A diidewooko 24 yanuari 2018, a Betelfamii fu Ameekankondee anga Kanada be piisii fu yee wan bun nyunsu: Baala Kenneth Cook toon wan fu den baala di e tii a wooko fu Yehofa Kotoigi a hii goontapu.

Baala Cook meke a Pennsylvania, wan foto na Ameekankondee. Na ape a kiya tu. A wan boi di en anga en be e sidon aini a seefi kalasi a hei sikoo yeepi en fu kon sabi a waaleiti. A dopu a 7 yuni 1980. A go aini a fuuten diniwooko 1 september 1982. Na a yali ya a bigin anga a kowownu pioniliwooko. Di a pionili 2 yali, neen den kai en fu go wooko a Betel. A bigin wooko na a beikantoo fu Wallkill, New York, a 12 oktober 1984.

Baala Cook wooko 25 yali langa a pe den e meke buku. A yeepi du taa wooko tu. A toow anga Jamie aini 1996. Jamie seefi go wooko na a beikantoo a Wallkill. Aini december 2009, den sende Baala Cook anga en uman go a Patterson New York pe a Gileyad sikoo e holi. Baala Cook be e wooko na a kantoo di e piki den akisi di sama e poti di abi fu du anga den leli fu Beibel. Aini april 2016 Baala Cook anga en uman go a Wallkill ma den á tan langa. Baka dati den go a Brooklyn, New York. Baka feifi mun den foloisi go na a ede kantoo di de a Warwick, New York. Aini yanuari 2017 neen Baala Cook fende a gaandi fu wooko na a Sikiifi Komte fu den baala di e tii a wooko.