U mu holi a pakisei taki a ná fu di den á be si fa Yesesi be e soi den bakaman fi en fa den mu membee a dede fi en, da dati wani taki den á be e waka a Yesesi baka moo. Ma a okasi de, Yesesi be wani de makandaa anga den apostel fi en wawan, fu di den be tan waka neen baka.

Yesesi be lobi den 12 apostel, ma a be lobi den 70 disipel tu. A omen bakaman Yesesi be abi, ma a be puu 12 a den mindii fu wooko anga en enke apostel (Luk. 6:12-16). A Galileya a be de di a be ‘kai den twalufu apostel.’ Bakadati a be ‘sende den fu go taki anga sama fu a Kownukondee fu Gadu, anga fu deesi den sama di siki (Luk. 9:1-6). Bakaten di Yesesi be de a Yudeya, a be sende 70 fu den tu a tu fu go peleiki (Luk. 9:51; 10:1). Neen meke bakaten, Yesesi be abi bakaman na ala den peesi pe den bakaman fi en be e go peleiki.

Den Dyu di be toon Yesesi bakaman be e holi a Paskafesa ete. Kande a den anga den osufamii be e holi a fesa ya (Ek. 12:6-11, 17-20). Di a yuu be e doo fu Yesesi dede gi libisama, en anga den apostel go a Yelusalem. Ma den á be holi a Paskafesa anga ala den taa disipel a Yudeya, Galileya anga Pereya, efuso a be o bigi tumisi. A taigi den taki: ‘Mi e angii tuutuu fu nyan a Paska-ofaandi ya anga u fosi mi pina.’​—Luk. 22:15.

Yesesi be sabi saide a sete sani naa fasi de. Dyonson a be o dede enke ‘a Pikin Sikapu fu Gadu di o puu sondu a goontapu.’ (Yoh. 1:29). A Yelusalem a be o dede, bika na ape den be gwenti tyai ofaandi gi Gadu. A dede fu Yesesi be o meke libisama fii. A pikin sikapu di den Islayelisama be nyan na a neti di den be komoto a Egepte, be meke den fii. Ma Yesesi be o meke den fii a wan moo gaan fasi (1 Kor. 5:7, 8). A kuudei di Yesesi be meke anga den na a lasti neti di a nyan anga den, be meke den Twalufu apostel toon a fondamenti fu a kemeente di be o opo (Efe. 2:20-22). A moin fu si tu taki a Yelusalem di de a hemel abi 12 siton na a fondamenti fi en. Den 12 nen fu ‘den 12 apostel fu a pikin sikapu be sikiifi a den tapu tu’ (Openb. 21:10-14). Eeye, den apostel di be tan waka a Yesesi baka, be du wan pelensipali wooko fu meke a wani fu Gadu pasa. A nai foondoo wi taki Yesesi be wani de makandaa anga den a neti fosi a dede. Neen meke a be wani nyan a lasti Paska-ofaandi anga den tu. Baka dati a soi den fa den mu membee a dede fi en.

Den taa 70 disipel á be de ape na a lasti neti di a be nyan anga den apostel. Ma na ala den bakaman fi en be o fende wini fu a kuudei di a be meke anga den apostel a neti de. Ala den taa sama di be o toon salufuwan be o kon aini a kuudei di Yesesi be meke anga den apostel fu tii makandaa aini a Kownukondee. Na a sani de Yesesi be soi den apostel a neti fosi a dede.​—Luk. 22:29, 30.