1. San Yesus o du aini a ten di e kon?

 WE LIBI aini wan ten pe fuu sani o kengi. Dyonson moo Yesesi o kuutu iniiwan sama a goontapu. Yesesi be soi u san a wantu sani di ‘wo si di o soi taki a kon, efuso taki a kaba fu a goontapu ya koosube’ (Mat. 24:3). Den polofeititoli ya sikiifi aini Mateyesi kapitel 24 anga 25 anga den ageisitoli fu Malikisi kapitel 13 anga Lukasi kapitel 21.

2. San wo luku aini a artikel ya, saide a sani ya o yeepi u?

² Yesesi be taki fu dii ageisitoli di o yeepi u fu seeka gi a ten di e kon. Den de enke wasikoi gi u tu. A fosiwan a du fu den sikapu anga den kaabita. Du fu tu a du fu den koni yonkuu-uman anga den don wan. A lasitiwan a du fu a masaa di be gi den saafu fi en moni fu luku gi en. Ibiiwan fu den ageisitoli ya e yeepi u fusutan fa Yesesi o kuutu wan sama fu a fasi fa ai du sani. Aini a artikel ya, wo taki fu den ageisitoli ya. Wo luku tu saw sa leli fu den. A fosi ageisitoli di wo luku a di fu den sikapu anga den kaabita.

DEN SIKAPU ANGA DEN KAABITA

3. On ten Yesesi o kuutu sama?

³ Yesesi be soi aini a ageisitoli fu den sikapu anga den kaabita taki, na a fasi fa wan sama holibaka gi den salufu baala anga a fasi fa den tyai denseefi di den yee a bun nyunsu, na a fasi de aw kuutu den (Mat. 25:31-46). Na a ten fu a ‘gaan banowtu’ Yesesi o taki sama a sikapu efuso kaabita (Mat. 24:21). Leti enke fa wan sikapuman e paati den sikapu anga den kaabita, a letiso Yesesi o paati den sama di e dini Yehofa anga den hii ati anga den sama di nai dini en.

4. Enke fa Yesaya 11:3, 4 e soi, da saide u sa biibi taki Yesesi o kuutu sama a wan leti fasi? (I sa luku a fowtow a fesise fu A Wakititolen)

 ⁴ Beibel e taki, te Yesesi o kuutu sama gi Yehofa, aw du en a wan letifasi. (Leisi Yesaya 11:3, 4.) Aw luku san den sama e du, san den e pakisei anga san den e taki. Aw luku tu fa den libi anga den salufuwan (Mat. 12:36, 37; 25:40). Yesesi o sabi sama holibaka gi den baala di e tii a wooko. a Wan fu den moo pelensipali fasi fa wan sama sa holibaka gi den baala ya, a te den e peleiki fayafaya. Yesesi o si den sama ya enke ‘sama di e libi enke fa Gadu wani.’ Den ‘o libi fu teego’ a goontapu ya tu (Mat. 25:46; Openb. 7:16, 17). A sani ya a wan belesi tuutuu! Efu wan sama tan dini Yehofa anga en hii ati na a ten fu a gaan banowtu te na a kaba, en nen o sikiifi aini ‘a buku fu libi’.​—Openb. 20:15.

5. Saw sa leli fu a ageisitoli fu den sikapu anga den kaabita? Sama o fende wini fu a ageisitoli ya?

⁵ Dini Yehofa anga i hii ati. A ageisitoli di Yesesi be gi fu den sikapu anga den kaabita e teli gi den sama di o libi fu teego a goontapu ya. Den e soi taki den biibi taanga fu di den e holibaka gi den baala fu Kelestesi aini a peleikiwooko. Den e wooko anga den leli di den baala di e tii a wooko e gi u, bika a Yesesi poti den baala ya fu tii (Mat. 24:45). Den sama di o libi fu teego a hemel mu poti pakisei tu na a wasikoi fu a ageisitoli fu den sikapu anga den kaabita. Saide? Bika Yesesi e poti pakisei na a fasi fa den e taki anga a fasi fa den e du sani. Denseefi mu soi taki den biibi taanga tu. Yesesi be taki fu ete tu ageisitoli pe ai wasikoi den salufu Kelesten. Den ageisitoli ya sikiifi aini Mateyesi kapitel 25. Wo taki now fu a ageisitoli fu den koni yonkuu-uman anga den don wan.

DEN KONI YONKUU-UMAN ANGA DEN DON WAN

6 Fa feifi fu den yonkuu-uman be soi taki den koni? (Mateyesi 25:6-10)

⁶ Aini a ageisitoli fu den yonkuu-uman, Yesesi be taki tin fu den yonkuu-uman be go fu go miti a toowman (Mat. 25:1-4). Ala den be wani go na a fesa fu a toowman. Yesesi be taki feifi fu den yonkuu-uman ya be ‘koni’, ma den taa feifi be ‘don’. Den koni wan be de seekaseeka, den be de na ain tu. Den be de kabakaba fu wakiti a toowman, winsi a be o doo lati. Neen meke den be tyai abeni fu leti faya aini a dunguu. Fu di den á be sabi efu a toowman be o kon fuuku, meke den be tyai moo oli. A sani ya be o yeepi den fu a abeni fu den á dede. (Leisi Mateyesi 25:6-10.) Di a toowman doo den koni yonkuu-uman go anga en na a toowfesa. Leti enke den koni yonkuu-uman ya, a letiso den salufu Kelesten mu de na ain. Den mu soi taki den e dini Yehofa anga den hii ati tu na a ten di Yesesi o kon, da aw tyai den fu go tii anga en aini en Kownukondee a hemel b (Openb. 7:1-3). Saw sa taki fu den feifi don yonkuu-uman?

7. San pasa anga den feifi don yonkuu-uman, saide a sani ya miti den?

⁷ Den feifi yonkuu-uman di be don á be de seekaseeka enke den koni wan di a toowman be doo. A abeni fu den be o kii, den á be tyai oli fu poti aini tu. Di den  yee taki a toowman e kon, den be abi fu go bai oli. Ma den á be doo ete di a toowman kon. A ten de, ‘den uman di be de seekaseeka go anga a toowman na a toowfesa, neen a doo tapu’ (Mat. 25:10). Ma baka di den don yonkuu-uman dai kon baka, den be wani go ainise, ma a toowman taigi den taki: ‘Mia sabi u’ (Mat. 25:11, 12). Den yonkuu-uman ya á be de seekaseeka e wakiti a toowman. San den salufu Kelesten sa leli fu a sani ya?

8-9. San den salufu Kelesten e leli fu a ageisitoli fu den yonkuu-uman? (Luku a fowtow.)

⁸ Soi taki i de seekaseeka. Soi taki i de na ain tu. Yesesi á be wani soi taki a tu kulu salufu Kelesten be o de. Aa be wani soi tu taki wan fu den kulu be o de kabakaba fu wakiti, ma a taa kulu á be o wakiti. Ma a wani a be wani soi san be o pasa anga den salufu Kelesten efu den á be teke seekaseeka fu tan dini Yehofa anga den hii ati te enke a kaba kon. Efu den á holidoo den naw fende a sani di Gadu paamisi den (Yoh. 14:3, 4). A sani ya pelensipali tuutuu. A naabi toobi efu wo gwa hemel efuso libi a goontapu ya, toku ala u mu poti pakisei na a ageisitoli fu den yonkuu-uman ya. Ala u mu de na ain. U mu de seekaseeka tu fu holidoo te enke a goontapu ya kon a wan kaba.​—Mat. 24:13.

⁹ Yesesi be gi a ageistoli fu den yonkuu-uman fu soi taki u mu de seekaseeka, u mu de na ain. Bakadati a be gi a ageisitoli fu den saka moni fu soi taki u mu e wooko taanga.

DEN MONI DI A MASAA BE GI DEN SAAFU

10. Fa den tu saafu be soi taki a masaa fu den be sa fitoow den? (Mateyesi 25:19-23)

¹⁰ Yesesi be gi wan ageisitoli fu wan masaa di be gi dii fu den saafu fi en moni fu luku gi en. A masaa be sa fitoow tu fu den, ma aa be poi fitoow wan fu den  (Mat. 25:14-18). Den tu saafu di be soi taki a masaa be sa fitoow den, be meke moo moni gi en. Fosi a gwe, a be gi den moni fu luku gi en. Den tu saafu ya be wooko anga a moni di a be gi den. Fa sani waka? Di a masaa fu den daai kon baka, den be meke tu toon fu a moni di a be gi den. A masaa fu den be gafa den neen a taigi den taki: ‘Kon poolo anga i masaa.’ (Leisi Mateyesi 25:19-23.) Ma fa fu a taa saafu? San a du anga a moni di a masaa be gi en?

11. San pasa anga a ‘lesi’ saafu? Saide a sani ya pasa anga en?

¹¹ Du fu dii saafu a wan saka moni namo a masaa be gi en, tokuso a be ‘lesi’. A masaa fi en be wani a koboloiki a moni di a gi en ya anga koni. Ma pe fu a du a sani ya, neen a beli a go beli en a ondoo doti. Neen meke di en masaa be kon, na a wan kodo saka moni di a be gi en, a daai gi en baka. A fasi fa a saafu ya be e denki á be bun. Pe fu a begi a masaa paadon taki aa meke moo moni gi en, neen a kuutu ai kuutu en taki a ‘kaakeli’. A masaa á be poolo anga a saafu ya. Boiti dati, a puu a moni neen ana, neen a poti en a doo.​—Mat. 25:24, 26-30.

12. Sama de enke den tu saafu di a masaa be sa fitoow?

¹² Den tu saafu di a masaa be sa fitoow e soi go a den salufu Kelesten. A masaa fu den, Yesesi taigi den taki ‘u kon poolo anga u masaa’. Den salufu Kelesten fende a paiman fu den di den weki baka fu go a hemel (Mat. 25:21, 23; Openb. 20:5b). Ma na a taa se, a fasi fa a lesi saafu be tyai enseefi de enke wan wasikoi gi den salufu Kelesten. Saide u sa taki a sani ya?

13-14. San den salufu Kelesten e leli fu a ageisitoli fu den saka moni? (Luku a fowtow tu.)

¹³ U mu de fayafaya. Aini a ageisitoli fu den saka moni anga du fu den yonkuu-uman, Yesesi á be taki den salufu Kelesten be o kon lesi. Ma a soi san be o pasa efu de á be de fayafaya. Den á be o de moo ‘enke sama di Gadu kai efuso enke  sama di a teke’. Den á be o poi go moo aini a Kownukondee a hemel tu.​—2 Peit. 1:10.

¹⁴ Den ageisitoli di Yesesi be gi fu den yonkuu-uman anga den saka moni di a masaa be gi den saafu fi en, e soi taki den salufu Kelesten mu de seekaseeka, den mu de na ain tu. Boiti dati, den mu de fayafaya. Ma Yesesi be taki fu wan taa sani di mu de enke wan wasikoi gi den salufu Kelesten na a dei di Yehofa ati o boon? Eeye! A sani ya sikiifi a Mateyesi 24:40, 41.

SAMA DEN O ‘TEKE TYAI GWE’?

15-16. Fa Mateyesi 24:40, 41 e yeepi den salufu Kelesten fu si taki den mu de na ain?

¹⁵ Fosi Yesesi be taki fu den dii ageisitoli, a be taki Gadu be o kuutu den salufu Kelesten fu luku sama a be o teke fu go tii a hemel. A be taki fu tu man di be e wooko aini wan goon anga tu uman di be e masi alisi. Enke fa a toli e soi da den tu man be e du aseefi wooko. Den tu uman di be de makandaa be e du aseefi wooko tu. Ma Yesesi be taki Gadu be o ‘teke wan tyai gwe, da a fika a taawan ape.’ (Leisi Mateyesi 24:40, 41.) Neen meke a be taigi den bakaman fi en taki: ‘U mu de na ain ala yuu, bika wa sabi on dei a Masaa fu wo kon’ (Mat. 24:42). Yesesi be koboloiki denseefi wowtu ya tu baka di a gi a ageisitoli fu den yonkuu-uman (Mat. 25:13). Na a aseefi sani, a sani ya wani taki? Eeye. A soso tuutuu salufu Kelesten di e dini Yehofa anga den hii ati, aw ‘teke tyai gwe’ fu go tii aini a Kownukondee a hemel.​—Yoh. 14:3.

¹⁶ U mu de na ain. Iniiwan salufu Kelesten di á de na ain, naw go makandaa anga ‘den sama di Gadu kai’ (Mat. 24:31). Leti enke den salufu Kelesten, a so den taa Kelesten di o libi fu teego a goontapu ya mu de na ain. Den mu tan dini Yehofa anga den hii ati tu.

17. Saide wa mu booko wi ede te Yehofa e salufu wan sama aini a ten ya?

¹⁷ Fu di u sabi Yehofa bun, meke we fitoow ala san ai du. Bika u sabi taki ai du sani a wan letifasi. Neen meke u nai booko wi ede efu Yehofa o salufu sama ete aini a ten ya. c U sabi ete san Yesesi be taki fu den man di be bigin wooko 5 yuu bakadina aini a doloifigoon fu a man di be go suku wookoman a wowoyo (Mat. 20:1-16). Den sama di be bigin wooko mmanten anga den sama di be bigin wooko 5 yuu be fende aseefi moni. Neen meke a naabi toobi on ten Yehofa salufu wan sama, solanga a tan dini Yehofa anga en hii ati, aw fende a okasi fu go libi a hemel.

POTI PAKISEI NA A WASIKOI

18-19. San den ageisitoli ya e leli u?

¹⁸ Saw leli? A ageisitoli fu den sikapu anga den kaabita e soi taki den sama di o libi fu teego a goontapu, mu tan dini Yehofa anga den hii ati nownow kaba, anga a ten fu a gaan banowtu. Na a ten de Yesesi o gi den sama di dini Yehofa anga den hii ati, a okasi fu ‘libi fu teego’.​—Mat. 25:46.

¹⁹ U be luku tu ageisitoli di de enke wasikoi gi den salufu Kelesten. A ageisitoli di Yesesi be gi fu den yonkuu-uman e soi taki a feifi fu den namo be koni. Den be soi taki den de na ain. Den be soi taki den  de seekaseeka tu e wakiti a toowman. Ma den don wan á be de seekaseeka. Neen meke a toowman á be wani den kon na a toowfesa fi en. Leti enke den koni yonkuu-uman, a so useefi mu de seekaseeka e wakiti te enke a kaba fu a goontapu doo. Aini a taa ageisitoli fu Yesesi di a be taki fu den saka moni, a be taki fu den tu saafu di be de fayafaya. Den tu saafu be wooko taanga, neen meke a masaa fu den be poolo anga den. Ma a be poti a lesi saafu a doo. San a toli ya e leli u? U mu wooko taanga gi Yehofa te enke a kaba fu a goontapu ya doo. A lasiti sani di u luku, a taki den salufu Kelesten mu de na ain, efu den wani Yesesi ‘teke den tyai gwe’ fu go tii anga en. Neen meke den e angii fu a yuu doo te Yesesi o tyai den ‘kon makandaa’ fu tii anga en aini hemel. Baka a feti fu Alimakedon, den o de enke a uman fu Yesesi, a Pikin Sikapu na a toowfesa fi en.​—2 Tes. 2:1; Openb. 19:9.

20. San Yehofa o du gi den sama di e aliki den wasikoi fi en?

²⁰ A yuu di Yesesi o kuutu goontapu de koosube, ma u naafu feele. Efu u soi taki wi abi biibi, u lobi ati Dda di de a hemel o gi u ‘a kaakiti di bigi pasa maiki’. A sani ya o yeepi u ‘fu u sa pasa ala den sani ya, . . . anga fu taampu na a Manpikin fu libisama fesi’ (2 Kor. 4:7; Luk. 21:36). Winsi wo go a hemel efuso libi fu teego a goontapu ya, tokuso u sa meke Yehofa piisii te we wooko anga den wasikoi di Yesesi gi aini den ageisitoli fi en. Fu di Yehofa a wan Gadu di abi bun-ati, meke aw ‘sikiifi u nen aini a buku’ fu libi.​—Dan. 12:1; Openb. 3:5.