1, 2. Sowtu komakandaa o tyai u kon na a wan aini 2018? Saide a komakandaa ya á de enke den taawan? (Luku a fowtow na a bigin.)

MILIYUNMILIYUN sama o go a wan komakandaa di o holi a 31 maart 2018. A wan leisi wan yali a komakandaa ya e holi. A neti de Yehofa Kotoigi anga omen taa sama o kon makandaa fu membee a gaan sani di Yesesi du gi u. Ala yali, a membee di wi e membee a dede fu Yesesi e tyai sama kon a wan, a wan foondoo fasi. Nawan taa komakandaa a goontapu poi tyai so ipi sama kon wan.

² Ná pikin piisii Yehofa anga Yesesi musu e piisii te den e si fa miliyunmiliyun sama na ala se fu goontapu e go na a komakandaa ya. Beibel e taki fu „wan gaan kulu sama fu ala sowtu nasi, lo, foluku anga tongo di sama á poi teli.” A taki den sama ya e bali taki: „Wi e gi u Gadu di sidon na a kownusutuu anga a Pikin Sikapu  daa, bika den fii wi” (Openbaring 7: 9, 10). A moin fu si fa omen sama e gi Yehofa anga Yesesi gaandi ala yali, fu a gaan sani di den du gi u.

3. Sowtu akisi wi o luku aini a artikel ya?

³ Yu o fende a piki fu den akisi ya aini a artikel ya: (1) Fa mi sa teke seeka gi a Membeefesa fu mi sa fende wini fi en? (2) Fa a Membeefesa e yeepi a foluku fu Gadu fu libi na a wan? (3) Fa mi sa holibaka gi a libi di a foluku fu Gadu e libi na a wan? (4) Wan dei o kon pe wi o holi a Membeefesa fu lasiti leisi? Efu a so, da on ten a sani ya o pasa?

4. Saide wi á mu misi a Membeefesa?

⁴ Saide wi á mu misi a Membeefesa? A fu di a Yehofa wi e go dini te wi e go a den komakandaa. Yehofa anga Yesesi e si a moiti di iniiwan fu wi e meke fu go na a moo pelensipali komakandaa fu a yali. U wani Yehofa anga Yesesi si taki winsi fa ai taanga gi u son leisi, toku wi e go na a Membeefesa. Te wi e soi taki den komakandaa fu wi de taanga fanowdu, da wi e gi Yehofa a okasi fu sikiifi u nen aini en „buku”. Den e kai a buku ya „a buku fu libi”. Ala den sama di Yehofa o gi teego libi, nen sikiifi aini a buku ya.​—Maleyaki 3:16; Openbaring 20:15.

5. Fa i sa ’ondoosuku luku efi i de a biibi’ den wiki fosi a Membeefesa?

⁵ Den wiki fosi a Membeefesa, u sa teke moo ten fu begi anga fu sidon pakisei bun efu wi anga Yehofa a mati tuutuu. (Leisi 2 Korentesama 13:5.) Apostel Pawlesi be taigi den Kelesten taki: „U mu e ondoosuku naamo luku efu u de a biibi.” Fa u sa du a sani ya? U sa akisi useefi taki: ’Mi e biibi tuutuu taki a disi na a olikanisâsi fu Yehofa? Mi e du ala san mi man fu paati a bun nyunsu? A fasi fa mi e libi e soi taki mi e biibi taki aini den lasiti dei fu a goontapu fu Saatan wi e libi? Mi e biibi Yehofa anga Yesesi enke fa mi be e biibi den di mi be bigin dini Yehofa?’ (Mateyesi 24:14; 2 Timotiyesi 3:1; Hebrewsama 3:14) Efu u sidon pakisei den akisi ya, den o yeepi u fu sabi „efu u de a biibi”.

6. (a) San na a wan kodo fasi fa u sa fende teego libi? (b) Fa wan owluman e seeka ala yali gi a Membeefesa? Fa iseefi sa du a sani ya?

⁶ Wan fasi fa i sa teke seeka gi a Membeefesa, a te yu e leisi Wakititolen artikel di e soi saide a komakandaa ya pelensipali. (Leisi Yohanisi 3:16; 17:3.) A wan enkii fasi fa u sa fende teego libi, a te wi e leli sabi Yehofa anga te wi e biibi en Manpikin Yesesi. Wan taa fasi fa i sa seeka gi  a Membeefesa, a te yu e sutudeli sani di o yeepi i fu kon koosube a Yehofa anga Yesesi. Na a sani ya wan baala di de owluman wan pisiten kaba e du. A omen yali kaba ai kibii den Wakititolen artikel di e taki fu a Membeefesa anga a lobi di Yehofa anga Yesesi soi gi u. Den wiki fosi a Membeefesa, ai leisi den artikel ya baka, da ai sidon pakisei saide a Membeefesa pelensipali. Baka wan pisiten, ai suku wan efuso tu nyun artikel di e taki fu a sani ya. Ai leisi den tekisi di e taki fu a Membeefesa tu, da ai teke ten pakisei san a leisi. A owluman ya taki, ala yali te a du a sani ya, ai leli nyun sani. A moo gaan wini di a fende, na a lobi di ai kon moo lobi Yehofa anga Yesesi. Efi i du aseefi, yu o moo teke san den du gi i fu bigi. Yu o moo fende wini fu a Membeefesa tu.

7. (a) San Yesesi begi Gadu a fosi leisi di a holi a Membeefesa? (b) San e soi taki Yehofa du san Yesesi begi en?

⁷ A neti di Yesesi holi a Membeefesa, a begi. A begi fu a libi di en anga Yehofa e libi na a wan. A begi en Dda tu fu den bakaman fi en libi na a wan. (Leisi Yohanisi 17:20, 21). Yehofa aliki a begi fi en Manpikin di a lobi. Fu ala den komakandaa di e holi a goontapu, a Membeefesa e soi kiin taki Yehofa Kotoigi e libi na a wan. A dei de, miliyunmiliyun sama fu omen kondee a goontapu, e kon makandaa fu soi taki den e biibi taki Yehofa sende en Manpikin kon a goontapu. Aini son kondee, sama á gwenti si sama fu omen sowtu nasi e kon makandaa fu dini Gadu. Den e si enke a sani ya á fiti. Ma a ná so Yehofa anga Yesesi e si a sani ya. Den e piisii te den e si fa a Membeefesa e tyai u kon a wan.

8. San Yehofa be meke Eseikiyeli taki a fesi?

⁸ A foluku fu Yehofa nai foondoo taki den e libi na a wan. Yehofa be meke Eseikiyeli taki a fesi taki a foluku fi en be o libi na a wan. A sende Eseikiyeli fu teke tu tiki, wan „fu Yuda” anga wan „fu Yowsefu”, da a miti den fu den toon wan tiki. (Leisi Eseikiyeli 37:15-17.) A artikel di den e kai „Sani di leisiman akisi” di be kon aini A Wakititolen fu yuli 2016 be taki: „Yehofa be meke Eseikiyeli taki a fesi taki en foluku be o daai go na a Paamisi kondee baka, da den be o toon wan foluku. Eseikiyeli be taki a fesi tu taki den sama di be o dini Yehofa aini den kiiboi dei, be o dini en makandii enke wan foluku.”

9. San e soi taki a foluku fu Gadu e libi na a wan enke fa Eseikiyeli be taki?

⁹ Bigin fu a yali 1919, Yehofa tyai den salufu Kelesten kon a wan baka. Den be de enke a tiki „fu Yuda”. Fanafu a ten de, neen den sama di abi a gaandi fu libi a goontapu ya, bigin holibaka gi den salufu Kelesten. Den Kelesten di o tan a goontapu de enke a tiki „fu Yowsefu”. Yehofa paamisi taki a o miti den tiki ya, da  den o „toon wan” tiki aini en ana (Eseikiyeli 37:19). A meke den salufu Kelesten anga den „taa sikapu” toon wan ipi (Yohanisi 10:16; Sakaliya 8:23). Aini a ten ya, den tu kulu ya e dini Yehofa makandii. Den abi wan Kownu, Yesesi Kelestesi. Gadu kai en „mi futuboi David” aini a polofeititoli fu Eseikiyeli (Eseikiyeli 37:24, 25). Ala yali te u kon makandaa fu membee a dede fu Yesesi, wi e si fa den tu kulu ya e libi na a wan enke fa Eseikiyeli be taki. Fa u sa holibaka gi a libi di a foluku fu Gadu e libi na a wan?

10. Fa u sa gi wan ana fu a foluku fu Gadu libi na a wan?

¹⁰ Wan fasi fa u sa gi wan ana fu a foluku fu Gadu libi na a wan, a te wi e meke moiti fu abi sakafasi. Di Yesesi be de a goontapu, a be leli den bakaman fi en taki den mu abi sakafasi (Mateyesi 23:12). Den sama fu a goontapu e si enke den bun moo taawan. Ma efu wi abi sakafasi, wi o lesipeki den baala di e teke fesi aini a kemeente. Wi o aliki den tu. A so namo a kemeente o man libi na a wan.  Ma san moo pelensipali, wi e meke Yehofa piisii bika ai „buuse sama di abi heimembee, ma ai soi bun-ati gi den sama di abi sakafasi”.​—1 Peitilisi 5:5.

11. Fa a sidon di wi e sidon pakisei a beele anga a win fu a Membeefesa, e yeepi u fu libi na a wan?

¹¹ Du fu tu fasi fa u sa gi wan ana fu a foluku fu Gadu libi na a wan, a te wi e teke ten pakisei san a beele anga a win wani taki. U mu du a sani ya fosi a Membeefesa anga a neti di a Membeefesa o holi (1 Korentesama 11:23-25). A beele sondee sowda, wani taki a sikin fu Yesesi di ná abi sondu. A lebi win, wani taki a buulu fi en. Ma wi á mu tifeedi fu di u sabi den sani ya. U mu holi a pakisei taki a dede fu Yesesi e soi fa Yehofa anga en Manpikin lobi u. Yehofa á mombii u en Manpikin. Yesesi seefi be de kabakaba fu dede gi u. Te wi e pakisei a lobi di den soi u, ai gi u taanga-sikin fu lobi den tu. A lobi di u lobi Yehofa, e yeepi u fu libi na a wan.

12. San Yesesi leli u anga a toli fu a kownu anga a saafu?

¹² Du fu dii fasi fa u sa gi wan ana fu a foluku fu Gadu libi na a wan, a te wi e gi taawan paadon anga u hii ati. Te wi e gi taawan paadon wi e soi taki ai bigi gi u taki Yehofa man gi u paadon fu di Yesesi dede gi u. A toli di Yesesi gi fu a kownu anga en saafu, e leli u taki a pelensipali fu gi taawan paadon. Gaantangi leisi Mateyesi 18:23-34, da i akisi iseefi taki: ’Mi e du san Yesesi leli mi anga mi hii ati? Mi e pasensi anga mi baala anga mi sisa? Mi e meke moiti fu fusutan saide den e meke son fowtu? Mi de kabakaba fu gi paadon te wan sama du wan hati sani anga mi?’ A tuu taki son fowtu bigi moo a taawan. Son sani di sama e du anga wi e meke a taanga gi wi enke sondu libisama fu gi den paadon. Ma a toli fu Yesesi e leli u san Yehofa wani u du. (Leisi Mateyesi 18:35.) Yesesi soi kiin taki Yehofa ná o gi u paadon efu u nai gi u baala anga sisa paadon te den soi taki san den du e hati den. A wan sani di u mu sidon pakisei bun. Efu u wani libi na a wan anga a foluku fu Gadu, u mu e gi taawan paadon enke fa Yesesi leli u.

13. Fa a holi di u nai holi taawan na a ati e yeepi u fu libi na a wan?

¹³ Te wi e gi taawan paadon, wi e soi taki u wani libi na a wan anga u baala anga sisa. Pawlesi taki efu u wani libi na a wan anga taawan, u mu meke taanga moiti (Efeisesama 4:3). Neen meke a neti di wi o membee a dede fu Yesesi, teke ten pakisei fa yu e libi anga taawan. Akisi iseefi taki: ’Den sama di sabi mi e si kiin taki mi nai holi taawan na ati? Den e si kiin taki mi e meke moiti fu libi na a wan anga taawan?’ U mu pakisei den akisi ya bun.

14. Fa u sa soi taki ’wi abi boo anga taawan’?

¹⁴ Du fu fo fasi fa u sa gi wan ana fu a foluku fu Gadu libi na a wan, a te wi e soi lobi gi taawan enke Yehofa (1 Yohanisi 4:8). Noiti wi o taki: „Mi musu lobi mi baala anga sisa, ma mi á musu  toon mati anga den.” Efu a so wi e denki, da u nai du san Pawlesi gi u taanga-sikin fu du. A taki: „U mu abi lobi, da wi o man abi boo anga taawan” (Efeisesama 4:2). Pawlesi á taki u mu „abi boo anga taawan” namo da á kaba. A taki u mu „lobi” den tu. A omen sowtu sama de aini a kemeente. A Yehofa hali den sama ya kon neen (Yohanisi 6:44). Neen meke a musu de so taki a di a si bun sani a den meke a lobi den. Efu Yehofa lobi den baala anga sisa fu u, u mu lobi den tu.​—1 Yohanisi 4:20, 21.

15. Fa u du sabi taki a ná fu teego wi o holi a Membeefesa?

¹⁵ Wan dei wi o holi a Membeefesa fu a lasiti leisi. Fa u du sabi a sani ya? Pawlesi taigi den salufu Kelesten taki te den e holi a Membeefesa ala yali, den e „meke sama yee fu a dede fu Masaa, te enke a kon” (1 Korentesama 11:26). Yesesi be taki fu a „kon” di a o kon, di a taki san o pasa na a ten fu a kaba. A be taki fu a gaan banowtu di o kon dyonson. A taki: „Den o si a maiki fu a Manpikin fu libisama a hemel. Ala den lo fu goontapu o de anga buduufu na ati. Den o si a Manpikin fu libisama e kon a den woluku anga kaakti anga gendee. A o sende den engel fi en go anga gaan tutu di o go e piki. Den engel o go teke ala den sama di Gadu kai puu na ala se fu hemel, tyai kon a wan” (Mateyesi 24:29-31). Yesesi o tyai ’ala den sama di Gadu kai kon a wan’. A sani ya wani taki a o meke ala den salufu Kelesten go a hemel. A sani ya o pasa baka te a gaan banowtu bigin, fosi Alimakedon. A Yesesi anga ala den 144.000 sama di go a hemel, o feti anga den kownu fu goontapu na Alimakedon (Openbaring 17:12-14). A lasiti Membeefesa di wi o holi, a di wi o holi fosi Yesesi „kon” fu tyai den salufu wan go a hemel.

16. Saide i ná o misi a Membeefesa fu a yali ya?

¹⁶ Yu á mu wani misi a Membeefesa di o holi a 31 maart 2018. Begi Yehofa fu a yeepi i fi i sa gi wan ana fu a foluku fi en libi na a wan. (Leisi Psalm 133:1.) Wan dei wi o go na a Membeefesa fu a lasiti leisi. Meke u soi ala yali taki ai bigi gi u fu si fa a foluku fu Yehofa e libi na a wan, te enke a lasiti leisi di wi o holi a Membeefesa.