1-2. Saide we piisii te we gi taawan sani?

 DI YEHOFA be meke libisama, a be meke u fu man piisii te taawan e gi u sani, ma u be o moo piisii te wi gi taawan sani (Toli 20:35). A sani ya wani taki u naw piisii te taawan e gi u sani? Nono Leti enke fa u sabi, da ala wi e piisii te taawan gi u wan kado. Ma wi e moo piisii, te a wi naa sama di e gi taawan sani. A Yehofa meke u fu fii naa fasi ya. Fu saide?

² Fu di Yehofa meke u naa fasi ya, meke u poi piisii. Te u denki luku san u sa du fu meke taawan piisii, da u seefi e piisii tu. A nai foondoo u taki Yehofa meke u naa fasi ya noh?​—Ps. 139:14.

3. Saide meke u sa taki Yehofa a wan ‘koloku Gadu’?

³ Beibel e taigi u kiin taki, te wi e gi taawan sani, a sani ya o meke u piisii. Neen meke a nai foondoo u taki Beibel e kai Yehofa a ‘koloku Gadu’ (1 Tim. 1:11). A Yehofa naa moo bun sama di e gi taawan sani. A leti enke fa apostel Pawlesi be taki: ‘Neen meke u de a libi, neen meke u poi waka, neen meke u de a goontapu’ (Toli 17:28). Boiti dati, ‘Ala bun sani anga ala sani di naabi fowtu’ e komoto fu Yehofa.​—Yak. 1:17.

4. San o yeepi u fu de anga moo piisii?

⁴ Ala u wani piisii fu di we gi taawan sani. Wi o poi du a sani ya moo bun te we waka a Yehofa baka, a sama di lobi fu gi taawan sani (Efe. 5:1). Aini a artikel ya, wo taki fu  wan tu moin fasi fa Yehofa e gi taawan sani. Wo luku tu saw sa du te we fii enke taawan nai teke den sani di we du gi den fu bigi. A sani ya o yeepi u fu de anga piisii te we gi taawan sani, aw yeepi u fu tan abi a manii ya tu.

WAKA A YEHOFA BAKA, A SAMA DI LOBI FU GI TAAWAN SANI

5. San a wantu pelensipali sani di Yehofa gi u?

⁵ San a wan tu fasi fa Yehofa soi taki a lobi fu gi taawan sani? Meke u poti pakisei a wan tu manii. Yehofa e gi u den moo pelensipali sani di wi abi fanowdu. A ná ala yuu Yehofa o gi u omen gudu, ma we gi en daa fu di ai gi u den sani di wi abi fanowdu fu tan a libi. Wan tu fasi fa Yehofa e du den sani ya, a taki ai meke u fende nyanyan, koosi anga wan peesi fu tan (Ps. 4:8; Mat. 6:31-33; 1 Tim. 6:6-8). Yehofa nai gi u den sani yaaso fu di ai fii enke a musu fu du en. Ma fu saide meke Yehofa e du den sani ya gi u?

6. San wi e leli fu Mat. 6:25, 26?

⁶ Fu taki en kiin, Yehofa e gi u den sani di wi abi fanowdu fu di a lobi u. Pakisei san Yesesi be taki aini Mateyesi 6:25, 26 (Leisi en.) Yesesi be e koboloiki ageisitoli fu den sani di Gadu meke. A be taki fu den pikin foo taki: ‘Den nai kibii nyanyan aini magisin’. Baka dati a taki: tokuso, ‘u Dda di de a hemel e gi den sani fu nyan’. Baka dati Yesesi taki: ‘Wa pelensipali moo den foo ya noh?’ San a sani ya e leli u? Ai leli u taki Yehofa e si den sama di e dini en pelensipali moo enke den meti. Neen meke efu Yehofa e booko en ede anga a solugu di a mu solugu den meti, da a naabi misi, aw moo booko en ede anga san wi enke libisama abi fanowdu! A Leti enke wan Dda di lobi en pikin, a letiso Yehofa e solugu wi enke en pikin di a lobi.​—Ps. 145:16; Mat. 6:32.

7. San a wan fasi faw sa gi taawan sani leti enke Yehofa? (Luku a fowtow.)

⁷ Leti enke Yehofa, u sa gi taawan san den abi fanowdu fu di u lobi den. I sabi wan baala efuso sisa di abi nyanyan efuso koosi fanowdu? Yehofa sa koboloiki i fu gi en san a abi fanowdu. U sabi a foluku fu Yehofa enke sama di de kabakaba fu yeepi te siki booko a wan peesi. Na a ten fu a COVID-19 siki, baala anga sisa be e paati den nyanyan, koosi  anga taa sani di den be abi fanowdu anga taa baala anga sisa di á be abi. Taawan be e poti moni seefi fu holibaka gi a wooko di e du a hii goontapu. A sani ya meke u be poi yeepi taawan a hii goontapu di be abi en fanowdu. Den baala anga sisa ya du san a tekisi fu Hebrewsama 13:16 e soi. Ape sikiifi taki: ‘Wi á mu feegete fu e paati san wi abi anga taawan tu. Bika Gadu lobi den sowtu ofaandi ya.

8. A sowtu fasi we fende wini fu a kaakiti fu Yehofa? (Filipisama 2:13)

⁸ Yehofa e gi u kaakiti. Yehofa e piisii fu paati a kaakiti di a abi anga den sama di e dini en. (Leisi Filipisama 2:13.) I be begi wan leisi kaba fu fende kaakiti di wan tesi be miti i? Kande ye begi tu fende kaakiti fu du den sani di i mu du aini a dei. Di i fende piki na a begi fii, da i be musu fii enke a apostel Pawlesi di be taki: ‘Mi poi du ala sani bika na a sama di e gi kaakiti e yeepi mi.’​—Filip. 4:13.

9. Faw sa koboloiki a kaakiti di wi abi leti enke Yehofa? (Luku a fowtow.)

⁹ Winsi fa wi a sondu libisama, tokuso u sa waka a Yehofa baka fu gi taawan kaakiti. Wa poi gi den kaakiti enke Yehofa, ma u sa waka neen baka te we koboloiki a kaakiti di wi abi fu yeepi taawan. Kande u sa yeepi den moo gaandiwan. U sa yeepi wan baala efuso sisa di siki fu kiin en osu, u sa go a wenkii gi den tu. Efu u poi, u sa yeepi kiin efuso seeka sani naa kownukondee zaal. Efu we koboloiki a kaakiti di wi abi fu du den sani ya, wo du bun gi den baala anga sisa fu u.

10. Faw sa gi taawan taanga-sikin anga den sani di we taki?

¹⁰ Ná feegete taki den sani di we taki abi kaakiti. I sabi wan sama di o fende deki-ati efii taigi en taki ye poolo anga en fu a fasi fa ai du sani? I sabi wan sama di abi toosutu fanowdu? Efu a so, saide i nai meke a sama sabi taki yu e booko yu ede anga en? I sa go luku a sama a osu, i sa telefon en, i sa sikiifi wan kaita efuso sende wan app gi en tu. I naafu taki efuso sikiifi omen kofaliki sani. Ma a fasi fa yo taki anga den wowtu di yo koboloiki, sa meke i baala efuso sisa fii bun baka. A sani ya o yeepi en fu holidoo anga biibi.​—Odo 12:25; Efe. 4:29.

11. Fa Yehofa e gi u koni?

¹¹ Yehofa e gi u koni. Apostel Yakowbesi be sikiifi taki: ‘Efu iniiwan fu wi e mankei koni, da meke a tan begi Gadu. Bika Gadu e gi sama sani anga en hii ati. A nai suku fowtu a sama’ (Yak. 1:5). A sani ya  e soi taki Yehofa nai holi a koni di a abi gi en wawan. Ma ai gi taawan en tu. Luku taki Yakowbesi be sikiifi taki, te Yehofa e gi sama koni ‘a nai suku fowtu a den.’ Aa wani u fii wan fasi te we akisi en fu a yeepi u. Fu taki en kiin, ai begi u fu akisi en koni.​—Odo 2:1-6.

12. Sowtu okasi u sa paati a koni di wi abi anga taawan?

¹² Faw sa du a sani ya fu paati a koni di wi abi leti enke Yehofa? (Ps. 32:8) A omen sowtu fasi a foluku fu Yehofa sa paati san den e leli anga taawan. Kande we yeepi den nyun peleikiman fu du a peleikiwooko moo bun. Anga pasensi den owluman e yeepi den dinali anga den baala di dopu kaba, fu den sa du den wooko di den fende moo bun aini a kemeente. Den baala anga sisa di sabi du bow wooko, e yeepi taawan fu du a wooko ya tu gi Yehofa.

13. Faw sa yeepi taawan fu kon moo koni te we leli den sani leti enke Yehofa?

¹³ Puubei fu du sani enke Yehofa te i mu leli taawan wan wooko. Na ala yuu Yehofa e paati a koni di a abi. Neen meke u seefi wani paati a koni di u abi fu leli taawan den sani di u sabi. Te we leli taawan wan sani, u nai luku taki den o sabi a wooko moo wi, da u naw leli den ala sani. Ma we du ala saw poi fu soi den ala saw sabi. Kande wo denki taki: ‘Nawan sama á be leli mi, da mi naw leli taa sama tu.’ A foluku fu Yehofa á mu abi a denki ya. A ná soso den sani di u sabi we leli taawan ‘Ma u be de kabakaba fu dede gi u tu’ (1 Tes. 2:8). We howpu tu taki, den ‘seefi o koni sai fu leli taawan’ (2 Tim. 2:1, 2). Efu we du sani na a fasi yaaso, wo kon moo koni. Wo moo de anga piisii tu.

TE TAAWAN NAI TEKE DEN SANI DI WE DU GI DEN FU BIGI

14. San son sama e du te u du wan sani gi den?

¹⁴ Te wi e gi taawan sani efuso e du sani gi den, moomoo den baala anga sisa fu u, gaanse leisi den e gi u daa. Kande den sende wan biifi gi u, efuso du wan taa sani (Kol. 3:15). Te den e gi u daa a den sowtu fasi ya, we piisii taki u du wan sani gi den.

15. Saw mu holi a pakisei te taawan nai teke den sani di we du gi den fu bigi?

¹⁵ A ná ala yuu taawan e teke den sani di we du gi den fu bigi. Son yuu a gei enke taawan nai booko den ede te we yeepi den. Winsi we gi den u ten efuso u kaakiti tokuso den nai si en fu wan sani. Saw yeepi u fu wa fii booko-saka te den sani ya e pasa? A bun fu pakisei den sani di sikiifi a Toli fu den apostel 20:35. A ná te we gi omen sama sani da dati o meke u fii bun. U sa tan meke moiti fu gi taawan sani, winsi den nai teke san we du gi den fu bigi. Meke u luku wan tu fasi faw sa du a sani ya.

16. Saw yeepi u fu tan gi taawan sani anga piisii?

¹⁶ Waka a Yehofa baka fu gi taawan sani. Winsi taawan nai teke san Yehofa e du gi den fu bigi, tokuso ai du bun gi ala sama (Mat. 5:43-48). Yehofa paamisi u taki te u ‘nai gi taawan sani anga a denki taki den mu pai u baka, da enseefi o pai u’ (Luk. 6:35). Neen meke ya mu fii booko-saka te taawan nai teke san ye du gi den fu bigi. Ya mu feegete tu taki Yehofa o pai yu fu di ye du bun gi taawan anga fu di ‘ye gi sani anga piisii.’​—Odo 19:17; 2 Kor. 9:7.

17. Saide u mu e gi taawan sani? (Lukasi 14:12–14)

 ¹⁷ Wan taa fasi faw sa du sani enke Yehofa te we gi taawan sani, a te we du san Yesesi be taki a Lukasi 14:12-14. (Leisi en.) Aa fowtu te we kai taawan kon a wi osu fu kon nyan makandaa anga u, efuso te we soi switifasi gi den wan di e du bun gi u. Ma wa mu e du bun gi taawan soso fu di u wani den du bun gi u baka. Maw mu meke moiti fu du san Yesesi be taki. U mu meke moiti fu du bun gi taawan di u sabi taki naw poi du bun gi u baka. A sani ya o meke u piisii fu di we du sani enke Yehofa.

18. San wa mu du? Saide wa mu du a sani ya?

¹⁸ Na denki ogii fu taawan (1 Kor. 13:7). Efu taawan nai teke san we du gi den fu bigi, u sa akisi useefi taki: Aa sabi taki a mu gim daa noh? A feegete fu gi mi daa?’ Saide meke aa gi mi daa enke fa mi be denki? Kande sen e kisi den te taawan e yeepi den, fu di kande a den be e yeepi sama fosi. Ma efu u lobi u baala anga sisa tuutuu, u naw denki ogii fu den, wo gi den sani anga piisii ala yuu.​—Efe. 4:2.

19-20. San a wan taa sani di o yeepi u fu gi taawan sani anga piisii? (Luku a fowtow.)

¹⁹ U mu abi pasensi. Kownu Salomo be sikiifi fu a gi di u mu e gi taawan sani taki: ‘Iti i beele a wataa, bika baka wan pisiten yo fende en baka’ (Peleik. 11:1). A sani ya e leli u taki a sa teke ‘omen dei’ fosi son sama gi u daa fu den sani di we du gi den. A sani ya be pasa anga wan sisa.

²⁰ Wan tu yali pasa, a uman fu wan kelen owluman be sikiifi wan biifi fu gi wan nyun sisa di be dopu deki-ati. Aini a biifi, a be sikiifi sowtu moiti a be mu meke fu fitoow Yehofa. Baka so wan aitin yali a sisa piki en aini wan biifi taki: ‘Mia sabi efii be sabi, ma mi wani taigi i taki ná pikin yeepi a biifi dii be sikiifi gi mi yeepi mi fu holidoo aini den yali di pasa’. Ai taki moo faa taki: ‘Na pikin moin a biifi  be moin. A tekisi di be de aini be doo mi ati, noiti mi feegete en’. a Baka di a taki fu wan tu tesi di a be miti den yali di pasa a taki: ‘Son yuu mi e wani gi abaa. Mi nai wani dini Yehofa moo tu​—Ma te mi e pakisei a tekisi dii be sikiifi gi mi, da dati e gi mi a deki-ati fu mi á gi abaa.’ Ai taki: ‘Aini den aitin yali di pasa, nawan taa sani a gi mi taanga sikin moo enke a biifi dii be sende gi mi anga a tekisi dii be poti aini’! We, a sa pasa anga ibiiwan fu u tu taki, u du bun gi wan taawan ma aa gi u daa wanten.

21. Saide meke i de kabakaba fu gi taawan sani leti enke Yehofa?

²¹ Leti enke faw be si a fesi, da Yehofa meke wi anga a fii fu gi taawan sani. A meke wi anga a fii tu taki te we gi, we moo piisii moo enke te we fende. Ná pikin piisii we piisii te u poi yeepi den baala anga sisa fu u. We piisii te den e gi u daa tu. Ma winsi taawan nai teke san wi e du gi den fu bigi, tokuso we piisii, fu di u sabi taki na a moo bun sani we du. Holi a pakisei taki ala sani di ye gi sama, ‘Yehofa poi gii moo enke dati seefi’ (2 Kolon. 25:9). Wa poi gi taawan sani moo enke san Yehofa e gi u! Te Yehofa o pai u, naa moo gaan pai wo kisi. Neen meke u mu tan waka aw Dda Yehofa baka, fu gi taawan sani anga piisii.