1-2. (a) Fa sani be de aini Yudeya a ten di Pawlesi be sikiifi a biifi gi den Hebrew Kelesten? (b) Saide meke den be abi a biifi ya fanowdu?

 DEN Hebrew Kelesten di be e tan aini Yelusalem anga Yudeya be miti anga sani den yali baka di Yesesi dede. Bunbun tesi be miti den satu baka di a Kelesten kemeente sete (Toli 8:1). Twenti yali bakadati, sani be kon moo taanga gi den, bika wan angiiten be kon di be meke sama e pina (Toli 11:27-30). Tokuso, a pisiten fu a yali 61, i sa taki den Kelesten á be e miti anga bunbun tesi, tei teke en gei anga san be o miti den bakaten. A pisiten de, Yehofa be meke apostel Pawlesi sikiifi wan biifi gi den. Den sani di a be sikiifi aini a biifi, a pilisisi san den be abi fanowdu fu yeepi den gi den tesi di be o miti den.

² Na a bun yuu Pawlesi be sikiifi a biifi gi den Hebrew Kelesten, bika aa langa bakadati fosi tesi bigin miti den. Ma den sani di Pawlesi be sikiifi be o yeepi den fu holidoo. Aa be o teke langa moo fu Yelusalem be poli enke fa Yesesi be taigi den a fesi (Luk. 21:20). Pawlesi anga den Kelesten aini Yudeya á be sabi on ten Yelusalem be o poli. Tokuso, den Kelesten be sa koboloiki a ten ya fu taanga den biibi, fu den be sa man holidoo.​—Heb. 10:25; 12:1, 2.

3. Saide meke Kelesten aini a ten ya mu poti pakisei na a buku Hebrewsama?

³ Wan gaan banowtu o miti wi aini a ten di e kon di  bigi moo san be miti den Hebrew Kelesten (Mat. 24:21; Openb. 16:14, 16). Kow luku san a wantu fu den sani di Yehofa be meke Pawlesi taigi den Kelesten ya fu yeepi den anga di o yeepi wi aini a ten ya tu.

‘U MU DU ALA SAW MAN FU TAANGA U BIIBI’

4. Sowtu tesi be miti den Dyu di be toon Kelesten? (Luku a fowtow.)

⁴ A omen sani den Dyu di be toon Kelesten be mu kengi. A sani ya á be makiliki gi den. Fosi, den Dyu a be a foluku di Yehofa be teke. Yelusalem a be a peesi pe den kownu di be e teke peesi gi Yehofa be e tii. Na ape den sama di be wani dini Yehofa be mu go tu fu dini en. Ala den Dyu di be e dini Gadu anga den hii ati be e wooko anga san a Weiti fu Mosesi be e taki anga san den keliki fesiman fu den be e taigi den. I be abi weiti di be e soi san den be sa nyan anga san den á be mu nyan. I be abi weiti tu di be e taki fu besnei anga weiti di be e soi fa den mu libi anga sama di á be de Dyu. Ma baka di Yesesi dede, Yehofa á be e teke ofaandi moo di sama be e tyai na a tempel. A sani ya be de enke wan tesi gi den Dyu Kelesten di be e wooko anga a Weiti fosi (Heb. 10:1, 4, 10). Gi den sama enke apostel Peitilisi seefi di biibi be taanga, a sani ya be taanga gi (Toli 10:9-14; Gal. 2:11-14). Fu di son Dyu be toon Kelesten, meke den Dyu keliki fesiman be e du ogii anga den.

5. Sowtu sani den Kelesten be mu luku bun anga en?

⁵ Tu kulu sama be de enke tesi gi den Kelesten aini Yudeya. A fosi kulu a den Dyu keliki fesiman. Den be e libi anga den Kelesten enke sama di be daai baka gi a Dyu biibi. Du fu tu kulu, a be wantu Kelesten aini a kemeente di be e taki den be mu holi denseefi a den weiti fu Mosesi ete. Den be e taki a sani ya fu di den á  be wani sama du ogii anga den (Gal. 6:12). Saw yeepi tuu Kelesten fu tan dini Yehofa?

6. San Pawlesi be gi den baala anga sisa taanga-sikin fu du? (Hebrewsama 5:14–6:1)

⁶ Aini a biifi di Pawlesi be sikiifi gi den Hebrew Kelesten, a be gi den baala anga sisa fi en taanga-sikin fu leisi a Wowtu fu Gadu da den denki dipi fu san den leisi. (Leisi Hebrewsama 5:14–6:1.) Pawlesi be koboloiki den Hebrew buku fu soi den Kelesten taki a fasi fa den be e dini Yehofa be bun moo a fasi fa den Dyu be e dini en. a Pawlesi be sabi taki efu den Kelesten be meke moiti fu fusutan den leli fu Beibel moo bun, den be o man daai baka gi sama di be wani leli den falisi sani.

7. Sowtu tesi e miti wi aini a ten ya?

⁷ Aini a ten ya, we miti anga sama di e paati nyunsu efuso fasi fu denki di nai kai anga den leli fu Yehofa. Son sama e kuutu Yehofa Kotoigi bika den e meke moiti fu holi denseefi na a weiti fu Beibel di e taki fu man anga uman libi. Den taki wi abi ogii-ati tu. Dei fu dei a fasi fa sama e denki nai kai moo anga a fasi fa Yehofa e si sani (Odo 17:15). U mu meke moiti fu taanga u biibi fu u sa sabi san a den falisi leli di sama wani koboloiki fu swaki a biibi fu u. Wa mu meke nawan sama meke u lasi ati fu wa dini Yehofa moo.​—Heb. 13:9.

8. Saw mu du fu toon gaansama aini a biibi?

⁸ Pawlesi be taigi den Hebrew Kelesten fu meke moiti fu toon gaansama aini a biibi. Na aseefi sani u mu du aini a ten ya tu. Efu u wani du a sani ya, daw mu sutudeli Beibel fu kon sabi Yehofa moo bun anga a fasi fa ai denki. Winsi u dopu seefi, toku u mu tan du a sani ya. A naabi toobi on langa u de a waaleiti, tokuso u mu tan leisi anga sutudeli Beibel ala dei (Ps. 1:2). Pawlesi be taigi den Hebrew Kelesten taki den be mu meke moiti fu taanga den biibi. Efu we sutudeli Beibel ala dei, wo man taanga u biibi tu.​—Heb. 11:1, 6.

‘WI A SAMA DI E BIIBI, BIKA A DATI O MEKE U TAN A LIBI’

9. Saide meke den Hebrew Kelesten be mu meke moiti fu taanga den biibi?

⁹ Den Hebrew Kelesten be mu meke moiti fu den biibi kon moo taanga, bika a sani ya be o yeepi den fu tan a libi te Yudeya be o poli (Heb. 10:37-39). Yesesi be taigi den bakaman fi en taki den be mu lowe te den be si suudati lontu Yelusalem. A sani di a be taigi den be e teli gi den Kelesten di be e tan aini a foto anga den wan di be e tan a doose fu a foto (Luk. 21:20-24). Gaanse leisi te suudati be e kon feti anga wan foto, da den sama di be de a doose fu a foto be e go aini a foto fu go kibii. Neen meke efu den be mu lowe go a den mongo enke fa Yesesi be taki, pe fu den tan aini a foto, da den be mu e biibi tuutuu fu man du a sani ya.

10. San den Kelesten be o du efu den biibi be taanga? (Hebrewsama 13:17)

¹⁰ Den Hebrew Kelesten be mu fitoow den sama di Yesesi be poti fu teke fesi aini a kemeente. A kan taki den baala di be e teke fesi aini den kemeente be soi den baala anga sisa kiin on ten den be mu lowe anga fa den be mu du en. (Leisi  Hebrewsama 13:17.) Apostel Pawlesi be taigi den baala anga sisa taki den ‘mu e aliki den sama di e teke fesi’. A sani ya á be wani taki den be mu aliki den owluman fu di den musu fu aliki den, ma a fu di den be e fitoow den. Den Hebrew Kelesten be mu meke moiti fu fitoow den owluman fu den be sa wooko anga san den e taigi den. Den be mu du a sani ya fosi a gaan banowtu fu Yelusalem be doo. Efu den Kelesten be gwenti aliki den owluman, a be o moo makiliki gi den fu aliki den te polobelema be de tu.

11. Saide u mu meke moiti fu taanga u biibi aini a ten ya?

¹¹ Leti enke den Hebrew Kelesten, useefi abi biibi fanowdu tu. Aini a ten ya, omen sama nai biibi taki a goontapu ya o kon a wan kaba. Den e wisiwasi u tu fu di we biibi a sani ya (2 Peit. 3:3, 4). Winsi fa Beibel e taki fu son sani di o pasa na a ten fu a gaan banowtu, tokuso a omen sani fu a gaan banowtu de ete di wa sabi. Ma u mu biibi taki a kaba fu a goontapu ya o doo na a yuu di Yehofa poti. Aw yeepi u tu na a ten de.​—Hab. 2:3.

12. Saw yeepi u fu pasa a gaan banowtu?

¹² U mu biibi taki Yehofa e koboloiki a ‘koni saafu di u sa fitoow’ fu soi u faw mu du sani aini a ten ya (Mat. 24:45). Leti enke fa den baala fu fositen be soi den Hebrew Kelesten san den be mu du di den Rome suudati be lontu Yelusalem, a so den baala di e teke fesi aini a ten ya, o soi u faw mu du sani fu u sa tan a libi di a gaan banowtu o doo. Neen meke a nownow kaba u mu meke moiti fu fitoow den baala di e teke fesi aini a olikanisâsi fu Yehofa. Efu a nownow kaba ai taanga gi u fu du san den baala e taki, aw taanga gi u fu aliki den tu te a gaan banowtu o doo.

13. Saide meke a sani di Pawlesi be taigi den Hebrew Kelesten a Hebrewsama 13:5 be de fanowdu?

¹³ A pisiten di den Hebrew Kelesten be e wakiti a maiki di Yesesi be taki fi en, den be mu soi taki a fasi fa den e libi, e ‘soi taki den á lobi moni’. (Leisi Hebrewsama 13:5.) Son wan fu den be mu pasa angiiten, taawan be e pina (Heb. 10:32-34). Winsi fa na a bigin den be de kabakaba fu pina fu a bun nyunsu ede, tokuso bakaten son wan fu den be e suku fu meke moo moni fu kibii denseefi fu ogii á miti den anga fu den á pina. Ma moni á be o poi kibii den te Yelusalem be o poli (Yak. 5:3). A moo a be o moo taanga gi den Kelesten di be lobi moni fu lowe gwe fika den osu anga den gudu fu den.

14. Fa a biibi fu u o yeepi u fu si gudu aini a ten ya?

¹⁴ U naw si moni efuso gudu enke a moo pelensipali sani, efu we biibi taki dyonson Yehofa o poli a goontapu ya. A towe den ‘sama o towe den solufu fu den a sitaati’ a ten de, bika den o si taki a ‘solufu anga a gowtu fu den naw poi yeepi den na a dei di Yehofa ati o boon’ (Eseik. 7:19). Pe fuu feti fu meke moo moni, a be o moo bun fu yeepi wi osufamii fu dini Yehofa anga fu yeepi den anga den sani di den abi fanowdu. Aa be o de wan koni sani fu meke paiman di á de fanowdu, efuso e koboloiki omen ten fu poti pakisei a den gudu di wi abi. U mu luku bun taki den gudu fu u á toon den moo pelensipali sani aini u libi (Mat. 6:19, 24). U mu luku efu a Yehofa wo fitoow efuso den gudu fu u, o moo a kaba fu a goontapu ya e doo.

 ‘U MU HOLIDOO’

15. Saide a be de taanga fanowdu fu den Hebrew Kelesten holidoo?

¹⁵ Den Hebrew Kelesten be mu tan dini Yehofa anga den hii ati, bika sani be o kon moo ogii (Heb. 10:36). Winsi fa omen tesi be miti den Hebrew Kelesten, tokuso na a ten di sani á be e go bun, omen fu den be bigin dini Yehofa. Pawlesi be membee den taki moo tesi be o miti den. Leti enke Yesesi, den be mu de kabakaba fu holidoo te enke den dede (Heb. 12:4). Omen fu den Dyu ati be e boon a den sama di be e toon Kelesten, den be e du ogii anga den tu. Wantu yali fosi Pawlesi be sikiifi a buku gi den Hebrewsama, wan kulu sama be wani du ogii anga en di a be e peleiki aini Yelusalem. Moo enke 40 Dyu be ‘sweli taki efu den nyan efuso diingi fosi den kii Pawlesi, ogii mu miti den’ (Toli 22:22; 23:12-14). Winsi fa sama be o go e buuse den Kelesten efuso du ogii anga den, tokuso den be mu e meke moiti fu taanga den biibi, fu kon a makandaa fu dini Yehofa anga fu peleiki.

16. Fa a biifi di Pawlesi be sikiifi gi den Hebrew Kelesten o yeepi u fu si den tesi di e miti u? (Hebrewsama 12:7)

¹⁶ San be o yeepi den Hebrew Kelesten fu holidoo te tesi be e miti den? Pawlesi be wani yeepi den fu si sowtu wini den o fende te den holidoo. A be soi den taki a fika di Gadu be e fika tesi fu miti den, be sa yeepi den fu toon wan moo bun Kelesten. (Leisi Hebrewsama 12:7.) A sani ya be o yeepi den fu abi manii di o meke Yehofa piisii. A be o moo makiliki gi den fu holidoo tu, te den be e pakisei sowtu wini den o fende te den e holidoo.​—Heb. 12:11.

17. San Pawlesi leli di a holidoo di tesi be e miti en?

¹⁷ Pawlesi be gi den Hebrew Kelesten taanga-sikin fu holidoo te tesi be e miti  den. Pawlesi a be a moo bun sama di be sa gi den a taanga-sikin ya. Fu di enseefi be e du ogii anga den Kelesten fosi, meke a sabi san be e miti den. A omen tesi be miti en tu baka di a be toon wan Kelesten, neen meke a be sabi fa a be mu gi den taanga-sikin (2 Kor. 11:23-25). Pawlesi be sabi san den be abi fanowdu fu holidoo. A be membee den Kelesten taki te tesi e miti den, den be mu fitoow Yehofa. Pawlesi be taki: ‘A Yehofa a mi yeepiman. Mi naw feele.’​—Heb. 13:6.

18. Saw miti ala u aini a ten di e kon, ma faw sa teke seeka a fesi?

¹⁸ Nownow, son wan fu den baala anga sisa fu u di e miti tesi e holidoo. Wan fasi faw sa soi taki u lobi den, a te we begi gi den anga te we yeepi den anga san den abi fanowdu (Heb. 10:33). Beibel e taki ‘sama o du ogii anga ala den sama di e meke moiti fu dini Gadu fayafaya enke bakaman fu Kelestesi Yesesi’ (2 Tim. 3:12). Neen meke ala u mu teke seeka gi den tesi di o miti wi aini a ten di e kon. U mu tan fitoow Yehofa tu. U mu biibi taki aw yeepi u fu holidoo winsi sowtu tesi o miti wi aini a ten di e kon. Di a yuu o doo, aw yeepi den sama di e dini en anga den hii ati.​—2 Tes. 1:7, 8.

19. Saw yeepi u fu teke seeka gi a gaan banowtu? (Luku a fowtow.)

¹⁹ A biifi di Pawlesi be sikiifi gi den Hebrew Kelesten na a ten fu den apostel be yeepi den gi a gaan banowtu di be o miti den. Pawlesi be gi den baala anga sisa taanga-sikin fu sutudeli a Wowtu fu Gadu anga fu meke moiti fu fusutan en moo bun. A sani de be o yeepi den fu taanga den biibi. A be o yeepi den tu fu si san a den falisi leli di sama wani koboloiki fu swaki a biibi fu den. A gi den deki-ati fu taanga den biibi. A sani ya be o yeepi den fu den á daaidaai fu wooko anga san Yesesi anga den baala di be e teke fesi aini a kemeente be e taigi den. Pawlesi yeepi den Kelesten fu den á si den tesi di be e miti den enke ogii. A sani ya be o yeepi den fu holidoo. Den be mu si den tesi enke wan fasi fa Yehofa, den Dda di de a hemel be e yeepi den fu taanga den biibi. Useefi mu wooko anga a sani ya di sikiifi aini Beibel, da wo poi holidoo te na a kaba.​—Heb. 3:14.