1-2. (a) Fa den sani di sikiifi a Yesaya 41:10 yeepi wan sisa den e kai Yoshiko? (b) Sama sa fende wini fu den sani di sikiifi a Yesaya 41:10?

WAN sisa di den e kai Yoshiko yee wan takuu nyunsu. A dataa fi en taigi en taki baka wantu mun a o dede. San a du di a yee a sani ya? Yoshiko membee wan tekisi di a lobi, Yesaya 41:10. (Leisi.) A taigi a dataa taki a nai feele bika Yehofa holi en neen ana. * Den sani di sikiifi aini a tekisi yeepi a sisa fu fitoow Yehofa anga en hii ati. A tekisi ya sa yeepi u tu fu wi á buuya te gaan sani miti u. Wi o luku saide Yehofa be meke Yesaya taki den sani di sikiifi aini a tekisi ya. A sani ya o yeepi u fu fusutan fa a sa gi u taanga-sikin.

² Yehofa be meke Yesaya sikiifi a tekisi ya fu toosutu den Dyu di den be o tyai go a katibo a Babilon. A ná gi den Islayelisama namo Yehofa be meke Yesaya sikiifi a tekisi ya, ma a meke a sikiifi en gi den sama di be o dini en bakaten tu (Yes. 40:8; Rom. 15:4). A ’libi taanga’ fu di wi e libi aini den lasiti dei, neen meke wi abi den sani di sikiifi aini a buku Yesaya taanga fanowdu fu fende taanga-sikin.​—2 Tim. 3:1.

3. (a) San Yehofa paamisi wi a Yesaya 41:10, a tekisi fu 2019? (b) Saide wi abi a taanga-sikin ya fanowdu?

³ Aini a artikel ya wi o luku dii sani di Yehofa paamisi wi aini Yesaya 41:10 di o gi u taanga-sikin: (1) Yehofa o de anga u, (2) neen a wi Gadu, anga (3) a o yeepi u. Den  sani di Yehofa paamisi * u ya e gi u taanga-sikin. Wi abi taanga-sikin fanowdu bika tesi e miti u leti enke Yoshiko. A omen sani e pasa aini a goontapu di e gi u booko-ede. Tiiman di abi makiti e du ogii anga son wan fu u fu di wi e dini Yehofa. Meke u luku den dii sani ya baka makandaa.

4. (a) San na a fosi sani di Yehofa paamisi wi a Yesaya 41:10? (Luku a maiki tu.) (b) Fa Yehofa e soi taki a lobi u? (c) Fa yu e fii te i pakisei san Gadu taki?

⁴ A fosi sani, Yehofa paamisi u taki: „Ná feele, bika mi de anga i.” * Yehofa e soi u taki a de anga u fu di ai poti pakisei a wi. Ai soi u tu taki a lobi u. Luku fa a soi u taki a lobi u. Yehofa taki: „Mi e si wi enke gudu, neen meke mi e lesipeki u. Mi lobi u tu” (Yes. 43:4). Nawan sani á de a hemel anga goontapu di sa meke Yehofa buuse den sama di e dini en. A lobi wi anga en hii ati (Yes. 54:10). A de di wi anga en de mati anga a sabi di u sabi taki a lobi u, e gi u taanga-sikin. A o kibii wi aini a ten ya, leti enke fa a be e kibii en mati Abalam (Abalaham). Yehofa be taigi en taki: „Ná feele, Abalam. A mi o kibii yu.”​—Gen. 15:1.

5-6. (a) Fa u du sabi taki Yehofa e booko en ede anga u te tesi e miti u? (b) San u sa leli fu a ondoofenitoli fu Yoshiko?

⁵ U sabi taki Yehofa wani yeepi wi anga den booko-ede fu u bika a paamisi u taki: „Efu u mu pasa aini wataa mi o de anga u. Efu u mu pasa aini liba mi o yeepi u fu wi á sungu. Efu u mu pasa aini faya, u ná o boon. Eeye, nawan faya o boon wi” (Yes. 43:2). San den wowtu ya wani taki?

⁶ Yehofa á paamisi u taki a o puu ala den sani di e meke a libi taanga gi u. Ma a paamisi u taki a ná o fika u fu den booko-ede di e kon a u tapu enke „liba” sungu wi. A ná o meke den tesi di e kon a u tapu enke „faya” meke u kaba a soso.  A paamisi u taki a o de anga u, a o yeepi u fu „pasa” den tesi di e miti u. Fa Yehofa o du a sani ya? A o yeepi u fu wi á feele te da u gwe fika en te tesi e miti u. A o yeepi u fu holidoo winsi u mu dede seefi (Yes. 41:13). Yoshiko di u be taki fi en na a bigin si taki a sani ya a tuu. A meisyo fi en taki: „Mma gi u deki-ati tuutuu. A á be e buuya. U si tuutuu taki a Yehofa yeepi en fu a á buuya. A peleiki gi den sesite anga den taa siki sama te enke a dei di a dede. A leli den sama a Yehofa anga san a paamisi u.” San a toli fu Yoshiko e leli u? Efu wi e biibi taki Gadu o ’de anga u’ enke fa a paamisi, wi o abi deki-ati tu te tesi e miti u.

7-8. (a) San na du fu tu sani di Yehofa paamisi wi a Yesaya 41:10? San a sani ya wani taki? (b) Saide Yehofa be taigi den Dyu di be de a katibo taki: „Ná booko yu ede”? (c) Sowtu sani di sikiifi a Yesaya 46:3, 4 be musu gi den Dyu taanga-sikin?

⁷ Yehofa paamisi wi ete wan sani a Yesaya 41:10. A taki: „Ná booko yu ede, bika a mi a yu Gadu.” San a sani ya e leli u fu booko-ede? Aini a tekisi ya den wowtu „booko-ede”, e soi go a ’wan sama di e daai luku en baka naamo fu di ai si enke wan sani o du en efuso fu di ai si enke wan sama o du ogii anga en’. Ai soi go a wan sama tu di e pantan ala yuu fu di ai feele enke sani o miti en.

⁸ Saide Yehofa be taigi den Dyu di be o go a katibo a Babilon taki den á mu „booko den ede”? A fu di a be sabi taki wan ten be o doo di den sama fu a kondee Babilon be o feele. Saide? Di den Dyu be o de 70 yali a katibo, den suudati fu Mediya anga Persiya be o kon feti anga Babilon. Yehofa be o meke den puu a foluku fi en a katibo a Babilon (Yes. 41:2-4). Di den sama fu Babilon anga den taa foluku di be de lontu den fusutan taki den feyanti ya be e kon feti anga den, den puubei fu gi denseefi taanga-sikin. Den be e taigi denseefi taki: „Abi deki-ati”. Den meke moo falisi gadu tu, fu di den be denki taki den gadu ya be o kibii den (Yes. 41:5-7). Yehofa be toosutu a foluku fi en di be de a katibo. A taigi den taki: „Islayeli, [yu á de enke den taa foluku] yu a mi futuboi. . . Ná booko yu ede, bika a mi a yu Gadu” (Yes. 41:8-10). Di Yehofa taki „a mi a yu Gadu”, a taanga-sikin a be e gi a foluku fi en taki a á feegete den. A be de a Gadu fu den ete, den a be en foluku tu. A taigi den taki: „Mi o tyai yu . . . Mi o kibii yu.” Den wowtu ya be musu gi den Dyu di be de a katibo taanga-sikin.​—Leisi Yesaya 46:3, 4.

9-10. Saide u ná abi fu feele? Gi wan ageisitoli.

⁹ Aini a ten ya sama e booko den ede fu di a goontapu e kon moo ogii. Useefi abi polobelema, ma u ná abi fu feele. Yehofa e taigi u taki: „A mi a yu Gadu.” Saide a sani ya e yeepi u fu wi á booko wi ede efuso buuya?

¹⁰ Pakisei a sani ya: Tu man, Jim anga Ben de aini wan opalani na a ten di wan gaan winta e wai. A winta taanga te a opalani e go a tapu, e kon a ondoo. A pilowtu taigi ala sama taki: „U banti, bika wi o fee pasa wan muliki pisi.” Jim buuya. Ma a pilowtu taki: „Wi á mu feele. A mi na a pilowtu, a miseefi e taki anga u ya.” A ten de Jim e seke en ede fu di a nai kaba fitoow a pilowtu, neen a taki:  „San a man ya e taki seefi?” Ma di a daai luku Ben, a si taki Ben nai feele seefiseefi. Jim akisi Ben taki: „Fa a waka i nai feele?” Ben lafu neen a taki: „Mi sabi a pilowtu ya bun. A nda!” Ben taki tu: „Meke mi taigi i. Efi i sabi nda anga fa a sabi fee opalani, iseefi ná o feele.”

11. San u sa leli fu a ageisitoli fu den tu man aini a opalani?

¹¹ San a ageisitoli ya e leli u? Leti enke Ben, u nai feele fu di u sabi u Dda Yehofa bun. U sabi taki a o yeepi u fu pasa ala den polobelema di e miti wi aini a ten ya, di de enke gaan winta (Yes. 35:4). Wi e fitoow Yehofa neen meke u nai buuya enke fa den sama fu a goontapu e buuya te den si den ogii di e pasa (Yes. 30:15). Leti enke Ben, wi e soi den biiti sama fu u saide den sa fitoow Gadu. A so wi e yeepi den fu denseefi biibi taki winsi san e miti den, Yehofa o holibaka gi den.

12. (a) San na du fu dii sani di Yehofa paamisi wi a Yesaya 41:10? (b) San a sani di Yesaya taki fu Yehofa „ana” e meke u pakisei?

¹² A polofeiti Yesaya be taki fu a du fu dii sani di Yehofa paamisi u. A taki: „Mi o meke yu abi deki-ati, mi o yeepi i.” Yesaya be taki kaba fa Yehofa o gi a foluku fi en deki-ati. A be taki: „Yehofa seefi o kon enke wan taanga fetiman. En ana o tii a kondee” (Yes. 40:10). Te Beibel kai a wowtu ana, son leisi a wani taki kaakiti. Neen meke di Yesaya taki Yehofa „ana o tii”, a fu membee u taki Yehofa a wan taanga Kownu. Aini a ten di pasa a koboloiki a gaan kaakiti fi en fu yeepi a foluku fi en. Te anga now ai gi den sama di e fitoow en taanga-sikin. Ai kibii den tu.​—Deit. 1:30, 31; Yes. 43:10.

13. (a) On ten Yehofa e du san a paamisi u? (b) Sowtu sani di Yehofa paamisi wi e gi u taanga-sikin?

 ¹³ Yehofa o du san a paamisi, moomoo te feyanti e du ogii anga wi. A taki: „Mi o meke yu abi deki-ati.” Aini son kondee den feyanti fu wi e meke moiti fu tapu u fu peleiki. Den e meke moiti fu tapu a olikanisâsi tu. Ma toku u nai buuya te den sani ya e miti u. Yehofa paamisi u taki a o yeepi u fu abi deki-ati. A paamisi u taki: „Winsi sowtu sani sama meke fu feti anga yu, a ná o abi wini” (Yes. 54:17). Den wowtu ya e meke u pakisei dii pelensipali sani.

14. Saide wi á mu foondoo taki den feyanti fu Gadu e du ogii anga u?

¹⁴ A fosi sani, enke bakaman fu Kelestesi u sabi taki sama o buuse u (Mat.10:22). Yesesi be taki a omen tesi be o miti den bakaman fi en aini den lasiti dei (Mat. 24:9; Yoh. 15:20). Du fu tu, a polofeititoli fu Yesaya e soi taki a ná buuse namo feyanti be o buuse u, ma den be o meke sani fu feti anga u tu. Wan fu den sani ya na a lei di den e lei gi u. Boiti dati den e du ogii anga u tu (Mat. 5:11). Yehofa ná o tapu den feyanti fu u fu den á meke sani fu feti anga u (Efe. 6:12; Opb. 12:17). Ma u ná abi fu feele den. Saide?

15-16. (a) San a du fu dii sani di wi á mu feegete? Fa Yesaya 25:4, 5 e holibaka gi a toli ya? (b) San Yesaya 41:11 taki o pasa anga den sama di e feti anga u?

¹⁵ Meke u luku du fu dii sani di wi á mu feegete. Yehofa taki „winsi sowtu sani” den meke fu feti anga u, den „ná o abi wini”. Leti enke fa wan osu e kibii wi te wan gaan sibibusi alen e kai, a so Yehofa e kibii u gi den tesi di de enke „sibi busi”. (Leisi Yesaya 25:4, 5.) Den feyanti fu u ná o poi du ogii anga u fu teego.​—Yes. 65:17.

 ¹⁶ Yehofa e taanga u biibi tu, fu di ai meke u sabi finifini san a o du anga ala den sama di ’ati e boon a wi’. (Leisi Yesaya 41:11, 12.) Winsi sowtu moiti den feyanti fu wi e meke fu du ogii anga u, winsi on hebi a feti de, a bakapisi o de aseefi: Den feyanti fu Gadu „ná o de moo, den o dede”.

17-18. (a) Fa a leisi di wi e leisi Beibel e yeepi u fu moo fitoow Gadu? (b) Sowtu wini wi o fende te wi e teke ten pakisei a tekisi fu 2019?

¹⁷ A sani di o yeepi u fu moo fitoow Yehofa, a te wi e meke moiti fu sabi en moo bun. A wan kodo fasi fa u sa du a sani ya, a te wi e leisi Beibel, da wi e teke ten pakisei san u leisi. Aini Beibel u sa leisi toli fu sama di Yehofa yeepi aini a ten di pasa. Den toli ya e yeepi u fu biibi taki a o yeepi wi aini a ten ya tu.

¹⁸ Yesaya koboloiki moin wowtu fu soi fa Yehofa e kibii wi. A taki Yehofa de enke wan sikapuman, a foluku fi en de enke sikapu. Neen a sikiifi fu Yehofa taki: „Anga en ana a o tyai den pikin sikapu kon a wan. A o poti den neen boofu-ati te ai tyai den” (Yes. 40:11). Te wi leisi taki Yehofa e tyai wi neen ana, wi e fii bun, u nai feele moo. U nai buuya tu. A saafu di u sa fitoow poti Yesaya 41:10 enke a tekisi fu 2019. A tekisi ya o yeepi u fu wi á buuya te tesi e miti u. Ape sikiifi taki: „Ná booko yu ede, bika a mi a yu Gadu.” Teke ten pakisei den wowtu ya. Den o gi i taanga-sikin winsi san miti yu aini a ten di e kon.