1. San e miti wi aini a ten ya? Saide Yehofa e piisii anga den sama di e dini en anga den hii ati? (Luku a fowtow na a bigin.)

A LIBI taanga nownow. A omen baala anga sisa fu u siki. Taawan abi fu solugu den famii fu den di kon gaandi, winsi fa denseefi á yonkuu moo. Ai taanga gi son baala anga sisa fu fende den moo pelensipali sani di den abi fanowdu. Son wan fu u abi ala den booko-ede ya. Den sani ya e meke u lasi omen ten, kaakiti anga moni. Ma u sabi taki Yehofa o yeepi u. A paamisi u taki sani o go moo bun. Yehofa e piisii te a si fa yu e holidoo.

2. Fa Yesaya 40:29 e gi u taanga-sikin? Sowtu gaan fowtu u sa meke?

² Yu e fii enke den polobelema fi i hebi tumisi? A nai wawan e fii so. Son sama di be e dini Gadu aini a ten di pasa be e fii enke den polobelema fu den be hebi gi den tu (1 Kownu 19:4; Yopu 7:7). San be yeepi den fu  holidoo? Den be e biibi taki Yehofa o gi den kaakiti fu holidoo. ’Beibel taki te wan sama weli, Yehofa e gi en kaakiti’ (Yesaya 40:29). A wan tyali sani taki son baala anga sisa e si enke efu den tapu fu dini Yehofa wan pisiten, den o boo fu den polobelema fu den. Den e si enke a dini di den e dini Yehofa a wan hebi. Den nai si a wini fi en. Neen meke den nai leisi Beibel moo, den nai go a komakandaa moo, den nai peleiki moo tu. Ma a dati Saatan wani.

3. (a) San u mu du fu Saatan á fende a okasi fu swaki u biibi? (b) San wi o luku aini a artikel ya?

³ Saatan wani u biibi swaki. A sabi taki te wi e wooko taanga gi Yehofa, u biibi e taanga. Neen meke winsi yu e fii enke i weli, ná meke a sani de puu yu a Yehofa se. Meke moiti fu kon moo koosube a Yehofa. Beibel taki: „A o meke u taampu gingin. A o meke u kon taanga” (1 Peitilisi 5:10; Yakowbesi 4:8). A tekisi fu Yesaya 40:26-31 o soi wi aini a artikel ya taki Yehofa poi gi u kaakiti. Boiti dati, wi o luku tu sani di sa meke wi á wooko taanga gi Yehofa moo. Wi o si fa den leli fu Beibel e yeepi u fu holidoo tu.

4. San wi e leli fu Yesaya 40:26?

⁴ Leisi Yesaya 40:26. Sama á poi teli ala den sitali a tapu. Ondoosukuman taki a wan sani fu 400.000 miliyun sitali de na a pisi pe goontapu de. Da wi á taki fu den taa kulu sitali ete. Tokuso Yehofa e kai ala den sitali a den nen. San a sani ya e leli u fu Yehofa? We, efu ai booko en ede anga den sitali, da a musu e booko en ede anga i tu. A di i lobi Yehofa meke yu e dini en. A na musu ai musu i (Psalm 19:1, 3, 14). I Dda Yehofa sabi ala sani fi i. Beibel taki „ala den uwii a wi ede seefi a teli” (Mateyesi 10:30). Yehofa wani u sabi taki a „sabi san e miti den sama di e libi a wan letifasi” (Psalm 37:18). Yehofa e si ala den tesi di e miti u. A poi gi wi a kaakiti di wi abi fanowdu fu pasa den tesi ya tu.

5. Fa u du sabi taki Yehofa poi yeepi u te wi abi polobelema?

⁵ Leisi Yesaya 40:28. A Yehofa abi ala kaakiti. Pakisei omen kaakiti a gi a san. David Bodanis, wan ondoosukuman taki a kaakiti di e komoto na a san ala sekonde bigi moo a kaakiti fu omen miliyun atoombom. Wan taa ondoosukuman taki a kaakiti di e komoto na a san aini wan sekonde, sai fu leti faya gi ala sama a goontapu 200.000 yali langa. A sani ya e soi taki Yehofa di gi a san kaakiti, poi gi u kaakiti te wi abi polobelema tu.

6. Saide u sa taki a tyatyali fu Yesesi safu? Saide a sani ya e gi u taanga-sikin?

 ⁶ Leisi Yesaya 40:29. A dini di wi e dini Yehofa e meke u piisii. Yesesi be taigi den bakaman fi en taki: „Teke a tyatyali fu mi.” A taigi den tu taki: „Wi o fende kaakiti baka. Bika mi tyatyali safu. Mi lai feke” (Mateyesi 11:28-30). A sani ya a tuu. Son leisi a weliweli wi e komoto a osu go a komakandaa efuso peleikiwooko. Ma fa wi e fii te u doo osu? Wi e fii bun. Wi e fende kaakiti. A sani ya e yeepi u anga den polobelema fu u. A tyatyali fu Yesesi safu tuu.

7. Gi wan ondoofenitoli di e soi taki san sikiifi a Mateyesi 11:28-30 a tuu.

⁷ Wan sisa fu u abi wan siki di e meke ai weli ala yuu. Ai fii booko-saka, boiti dati en ede e hati en. A sani ya e meke a taanga gi en son leisi fu go a komakandaa. Wan dei, di a meke moiti go a wan komakandaa, a sikiifi taki: „A lezing be e taki fu sama di e fii booko-saka. A baala di be holi a lezing be e taki anga fii. A sani ya meke wataa bigin lon a mi ain. A sani ya membee mi taki winsi san e pasa, mi mu go a komakandaa.” A be e piisii taki a meke moiti go na a komakandaa.

8, 9. San apostel Pawlesi be soi di a sikiifi taki: „Te mi swaki, da mi taanga”?

⁸ Leisi Yesaya 40:30. A omen sani de di u man du, ma a ná ala sani u man du anga a kaakiti di wi abi. Ala wi mu holi a sani ya a pakisei. A omen sani apostel Pawlesi be e du, ma a ná ala san a be wani du a be poi du. Di a taigi Yehofa fa ai fii, neen Yehofa piki en taki: „A bun-ati fu mi sai i, bika te i swaki, ala sama o si taki a mi e gi i kaakiti.” Pawlesi be fusutan san Yehofa be taigi en. Neen meke a taki: „Te mi swaki, da mi taanga” (2 Korentesama 12:7-10). San Pawlesi be wani soi anga a sani di a taki ya?

⁹ Pawlesi be sabi taki a ná ala sani a poi du. Wan sama di taanga moo en be mu yeepi en du son sani. A santa yeye fu Gadu be poi gi Pawlesi kaakiti te a be abi kaakiti fanowdu. A be e yeepi en a taa fasi tu. A yeye fu Gadu be poi gi Pawlesi kaakiti fu du sani di a á be poi du. A poi yeepi u tu. Te Yehofa gi wi a santa yeye, wi o fende kaakiti.

10. Fa Yehofa yeepi David fu holidoo te sani be e miti en?

¹⁰ A psalm sikiifiman David be si omen leisi fa a santa yeye fu Gadu be yeepi en. A be singi taki: „A di yu e yeepi mi meke mi man feti anga ogii-ati fufuuman. A Gadu e gi mi kaakiti fu subi sikotu” (Psalm 18:29). Leti enke fa wan hei sikotu taanga fu subi, a so den nowtu fu u e moo wi son leisi. Useefi nai poi losi den. A Yehofa namo sa yeepi u.

11. Fa a santa yeye e yeepi u te wi abi polobelema?

¹¹ Leisi Yesaya 40:31. Te wan agaa de a tapu a ná anga en kaakiti wawan ai fee. Ai meke a waan winta tyai en. A sani ya e meke a man  fee langa, bika a ná anga en kaakiti wawan ai fee. Neen meke te yu abi gaan polobelema, pakisei a agaa. Begi Yehofa fu a meke a „yeepiman”, a santa yeye, gi i moo kaakiti (Yohanisi 14:26). Winsi on yuu fu a dei, u sa akisi Yehofa fu a gi wi a santa yeye. A iniiwan wan yuu u sa akisi Yehofa fu a gi wi en santa yeye fu yeepi u, moomoo te wi abi polobelema anga wan baala efuso wan sisa aini a kemeente. Ma saide baala anga sisa nai kaba fusutan denseefi son leisi?

12, 13. (a) Saide Kelesten e abi polobelema son leisi? (b) San wi e leli fu Yehofa te u luku a libi fu Yowsefu?

¹² Wi a sondu sama, neen meke son leisi u nai fusutan useefi. Kande wi ati boon fu di wan taawan taki efuso du wan sani di wi á lobi. Son leisi a wi e du sani di taawan á lobi. A sani ya sa de enke wan tesi. Ma ai gi wi a okasi fu soi taki wi e du san Yehofa taki ala yuu. Saide? Ai yeepi u fu wooko makandaa anga u baala anga sisa. Yehofa lobi den, winsi fa den e meke fowtu. Neen meke u mu lobi den tu.

¹³ Yehofa nai puu tesi gi u. Wi e fusutan a sani ya bun te u luku a toli fu Yowsefu. Di Yowsefu be de wan yonkuman, den baala fi en be e dyalusu anga en. Den seli en enke saafu, neen den sama di bai en tyai en go a Egepte (Genesesi 37:28). Yehofa be e si san e pasa. A be e hati en taki den be e libi ogii anga en futuboi Yowsefu. Ma tokuso Yehofa á puu a tesi ya gi Yowsefu. Bakaten di den lei gi Yowsefu taki a be wani suwa anga Potifar uman, neen den poti en a dunguu-osu. Yehofa a be puu Yowsefu aini a tesi de. Ma a be gwe fika Yowsefu? Nono. A Beibel taki ’Yehofa be de anga Yowsefu. A be e meke ala san Yowsefu be e du, waka bun.’​—Genesesi 39:21-23.

14. Sowtu wini wi e fende te u nai holi sama na ati?

¹⁴ Yehofa á be puu tesi gi David tu. Kande noiti sama libi ogii anga wi  enke fa den be libi ogii anga David. Tokuso a mati fu Yehofa ya á be e holi sama na ati. A sikiifi taki: „Yu ati á mu boon moo. Yu á mu ligei moo tu. Yu ati á mu boon te, da i du ogii” (Psalm 37:8). A di u wani de enke Yehofa meke u nai holi sama na ati. A nai „meke u pai fu ala den fowtu di u meke”. Ai gi u paadon (Psalm 103:10). Wi e fende taa wini tu te u nai holi sama na ati. Buulu sa naki wan sama di ati e boon tumisi. A sa siki neen bee anga en lebi. Te wan sama ati boon, a nai man denki bun tu. A sa taigi taawan hati sani. A sani ya sa meke a fii booko-saka. A moo bun te wi ati nai boon. Beibel taki: „Wan ati di nai buuya gaw, bun gi a sikin, ma dyalusu e poli sama bon” (Odo 14:30). Da san u mu du te taawan du wan sani di hati u? San u mu du fu meke en bun anga u baala? U mu du san Beibel taki.

15, 16. San u mu du te wan sama du wan hati sani anga u?

¹⁵ Leisi Efeisesama 4:26. U nai foondoo te wan sama di nai dini Yehofa du wan hati sani anga u. Ma te wan Kelesten efuso wan famii du wan sani anga u, ai moo hati u. San wi o du efu wi á poi feegete san a sama du anga u? Wi o holi a sama na ati? Wi o meke en bun anga a sama wanten enke fa Beibel taki? Moo u tan langa fu taki anga a sama, moo a o taanga gi u fu meke en bun anga a sama.

¹⁶ Ma efu wan baala efuso wan sisa du wan sani anga i, neen yu á poi feegete san a du noh? A fosi sani di i mu du, a begi i mu begi Yehofa. Akisi en fu a yeepi i fu taki moin anga en. Holi a pakisei taki a baala efuso a sisa a Yehofa mati tu (Psalm 25:14). Gadu lobi en tu. Yehofa e libi bun anga den mati fi en. A dati a wani u du tu (Odo 15:23; Mateyesi 7:12; Kolosesama 4:6). Du fu tu sani di i mu du, i mu denki bun san yu o taigi a baala efuso a sisa. Yu á mu si enke a fu seefi a du a sani anga i. Kande a wan fowtu a meke efuso kande a yu á fusutan en bun. I mu si i fowtu tu. Te yu o bigin taki anga en, i sa taki: „Kande mi ati boon gaw tumisi di i taki anga mi eside. Mi be e fii enke.  . .” Efu a sani di i taigi en á yeepi, i mu puubei go doo. Begi gi en. Akisi Yehofa fu a belesi en. Akisi Yehofa fu a yeepi i tu fu poti pakisei a den bun manii fu a baala efuso a sisa. I sa biibi taki Yehofa o piisii anga a moiti di yu e meke fu meke en bun anga a baala efuso a sisa, bika enseefi a Gadu mati.

17. Fa Yehofa e yeepi i fu yu anga en toon mati baka te i du wan sondu? Saide u mu meke moiti fu du san a soi u?

¹⁷ Son sama e fii enke den á bun fu dini Yehofa, bika den be du wan gaan  sondu. Te u kosensi e fon u, a libi nai switi gi u. U nai abi kaakiti fu du sani tu. Kownu David kosensi be e fon en. A be taki: „Di mi á be e taki sowtu sondu mi du, mi be e geme hii dei te enke mi ná abi kaakiti moo. Dei anga neti mi be e fii fa yu ana ibi a mi tapu.” Ma David be abi deki-ati. A du san Yehofa be wani a du. A sikiifi taki: „Te fu kaba mi taigi i san mi du, . . . neen i gi mi paadon fu den fowtu anga den sondu fu mi” (Psalm 32:3-5). Efi i du wan gaan sondu, Yehofa de kabakaba fu gi i paadon. A wani yeepi i fu yu anga en toon mati baka. Ma i mu wooko anga san den owluman soi i (Odo 24:16; Yakowbesi 5:13-15). Efi i wani fende teego libi, yu á mu daaidaai fu du a sani ya. Ma san i mu du efi i kosensi e fon yu ete baka di den baala yeepi i?

18. Fa a libi fu Pawlesi e yeepi den sama di e fii enke den á bun fu dini Yehofa fu di den be meke wan fowtu?

¹⁸ Wan pisiten Pawlesi be e fii booko-saka te a be e denki den sani di a be du. A be taki: „Mi na a moo pikinwan fu ala den apostel. A á fiti fu den kai mi apostel, bika mi be e du ogii anga a kemeente fu Gadu.” Pawlesi be taki tu taki: „Ma a di Gadu soi mi bun-ati meke mi de enke fa mi de nownow” (1 Korentesama 15:9, 10). Yehofa be sabi taki Pawlesi e meke fowtu. Ma toku a be lobi Pawlesi. A be wani Pawlesi fusutan a sani ya bun. Efu den sani di i be du e hati i tuutuu, neen i taigi Yehofa anga den owluman, i sa biibi taki Yehofa o gi i paadon.​—Yesaya 55:6, 7.

19. San na a tekisi fu 2018? Saide wi abi a taanga-sikin ya fanowdu?

¹⁹ Moo wi e doo a kaba fu a goontapu ya, moo tesi o miti u. Ma wi á mu feegete taki ’te wan sama weli, Yehofa e gi en kaakiti. Te wan sama ná abi kaakiti, ai meke a kon taanga’. A poi gi u san wi abi fanowdu fu dini en (Yesaya 40:29; Psalm 55:22; 68:19). Solanga u go aini wan Kownukondee zaal aini a yali 2018, a tekisi fu a yali o yeepi u fu fitoow Yehofa. A tekisi taki: „Den sama di e fitoow Yehofa, o fende kaakiti.”​—Yesaya 40:31.