1, 2. Saide a á makiliki gi a foluku fu Yehofa fu tyai denseefi bun? (Luku a fowtow na a bigin.)

A OMEN dataa e yeepi sama di abi siki di sa kisi taa sama makiliki. Den e booko den ede anga den sama ya neen meke den e wani yeepi den. Ma den mu luku bun fu a siki di den e deesi á kisi den. A so useefi e wooko efuso tan anga sama di abi manii di Yehofa á lobi. A sani ya á makiliki.

² Aini den lasiti dei ya, den sama di á lobi Gadu nai meke moiti fu libi enke fa Gadu wani. Di apostel Pawlesi sikiifi wan biifi gi Timotiyesi, a taki fu den takuu manii fu den sama ya. Pawlesi taki, moo a kaba fu a goontapu e koosube, moo sama o abi den manii ya. (Leisi 2 Timotiyesi 3:1-5, 13.) Winsi fa wi á lobi den manii ya, tokuso efu wi á luku bun, wi o denki, taki efuso tyai useefi enke den sama fu a goontapu (Odo 13:20). Aini a artikel ya, wi o si taki a foluku fu Gadu á de enke den  sama fu a goontapu ya. Wi o luku san u mu du fu wi á kon abi takuu manii te wi e yeepi sama fu kon sabi Yehofa.

3. San Pawlesi taki a 2 Timotiyesi 3:2-5?

³ Aini a biifi di Pawlesi sikiifi gi Timotiyesi a taki ’a libi be o taanga’ aini den lasiti dei. Baka dati a taki fu 19 takuu manii di den sama fu a ten ya be o abi. Pawlesi be kai son wan fu den manii ya a Romesama 1:29-31. Ma a kai wantu sani aini a biifi di a sikiifi gi Timotiyesi di á de aini den taa Giiki buku fu Beibel. A ná ala sama abi den takuu manii di Pawlesi kai aini den tekisi ya. Tuu Kelesten de taa fasi.​—Leisi Maleyaki 3:18.

4. On ten i be o taki wan sama abi heimembee?

⁴ Pawlesi taki sama o lobi denseefi pasa peesi. Den o lobi moni. Baka dati a taki sama o go e gafa, den o abi heimembee. Den sama di abi den manii ya e si enke den bun moo taawan fu di den moin, fu di den poi du son sani, fu di den abi son sani efuso fu di den abi balinen. Den wani sama gafa den. Wan ondoosukuman taki, wan sama di abi heimembee „abi wan pikin altari aini en ati pe ai sutu kini a doti dini enseefi”. Son sama taki heimembee takuu te neen sama di abi heimembee seefi nai wani si en a taawan.

5. Fa sama di be e dini Yehofa anga den hii ati be kon abi heimembee?

⁵ Yehofa buuse heimembee. A á lobi te sama e si enke den bun moo taawan (Odo 6:16, 17). Gadu nai mati anga sama di abi heimembee (Psalm 10:4). Heimembee a wan fu den manii fu Didibii (1 Timotiyesi 3:6). A tyali taki son sama di be e dini Yehofa anga den hii ati, be kon abi heimembee bakaten. Kownu Usiya fu Yuda a wan fu den sama ya. A omen yali a dini Yehofa anga en hii ati. Ma Beibel taki: „Di a fende moo makiti, neen a be kon abi bigifasi. Neen meke sani á waka bun gi en. A ná aliki en Gadu Yehofa.” Usiya go na a tempel neen a boon ofaandi, winsi fa a á be abi a leti fu du a sani ya. Kownu Heskiya seefi be kon abi heimembee, ma a kengi bakaten.​—2 Koloniki 26:16; 32:25, 26.

6. San be sa meke David fii enseefi? Ma san yeepi en fu a á kon abi heimembee?

⁶ Son sama e fii denseefi fu di den moin, fu di den abi balinen, fu di den sabi singi, fu di den taanga efuso fu di sama lobi den. David be abi ala den sani ya, toku a á be abi heimembee. Di David kii Goliyat, neen Kownu Saul taigi en taki a sa toow anga en umanpikin. Ma David piki en taki: „Mi mofina baa. Nda famii á pelensipali fu mi toow anga kownu umanpikin” (1 Samuweli 18:18). San yeepi David fu a á kon abi heimembee? A be sabi taki a di Yehofa abi sakafasi meke a poti pakisei neen. Neen meke a be man du son sani. A Yehofa be meke a be abi son faantiwowtu tu (Psalm 113:5-8). David be sabi taki a Yehofa be gi en ala den bun sani di a be abi.​—Luku 1 Korentesama 4:7 tu.

7. San o yeepi u fu soi taki wi abi sakafasi?

 ⁷ A foluku fu Yehofa e meke moiti fu abi sakafasi leti enke David. Ai bigi gi u fu sabi taki Yehofa, a Moo Gaan Gadu abi sakafasi (Psalm 18:35). Wi e meke moiti fu ’abi tyali-ati anga taawan, fu abi switifasi, sakafasi, safu-ati anga pasensi’. Wi e meke moiti fu „wei den fasi ya enke wan koosi a u sikin” (Kolosesama 3:12). U sabi taki lobi „nai meke bigi. A ná abi heimembee” (1 Korentesama 13:4). Te sama si taki wi abi sakafasi, kande denseefi o wani sabi Yehofa. Te wan man si fa en uman di e dini Yehofa e tyai enseefi, son leisi ai wani leli sabi Yehofa. A so sama o wani sabi Yehofa tu, te den si fa a foluku fi en abi sakafasi.​—1 Peitilisi 3:1.

8. (a) Fa son sama aini a ten ya e si a aliki di pikin nai aliki den mma anga dda? (b) San Beibel taki pikin mu du?

⁸ Pawlesi taki fa sama be o libi anga denseefi aini den lasiti dei. A sikiifi taki pikin á be o go e teke taki. Aini a ten ya, a omen buku, felon anga taa sani di den e pee a tv e meke sama denki taki a ná ogii te pikin nai aliki mma anga dda. Ma aini a osufamii wan pikin e leli fa a mu libi anga taawan. Neen meke te den nai aliki den mma anga den dda, den ná o poi libi bun anga taa sama. A senten libisama sabi a sani ya. Fosi, te wan man be naki en dda efuso en mma aini Giikikondee, a be o lasi ala den leti di wan Giikisama be abi. A weiti fu den Romesama be e soi taki, te wan sama naki en dda efuso en mma, da na aseefi enke te wan sama be kii wan taawan. Boiti dati den Hebrew buku fu Beibel anga den Giiki buku fu Beibel, e soi taki pikin mu lesipeki den mma anga den dda.​—Ekisodesi 20:12; Efeisesama 6:1-3.

9. San o yeepi wan pikin fu aliki en mma anga en dda?

⁹ San o yeepi wan pikin fu aliki en mma anga en dda, winsi den pikin di de na a pisi pe ai tan nai aliki den mma anga den dda? A mu teke ten pakisei san en mma anga en dda du gi en. A sani ya o yeepi en fu teke san den du gi en fu bigi. A sani ya o meke a wani aliki den tu. Yonkuuwan mu fusutan tu taki Gadu wani den aliki den mma anga den dda. Te wan pikin e taigi taawan den bun manii fi en mma anga en dda, den mati fi en o lesipeki den mma anga den dda tu. Efu wan mma anga wan dda á lobi a pikin fu den, a o taanga gi a pikin fu lesipeki den. Ma te a pikin e si taki en mma anga en dda lobi en, a sani ya e yeepi a pikin fu aliki den winsi a á makiliki. Wan yonkuu baala den e kai Austin taki:  „Son leisi mi be e wani du son sani di mi sabi taki mi á mu du, ma mma anga nda be e taki anga mi. Den be e soi mi saide den á wani mi du son sani. Den be e gi mi a okasi fu taki fa mi e denki tu. A sani ya yeepi mi fu lesipeki den. Mi be e si taki den lobi mi, neen meke mi be wani du sani di o meke den fii bun.”

10, 11. (a) San e soi taki sama á lobi taawan? (b) Fa tuutuu Kelesten lobi taawan?

¹⁰ Pawlesi taki fu wan taa manii di sama be o abi di e soi taki den á lobi taawan. Baka di a taki pikin á be o go e „teke taki”, a taki sama á be o sabi kiyoo. San Pawlesi taki a tuu, bika sama di á sabi kiyoo nai teke den sani di taawan e du gi den fu bigi. Pawlesi taki sama be o gwe fika taawan. Den á be o wani meke kuudei. A sani ya wani taki, sama á be o go e wani meke en bun anga taawan. Den o go e taki sani fu saanti taawan. Den o go e kosi Gadu tu. Den o go e konkuu. Den o go e lei gi taawan fu poli den nen. *​—Luku a maiki a ondoo.

¹¹ A foluku fu Yehofa á de enke somen sama, bika den lobi taawan. A so den de senten. Yesesi taki enke fa a Weiti fu Mosesi e soi, da na a lobi di u mu lobi Gadu na a wan enkii weiti di pelensipali moo a lobi di u mu lobi taawan (Mateyesi 22:38, 39). Boiti dati, Yesesi taki tuutuu Kelesten be o lobi denseefi. A so sama be o sabi den. (Leisi Yohanisi 13:34, 35.) Tuutuu Kelesten be o lobi den feyanti tu.​—Mateyesi 5:43, 44.

12. Fa Yesesi soi taki a lobi sama?

¹² Yesesi soi taki a lobi sama tuutuu. Wan fasi fa a du a sani ya, a di a go a omen foto fu paati a bun nyunsu fu Gadu Kownukondee gi sama. Boiti dati, a deesi sama di be beendi, sama di be lan, sama di be abi kokobe anga sama di be dofu. A weki dedesama tu (Lukasi 7:22). Yesesi dede gi libisama, winsi fa omen sama be buuse en. Yesesi lobi sama tuutuu, leti enke en Dda. Yehofa Kotoigi a hii goontapu e waka a Yesesi baka. Denseefi lobi taawan.

13. Fa a lobi di wi e soi taawan sa yeepi den fu wani sabi Yehofa?

¹³ Efu wi e soi sama taki u lobi den, den o wani leli sabi u Dda di de a hemel. Di wan man aini Tailand go a wan konkelesi, a foondoo di a si fa baala anga sisa lobi denseefi. Di a go a osu, a akisi Yehofa Kotoigi fu den sutudeli Beibel anga en tu leisi aini wan wiki. Baka sigisi mun, neen a man ya bigin holi lezing. Yu e soi taawan taki i lobi den? Akisi iseefi taki: ’Mi e du ala san mi man fu yeepi mi osufamii, den baala anga sisa aini a kemeente anga den sama di mi e miti aini a peleikiwooko? Mi e meke moiti fu si taawan enke fa Yehofa e si den?’

14, 15. Sowtu manii son sama abi aini a ten ya? Fa son sama kengi den manii?

¹⁴ Aini den lasiti dei ya, sama abi wantu taa takuu manii di u mu meke  moiti fu u ná abi. A omen sama á lobi bun sani. Son wan fu den á wani si bun sani seefiseefi. Den sama ya nai dwengi denseefi. Den abi takuu boon ati. Son wan fu den abi taangayesi. Den nai denki fosi den du wan sani. Den nai booko den ede anga taawan te den e du sani.

¹⁵ A omen sama di be abi takuu boon ati, kengi den manii. A sikiifi aini Beibel taki a sani ya be o pasa. (Leisi Yesaya 11:6, 7.) Wi e leisi aini a Beibel buku Yesaya taki busidagu anga lew e de makandaa anga pikin sikapu anga pikin kaw sondee fu du sani anga den. Fa a waka den ogii meti ya nai du ogii anga den taa meti? Beibel taki a fu di „a leli fu Yehofa o fuu goontapu enke fa a se fuu anga wataa” (Yesaya 11:9). Na a fasi fa sama be o kengi den manii a tekisi ya e taki, bika meti á poi leli sabi Yehofa.

16. Fa Beibel yeepi sama fu kengi a fasi fa den be e libi?

¹⁶ Son wan fu den baala anga sisa fu u be abi takuu boon ati fosi den kon dini Yehofa. Ma nownow den abi bun manii. I sa leisi wantu fu den ondoofenitoli fu den aini den artikel di den e kai „Bijbel e kenki sma libi” di e de a jw.org/srn. Son sama e taki den e dini Gadu, ma den libi e soi taki den nai dini en. A du den sama ya e du enke den e dini Gadu, ma a fasi fa den  e libi e soi taki den nai dini en. Den sama di kon sabi Yehofa, á de enke den sama ya. Fosi, son sama á be e tyai denseefi bun, ma di den bigin dini Yehofa, den ’kengi den manii, fu den sa de enke fa Gadu wani. Dati wani taki fu de bun-ati sama di e du san Gadu taki ala yuu’ (Efeisesama 4:23, 24). Te sama e leli sabi Gadu, den e kon si taki den mu libi enke fa a wani. A sani ya e yeepi den fu den á biibi son sani moo. Ai yeepi den tu fu kengi a fasi fa den be e denki anga a fasi fa den be e tyai denseefi. A á makiliki fu du den sani ya, ma a santa yeye e yeepi ala den sama di wani dini Yehofa.

17. San o yeepi u fu wi á kon abi den manii fu den sama fu a goontapu ya?

¹⁷ Nownow a moo makiliki fu sabi sama e dini Gadu anga sama nai dini en. U mu luku bun fu wi á kon abi den manii fu den sama di nai dini Gadu. U mu du san Yehofa taki. A taki wi á mu paa anga den sama di abi den manii di sikiifi a 2 Timotiyesi 3:2-5. Son leisi wi e de makandaa anga den sama ya a pe wi e wooko efuso a sikoo. Son wan fu wi e tan anga den aini a wan osu. Ma toku u poi tyai useefi bun. San o yeepi u? U mu meke moiti fu wi anga Yehofa toon mati. Boiti dati u mu suku mati di lobi Yehofa tu.

18. Fa den sani di wi e taki anga den sani di wi e du, e yeepi sama fu kon sabi Yehofa?

¹⁸ U wani yeepi taawan fu den anga Yehofa toon mati tu. Suku okasi fu peleiki gi sama. Begi Yehofa fu sabi san i mu taki te i fende wan okasi fu peleiki. U mu meke sama sabi taki wi a Yehofa Kotoigi. Da den o gafa Yehofa te den si fa wi e tyai useefi, a ná wi den o gafa. Yehofa e leli u taki u mu „koti pasi gi ogii anga den takuu fii di den sama fu a goontapu abi. Ai leli u tu fu wooko anga bunbun fusutan, fu libi anga wan kiin ati, anga fu dini Gadu anga u hii ati aini a ten ya” (Titesi 2:11-14). Efu wi e waka a Yehofa baka, efu wi e du san a wani u du, sama o si a sani ya. Kande son wan o taki: „U wani go anga u, bika u yee taki Gadu de anga u.”​—Sakaliya 8:23.