1-2. (a) San Yehofa e si te miliyunmiliyun sama kon makandaa fu membee a dede fu Yesesi? (Luku a fowtow a fesise fu a Wakititolen.) (b) San wi o luku aini a artikel ya?

PAKISEI san Yehofa e si te miliyunmiliyun sama kon makandaa a hii goontapu fu membee a dede fu Yesesi. A ná a gaan kulu wawan ai luku, ai poti pakisei na ala den sama di kon ape. Ai si den sama di e meke moiti fu de ape ala yali. Kande son sama meke moiti kon winsi fa a á be makiliki gi en. Son wan fu den nai kon a komakandaa ala yuu, ma den e si a Membeefesa enke wan pelensipali sani di den á mu misi. Boiti dati Yehofa e si den sama di kon a fosi leisi, fu di den wani si fa sani o waka.

² Yehofa e piisii te a si fa omen sama e kon na a Membeefesa (Luk. 22:19). Ma a ná dati na a moo pelensipali sani gi en. A moo pelensipali sani gi Yehofa, a saide den sama kon ape. Wi o luku wan pelensipali akisi aini a artikel ya: Saide wi e go ala wiki a den komakandaa di Yehofa sete gi den sama di lobi en, boiti a Membeefesa di wi e go wan leisi aini a yali?

3-4. (a) Saide wi e go a komakandaa? (b) San a go di wi e go a den komakandaa e soi? (c) Te u luku san 1 Korentesama 11:23-26 taki, da saide wi á mu misi a Membeefesa?

³ A moo pelensipali sani saide wi e go a komakandaa, a fu di den komakandaa a wan fasi fa wi e dini Yehofa.  Wi e go a komakandaa tu fu di Yehofa e leli u te u de ape. Sama di abi heimembee e si enke nawan sama á poi leli den (3 Yoh. 9). Ma wi á de so, u wani Yehofa anga a olikanisâsi fi en leli u.​—Yes. 30:20; Yoh. 6:45.

⁴ Te wi e go a komakandaa wi e soi taki wi abi sakafasi. U de kabakaba fu teke leli. A ná di wi e si a Membeefesa enke wan pelensipali sani namo meke wi e go neen, ma wi e go tu fu di u wani du san Yesesi taigi wi. A taki: „U mu e du a sani ya naamo fu e membee mi.” (Leisi 1 Korentesama 11:23-26.) A Membeefesa e yeepi u fu biibi den sani di Yehofa paamisi u. Ai yeepi u tu fu fusutan fa Yehofa lobi u. Yehofa sabi taki wi abi taanga-sikin fanowdu moo enke wan leisi aini a yali. Neen meke a sete den komakandaa gi wi ala wiki. A á wani u misi den komakandaa ya. Sakafasi e yeepi u fu aliki Gadu. Ala wiki wi e teke ten seeka gi den komakandaa. Boiti dati u nai misi den.

5. Saide den sama di abi sakafasi e kon te Yehofa kai den fu kon teke leli?

⁵ A omen sama di abi sakafasi e kon te Yehofa kai den fu kon teke leli neen (Yes. 50:4). Te den kon na a Membeefesa den e piisii, da den e bigin kon a den komakandaa di wi e holi ala wiki (Sak. 8:20-23). Wi anga den nyun sama di e kon e piisii fu teke leli a Yehofa, ’a sama di e yeepi u’ (Ps. 40:17). Sani á de di bun enke te u kon makandaa fu Yehofa anga Yesesi, a Manpikin fi en leli u.​—Mat. 17:5; 18:20; 28:20.

6. Fa sakafasi be yeepi wan man fu go na a Membeefesa?

⁶ Ala yali wi e meke moiti fu kai ala sama di u man fu kon membee a dede fu Yesesi. A omen sama fende wini di den kon. Kon u luku wan toli fu wan man. Wantu yali pasa, wan baala be kai wan man fu kon na a Membeefesa, ma a man be taigi a baala taki a ná o poi kon. A neti fu a Membeefesa a baala foondoo di a si a man aini a Kownukondee zaal. Di a man ya kon na a Membeefesa, a foondoo fu a fasi fa den baala anga sisa libi anga en. A sani ya meke a bigin go a den komakandaa di wi e holi ala wiki. Saide a du a sani ya? A di a be abi sakafasi meke a kengi a fasi fa a be e denki. Bakaten a baala di be kai a man ya kon na a Membeefesa taki: „A man ya abi sakafasi.” U sabi taki a Yehofa kai a man ya fu kon dini en. Nownow a wan dopu baala.​—2 Sam. 22:28; Yoh. 6:44.

7. Fa den sani di wi e leli a komakandaa anga den sani di wi e leisi aini Beibel e yeepi u fu abi sakafasi?

⁷ Den sani di wi e leli a komakandaa anga den sani di wi e leisi aini Beibel sa yeepi u fu abi sakafasi. Den komakandaa di e holi te a Membeefesa koosube, e leli u fa u sa waka a Yesesi baka. Boiti dati wi e si fa a sakafasi di Yesesi be abi yeepi en fu kon dede gi u. Den sani di wi e leli a komakandaa anga den sani di wi e leisi aini Beibel den dei fosi a Membeefesa, e yeepi u fu teke a sani di Yesesi du gi u fu bigi. Den e gi u taanga-sikin fu meke moiti fu abi sakafasi enke Yesesi. Boiti dati den e yeepi u fu libi enke fa Yehofa wani, winsi a á makiliki.​—Luk. 22:41, 42.

8. Fa Yesesi soi taki a abi deki-ati?

⁸ Wi e meke moiti fu abi deki-ati enke Yesesi. Pakisei fa a be soi taki a abi deki-ati den dei fosi a dede. A be sabi taki den feyanti fi en be o soso en. A be sabi taki den be o fon en. A be sabi taki den o kii en tu (Mat. 20:17-19). Tokuso a be de kabakaba fu dede gi u. Di a yuu doo, a taigi den apostel fi en di be de anga en a Getsemanei taki: „Opo meke u gwe. Luku! A sama di o konkuu mi doo kaba” (Mat. 26:36, 46). Di den sama di be de anga fetisani be kon kisi en, a go a den neen a taigi den taki neen a Yesesi. A taigi den suudati taki den á mu kisi den apostel fi en (Yoh. 18:3-8). Ná pikin deki-ati Yesesi be abi! Den salufu Kelesten anga den taa sikapu e meke moiti fu abi deki-ati enke Yesesi tu. Fa den e du a sani ya?

9. (a) Saide u mu abi deki-ati fu man go a komakandaa ala yuu? (b) Sowtu wini den baala anga sisa di de a sitaafu-osu e fende te wi e holidoo?

⁹ U mu abi deki-ati fu man go a komakandaa ala yuu, moomoo te wi abi polobelema. Son baala anga sisa nai misi komakandaa winsi fa tyali sani e miti den, winsi den e fii booko-saka efuso siki. Taawan e go a komakandaa winsi fa famii anga lanti e tapu den. Pakisei fa a moiti di wi e meke e gi den baala anga sisa fu u di de a sitaafu-osu taanga-sikin (Heb. 13:3). Te den e yee taki wi e tan dini Yehofa winsi san e miti u, ai taanga den biibi. Den e moo abi deki-ati. Boiti dati den nai gwe fika Yehofa. A sani ya be yeepi apostel Pawlesi. Di a be de a sitaafu-osu a Rome, a be e piisii te a be yee taki den baala anga sisa e holidoo (Filip. 1:3-5, 12-14). Kande a di Pawlesi de fu komoto a sitaafu-osu efuso faisi a komoto a sitaafu-osu, a sikiifi a biifi gi den Hebrew Kelesten. A gi den taanga-sikin fu ’lobi denseefi enke fa baala lobi denseefi’. A taigi den tu taki den á mu e misi komakandaa.​—Heb. 10:24, 25; 13:1.

10-11. (a) Sama u mu kai kon na a Membeefesa? (b) Fa Efeisesama 1:7 e gi u taanga-sikin fu du a sani ya?

¹⁰ Wi e soi taki wi abi deki-ati te wi e kai famii, sama a wookope anga den sama na a pisi pe wi e tan fu kon na a Membeefesa. Saide wi e kai den sama ya? A sani di Yehofa anga Yesesi du gi wi e bigi gi u, neen meke u wani kai ala sama kon na a Membeefesa. U wani den sabi sowtu wini den o fende fu a ’bun-ati di Yehofa soi u’ di a sende en Manpikin kon dede gi u.​—Leisi Efeisesama 1:7; Openb. 22:17.

¹¹ Te wi e go a komakandaa, wi e soi taki wi abi deki-ati. Wi e soi tu taki wi  abi wan taa moin fasi di Gadu anga en Manpikin abi.

12. (a) Fa den komakandaa e yeepi u fu moo lobi Yehofa anga Yesesi? (b) Fa 2 Korentesama 5:14, 15 e gi u taanga-sikin fu waka a Yesesi baka?

¹² U lobi Yehofa anga Yesesi, neen meke wi e go a den komakandaa. Den sani di wi e leli a komakandaa e meke u moo lobi Yehofa anga Yesesi. Den komakandaa e yeepi u fu membee den sani di den du gi u (Rom. 5:8). A Membeefesa e membee u taki Yehofa anga Yesesi lobi libisama tuutuu. Den lobi den sama tu di nai kaba si a wini fu a dede fu Yesesi. A di a sani ya e bigi gi u meke wi e meke moiti fu waka a Yesesi baka ala dei. (Leisi 2 Korentesama 5:14, 15.) U wani gafa Yehofa fu a paiman di a pai gi u. Wan fasi fa u sa du a sani ya, a te wi e gi bun piki a den komakandaa.

13. Fa u sa soi taki u lobi Yehofa anga en Manpikin tuutuu?

¹³ U sa soi taki u lobi Yehofa anga en Manpikin te u de kabakaba fu du ala san u man gi den. Son leisi u mu fika son sani di u lobi fu u sa go a den komakandaa. Gaanse baala anga sisa e go weliweli a komakandaa, bika a wooko den e komoto go a komakandaa. Son komakandaa e holi sataa efu sonde na a yuu di son sama e boo. Yehofa e si taki a weliweli wi e go a komakandaa son leisi? Eeye, ai si! O moo wi e meke moiti fu soi Yehofa taki u lobi en, moo Yehofa e teke den sani di wi e du gi en fu bigi.​—Malik. 12:41-44.

14. Fa Yesesi soi taki a lobi taawan anga en hii ati?

¹⁴ Yesesi soi u kiin taki te wi e soi lobi, wi á mu denki useefi namo. A be de kabakaba fu dede gi den disipel fi en. Ala yuu a be e du sani di e soi taki a be e holi den a pakisei. Winsi a be weli efuso abi booko-ede, tokuso a be e de makandaa anga den bakaman fi en (Luk. 22:39-46). A be e meke moiti fu du bun gi taawan. A á be de namonamo taki taawan mu du bun gi en (Mat. 20:28). Efu u lobi Yehofa anga den baala anga  sisa fu wi enke fa Yesesi lobi den, wi o meke moiti fu go na a Membeefesa anga den taa komakandaa di e holi ala wiki.

15. Sama u wani yeepi tuutuu?

¹⁵ A wi abi a gaandi fu de aini a tuu Kelesten biibi. Wi e du ala san u poi fu kai taawan fu kon dini Yehofa makandaa anga u. U wani yeepi „den sama di wi anga den de na aseefi biibi”, ma di nai peleiki efuso go a komakandaa moo (Gal. 6:10). Wi e soi taki u lobi den te wi e gi den taanga-sikin fu kon a den komakandaa, moomoo a Membeefesa. Leti enke fa Yehofa anga Yesesi e poolo te wan sama di be saka gwe daai kon baka, a so useefi e poolo tu.​—Mat. 18:14.

16. (a) Fa u sa gi useefi taanga-sikin? Fa den komakandaa e yeepi u? (b) Saide nownow a wan bun ten fu pakisei san Yesesi taki a Yohanisi 3:16?

¹⁶ Meke moiti aini den wiki di e kon fu kai ala den sama di i man, fu kon na a Membeefesa di o holi feeda neti 19 april 2019 (Luku a faki „ Yu o kai sama?”) Meke u meke moiti aini a ten di e kon fu gi useefi taanga-sikin fu go a den komakandaa di Yehofa e seeka gi u. A kaba fu a goontapu koosube, neen meke wi abi den komakandaa fanowdu fu yeepi u fu abi sakafasi, fu abi deki-ati anga fu soi lobi (1 Tesalonikasama. 5:8-11). Meke u soi Yehofa anga en Manpikin taki u lobi den anga u hii ati!​—Leisi Yohanisi 3:16.