sikoo a Lansing a New York. Baka di mi kaba a Gileyad sikoo a 12 februari 1956, neen den sende mi go a Gaana, b a West Afiikan. Fosi mi be go a Gaana, mi be mu daai go a Kanada baka fu go seeka wantu pampila sani fu mi. Mi be denki taki a tu efuso dii wiki namo a be o teke fu seeka den.

A seibin mun langa mi wakiti a Toronto fosi mi fende den pampila ya. Di mi be de a Toronto, mi be e tan anga famii Cripps, na ape mi kon sabi a umanpikin fu den di den e kai Sheila. Mi be lobi en, a be lobi mi tu. A pisiten di mi e denki fu akisi en fu toow anga mi, neen den pampila fu mi kon. Mi anga Sheila begi fu a toli, neen u taki a be o moo bun fu mi go fosi a pe den baala sende mi go. Ma u be o tan e sikiifi biifi gi useefi fu luku on ten u be o fende a okasi fu toow. A sani ya a be makiliki, ma bakaten u kon si taki na a moo bun sani u du.

A wan mun langa a teke fosi mi doo a Accra a Gaana. Mi be mu teke loko, sipi anga opalani fu doo ape. Di mi go ape, den be poti mi enke distrikt owluman. Mi be mu go a omen peesi a Gaana anga taa peesi enke Ivory Coast (nownow den e kai en Côte d’Ivoir) anga Togoland (Nownow den e kai en Togo). Gaanse leisi mi be e go anga wan wagi fu Betel. Mi be lobi fa mi be e go luku den baala anga sisa.

 Te sataa anga sonde mi be e go a den kelen komakandaa. Wa be abi peesi pe u be e holi den komakandaa ya. Neen meke den baala be e meke tasi osu fu a san á be boon wi. Fu di wa be abi sani enke eisikasi meke den baala be e tyai libilibi meti kon ape. Den be e salakiti den te a be de fanowdu fu den boli den.

Son leisi sani be e pasa a den komakandaa ya di be e meke we lafu. Wan leisi di Herb Jennings c wan Zendeling baala be e holi wan lezing, wan mankaw losi komoto a pe den be tei en. A be bigin lon na a peesi neen a baala be tapu anga a lezing fosi. A kaw á be fusutan sai pasa. Ma fo taanga baala kon kisi en tyai gwe, neen den sama di be de ape naki ana gi den.

Te mindii wiki mi be e soi a felon di den e kai The New World Society in Action (Fa a olikanisâsi fu Yehofa e du sani) a den kampu di be de koosube. Mi be e meke den luku a felon ya a wan weti pisi koosi di den be e fasi a tu ponsu efuso tu bon. Den sama be e lobi en. Gi son wan fu den a fosi toon aini den libi den be si wan felon. Den be e naki ana te den be e si sama e dopu aini a felon. A sani ya be e yeepi den fu si taki wi a wan olikanisâsi di de a hii goontapu.

Baka di mi go na Afiikan wan sani fu tu yali so, neen mi be go a wan gaan konkelesi a New York. Mi be piisii taki mi be man go. A be switi gi mi tu taki mi be miti Sheila baka. A be de enke spesuutu pionili a Kibek. U be e sikiifi biifi gi u seefi. Ma di u miti baka mi akisi en fu a toow anga mi, neen a taki eeye. Mi sikiifi wan biifi gi Baala Knorr, d neen mi akisi en efu a be sa meke Sheila go na a Gileyad sikoo, da a kon a mi na Afiikan dise. Neen baala Knorr taki, abun. Sheila kon a Gaana neen u toow a Accra a 3 oktober 1959. U si fa Yehofa belesi u di u poti a wooko fi en a fesi.

Aini 1961 den be sende u go a Kamerun. Den baala be akisi mi fu yeepi sete wan nyun beikantoo ape, neen meke mi be abi tyaipi sani e du. Fu di mi be mu yeepi seeka  a wooko a Kamerun, meke a omen sani mi be mu leli ete. Ma aini 1965 Sheila be kon de anga bee. Aa be makiliki gi u te u be pakisei taki u be abi fu kweki wan pikin. Ma di u be bigin teke gwenti fu a sani ya, u be bigin seeka sani fu go baka a Kanada, neen Sheila lasi a bee.

Di Sheila lasi a bee, a dataa taigi u taki a be wan boi. A 50 yali kaba di a sani ya pasa, ma tokuso wa poi feegete en. Winsi fa a sani ya be hati u, tokuso u tan dini Yehofa a Kamerun, bika u be lobi a wooko di den baala be gi u ape.

Aini Kamerun, den baala be lobi miti anga tesi fu di den á be e mumui anga politiki. Sani be moo taanga gi den, moomoo na a yuu di den be mu sitemu poti wan peleisidenti. U be e si enke den be o tapu a wooko fu Yehofa Kotoigi. A sani de pasa tuu na a 13 mei 1970. A wan sani fu feifi mun di u foloisi go tan na a nyun Betel osu, neen lanti teke a Betel osu. Aa doo wan wiki, neen den puu ala den zendeling aini a kondee, mi anga Sheila tu. A be taanga gi u fu gwe fika den baala anga sisa. Fu di u be lobi den meke u be e booko wi ede anga den, bika wa be sabi san be o pasa anga den.

A sigisi mun langa u be de na a beikantoo fu Faansikondee. Di mi be de ape, mi be e meke moiti fu yeepi den baala anga sisa fu Kamerun. Aini december fu a yali de, den be sende u go na a beikantoo fu Nigeliya. A den be bigin e luku fa a wooko e go a Kamerun. Den baala anga sisa fu Nigeliya be libi bun anga u di u be go ape. A omen yali u wooko de anga piisii.

Aini 1973 u be mu du wan sani di be taanga gi u. Sheila be e siki wan pisiten kaba. Ma di u be de a wan konkelesi a New York, a bigin kee neen a taigi mi taki: ‘Mia poi moo! Mi weli, bika a wan hii pisiten mi e siki kaba.’ A 14 yali langa mi anga en wooko makandaa a West Afiikan. Mi be piisii taki a be du ala san a be poi gi Yehofa, ma u be abi fu kengi son sani now. Baka di u taki fu a toli ya, u begi fi en, neen u taki wo daai go baka a Kanada, bika a be o fende den yeepi di a be abi fanowdu ape a dataa. A gwe di u be mu gwe fika a zendeling wooko di u be e du, a be wan fu den moo taanga sani di u be mu du aini u libi.

Di u daai go a Kanada, mi bigin wooko anga wan mati fu mi di be e seli wagi aini wan foto na a noordse fu Toronto. U be yuu wan osu, neen u bai wantu gaandi sani di u be abi fanowdu poti aini. A sani ya be yeepi u fu wa poti useefi a paiman. Wa be wani libi bigi, bika te u be o fende a okasi, u be wani du a fuuten-diniwooko baka. Aa be langa fosi u fende a okasi ya.

Te sataa mi be e yeepi anga a bow fu wan gaan komakandaa peesi a Norval, wan foto a Ontario. Bakaten den be akisi mi fu luku a gaan komakandaa peesi. Sani be e go moo  bun anga a gusontu fu Sheila, u be si tu taki a be o poi du a wooko ya. Neen meke u foloisi go tan na a gaan komakandaa peesi a yuni 1974. U be e piisii fu du a fuuten-diniwooko baka!

U be e piisii taki sani be e go moo bun anga Sheila. Tu yali bakadati, u be man bigin anga a kelen wooko. U be e du a kelen wooko a Manitoba, wan peesi a Kanada. Ná pikin koo a peesi de be e koo. Winsi fa a peesi be e koo, tokuso den baala anga sisa be e libi bun anga u. U kon si taki a ná pe we dini Yehofa pelensipali, ma a tan u mu tan dini en.

Baka wantu yali di u du a kelen wooko, den kai u aini 1978 fu wooko na a Betel a Kanada. Aa langa bakadati neen wan hati sani miti mi. Di a sani ya miti mi, mi leli wan pelensipali sani. Mi be mu holi wan lezing fu wan anga afu yuu langa aini Faansi a wan spesuutu komakandaa a Montreal. A tyali taki gaanse fu den sama be e dyonko di mi be e holi a lezing. Neen meke a baala fu a Diniwooko Kantoo be kon taki anga mi fu a sani ya. A sani ya á be mu foondoo mi, bika mia ná wan sama di be e holi gaan moin lezing. Tokuso mia be fende en bun di a be taki anga mi fu a toli ya. Wa be taki bun anga useefi, mi ati be boon, bika aa be gafa mi fu den sani di mi be du bun. A soso den sani di mia be du bun a be taki anga mi fu den. Mi be meke wan fowtu, bika mi be kuutu a baala di be taki anga mi, anga a fasi fa a be taki anga mi.

Baka wantu dei, wan baala fu a Beikantoo Komte taki anga mi fu a toli. Mi be soi en taki a be e hati mi fu a fasi fa mi be tyai miseefi. Mia be taki bun anga a baala. Bakadati mi be go taki anga a baala di mi ati be boon neen. Neen a gi mi paadon. A sani ya yeepi mi fu si on pelensipali a de fu abi sakafasi. Mi naw feegete a sani ya noiti moo (Odo 16:18). A omen leisi mi begi Yehofa fu a toli ya. Fanafu a ten de, mi be taigi miseefi taki solanga taawan e poti mi a pasi, mio aliki.

A 40 yali kaba di mi e wooko na a Betel a Kanada. Fanafu a yali 1985 neen den poti mi enke wan fu den baala fu a Beikantoo Komte. Aini februari 2021, Sheila lasi libi. Boiti taki mi be e angii fu Sheila, mi e sikisiki den pisiten ya tu. Ma mi nai ‘poti pakisei seefi a den dei di e pasa gwe’ bika a wooko fu Yehofa e puu mi pakisei a den sani ya (Peleik. 5:20). Winsi fa omen tesi miti mi, tokuso den sani di pasa aini mi libi di e meke mi e piisii, ipi moo den tesi ya. Fu di mi be e poti a wooko fu Yehofa a fesi, meke den 70 yali di mi du a fuuten-diniwooko be de den moo piisii ten aini mi libi. Mi e begi fu den yonkuu baala anga sisa tan poti Yehofa a fesi aini den libi, bika mi sabi taki a soso te den e dini Yehofa den o piisii, sani o waka bun aini den libi.