1, 2. Saide Gadu á be e holibaka gi Saul moo? (Luku a fowtow na a bigin.)

SAUL be abi sakafasi di Yehofa be poti en enke kownu (1 Samuweli 9:1, 2, 21; 10:20-24). Ma bakaten a be kon abi heimembee. Wan fu den leisi di a soi taki a abi heimembee, a di omen dunsu Filisteya suudati be kon feti anga den Islayelisama. Samuweli be taigi en taki a be o kon boon wan ofaandi gi Yehofa. Ma fosi Samuweli doo, neen omen fu den Islayelisama gwe fika Saul bika den be e feele. Di Saul si so kaba, a á be wani wakiti Samuweli moo. Neen enseefi go boon a ofaandi. A sani de meke Yehofa ati boon neen, bika a du wan sani di a á be mu du.—1 Samuweli 13:5-9.

² Di Samuweli doo, neen a soi Saul taki a á tyai enseefi bun. Ma Saul á be e si enke a du ogii. A be wani soi  Samuweli taki a á fowtu. A be e gi taawan a fowtu tu (1 Samuweli 13:10-14). Fanafu a ten de, Saul du omen taa sani di be e soi taki a be abi heimembee. Neen meke Yehofa á be wani en enke kownu moo (1 Samuweli 15:22, 23). Saul bigin bun, ma bakaten a du sani di tyai ogii gi en.—1 Samuweli 31:1-6.

3. (a) Fa omen sama e si sakafasi? (b) Sowtu akisi wi o luku aini a artikel ya?

³ A omen sama aini a ten ya, e si enke yu á poi abi sakafasi efi i wani abi balinen aini a goontapu. Den e du sani fu soi taki den bun moo taawan. Wan balinen man di e meke felon, ma di de aini politiki now taki: „Sakafasi a ná gi den man enke mi. Noiti mi o soi a fasi de.” Ma, saide wan Kelesten mu abi sakafasi? San a sakafasi? On ten u sa taki wan sama ná abi sakafasi? Wi o piki den akisi ya aini a artikel ya. Wi o si aini a taa artikel fa u sa soi sakafasi winsi a á makiliki.

4. San a heimembee?

⁴ Beibel e soi taki wan sama di ná abi sakafasi abi heimembee. (Leisi Odo 11:2.) David be begi Yehofa taki: „Yeepi i futuboi fu a ná abi heimembee te, da a go du sani di á bun” (Psalm 19:13). San a heimembee? Heimembee a te wan sama e du wan sani di a sabi taki a ná abi leti fu du. Kande ai du a sani de fu di ai fii enseefi efuso fu di a ná abi pasensi. Ala u du wan sani wan leisi kaba di wi á be abi leti fu du, bika wi a sondu sama. Ma a toli fu Kownu Saul e leli u taki efu u gwenti tyai useefi na a fasi ya, Yehofa ná o piisii anga u. Psalm 119:21 taki Yehofa o „kaasi den sama di abi heimembee”. Saide ai du a sani ya?

5. Saide wi á mu du sani di u ná abi leti fu du?

⁵ Te wi e du wan sani di u ná abi leti fu du, da u nai lesipeki Yehofa, a sama di mu tii wi. Wi anga taawan o go e kisi toobi (Odo 13:10). Boiti dati, sen o kisi u te sama yee a taki (Lukasi 14:8, 9). Den sani ya e yeepi u fu si saide Yehofa wani u soi sakafasi.

6, 7. Fa wan sama di abi sakafasi e tyai enseefi?

⁶ Wan sama di abi sakafasi nai fii enseefi (Filipisama 2:3). A nai si enke a bun moo taawan. Ai holi a pakisei taki sani de di a á poi du. Te a meke wan fowtu, a nai kibii en. A de kabakaba fu aliki taawan. Yehofa lobi sama di abi sakafasi.

⁷ Beibel e soi taki wan sama di abi sakafasi e fusutan taki a ná ala sani a poi du. A sabi tu taki a ná abi a leti fu du son sani. A sani ya e yeepi en fu lesipeki taawan. Wan sama di abi sakafasi e libi bun anga taawan tu.

8. San a wantu sani di e soi taki wan sama abi heimembee?

 ⁸ Efu wi á luku bun, u sa pakisei sani di e soi taki wi abi heimembee. Fa a sani ya sa pasa? Kande wi e fii enke u bun moo taawan fu di wi abi faantiwowtu aini a kemeente efuso fu di den mati fu u abi faantiwowtu aini a kemeente (Romesama 12:16). Kande wi e du sani tu fu di u wani taawan gafa u (1 Timotiyesi 2:9, 10). Kande wi e bigin taigi taawan san den mu du anga san den á mu du.—1 Korentesama 4:6.

9. Beibel e taki fu sama di be abi heimembee. Fa den sama ya du kon abi heimembee?

⁹ Efu u nai dwengi useefi, wi o bigin du sani di u ná abi leti fu du. A omen sama kon abi heimembee fu di den be wani balinen, fu di den be e dyalusu anga taawan, efuso fu di den á be e holi denseefi di den ati be boon. Na a sani ya pasa anga Absalom, Usiya anga Nebukadnesar. Neen meke Yehofa meke den fusutan taki en anga sama di abi heimembee nai koti.—2 Samuweli 15:1-6; 18:9-17; 2 Koloniki 26:16-21; Daniyeli 5:18-21.

10. Sowtu toli aini Beibel e soi saide wi á mu e kuutu taawan?

¹⁰ Ma taa sani de tu di sa meke sama du sani di den ná abi leti fu du. Pakisei a toli fu Abimeilek anga Peitilisi (Genesesi 20:2-7; Mateyesi 26:31-35) A heimembee meke den man ya du sani di den á be abi leti fu du? A sabi den á be kaba sabi a fini fu a toli efuso a denki den á denki fosi den du wan sani? Wi á poi si sama ati, neen meke wi á mu e kuutu taawan te den du wan sani.—Leisi Yakowbesi 4:12.

11. San u mu meke moiti fu fusutan?

¹¹ Wan sama di abi sakafasi sabi en peesi aini a olikanisâsi fu Gadu. Yehofa á lobi te sani e waka buuyabuuya. A meke ala sama sabi san neen peesi aini a kemeente, ma ala sama de fanowdu. A gi ala u koni fu du son sani. Ai gi wi a okasi tu fu luku fa u wani wooko anga a koni ya. Ma efu wi abi sakafasi, wi o wooko anga a koni di a gi u enke fa a wani (Romesama 12:4-8). Wi e fusutan taki Yehofa wani u wooko anga a koni di a gi u, fu gi en gaandi efuso fu yeepi taawan.—Leisi 1 Peitilisi 4:10.

12, 13. San u mu holi a pakisei te a wooko di wi e du gi Yehofa kengi?

¹² Te a de fanowdu Yehofa e kengi a wooko di wi e du aini en olikanisâsi. Pakisei Yesesi. Biginbigin neen anga Yehofa wawan too be de (Odo 8:22). Neen a yeepi Yehofa meke den engel, hemel, goontapu anga libisama (Kolosesama 1:16). Baka ten Yehofa gi en wan taa wooko. A be sende en kon a goontapu enke libisama. A be de wan beibi fosi. Baka dati a toon wan gaansama (Filipisama 2:7). Baka di a dede, a go a hemel, neen a toon kownu fu Gadu Kownukondee aini 1914 (Hebrewsama 2:9). Ma aini a ten di e kon, a o tii enke Kownu wan dunsu yali. Baka dati a o gi Yehofa a Kownukondee baka, da „Gadu o de ala sani gi ala sama”.—1 Korentesama 15:28.

 ¹³ Sani sa kengi aini u libi tu. Kande fosi a u wawan be de, neen u toow bakaten. Kande u meke pikin tu. Kande di u kon moo gaandi u kengi wantu sani fu man du moo gi Yehofa. Den sowtu kengi ya sa meke u fende moo faantiwowtu, ma kande den sa meke u lasi son faantiwowtu tu. Winsi u gaandi efuso yonkuu, winsi u gusontu efuso siki, Yehofa sabi san u poi du. A nai akisi u fu du sani di a sabi taki u ná o poi du. Ai piisii anga den sani di wi e du gi en.—Hebrewsama 6:10.

14. Fa sakafasi sa yeepi u fu tifeedi anga fu de anga piisii ala yuu?

¹⁴ Yesesi be e piisii anga ala den wooko di Yehofa be e gi en. A so u sa piisii anga den wooko di Yehofa e gi u tu (Odo 8:30, 31). Wan sama di abi sakafasi e tifeedi anga den gaandi di a abi aini a kemeente. A nai fii wan fasi te taawan e fende faantiwowtu, ma ai piisii anga den sani di ai du gi Yehofa. Ai fusutan taki a Yehofa gi en a faantiwowtu di a abi. Wan sama di abi sakafasi e lesipeki taawan. Ai piisii fu holibaka gi den. Ai holi a pakisei taki Yehofa gi taawan faantiwowtu tu.—Romesama 12:10.

15. San u sa leli fu Gidiyon?

¹⁵ Gidiyon a wan sama di be abi sakafasi. Di Yehofa gi en a faantiwowtu fu fii den Islayelisama di den Midiyansama be e pina den, neen Gidiyon taigi Yehofa taki: „Mi famii á pelensipali seefiseefi aini a lo fu Manase. Anga ala mi na a moo pikinwan aini a osofamii  fu nda” (Kuutubakaa 6:15). Ma Gidiyon fitoow Yehofa, neen a teke a faantiwowtu di Yehofa gi en. A meke moiti fu fusutan fa a mu du a wooko, neen a begi Yehofa fu yeepi en (Kuutubakaa 6:36-40). Gidiyon be taanga. A be abi deki-ati tu. Ma tokuso a be e du sani anga koni (Kuutubakaa 6:11, 27). Bakaten, den sama be wani poti en enke kownu, ma a á be wani. Di a du san Yehofa be sende en, neen a go a osu baka.—Kuutubakaa 8:22, 23, 29.

16, 17. San wan sama di abi sakafasi mu du fu go a fesi?

¹⁶ Te wan sama teke wan wooko di den baala gi en efuso a wani moo faantiwowtu aini a kemeente, da dati á wani taki a heimembee a abi. Beibel e soi taki a wan bun sani te wan sama di e dini Yehofa wani yeepi en baala anga sisa. A wan bun sani tu te ai suku fu go a fesi (1 Timotiyesi 4:13-15). Ma a te wi e fende nyun faantiwowtu fosi, da wi e go a fesi? Nono. Te wi e meke moiti fu toon wan moo bun mati fu Yehofa, anga te wi e meke moiti fu dini Yehofa moo bun efuso fu yeepi taa sama, da a fesi wi e go tu.

¹⁷ Te wan sama abi sakafasi, ai luku fosi efu a o man tyai a faantiwowtu di den gi en. Ai begi Yehofa fu yeepi en tu. Ai akisi enseefi taki: „Mi o abi ten anga kaakiti fu du taa sani di de fanowdu? Efu mi ná o abi ten anga kaakiti fu du den sani de, da mi sa akisi taa sama fu yeepi mi anga a wooko di mi e du nownow?” Te wan sama di abi sakafasi pakisei den sani ya, da a o luku efu a o poi du a wooko. Efu wi abi sakafasi, da kande u mu taki wi á poi du a wooko.

18. (a) San wan sama di abi sakafasi o du te den baala gi en wan wooko? (b) Fa Romesama 12:3 e yeepi u fu soi sakafasi?

¹⁸ Yehofa wani den sama di e dini en soi „sakafasi” (Mika 6:8). Neen meke te den baala gi u wan wooko, u mu meke moiti fu sabi fa Yehofa wani u du a wooko. U mu begi en fu a yeepi u, leti enke Gidiyon. U mu teke ten pakisei san Yehofa e leli u anga a Beibel anga en olikanisâsi. U mu holi a pakisei taki a ná fu di u sabi du son wooko meke Yehofa gi u wan faantiwowtu. A di a abi sakafasi meke ai gi u faantiwowtu. A de kabakaba fu yeepi u anga den faantiwowtu de tu (Psalm 18:35). Wan sama di abi sakafasi ’nai fii enseefi’.—Leisi Romesama 12:3.

19. Saide u mu abi sakafasi?

¹⁹ Wan sama di abi sakafasi sabi taki a Yehofa wawan sama mu gafa, bika neen meke ala sani. Neen na a Moo Gaan Gadu fu hemel anga goontapu (Openbaring 4:11). Efu wi abi sakafasi, wi o piisii anga den sani di wi e du gi Yehofa. Wi o lesipeki a fasi fa den baala anga sisa e denki. Wi o holi den a pakisei. A sani ya o meke u libi na a wan. Wan sama di abi sakafasi e denki fosi a du wan sani. A sani ya e yeepi en fu a á meke gaan fowtu. Yehofa lobi den sama di abi sakafasi. Neen meke a foluku fi en, e fusutan taki a de taanga fanowdu fu abi sakafasi. Aini a taa artikel wi o si fa u sa soi sakafasi winsi a á makiliki.